Mefaʼ Meziŋ-ntō 17 - Eka Eswhī

Pɔ́ɔl pɔ́ Silas á tésɔŋ Tesalonik

¹ Pɔ́ɔl pɔ́ Silas é zápa ánɛ metésɔŋ Amfioolis pɔ́ Apolini, ŋgʉ̄ɔ mé tésɔŋ Tesalonik. Mmɔʼ ŋgyā aswiŋte epuɔ Yúda é gɔ́ éwú.

² Pɔ́ɔl á lɛ ŋkó á ŋgyā aswiŋte mɛ́t, páʼ a gɛ nzī ŋghʉ̄ɛ épúp ejʉʼ etsem. Ŋ́kó éwú ndɛtne lɛtne ánɛ eleʼé aswite epuɔ Yúda tsɛ́tɛ́t. Pɔ́ a epuɔ pīi é ŋgɔ́ éwú, é nɔŋ ntúŋɔ atseŋ ánɛ anu Ndém, éfhó ánɛ páʼ, mɛ́ le tí épúp.

³ Á nɔŋ eshúŋɔ á wɔ́p anu ánɛ Nzaʼ‑Ŋkhʉ, ŋ́kɛ́ʼtɛ eshúŋɔ á wɔ́p páʼ, ashuŋne Ndém á leé ŋ́gɛ, Nzaʼ‑Ŋkhʉ a ke pɔŋté á lejʉ̄ɔ ŋgʉɔ̄ʼ, ŋ́kwhʉ́, Ndém á piŋ ŋghʉ̄ á zím ánɛ lewhʉ̄. Ńzéŋ eshúŋ á wɔ́p ŋ́gɛ, Nzaʼ‑Ŋkhʉ mɛ́t, a á si ŋgɔ́ á Yɛɛ́so yīi, yí tswii ŋke yí á mbū pɔ́p lā.

⁴ Emɔ̄ʼ epuɔ Yúda pīi, é lɛ á ŋgyā, é júʼ épúp, ḿvéŋ, ŋ́kó á nnɔ Pɔ́ɔl pɔ́ Silas, ŋ́ghʉ̄ epuɔ Glɛk tɛ nzáne pīi, pɔ́ lɛ si ŋgūʼtɛ á Ndém, ŋ́ghʉ̄ emɔ̄ʼ wɔnzwí pīi, shʉ́shɔ́k wɔp á éwú.

⁵ Táʼ, emɔ̄ʼ epuɔ Yúda é jʉ́ɔ azɔ́p, éséŋ eshhʉ̄. Ńdɛ ntsé á mɛnzhɛ, ńcúʼte epuɔ pīi, é té ecūɔ ɔ́. Pɔ́ a pɔ́p é tɔ́kte á tésɔŋ, éswīte alāʼ, ńcʉ̄ʼne ejʉʼ, tɛ nzíʼ ŋkó á mba mmɔʼ ŋiŋ, mɛ́ tɔ́ŋ á yí lɛ Jazɔŋ, éfāʼ á Pɔ́ɔl pɔ́ Silas, ŋ́gɔ̄ á ŋgɔɔ̄ pɔ́p, élɔk egʉɔ mé mvhɔ alāʼ.

⁶ Tɛ́ pɔ́ té á wɔ́p jʉ́ɔ ɔ́, ńdɛ ŋgɔ̄ á Jazɔŋ mɛ́t, pɔ́ a emɔ̄ʼ epɔ̄ memía, é shuŋne á wɔ́p ndɔk ŋgʉ̄ɔ mé mvhɔ wɔ‑sáʼ á tésɔŋ, ńdéŋte ŋguŋ, ńdé ŋ́gɛ: «Epuɔ pīi é si ŋkʉ́ʼnɛ mmāʼa atāk á ŋgɔŋ lā, a ayi pɔ́ shʉʼ tɛ ŋkó ega lāa.

⁷ Jazɔŋ wuɔ á kókne á wɔ́p á mba yí. Pɔ́ metsem é si ndʉ́ɛ́ ŋ́gɛ: “Mmɔʼ efɔ a á éwú, lezēŋ tsí é gɔ́ lɛ Yɛɛ́so.” Púp, pɔ́ lɔkɔ te nzīŋɛ ánɛ lepé ŋwɛ́t ŋgɔŋ Lóma á. »

⁸ Alāʼ pɔ́ a wɔ‑sáʼ á tésɔŋ, é júʼ meshuŋne muɔ mɛ́t, ethū tsɔ́p é tákte.

⁹ Pɔ́ ghʉ tɛ Jazɔŋ pɔ́ a epuɔ pīi, mɛ́ gɔ á wɔ́p a pɔ́p, é láʼ ŋgyá ŋkāp á mbū wɔ‑sáʼ á tésɔŋ, ńdɔk nzó á athū zɔ́p, tɛ́ mɛ́ tshi á wɔ́p nnéŋ.

¹⁰ Nzém é kó eséŋ, epɔ̄ memía é lɛ ŋghʉ̄, Pɔ́ɔl pɔ́ Silas é gʉɔ mé tésɔŋ Bele. Ŋ́gʉɔ tɛ ndɛ̄ ŋgē ekó éwú, ŋ́kó á ntē ŋgyā aswiŋte epuɔ Yúda.

¹¹ Epuɔ Yúda pīi é tésɔŋ mɛ́t, é wɛ atswhī mbɔŋ tɛ ntɔ́k epi Tesalonik, ńjúʼ anu Ndém, ńzwíʼte mé taʼ ntē. Ńzéŋ ŋgɔ́ eleʼé tsem, ńnɔŋ ntsāʼa anu mɛ́t, ńcʉ̄tɛ ŋ́gɛ, kɛ anu zīi Pɔ́ɔl a shúŋɔ, á ndeŋ ndeŋ páʼ mɛ́ le tí épúp lɛ́ɛ.

¹² Epuɔ tɛ nzáne é lɛ efɛ́ nnɛ̄t ŋgyá á mbū Yɛɛ́so. Éshʉ̄ʼ ánɛ eshhʉ̄ epuɔ Glɛk, mekém wɔnzwí pɔ́ a mbaŋa tɛ nzá, é fɛ́ azɔ́p nnɛ̄t ŋgyá á mbū Yɛɛ́so.

¹³ Táʼ, epuɔ Yúda pīi é Tesalonik, é júʼ á légɛ Pɔ́ɔl a á tésɔŋ Bele, ńzéŋɛ eshúŋɔ anu Ndém, éshʉ̄ʼ éwú, ńcʉ̄ʼne ejʉʼ, éswīte alāʼ.

¹⁴ Epɔ̄ memía é jʉ́ɔ épúp, ndɛ ŋ́ghʉ̄ Pɔ́ɔl á lɔk eshhʉ̄ mía ntshi ŋgʉ̄ɔ. Ŋ́gɔ́ mé Silas pɔ́ Timotɛ, pɔ́ cʉ́ʼ nzɛ́t á Bele.

¹⁵ Epuɔ pīi pɔ́ nnɔŋ ntsāknɛ á Pɔ́ɔl, pɔ́ lɔk á yí ŋgʉ̄ɔ tɛ ŋkó á tésɔŋ Atɛne. Ŋ́ghʉ ŋgē epiŋ nzem mé Bele, Pɔ́ɔl á tó ŋke á mbū pɔ́p ŋ́gɛ, Silas pɔ́ Timotɛ, é ha eshʉ̄ʼ ntswɛ́tte á yí.

Pɔ́ɔl a á ega á tésɔŋ Atɛne

¹⁶ Pɔ́ɔl á ge ezwíʼte á Silas pɔ́ Timotɛ á Atɛne, ńtɔ́kte á tésɔŋ mɛ́t, ńjʉ́ɔ, meŋgyā mesī é zá éwú tɛ́ʼ, mbe zi é cʉ́ʼɛ ntsyɛ̄tte tsyɛtte.

¹⁷ Á lɛ ŋgʉ̄ɔ mé ŋgyā aswiŋte epuɔ Yúda, pɔ́ a epuɔ Yúda mbɔɔ epuɔ pīi pɔ́ té epuɔ Yúda á, ḿbiŋ nnɔ̄ŋ ŋgūʼtɛ á Ndém, é zi á leshūŋne. A le zéŋ nnɔŋ ŋgʉ̄ɔ eleʼé tsem, éshúŋnɛ tɛ mbɔɔ egʉ́ɛ egʉ́ɛ yīi, a á pote epuɔ éwú.

¹⁸ Emɔ̄ʼ wɔ túŋ atseŋ anu, mé akwaŋte Epikwii, mbɔɔ emɔ̄ʼ mé akwaŋte Zenɔŋ, é shʉʼ azɔ́p, pɔ́ a Pɔ́ɔl é zi á leshūŋne. Emɔ̄ʼ epuɔ é gɛ: «Ŋgaŋ leghī yi, a á gɛ akʉ̄ɛ?» Emɔ̄ʼ epuɔ é júʼ páʼ Pɔ́ɔl a á tswi ŋke mbɔŋ Yɛɛ́so, ńzéŋ ńnɔŋ eshúŋɔ anu, ánɛ lezīm ánɛ lewhʉ̄, ńdé azɔ́p ŋ́gɛ: «Á swhí áa yīi, a á si ntswīi ŋke emɔ̄ʼ mege melém. »

¹⁹ Ńdɛ ndɔ̄k á yí ŋgʉ̄ɔ mé ajʉʼ tésɔŋ zīi, mɛ́ gɛ ncúʼtɛ éwú efāʼa menu, á ndo lekwɛ̄t tsīi, mɛ́ tɔ́ŋɔ lɛ Aleopaje, ńdé á mbū yí ŋ́gɛ: «Pek gɔ ezhɛ́ anu eswhī jʉɔ zīi, o zíʼnɛ epuɔ lā a?

²⁰ O ó si eshúŋɔ mege menu, pek piŋ ŋgɔ́ si ŋkɔ̄ŋɔ á lezhɛ̄ ajū mīi, é lɔkɔ ndʉ́ɛ́. »

²¹ Á ge egɔ́ épúp, mbɔ epuɔ Atɛne metsem, mbɔɔ mege pīi é nnɔ pɔ́p, é gɛ nzī nzóko ŋkɔ̄ŋɔ á lejūʼ menu meswhī, ŋ́kó eshúŋ emɔ̄ʼ.

²² Pɔ́ɔl á lu á esī á mvhɔ acuʼte, ńdé ŋ́gɛ: «Pɛ epuɔ Atɛne, meŋ á jʉ́ɔ ŋ́gɛ, pɛ́ é epuɔ, ńdɔ̄k mekuʼ ŋgūʼte melém ánɛ meshhʉ̄ metsem.

²³ Meŋ á nnɔŋ ntɔ́ktɛ á tésɔŋ pɛ ega, ńjʉ́ɔ mejʉʼ esī mīi, pɛ cúʼtɛ éwú, ŋ́gwáʼa njʉʼ á mbū mesī. Meŋ á jʉ́ɔ amɔ̄ʼ ajʉʼ esī, mbɔ mɛ́ lē ntí éwú ŋ́gɛ: “Á mbū ndém te zhɛ́ á yí.” Púp, Ndém yīi pɛ wuʼtɛ, té zhɛ́ á yí, yí tɛ́ meŋ méŋwɛ̄t, meŋ shʉʼɛ mé eshuúŋ pɛ.

²⁴ Yí Ndém mɛ́t mé le ghʉ̄ ŋgɔŋ pɔ́ akʉ̄ɛ akʉ̄ɛ zīi, á ntē éwú. A á Efɔ lephū pɔ́ esī atsetsáʼ. A te náŋ ánɛ meŋgyā mīi, epuɔ menɔŋ mé le kwɛ́t ɛ́.

²⁵ A te si mbúŋɔ amɔ̄ʼ azō, tɛ ŋgɔ́ yīi, ŋiŋnɔŋ a gɔ etswíte á yí í. Yí mé si ŋgyáa etsō tsem á mbū ŋiŋnɔŋ, ḿbiŋɛ ŋghʉ̄ɛ á gɔ́ɔ éwú.

²⁶ «A le gē ezii, ḿbɔ́ á taʼ ŋiŋ, éfhó ánɛ yí, ŋ́ghʉ̄, melāʼ ntsem é pú ŋgɔ́ á ndo esī atsetsáʼ. Ńzi ŋgē eghʉ, nté njhʉ̄, ḿbʉ́ʼte ndhʉ melāʼ, ńzéŋ nnéŋ afʉʼ zīi, pɔ́ e lɔk enáŋ.

²⁷ A lɛɛ́ ŋghʉɛ épúp, ŋ́gɛ epuɔ menɔŋ e elɔk efāʼ á yí, ŋ́gɔ́ amɔ̄ʼ, pɔ́ té á mmɔtɛ́, ŋ́kó nzhɛ́ á yí. Tɛ́ Ndém á ké mbīŋ ŋgɔ́ á lezēŋ awíɛ awíɛ.

²⁸ Yí mé si ŋghʉ̄ɛ, ḿpɛ é gɔ́ɔ éwú, ńnɔŋ ŋŋɛ̄nɛ, ŋ́gɔ́ɔ nte. Á zéŋ ŋgɔ́ ajū mīi, emɔ̄ʼ wɔ zɔp azō á nnɔ pɛ, é le léē. Pɔ́ le lé ŋ́gɛ: “Pek é páʼa, ŋ́gɔ́ nzwɛt Ndém.”

²⁹ Púp, páʼ ḿpɛ é si ŋgɔ́ nzwɛt Ndém lā, ndɛ́ʼ ḿpɛ é zéŋ ŋkwāŋ ŋ́gɛ, Ndém a swhií ajū mīi, ŋiŋnɔŋ a gɔ elɔ̄ɔk leghi tsí, pɔ́ mbū mí ncūŋte, páʼ akeke zīi, mɛ́ lɔkɔ á gɔ́ɔl, kɛ́ atʉɛ́ ŋkāp, kɛ́ tɔ́, ńcūŋtɛ lā.

³⁰ Epuɔ menɔŋ é lɛ afʉʼ mvhɔ, ḿbūŋnɛ á Ndém. Ndém a te si ŋŋāka á wɔ́p melaʼ épúp ɔ́, táʼ, tsetsɔŋɔ, a á si ntswīi á mbū epuɔ menɔŋ egʉ́ɛ egʉ́ɛ ŋ́gɛ, pɔ́ pɔŋteé á legɔ̄ nnɛ̄t zɔp, ŋ́gwáʼ atswhī tepɔŋ zɔ́p.

³¹ A le néŋ á taʼ aleʼé yīi, a pɔŋteé á lelɔk nzáʼ ntsaŋ zɔp a epuɔ menɔŋ ndeŋ ndeŋ, a le tsɔ́ʼ á ŋiŋ yīi, a a shʉʼ ezáʼ ntsaŋ mɛ́t. Ŋ́ghʉ̄, ŋgaŋ á zím ánɛ lewhʉ̄, ńdɔkɔ eshúŋɔ epuɔ metsem ŋ́gɛ, nzaʼ‑ntsaŋ mɛ́t a a wɔ̄. »

³² Epuɔ pīi é ŋgɔ́ á esī, é júʼ páʼ Pɔ́ɔl a shúŋɔ ŋ́gɛ, ŋiŋ a le zím ánɛ lewhʉ̄, emɔ̄ʼ epuɔ é zwi á yí, emɔ̄ʼ epuɔ é lé azɔ́p ŋ́gɛ: «Shʉʼ afʉʼɛ́ ndɛʼɛ, tɛ́ nzéŋ eshúŋ á wék azō, ánɛ anu jɔ̄ mɛ́t. »

³³ Pɔ́ ghʉ épúp, Pɔ́ɔl á lɛ efhó á nnɔ pɔ́p ŋgʉ̄ɔ.

³⁴ Táʼ, emɔ̄ʼ epuɔ é ké efɛ́ nnɛ̄t zɔp ŋgyá á mbū Yɛɛ́so, ŋ́kó ánɛ nnɔ Pɔ́ɔl. Á ŋiŋ páʼ Denísi ŋgaŋ acuʼte Aleopaje, ŋ́ghʉ̄ mmɔʼ menzwí, lezēŋ tsí é gɔ́ lɛ, Damalis mbɔɔ emɔ̄ʼ epuɔ azɔ́p.