Mefaʼ Meziŋ-ntō 15 - Eka Eswhī

Mía acuʼte a á ega á Yelósalɛm, ńcʉ̄tɛ anu letēm á ŋiŋ

¹ Emɔ̄ʼ epuɔ é shʉʼ efhó á Yudéa, éshʉ̄ʼ á Aŋtiɔsh, ńzī á lezīʼne epuɔ Yɛɛ́so ŋ́gɛ, pɔ́ gɔ́ te ghʉ̄ mɛ́ tém á wɔ́p páʼ lepé Mɔɔ́sɛ é si nzɛ́ttɛ ɛ́, mbɔ Ndém a te e láʼ eghʉ pɔ́ etswɛ́t ɛ́.

² Epuɔ mɛ́t pɔ́ a Pɔ́ɔl é shuŋne anu mɛ́t, ŋ́ŋāk tɛ á tsya á wɔ́p metsem. Mɛ́ zápa ŋ́gɛ, Pɔ́ɔl pɔ́ Baanabas mbɔɔ emɔ̄ʼ epuɔ Aŋtiɔsh, e egʉ̄ɔ á Yelósalɛm, ńnɔ̄ŋ anu jʉɔ mɛ́t á mekhu meziŋ‑ntō Yɛɛ́so mbɔɔ epɔ̄ melʉɛ, pɔ́ a pɔ́p e efāʼ.

³ Alúŋ epuɔ Yɛɛ́so, á tswíte á wɔ́p ánɛ leziŋ wuɔ mɛ́t, pɔ́ ge egʉɔ, ńzápa á apak ŋgɔŋ Fenísia pɔ́ apak ŋgɔŋ Samalía, ńnɔŋ nzīŋɛ eshúŋɔ á mbū epuɔ Yɛɛ́so, páʼ epuɔ pīi é té epuɔ Yúda á, é tsé á nzem Atsyapuɔ. Epɔ̄ memía metsem é júʼ, á yá á wɔ́p á mía lekāk.

⁴ Pɔ́ gʉɔ tɛ ŋkó á Yelósalɛm, alúŋ epuɔ Yɛɛ́so pɔ́ meziŋ‑ntō Yɛɛ́so mbɔɔ epɔ̄ melʉɛ, é tswí á wɔ́p á mbɔŋɔ́. Pɔ́ɔl pɔ́ Baanabas é pɛ́te eshúŋ á wɔ́p menu mīi, Ndém a ke tswité á wɔ́p, pɔ́ ghʉ.

⁵ Emɔ̄ʼ epuɔ Yɛɛ́so ánɛ ŋkɔʼɔ́ epuɔ Falísia, é lu á esī ndé ŋ́gɛ: «Mɛ́ pɔŋteé á letēm epuɔ Yɛɛ́so pīi, pɔ́ té epuɔ Yúda á, ńtswī ŋ́gɛ pɔ́ ekúʼte lepé Mɔɔ́sɛ. »

⁶ Pɔ́ lé épúp, meziŋ‑ntō pɔ́ a epɔ̄ melʉɛ é kó ncúʼte ńnáŋ á esī, éfāʼ anu jʉɔ mɛ́t.

⁷ Mɛ́ ŋak anu mɛ́t tɛʼ, tɛ Piɛ á lu á esī ndé ŋ́gɛ: «Epɔ̄ memía, pɛ é zhɛ́ á légɛ, tɛ efhó tɛ afʉʼ, Ndém a le fhó á tsetsɛlɛ pɛ, ńtsɔ́ʼ á gá, ŋ́gɛ meŋ etswī ŋke mbɔŋ yí á mbū epuɔ pīi, é té epuɔ Yúda á, pɔ́ júʼ, mvéŋ azɔ́p.

⁸ Yí Ndém a zhɛɛ́ ntē epuɔ metsem, a le gē etswi á légɛ yí é véŋ á wɔ́p páʼ epuɔ pí, ńtó Azwakne zí á mbū pɔ́p, ńdeŋ ndeŋ páʼ a le tó á mbū pímpɛ.

⁹ A le zéŋ esok ntē wɔ́p, melaʼ mīi pɔ́ é fɛ́ nnɛ̄t ŋgyá á mbū Yɛɛ́so. A te ghʉ̄ atɛʼte á tsetsɛlɛ ḿpɛ a pɔ́p ɔ́.

¹⁰ Pɛ é piŋ ŋghʉ̄ á lā, ńzéŋ efāʼ á wɛ́ á leghʉ, tɛ Ndém á záŋ á lɔ́ŋ ŋ́? Pɛ faʼa á wɛ́ á letshī apiʼ á athū epuɔ Yɛɛ́so puɔ melaʼ akɔ̄? Apiʼ mɛ́t, á zéŋ ŋgɔ́ á azímpɛ, mbɔ memɔʼɔ́ pímpɛ, é le fāʼ á lekʉlɛ, ḿbiŋ te kūuʼ.

¹¹ Táʼ, ajū mīi ḿpɛ é si mvéŋɛ, á gɔ́ áa lɛ, Ndém a le zapá ánɛ apɔŋɔ́ ntē te ndhʉ zīi, Atsyapuɔ Yɛɛ́so a wɛɛ̄ ánɛ pímpɛ, ŋ́ghʉ̄ ḿpɛ tswɛ́t, ńzéŋ ŋghʉ̄ epuɔ mɛ́t é tswɛ́t azɔ́p ndeŋ ndeŋ épúp. »

¹² Piɛ á shúŋne épúp, epuɔ metsem é pú ndáŋte, ŋ́gɔ̄ á njúʼ anu zīi Baanabas pɔ́ Pɔ́ɔl é gɔ á eshúŋɔ. Pɔ́ lɛ mbɛ́te eshúŋ á wɔ́p páʼ, pɔ́ ke wúa epuɔ pīi, é té epuɔ Yúda á, Ndém á nɔŋ ntsīa ánɛ pɔ́p, ŋ́ghʉ̄ɛ meŋkʉʼne anu mīi, é tswii mete mí á tsetsɛlɛ pɔ́p.

¹³ Pɔ́ shúŋne tɛ á mi, Jáak á tswí ashuŋne, ńdé ŋ́gɛ: «Epɔ̄ memía pá, pɛ ejúʼ anu jʉɔ zīi, meŋ gɔ̄ á eshúŋ pɛ lāa.

¹⁴ Simɔŋ a á pɛ́te eshúŋ páʼ, tɛ efhó á nzií ŋke mbɔŋ, Ndém á kɔŋ epuɔ pīi, pɔ́ té epuɔ Yúda á azɔ́p, ńtsɔ́ʼ emɔ̄ʼ epuɔ á nnɔ pɔ́p, ńdɔk ŋghʉ̄ epuɔ pí.

¹⁵ Á lɔk ntsóʼne ánɛ menu mīi, metswi‑ŋke Ndém é le lé efʉʼ mvhɔ. Mɛ́ le tí ŋ́gɛ:

¹⁶ “Afʉʼ a láʼ nnɔŋ ekuʼɔ, meŋ ezéŋ eshʉʼ mbʉ́ʼɛ ŋgyā Ndavít zīi, e lē eswia. Meŋ a láʼ epʉ́ʼte á aswiá‑apaʼa mɛ́t, tɛ a eláʼ ntshí á ajʉʼ, ŋ́gɔ́ páʼ á lɛ épúp,

¹⁷ tɛ́ mvuʼ epuɔ menɔŋ e etsɔ́ʼte akhu zá, ńdɔkɔ ndʉ́ɛ́ melāʼ ndɛʼɛ mīi, meŋ ndē ntsɔ́ʼ á wɔ́p, ńdɔk ŋghʉ̄ epuɔ pá. Atsyapuɔ mé lʉ́ɛ́ páʼa, á yí yīi, a laʼneē anu, ŋ́ghʉ̄.

¹⁸ A le ghʉ̄ʉ̄, epuɔ menɔŋ é zhɛ́ menu muɔ mɛ́t, tɛ efhó tɛ ŋguʼ léée.”»

¹⁹ Jáak á zéŋ ndé ŋ́gɛ: «Meŋ á jʉ́ɔ azá ŋ́gɛ, á ka pɔ̄ŋ ŋ́gɛ, ḿpɛ e eták epuɔ pīi, pɔ́ té epuɔ Yúda á, mbɔ pɔ́ ke sɛ̄t ntē wɔ́p, ḿvéŋ á Ndém ɛ́.

²⁰ Táʼ, ḿpɛ etí ndɔk mbé á wɔ́p ŋ́gɛ, ndɛ́ʼ pɔ́ ezéŋ mpfɛ́t mbap zīi, mɛ́ lɔk ntsɔ́ʼ afɛʼ á mbū mesī, ḿbé á wɔ́p agā, ḿbé á wɔ́p ŋ́gɛ, ndɛ́ʼ pɔ́ ezéŋ mpfɛ́t mbap na yīi, a á kwhʉ́ efem feém, mbɔɔ metshi mena.

²¹ Mɛ́ etí á mbū pɔ́p épúp, melaʼ mīi, tɛ efhó tɛ ŋguʼ, epuɔ menɔŋ é shúŋ anu Mɔɔ́sɛ jʉɔ mɛ́t á ntē metésɔŋ ntsem, epuɔ metsem é nɔŋ njúʼɔ. Tɛ mbɔɔ tsetsɔŋɔ, mɛ́ zɛɛ́t ntswiʼnɛ ntɔ́ŋɔ aŋwaʼne Mɔɔ́sɛ ánɛ meleʼé aswite epuɔ Yúda ntsem, á ntē meŋgyā aswiŋte. »

Epɔ̄ melʉɛ é ega ntíi akɛtte á mbū epuɔ Yɛɛ́so pīi, pɔ́ té epuɔ Yúda á

²² Meziŋ‑ntō pɔ́ a epɔ̄ melʉɛ mbɔɔ megaŋ alúŋ ntsem, é gɔ́ taʼ nchu ŋ́gɛ, mɛ́ etsɔ́ʼ emɔ̄ʼ epuɔ á nnɔ pɔ́p, ńtsóʼne ánɛ Pɔ́ɔl pɔ́ Baanabas, ńtó á wɔ́p á Aŋtiɔsh. Mɛ́ lɛ ntsɔ́ʼ á Zwíde yīi, mɛ́ lɛɛ́ nzéŋɛ ntɔ́ŋɔ á yí lɛ Baasabas, ńzéŋ ntsɔ́ʼ á Silas, pɔ́ mémpīa é gɔ́ epuɔ pīi, epɔ̄ memía é wuʼteé á wɔ́p.

²³ Mɛ́ tí ánɛ akɛtte zīi, pɔ́ lɔkɔ ŋgʉ̄ɔ ŋ́gɛ: «Pek, épɔ̄ memía pɛ́, méziŋ‑ntō, ŋ́ghʉ̄ epɔ̄ melʉɛ ánɛ alúŋ epuɔ Yɛɛ́so, pek é pú ntsāʼte á wɛ́ metsem. Á wɛ́ epɔ̄ memía pék pīi, é té epuɔ Yúda á, épi é tésɔŋ Aŋtiɔsh, mbɔɔ epi é ntē ŋgɔŋ Sili mɛ́t, ŋ́ghʉ̄ é epi é ntē ŋgɔŋ Silisi.

²⁴ Pek ke júʼ páʼ, emɔ̄ʼ epuɔ é ke fhó á nnɔ pek, éshʉʼ eshúŋ á wɛ́ menu, ńdɔk ntákte athū zɛ́, tɛ pɛ cʉ́ʼɛ ntāpne tapne. Pek mé ke ké te á wɔ́p tó.

²⁵ Púp tɛ́, pek ke náŋ á esī, ŋ́gɔ́ á taʼ nchu, ńtsɔ́ʼ emɔ̄ʼ epuɔ, ńtsóʼne ánɛ Pɔ́ɔl pɔ́ Baanabas, mépɔŋ mesoó pék, ńtó á wɔ́p ŋ́gɛ, pɔ́ eshʉʼ njʉ́ɔ á wɛ́.

²⁶ Pɔ́ɔl pɔ́ Baanabas é si ŋgɔ́ epuɔ pīi lewhʉ̄ a lē nnek á wɔ́p, tɛ ŋgɔ́ yīi pɔ́ kúɔ́ ánɛ anu Atsyapuɔ yímpɛ Yɛɛ́so Klísto, ŋ́kwhʉ́, pɔ́ le lʉ̄ʉʼ.

²⁷ Epuɔ pīi pek é tó á wɔ́p a pɔ́p, é si ŋgɔ́ á Zwíde pɔ́ Silas, ŋ́gɛ pɔ́ eshʉʼ ndɔ̄k nchu, ḿbɛ́te eshúŋ á wɛ́ ndeŋ ndeŋ, ájū mīi pek é tí á ntē akɛtte ega.

²⁸ Ńdɔkɔ ŋ́gɛ, Azwakne Ndém á ke ghʉ̄ pek jʉ́ɔ ŋ́gɛ, pek gɔ le zápa amɔ̄ʼ apiʼ ndɛʼɛ, á athū pɛ pīi, pɛ te epuɔ Yúda á, ńtɔ́k ecū mīi mɛ́ pɔŋteé á leghʉ ɛ́. Etsō mɛ́t e ecʉɔ:

²⁹ pɛ epá á lepfɛ̄t mbap zīi, mɛ́ lɔk ntsɔ́ʼ afɛʼ á mbū mesī. Ḿbá á lepfɛ̄t mbap mena pīi é kwhʉ́ efem feém, ḿbá lepfɛ̄t metshi mena, ḿbá á agā. Pɛ kʉʉ ecū muɔ mɛ́t ntsem, mbɔ pɛ é ghʉ á mbɔŋɔ́. Pek é tsaʼte á wɛ́. »

³⁰ Mɛ́ tí épúp, wɔ Pɔ́ɔl é lɔk ŋgʉ̄ɔ, ŋ́kó á Aŋtiɔsh, ńcúʼte epuɔ Yɛɛ́so metsem, ŋ́gyá á akɛtte mɛ́t á mbū pɔ́p.

³¹ Pɔ́ tɔ́ŋ, á yá á wɔ́p ŋgate, pɔ́ júʼ mbú ŋgáŋte.

³² Páʼ Zwíde pɔ́ Silas é azɔ́p metswi‑ŋke Ndém lā, pɔ́ shúŋ á wɔ́p menu tɛ záne, ńdɔk nték á wɔ́p, ńzéŋ ndɔk ntswíʼte á wɔ́p.

³³ Pɔ́ zi éwú nnáŋ, éshʉʼ ncʉ́ʼ á legʉɔ, epɔ̄ memía metsem é lɔk a taʼ nchu, ńdāʼne á wɔ́p, ŋ́gɛ pɔ́ ezīŋ mé apwɛne, ŋ́gʉɔ ntswɛ́tte epuɔ pīi, pɔ́ ke tó á wɔ́p.

³⁴ [Táʼ, Silas á piŋ njʉ́ɔ ŋ́gɛ, yí e cʉ́ʼ ezɛ́t éwú.]

³⁵ Ŋ́gɔ́ mé Pɔ́ɔl pɔ́ Baanabas, pɔ́ cʉ́ʼ nzɛ́t á Aŋtiɔsh, pɔ́ a emɔ̄ʼ epuɔ é nɔŋ nzíʼnɛ epuɔ, ńnɔŋ ntswīi ŋke mbɔŋ, éshúŋɔ anu Atsyapuɔ.

Pɔ́ɔl pɔ́ Baanabas é ega ŋgɔ̄ á efaknɛ̄

³⁶ Méŋ afʉʼ á shʉʼ nnáʼ ntɔ́k, Pɔ́ɔl á lé mé Baanabas ŋ́gɛ: «Pɔkɔ ezéŋ mbīŋ nzem ánɛ metésɔŋ ntsem pīi, pɔkɔ ke shúŋ anu Atsyapuɔ éwú, ńcʉ̄te epuɔ Yɛɛ́so, ńjʉ́ɔ páʼ pɔ́ lē ncʉ́ʼ ŋgɔ́ épúp. »

³⁷ Baanabas á nɔŋ ŋkɔ̄ŋɔ ŋ́gɛ, pɔ́ a Jáaŋ Málkúsi e epú ŋgʉ̄ɔ.

³⁸ Táʼ, Pɔ́ɔl á pú te épúp kɔŋ, melaʼ mīi Málkúsi a le wáʼ á wɔ́p á apak ŋgɔŋ Pamfili, ŋgʉ̄ɔ té tsékne mefaʼ mīi, pɔ́ a pɔ́p é ke zīī.

³⁹ Pɔ́ Baanabas é zi anu mɛ́t ŋŋāk, tɛ ndáʼ ŋgē ejʉ́ɔ, éfākne fakne. Baanabas á lɔk á Málkúsi, pɔ́ yí é gʉɔ, ŋ́gɔ ŋkó á ntē mɛtúa ntshi, ńtó ŋgʉ̄ɔ mé ŋgɔŋ Shʉple.

⁴⁰ Pɔ́ɔl á kaŋ á Silas, ŋ́gē egʉɔ, epɔ̄ memía é ghʉ aswiŋte, ńdɔk ntsékne á yí á mbū Atsyapuɔ Ndém, ŋgaŋ apɔŋɔ́ ntē te ndhʉ.

⁴¹ Á ge egʉɔ, ńdɔ̄k á apak ŋgɔŋ Sili pɔ́ Silisi ntɔ́k. Ńnɔŋ ntɔ́kɔ ánɛ aziɛ́ alúŋ epuɔ Yɛɛ́so lɛ́, ésēmtɛ á wɔ́p ánɛ lefɛ̄ nnɛ̄t.