Mefaʼ Meziŋ-ntō 19 - Eka Eswhī

Pɔ́ɔl a á gʉɔ tɛ ŋkó á tésɔŋ Efɛze

¹ Apolos a ge egɔ́ á Kɔlɛŋte, Pɔ́ɔl á zíʼ mekwɛ̄t apak ŋgɔŋ Azíi, ŋgʉ̄ɔ mé Efɛze. Ŋ́kó éwú, ńjʉ́ɔ emɔ̄ʼ ntaʼné epuɔ Yɛɛ́so.

² Ńzɛ́tte á wɔ́p ŋ́gɛ: «Pɛ le fɛ́ nnɛ̄t ŋgyá á mbū Yɛɛ́so péʼe, Ndém á néŋ Azwakne zí ánɛ pɛ ɛ?» Pɔ́ pwɛt ŋ́gɛ: «Pek laá nzi njúʼ á lekīm Azwakne Ndém ɛ́. »

³ Pɔ́ɔl á lɛ nzɛ́tte á wɔ́p ŋ́gɛ: «Tɛ mɛ́ le nōʼ á wɛ́ á ntshi ánɛ ezi ntií awɔ́?» Pɔ́ pwɛt ŋ́gɛ: «Mɛ́ le nōʼ á wék á ntshi, páʼ Jáaŋ a le ziʼné épúp. »

⁴ Pɔ́ɔl á lé á mbū pɔ́p ŋ́gɛ: «Jáaŋ a lɛɛ́ nnoʼo epuɔ á ntshi, ńdɔkɔ ntswīi ŋ́gɛ, pɔ́ egɔ̄ nnɛ̄t zɔp, ŋ́gwáʼ atswhī tepɔŋ zɔ́p, tɛ́ ŋké nnɔŋ ndʉ́ɛ́ á mbū alāʼ ŋ́gɛ, pɔ́ efɛ́ nnɛ̄t ŋgyá á mbū ŋiŋ yīi, a á si eshʉ̄ʼɛ á nzem yí, ńdɔkɔ ndʉ́ɛ́ á Yɛɛ́so. »

⁵ Pɔ́ júʼ anu Pɔ́ɔl, ḿvéŋ ŋ́gɛ mɛ́ enōʼ á wɔ́p á ntshi ánɛ lezēŋ Atsyapuɔ Yɛɛ́so.

⁶ Pɔ́ɔl á zápa mbū á athū pɔ́p, Ndém á lɛ nnéŋ Azwakne zí ánɛ pɔ́p. Pɔ́ lɛ nzī á leshūŋne melāʼ ndɛʼɛ, ńzéŋ nnɔŋ eshúŋɔ ajū mīi, Ndém mé shúŋ á wɔ́p.

⁷ Epuɔ puɔ mɛ́t ntsem, é le nɔ̄ŋ ŋkuʼɔ ajūɔ ntsɔp pīa mé legēm.

⁸ Pɔ́ɔl á zɛ́t á Efɛze, ńdɔ̄k mesaŋ métɛ́t, ńnáŋa ŋgʉ̄ɔ á ŋgyā aswiŋte, éshúŋnɛ á mbū epuɔ té pɔ́k, éshúŋ á wɔ́p anu ánɛ Lefɔ Ndém, ńnɔŋ efāʼa eshhʉ̄ á leghʉ tɛ pɔ́ véŋ.

⁹ Táʼ, emɔ̄ʼ epuɔ á nnɔ pɔ́p, é te athū, ńdʉ̄ʼ á wɔ́p á levēŋ. Ńtshí á mvhɔ alāʼ, éshúŋne tépɔŋ ánɛ mɛnzhɛ Yɛɛ́so. Pɔ́ɔl á lɛ efhó á nnɔ pɔ́p, ńdɔ̄k epuɔ Yɛɛ́so, ŋ́gʉ̄ɔ mé ŋgyā acuʼte Tilanus, ńnáŋa nzíʼnɛ á wɔ́p anu Yɛɛ́so eleʼé tsem.

¹⁰ Á ghʉ épúp ŋguʼ epīa, tɛ epuɔ pīi é puú ŋgɔ́ á apak ŋgɔŋ Azíi, pɔ́ epuɔ Yúda mbɔɔ epuɔ Glɛk, é pú njúʼ anu Atsyapuɔ.

Epɔ̄ Sɛ́va é ega efāʼa á lelɔk lezēŋ Yɛɛ́so, ńjūŋ mesī ánɛ epuɔ

¹¹ Pɔ́ɔl á nɔŋ nzíʼnɛ epuɔ épúp, Ndém á nɔŋ ŋgyáa á yí mete, á ghʉɛ etsiá meŋkʉʼne anu,

¹² tɛ mɛ́ nɔŋ ndɔ̄kɔ nzhó, kɛɛ́ azō nzhó lɛ́ zīi, á pfeŋ á Pɔ́ɔl, ḿpfēŋɛ megaŋ agɔ, pɔ́ tʉɛ. Epuɔ pīi mesī é genɛ á wɔ́p, é tʉɛ azɔ́p.

^13-14 Mmɔʼ ŋiŋ Yúda a lɛ éwú, lezēŋ tsí é gɔ́ lɛ Sɛ́va, ŋ́gɔ́ mmɔʼ nnɔŋ‑epɔʼ eyi ndʉɛ, epɔ̄ pí esambīa é nɔŋ ŋkʉ́ʼnɛ á mejʉʼ mejʉʼ, ńjūŋɔ mesī ánɛ epuɔ, ńzéŋ nnɔŋ efāʼa á lelɔk lezēŋ Atsyapuɔ Yɛɛ́so, ńjūŋ. Éshʉ̄ʼ amɔ̄ʼ afʉʼ, ńdé á mbū mesī mɛ́t ŋ́gɛ: «Meŋ á lɔk lezēŋ Yɛɛ́so wuɔ yīi, Pɔ́ɔl a tswii ŋke yí la, ńtswī mé pɛ ŋ́gɛ, pɛ efhó ánɛ ŋiŋ wuɔ ntó. »

¹⁵ Esī mɛ́t é pwɛt á mbū pɔ́p ŋ́gɛ: «Pɛ é páʼa, ŋ́gɔ́ ewɔ awɔ́? A gɔ́ mé Yɛɛ́so, mbɔ meŋ á si nzhɛ́ɛ á yí, ńzéŋ nnɔŋ nzhɛ́ɛ á ŋiŋ yīi, Pɔ́ɔl a á ewiɛ́. »

¹⁶ Ŋiŋ mɛ́t yīi, esī e é ŋgɔ́ ánɛ yí, á whʉ ánɛ pɔ́p, ḿbɔ́ŋ mbʉʼ ntsyā á wɔ́p, ńtswá á wɔ́p metsem, ńnéŋ meféŋ ánɛ pɔ́p, tɛ pɔ́ fhó á ŋgyā yí atseŋ te nzhó, ńtó ŋkʉ̄.

¹⁷ Epuɔ Efɛze metsem, épuɔ Yúda mbɔɔ epuɔ Glɛk, é júʼ ajʉɔ anu mɛ́t, ḿbú ncɔ̄ʼ tɛ́ʼ. Mɛ́ pú ŋkɔ́ʼne nzwiŋ Atsyapuɔ Yɛɛ́so, ŋ́gɛ a á te efʉʼne zi.

¹⁸ Epuɔ tɛ nzá pīi, pɔ́ é fɛ́ nnɛ̄t ŋgyā á mbū Yɛɛ́so, pɔ́ shʉʼ á mvhɔ epuɔ, ńdɔ̄k ŋghi teté mvéŋ menu tepɔŋ mīi, pɔ́ lé fʉʼ.

¹⁹ Lelʉɛ epuɔ pīi, é lɛ éwú, ŋ́gɔ́ megaŋ lekaŋ, é lɔk meŋwaʼne lekaŋ mɔ́p, ńdɔk eshʉ̄ʼ ntáŋa á mvhɔ alāʼ, ńtɔ̄. Mɛ́ pú ŋkwāŋ meŋwaʼne mɛ́t, é tó epak ŋkāp ntsāʼ megēm ntáa.

²⁰ Á páʼa tɛ́, mete Atsyapuɔ é le ghʉ̄ʉ̄, ŋke Yɛɛ́so é pú esāŋ ejʉʼ, ńnɔŋ ŋghʉ̄ɛ memía metsō.

Demetlus pɔ́ megaŋ afaʼ pí é ega ncʉ̄ʼnɛ á tésɔŋ Efɛze

²¹ Menu muɔ mɛ́t é tɔ́k páʼa, Pɔ́ɔl á wɛ akwaŋte á yí á letɔ̄k ánɛ apak ŋgɔŋ Maseduan pɔ́ Akayi, ŋgʉ̄ɔ mé Yelósalɛm. Ńnɔŋ ndʉ́ɛ́ ŋ́gɛ: «Meŋ shʉʼɛ ŋgʉ̄ɔ tɛ ŋkó éwú, mbɔ á pɔŋ ŋ́gɛ, meŋ egʉ̄ɔ á tésɔŋ Lóma. »

²² Ńdɛ ntó á Timotɛ pɔ́ Elaste pīi, pɔ́ tswítɛ á yí ánɛ afaʼ, ŋ́gɛ pɔ́ epīk á Maseduan. Yí méŋwɛ̄t á piŋ ncʉ́ʼ nnáʼ ńnáŋ á ntē apak ŋgɔŋ Azíi.

²³ Afʉʼ mɛ́t, pókné á pú ntó á Efɛze, melaʼ mɛnzhɛ Yɛɛ́so.

²⁴ Mmɔʼ ŋgaŋ levho á gɔ́ éwú, mbɔ a gɛ ndɔ̄kɔ atʉɛ́ ntshɔ́ɔ etsō, lezēŋ tsí é gɔ́ lɛ Demetlus. Á lɔk atʉɛ́ ŋkāp, ńtshó ayiŋne mía mía ŋgyā mmɔʼ ndém, ndém mɛ́t á gɔ́ menzwí, mɛ́ tɔ́ŋ á yí lɛ Aatemis. Pɔ́ a emɔ̄ʼ megaŋ levho é lɛ́ ŋghʉɛ épúp, ńdɔkɔ ŋgwīɛ̄ atʉtʉ ŋkāp.

²⁵ Á cúʼte megaŋ levho puɔ mɛ́t, mbɔɔ emɔ̄ʼ epuɔ pīi, pɔ́ lɛɛ́ nzéŋɛ ntshɔ́ɔ etsō páʼ yí, ńdé á mbū pɔ́p ŋ́gɛ: «Mesoó pá, pɛ metsem é zhɛɛ́ á légɛ, ajū mīi ḿpɛ gɔ́ elɔ̄ɔk njúʼ á mbɔŋɔ́, á fhó ánɛ afaʼ zímpɛ jʉɔ.

²⁶ Pɛ é si njʉ́ɔ, ńzéŋɛ njúʼɔ anu zīi, ŋiŋ yīi mɛ́ tɔ́ŋɔ á yí lɛ Pɔ́ɔl lā, á lʉ́ɛ́. A á si ŋ́gɛ, ecū mīi mɛ́ lɔɔ̄k mbū tɛ́ ncūŋte, é té melém ɛ́. A á si mbɔ, a á ghʉ, epuɔ tɛ nzáne é véŋ anu zí, á ntē tésɔŋ Efɛze ega, mbɔɔ á ntē apak ŋgɔŋ Azíi ntsem.

²⁷ Mɛ́ ghʉɛ tépɔŋ, anu zí mɛ́t, á tseŋte nchu afaʼ zímpɛ. Ńzéŋ ŋghʉ̄, ŋgyā mía mía ndém Aatemis, e é le zɛ́t azō ɔ́. Púp, á pí á lewuʼte yīi, epuɔ apak ŋgɔŋ Azíi puɔ ntsem, mbɔɔ ŋgɔŋ ŋgɔŋ, é lɔkɔ ŋgūʼtɛ á yí. »

²⁸ Pɔ́ lɛ njúʼ épúp, ntɔ̄ŋ wɔ́p é fuʼ, pɔ́ lé mé ŋghi teté ŋ́gɛ: «Aatemis, á ndém epuɔ Efɛze mé mía mía ndém. »

²⁹ Tésɔŋ á pú ntákte tɛ mmī. Alāʼ á nɔŋ ŋgʉ̄ɔ mé mía mía ajʉʼ zīi, mɛ́ gɛ ncúʼtɛ éwú, á ŋgɔɔ̄ á Ŋgayus pɔ́ Alistáak, épuɔ Maseduan mémpīa pīi, pɔ́ a Pɔ́ɔl é gɛ nzīŋɛ.

³⁰ Pɔ́ɔl á júʼ épúp, ńnɔŋ efāʼa á letswi nnɛ̄t zi á mvhɔ alāʼ, tɛ́ epuɔ Yɛɛ́so é té véŋ.

³¹ Tɛ mbɔɔ emɔ̄ʼ memía megaŋ afaʼ ŋgɔpna, ŋ́gɔ́ mesoó Pɔ́ɔl, é zéŋ ntó ŋke, éswíŋte á yí ŋ́gɛ, ndɛ́ʼ á gʉɔ á mía mía ajʉʼ zīi, mɛ́ gɛ ncúʼtɛ éwú.

³² Á ge egɔ́ épúp, mbɔ menchu menchu, a á kó á nnɔ alāʼ. Emɔ̄ʼ epuɔ é gɔ́ ega, ńzwɛnnɛ ndʉ́ɛ́ ajʉɔ anu, epi emɔ̄ʼ é gɔ́ ege, ńdʉ́ɛ́ azi ndɛʼɛ. Lelʉɛ epuɔ á nnɔ pɔ́p, é zi nnɔ̄ŋ te nzhɛ́ɛ ajū mīi, á ghʉ tɛ́ pɔ́ cúʼtɛ ɛ́.

³³ Emɔ̄ʼ epuɔ méshɔ́ʼɔ́ lɛ́, é jʉ́ɔ páʼ epuɔ Yúda é tsakne á Alɛkzaŋdle ŋgyá á mvhɔ, éfhó á nnɔ alāʼ, ŋ́kɛ́ʼte anu jʉɔ mɛ́t eshúŋ á yí. Á tsɛtte apū, éfāʼa á leshūŋne, ńdɔk ntɔ́k nzem zɔp á mvhɔ alāʼ.

³⁴ Mɛ́ piŋ nzhɛ́ á légɛ, a á ŋiŋ Yúda, ŋ́kwɛ̄ʼ kwɛʼe tsɔ meleŋ njhʉ̄ mɛ́mbīa, ńnɔŋ ndʉ́ɛ́ á taʼ anu ŋ́gɛ: «Aatemis, á mía mía ndém epuɔ Efɛze, mé mía ndém. »

³⁵ Ntii‑nzɔ̄ŋ tésɔŋ mɛ́t, á faʼ eshhʉ̄ tɛ mbwɛ́ne alāʼ, ńdé á mbū pɔ́p ŋ́gɛ: «Pɛ, épuɔ Efɛze, awɔ́ a te si nzhɛ́ɛ á légɛ, tésɔŋ Efɛze wuɔ ntsem, mé cʉteē ŋgyā mía mía Aatemis, mbɔɔ akeke zí zīi, á le fhó á lephū esóʼo ō?»

³⁶ Epuɔ metsem é si mbúu nzhɛ́ɛ épúp, tɛ legaá lɛ́, a te éwú ú. Melaʼ épúp, á pɔŋ ŋ́gɛ, pɛ eŋímne ndáŋte, ndɛ́ʼ pɛ eghʉ̄ʉ anu té kwaŋte.

³⁷ Pɛ é shuŋne epuɔ puɔ, ńdɔk eshʉ̄ʼ páʼā, mbɔ pɔ́ ka ŋgyā esī pwɔ́ʼ ɔ́, ḿbīŋ te shúŋne tépɔŋ ánɛ ndém yímpɛ ɛ́.

³⁸ A gɔ́ éyi Demetlus pɔ́ emɔ̄ʼ megaŋ levho pīi, é nzem yí, pɔ́ a ŋiŋ é wɛɛ̄ ntsaŋ, mbɔ aleʼé zīi, mɛ́ ŋaka mentsaŋ á éwú, wɔ sáʼ mentsaŋ é zéŋ ŋgɔ́ éwú. Pɔ́ egʉ̄ɔ á mbū pɔ́p, éswīŋ ntsaŋ zɔp.

³⁹ A piŋɛ ŋgɔ́ éyi, ŋiŋ a zeéŋ ŋgwɛ amɔ̄ʼ anu zīi, a gɔ á nzɛ́ttɛ, mbɔ mɛ́ e láʼ ekó á ŋgyā asāʼ tɛ́ cʉte.

⁴⁰ Ḿpɛ ghʉɛ tépɔŋ, mɛ́ tsia ánɛ anu zīi, á ntɔ́k á tésɔŋ, ńdɔ̄k á yímpɛ, ŋ́ghʉ̄ epuɔ pīi, é táktɛ ejʉʼ. Mɛ́ zɛ́ttɛ á yímpɛ ŋ́gɛ, akēzō á táktɛ ejʉʼ ayáʼa lɛ́, ḿpɛ é le kūʼ á leshūŋ anu, tɛ methū é tó ɔ́. » Á shúŋne épúp, ḿbiŋ ntswī mɛ́ fhó á ajʉʼ mɛ́t, ŋgʉ̄ɔte.