Mefaʼ Meziŋ-ntō 18 - Eka Eswhī

Pɔ́ɔl a á ega á tésɔŋ Kɔlɛŋte

¹ Ajʉɔ á tɔ́k épúp, Pɔ́ɔl á fhó á Atɛne, ŋgʉ̄ɔ mé tésɔŋ Kɔlɛŋte.

² Ŋ́kó éwú, ḿbōte mmɔʼ ŋiŋ Yúda, lezēŋ tsí é gɔ́ lɛ Akilas, mbɔ mɛ́ le zhí á yí á apak ŋgɔŋ Pɔ́ɔŋ. Pɔ́ nzwí yi Plisil é zɛ́t efhɔ́ɔ á apak ŋgɔŋ Itália, melaʼ mīi Klɔde ŋwɛ́t ŋgɔŋ Lóma, a ke jūŋ epuɔ Yúda metsem á tésɔŋ Lóma. Pɔ́ɔl á kó á wɔ́p lesoó.

³ Ŋ́kó njʉ́ɔ mbɔ pɔ́ gɛ ntémɛ ŋgup mena, ńdɔkɔ ncūŋtɛ mentap páʼ yí, á cʉ́ʼɛ nnáŋa áa mba pɔ́p, pɔ́ a pɔ́p é pútɛ ŋghʉ̄ɛ afaʼ mɛ́t.

⁴ Á lɛɛ́ ŋgɔ́ɔ eleʼé aswite epuɔ Yúda ntsem, Pɔ́ɔl a egʉɔ ŋkó á ŋgyā aswiŋte, pɔ́ a epuɔ Yúda mbɔɔ epuɔ Glɛk, e eshúŋne, a enɔŋ efāʼa ŋ́gɛ, pɔ́ evéŋ anu Yɛɛ́so.

⁵ Afʉʼ zīi Silas pɔ́ Timotɛ é le fhó á apak ŋgɔŋ Maseduan, éshʉʼ ntswɛ́tte á Pɔ́ɔl lā, á pú ncʉ́ʼ efʉʼ metsem, ńtswī ŋke mbɔŋ á mbū epuɔ Yúda ŋ́gɛ, Yɛɛ́so mé si ŋgɔ́ á Nzaʼ‑Ŋkhʉ.

⁶ Ńdé épúp, táʼ, epuɔ Yúda é pú ŋkʉ̄ŋne á anu zí, ńcʉ́ʼɛ nzɔ̄tɛ á yí zɔte. Pɔ́ɔl á lɛ mbʉ̄pte avɔ́p ánɛ menzhó mí, ńdé á mbū pɔ́p ŋ́gɛ: «Pɛ a Ndém é ké efākne, mbɔ a cʉte á wɛ́, mbɔ alɔ́ʼ zá á té éwú ú. Tɛ efhó tsetsɔŋɔ, meŋ a tshi á wɛ́ néŋ, égʉɔ etswii ŋke mbɔŋ, á mbū epuɔ pīi, é té epuɔ Yúda á. »

⁷ Ńdɛ efhó á ŋgyā aswiŋte ntó, ŋgʉ̄ɔ á nzíʼne epuɔ á mba mmɔʼ ŋiŋ Glɛk yīi, a gɛ ŋgūʼtɛ á Ndém. Lezēŋ ŋiŋ mɛ́t é gɔ́ lɛ, Titíus Zwistwis. Mba zi é tshí á ŋkɔʼɔ́ ŋgyā aswiŋte epuɔ Yúda.

⁸ Klispus yīi a tshií mvhɔ ánɛ ŋgyā aswiŋte mɛ́t, á ghʉ efɛ́ nnɛ̄t ŋgyá á mbū Yɛɛ́so, mbɔɔ epuɔ pīi, é ŋgyā yí metsem. Pɔ́ɔl á zɛ́t ntswīʼnɛ nzíʼnɛ epuɔ ziʼné. Epuɔ Kɔlɛŋte tɛ nzáne, é fɛ́ azɔ́p nnɛ̄t, mɛ́ noʼ á wɔ́p á ntshi.

⁹ Á shʉʼ ŋgɔ́ mmɔʼ ŋkɔʼɔ́‑atswɛt, Atsyapuɔ Yɛɛ́so á shʉʼ á ntē njʉɔ te lí, ńdé á mbū Pɔ́ɔl ŋ́gɛ: «Zɛ́t ntswīʼnɛ eshúŋɔ anu zá, ńdɔkɔ ŋgʉ̄ɔ mé mvhɔ, te láŋte, te pɔ́k azō,

¹⁰ pɔkɔ mé nnɔ. Ŋiŋ a gɔ le zápa apū zí ánɛ wu, tɛ ŋghʉ̄ á wú anu tepɔŋ ɔ́. Epuɔ pá é zɛɛ́t á ntē tésɔŋ ega tɛ nzáne. »

¹¹ Pɔ́ɔl á lɛ nnáŋ á tésɔŋ Kɔlɛŋte á taʼ ŋguʼ mé mesaŋ ntokó, ńnɔŋ nzíʼnɛ epuɔ anu Ndém.

¹² Páʼ Pɔ́ɔl á nzɛ́t éwú lā, á shʉʼ ŋgɔ̄ afʉʼ zīi Ŋgaliɔŋ a lɛ á ŋgɔpna apak ŋgɔŋ mɛ́t, mɛ́ tɔ́ŋ lɛ Akayi. Epuɔ Yúda é cúʼte, ŋ́gɔ́ á taʼ nchu, ḿbā á Pɔ́ɔl, ŋ́gɔ̄ á yí, éshūŋne á yí ndɔk ŋgʉ̄ɔ mé mvhɔ asāʼ,

¹³ éswīŋ á yí ŋ́gɛ: «Ŋiŋ wuɔ a á si mbɔ̄ptɛ epuɔ ŋ́gɛ, mɛ́ elɔ̄k ntií ndɛʼɛ ŋgūʼte á Ndém, é piŋ ŋgɔ́ ntií zīi, lepé é té si mvéŋɛ ɛ́. »

¹⁴ Pɔ́ɔl á júʼ tɛ nnɔ̄ŋ ŋgɔ̄ á mbwɛtɛ́, Ŋgaliɔŋ á záʼ ashuŋne zí, ńdé á mbū epuɔ Yúda mɛ́t ŋ́gɛ: «Á ke wíʼe ŋgɔ́ anu ŋiŋ yīi, a á nzwhí á ŋiŋ, kɛɛ́ mmɔʼ mía anu tepɔŋ yīi, a á ghʉ lɛ́, mbɔ meŋ á chʉ́ nnɛ̄t nzwíʼte anu zīi, pɛ epuɔ Yúda, pɛ lʉ́ɛ́.

¹⁵ Páʼ á ké ŋgɔ́ á aŋak, ánɛ ashuŋne pɔ́ nzēŋ, mbɔɔ lepé tsɛ́ á nnɔ pɛ lā, ajɔ̄ mɛ́t á cʉteē á wɛ́. Meŋ á lʉʼ á gá á leŋak ejɔ̄ ntií menu. »

¹⁶ Ńdé épúp, ńdɛ efhó á mvhɔ asāʼ, ńjūŋ á wɔ́p.

¹⁷ Pɔ́ metsem é tó, ŋ́gɔ̄ á Sostɛn, á ŋiŋ yīi a tshií mvhɔ ánɛ ŋgyā aswiŋte epuɔ Yúda, ńzī á letswā á yí á ajʉʼ asāʼ. Táʼ, Ŋgaliɔŋ á ké mbú te lɔ̄k ntɔ́ŋ á azō ɔ́.

Pɔ́ɔl a á ega mbīŋɛ nzem mé tésɔŋ Aŋtiɔsh

¹⁸ Menu muɔ mɛ́t é tɔ́k páʼā, Pɔ́ɔl á zi á Kɔlɛŋte nnáŋ, ŋ́ghʉ̄ á taʼ alaʼne á mbū Ndém, ḿbiŋ ndāʼne epɔ̄ memía, ŋ́gɔ̄ epiŋ nzem mé ŋgɔŋ Sili. Pɔ́ a Akilas mbɔɔ Plisil é ziŋ tɛ ŋkó á Saŋklɛ, Pɔ́ɔl á jhu á athū zí, ńdɔk ntsékne alaʼne jɔ̄ zīi, a le ghʉ̄ á mbū Ndém lā, tɛ́ pɔ́ kó á mɛtúa ntshi ŋgʉ̄ɔ.

¹⁹ Pɔ́ gʉɔ tɛ ŋkó á tésɔŋ Efɛze, Pɔ́ɔl á tshi á Akilas pɔ́ Plisil éwú nnéŋ. Ŋ́gʉɔ ŋkó á ŋgyā aswiŋte epuɔ Yúda, pɔ́ a pɔ́p é zi á leshūŋne.

²⁰ Pɔ́ lé á mbū yí ŋ́gɛ, pɔ́ a pɔ́p e enáʼ nzi nnáŋ, tɛ́ Pɔ́ɔl a te véŋ.

²¹ Pɔ́ a pɔ́p é ge efakne, á lé á mbū pɔ́p ŋ́gɛ: «Ndém a shʉʼɛ mvéŋ, mbɔ meŋ a zéŋ eshʉʼ ecʉte á wɛ́. » Ńdé épúp, ŋ́kó á mɛtúa ntshi, ńdɛ efhó á Efɛze ŋgʉ̄ɔ.

²² Mɛtúa ntshi á gʉɔ tɛ ŋkó á tésɔŋ Sezale, Pɔ́ɔl á tó mbe mé Yelósalɛm, ńtsāʼte á alúŋ epuɔ Yɛɛ́so zīi á éwú, ḿbiŋ ŋgʉ̄ɔ mé Aŋtiɔsh.

²³ Ŋ́kó éwú, ńnáʼ nzi nnáŋ, tɛ́ nzéŋ ŋgʉ̄ɔ á leziŋ. Ńnɔŋ ntɔ́ktɛ ánɛ metésɔŋ á ntē apak ŋgɔŋ Ŋgalati pɔ́ Fliji, ńtswíʼtɛ epuɔ Yɛɛ́so metsem ánɛ lefɛ̄ nnɛ̄t.

Apolos a á ega ŋgúa metésɔŋ Efɛze pɔ́ Kɔlɛŋte

²⁴ Afʉʼ mɛ́t, mmɔʼ ŋiŋ Yúda á shʉʼ á Efɛze, lezēŋ tsí é gɔ́ lɛ Apolos, mbɔ mɛ́ le zhí á yí á tésɔŋ Alɛkzaŋdli, ŋ́gɔ́ á ŋiŋ, éshúŋne ŋgyá njuʼɔ́, ńzéŋ nzhɛ́ á aŋwaʼne Ndém á mbɔŋɔ́ mbɔŋɔ́.

²⁵ A lɛ ŋiŋ, mbɔ mɛ́ le kɛʼté eshúŋ á yí páʼ mɛnzhɛ Atsyapuɔ Yɛɛ́so a á épúp. Á kúʼte mé taʼ ntē, ńnɔŋ mbɛ́tɛ eshúŋɔ ndeŋ ndeŋ anu Yɛɛ́so, ŋ́ké nnɔŋ nzhɛ́ɛ áa ndaʼ anu zīi, Jáaŋ á le nziʼné ánɛ lenoʼ epuɔ á ntshi.

²⁶ Á kó á Efɛze épúp, ńzíʼ ŋkó á ŋgyā aswiŋte epuɔ Yúda, ńzī á leshūŋne á mbū epuɔ, té miʼte. Akilas pɔ́ Plisil é júʼ anu zīi a shúŋɔ, ńdɔ̄k á yí ŋgʉ̄ɔ, ŋ́kó ncuŋte ŋkɛ́ʼte éshúŋ á yí, páʼ mɛnzhɛ Ndém a á épúp.

²⁷ Apolos á shʉʼ nnɔ̄ŋ ŋkɔ̄ŋɔ á yí á legʉɔ mé apak ŋgɔŋ Akayi. Epɔ̄ memía é yá á yí ŋgate, á leghʉ épúp. Á ge egʉɔ, pɔ́ tí akɛtte ŋgyá á mbū epuɔ Yɛɛ́so pīi, pɔ́ é eshhʉ̄ ŋgɔŋ mɛ́t, ńdé ŋ́gɛ, pɔ́ ekókne á yí á mbɔŋɔ́. Á kó éwú, Ndém á nɔŋ ntswítɛ á yí, á nɔŋ ntɔ́tɛ epuɔ pīi, pɔ́ lē efɛ́ nnɛ̄t ŋgyá á mbū Yɛɛ́so.

²⁸ Ńtɔ́te á wɔ́p ánɛ páʼ, pɔ́ a epuɔ Yúda é túŋ atseŋ anu Yɛɛ́so á ntentā. Á chʉ́ nnɛ̄t ŋkɛ́ʼte eshúŋ á wɔ́p, tɛ pɔ́ té zéŋ ŋgwɛ̄ anu zīi, pɔ́ e shúŋ ɔ́. Á nɔŋ ndɔ̄kɔ aŋwaʼne Ndém, éshúŋɔ á wɔ́p ŋ́gɛ, Yɛɛ́so mé si ŋgɔ́ á Nzaʼ‑Ŋkhʉ.