Mefaʼ Meziŋ-ntō 13 - Eka Eswhī

Azwakne Ndém á ega ntúɔ́ á Baanabas pɔ́ Sɔ́ɔl

¹ Emɔ̄ʼ epuɔ é lɛ ánɛ alúŋ epuɔ Yɛɛ́so zīi á Aŋtiɔsh, ŋ́gɔ́ metswi‑ŋke Ndém, emɔ̄ʼ é gɔ́ wɔ zíʼne epuɔ azō. Epuɔ puɔ mɛ́t, é lɛ wɔ Baanabas, ŋ́ghʉ̄ á Simeɔŋ yīi, mɛ́ lɛɛ́ nzéŋɛ ntɔ́ŋɔ á yí lɛ Sɛ́h‑Ŋiŋ, mbɔɔ Lusius ŋiŋ Silɛ̄ne, mbɔɔ Manaɛŋ yīi, pɔ́ Efɔ Elōde é le lū á esī, ŋ́ghʉ̄ á Sɔ́ɔl.

² Á shʉʼ ŋgɔ́ amɔ̄ʼ afʉʼ, pɔ́ nɔŋ ŋkɔ̄ŋɔ nnáŋa nzi melaʼ Ndém, ńnɔŋ eswíŋtɛ á Ndém. Azwakne Ndém á shʉʼ amɔ̄ʼ aleʼé, ńdé á mbū pɔ́p ŋ́gɛ: «Pɛ etswhi efāk á Baanabas pɔ́ Sɔ́ɔl, pɔ́ eghʉ̄ mefaʼ mīi, meŋ a tsékne á mbū pɔ́p. »

³ Pɔ́ júʼ épúp, ńzɛ́t ntswiʼnɛ ŋkɔ̄ŋɔ nnáŋa áa nzi melaʼ Ndém, ńnɔŋ eswíŋtɛ á Ndém. Afʉʼ á kuʼ, pɔ́ zápa mbū á athū pɔ́p, ńtó á wɔ́p ánɛ mefaʼ mɔ́p.

Baanabas pɔ́ Sɔ́ɔl é gʉɔ mé Shʉple

⁴ Azwakne Ndém á tó á Baanabas pɔ́ Sɔ́ɔl páʼā, pɔ́ lɛ ŋgʉ̄ɔ mé Selesi, ŋ́kó éwú, ŋ́kó á ntē mɛtúa ntshi, ńtó ŋgʉ̄ɔ mé ŋgɔŋ Shʉple.

⁵ Ŋ́gʉɔ ŋkó éwú, ńtó ánɛ mmɔʼ tésɔŋ yīi, mɛ́ tɔ́ŋɔ lɛ Salamine, ńzī á lekʉ̄ʼne eshúŋ ashuŋne Ndém á mbū epuɔ Yúda, á ntē meŋgyā aswiŋte pɔ́p. Pɔ́ a wɔ Jáaŋ Málkúsi é nɔŋ nzīŋɛ, á nɔŋ ntswítɛ á wɔ́p.

⁶ Pɔ́ ziŋ tɛ ŋkó eyi mmɔʼ eshhʉ̄ ŋgɔŋ mɛ́t, ŋ́gʉɔ tɛ ŋkó á tésɔŋ Pafɔs, ńjʉ́ɔ mmɔʼ ŋgaŋ lekaŋ, mɛ́ tɔ́ŋ á yí lɛ Baa Yɛɛ́so. Á gɔ́ ŋiŋ Yúda, mbɔ a gɛ mbɔ̄ptɛ epuɔ ŋ́gɛ, yí é ntswi‑ŋke Ndém.

⁷ A lɛɛ́ ŋgɔ́ɔ afʉʼ metsem, ŋ́gúa á mba Sɛ́je Pɔ́ɔl yīi, a lɛ ŋgɔpna alāʼ mɛ́t. Ŋgɔpna wuɔ mɛ́t a lɛ ŋiŋ, leghi tsí é gɔ́ éwú. Táʼ, á shʉʼ nnáŋ tɛ ntswī ŋ́gɛ, mɛ́ etɔ́ŋ á Baanabas pɔ́ Sɔ́ɔl, melaʼ mīi a le nɔ̄ŋ ntsáa á lejūʼ ashuŋne Ndém.

⁸ Pɔ́ shʉʼ, ńzī á lezīʼne á ŋgɔpna. Elimas, ŋgaŋ lekaŋ wɔ̄, páʼ mɛ́ lɛɛ́ ntɔ́ŋɔ á yí épúp, ánɛ ashuŋne epuɔ Glɛk, á lɛ nzī á leŋak á wɔ́p, ńnɔŋ efāʼa á letɔʼ ŋ́gɛ, ŋgɔpna a te e fɛ́ nnɛ̄t zi, éyá mé Yɛɛ́so ó.

⁹ Azwakne Ndém á kó tɛ ndó ntē Sɔ́ɔl yīi, mɛ́ lɛɛ́ nzéŋɛ ntɔ́ŋɔ á yí lɛ Pɔ́ɔl. Á pʉ́ʼɛ menēk mí ntshí ánɛ ŋgaŋ lekaŋ wɔ̄.

¹⁰ Ńdé á mbū yí ŋ́gɛ: «O ó méŋ Sɛ́ta, o kɔɔ̄ŋ á lepa ajū mīi á mbɔŋ. Ŋgɛ́tte é ntē wu tɛ mbú ndó. O pīŋ ŋkɔ̄ŋ á wú á lepɔp epuɔ afʉʼ metsem. O o láʼ enéŋ té ŋɔ́ʼne ashuŋne Ndém zīi, á ndeŋ ndeŋ eséŋ ɛ́?

¹¹ Ké nzhɛ́ á légɛ, tɛ efhó tsetsɔŋɔ, Ndém a a néŋ ndɔ á athū wu. O o cʉ́ʼ á apií‑menēk. O cʉʉ́ʼ ejʉʼ ejʉ́ɔ ɔ́, tɛ a enáʼ nzi nnáŋ. » Elimas á lɛ njúʼ, amɔ̄ʼ azō á kápte menēk mí, ŋ́gɔ́ páʼ sɛ́h alɔ lā. Á zi á leswāŋte nnɛ̄t zi, ḿmɔ̄te ejʉʼ, éfāʼa á ŋiŋ yīi, a a tsaŋ á yí.

¹² Ŋgɔpna á jʉ́ɔ ajū mīi á tɔ́k, éfɛ́ nnɛ̄t zi ŋgyá á mbū Yɛɛ́so. Menu mīi a á zhɛ́ ánɛ Yɛɛ́so, é pú ŋgɔ́ si ntsyāa á yí tɛʼ.

Pɔ́ɔl pɔ́ Baanabas é ega ŋgʉ̄ɔ mé Aŋtiɔsh yīi, a á ŋgʉ̄ŋ Pisidi

¹³ Pɔ́ɔl pɔ́ nnɔ yí é fhó á Pafɔs, ŋ́kó á mɛtúa ntshi, ŋ́gʉ̄ɔ tɛ ntó á Pɛɛje, ḿmɔʼ tésɔŋ ŋgɔŋ Pamfili. Jáaŋ Málkúsi á sákne á wɔ́p, ḿbīŋ nzem mé Yelósalɛm.

¹⁴ Pɔ́ɔl pɔ́ Baanabas, é láʼ nzīŋ á esī, ŋ́gʉɔ tɛ ŋkó á tésɔŋ Aŋtiɔsh yīi, á ŋgʉ̄ŋ ŋgɔŋ Pisidi. Aleʼé aswite epuɔ Yúda á kuʼ, pɔ́ gʉɔ ŋkó á ŋgyā aswiŋte, ńnáŋ á esī.

¹⁵ Mɛ́ tɔ́ŋ amɔ̄ʼ ajʉʼ á ntē aŋwaʼne Mɔɔ́sɛ mbɔɔ azi metswi‑ŋke Ndém tɛ á mi, wɔ tshí‑mvhɔ ánɛ ŋgyā aswiŋte é tó á ŋiŋ, á gʉɔ ndé á mbū pɔ́p ŋ́gɛ: «Epɔ̄ memía, pɛ wiɛ anu zīi pɛ gɔ elɔ̄ɔk nték epuɔ, pɛ eshúŋ. »

¹⁶ Pɔ́ɔl á lɛ ndū á esī, ńtsɛ̄tte apū zí á mbū pɔ́p, ńdé ŋ́gɛ: «Epuɔ Islaɛl, pɛ ejúʼ, mbɔɔ epuɔ metsem pīi, pɔ́ té epuɔ Islaɛl ɛ́, táʼ, ŋ́ké nnɔŋ ŋgūʼtɛ á Ndém, pɛ ejúʼ azɛ́.

¹⁷ Ndém epuɔ Islaɛl a le láʼ ntsɔ́ʼ wɔ maŋgānjʉʼ pék, ŋ́ghʉ̄ pɔ́ fuŋ nzá tɛʼ, á afʉʼ zīi pɔ́ lɛ mege á ntē ŋgɔŋ Ejīpto. Á shʉʼ efhó éwú, ńdɔ̄k ete yí, éfók á wɔ́p.

¹⁸ Ŋ́gɔ́ si nnɔŋ ntswítɛ á wɔ́p á késáatswɛt, tɛ á gɔ́ ajūɔ ŋguʼ alāʼ megēm lekua.

¹⁹ Pɔ́ shʉʼ ŋgʉ̄ɔ tɛ ŋkó á ŋgɔŋ Kanaaŋ, á pík melāʼ esambīa á ntē ŋgɔŋ mɛ́t, ŋ́gyá á atsáʼ zɔ́p á mbū epuɔ Islaɛl, á cʉ́ʼ azɔ́p.

²⁰ Á le gē egɔ́ épúp, mbɔ á ghʉ ajūɔ ŋguʼ alāʼ ŋkhʉ lekua mé megēm ntáa páʼ, pɔ́ le kó á Ejīpto. Ḿbáte, Ndém á zéŋ ŋgyá epuɔ ŋ́gɛ, pɔ́ etɔ́k nzem zɔp, ḿbú esáʼ á wɔ́p, ŋ́gyá yá, tɛ ndáʼ ŋkó ŋguʼ ntswi‑ŋke Ndém Samiɛ.

²¹ Pɔ́ shʉʼ nzéŋ nzɛ́tte á efɔ, Ndém á yá á wɔ́p á Sawul, á méŋ Kis, ŋ́gɔ́ ndhu Bɛnjamɛŋ. Á náŋ ánɛ lefɔ ŋguʼ megēm lekua.

²² Ndém á sóʼne á yí ánɛ akɔʼ lefɔ, ŋ́kɔ́ʼne á Ndavít nnáŋ éwú, á cʉ́ʼ á efɔ wɔp. Ndém a le lé ánɛ Ndavít wuɔ mɛ́t ŋ́gɛ: “Meŋ á jʉ́ɔ ŋ́gɛ Ndavít méŋ Jese, a á si ŋgɔ́ ntií ŋiŋ zīi, ntē gá é si ŋkɔ̄ŋɔ. A a shʉʼ eghʉ ajūɔ tsem zīi, meŋ mé tswi.”

²³ Púp, Ndém á yá á taʼ ŋiŋ, á mbū epuɔ Islaɛl, á fhó ánɛ ndhu Efɔ Ndavít. Ŋ́gɛ a eshʉʼ ŋgɔ́ á Ŋghʉɛ‑mɛ́‑tswɛ́t wɔp, páʼ a le laʼnē épúp. Ŋiŋ wuɔ mɛ́t á gɔ́ Yɛɛ́so.

²⁴ Yɛɛ́so wuɔ mɛ́t, a le gē eshʉʼe, mbɔ Jáaŋ a le té njhʉ̄ eshʉ̄ʼ á mbū epuɔ Islaɛl, ńnɔŋ ndʉ́ɛ́ á mbū pɔ́p ŋ́gɛ, pɔ́ egɔ̄ nnɛ̄t zɔp, ŋ́gwáʼ atswhī tepɔŋ zɔ́p, mɛ́ enōʼ á wɔ́p á ntshi.

²⁵ Jáaŋ á shʉʼ nnɔ̄ŋ mmāka afaʼ zí, ńzɛ́tte epuɔ ŋ́gɛ: “Pɛ é si ŋkwāŋa ŋ́gɛ, meŋ á páʼa, ŋ́gɔ́ á wɔ̄? Meŋ te ŋiŋ yīi pɛ zwíʼtɛ lā á. Ŋiŋ mɛ́t a á nzem meŋ eshʉ̄ʼɛ, meŋ zi mbú te kūʼ yīi, meŋ gɔ eŋɔ́ʼne á esī, ésɔ̄ŋ meláŋ mí í.”»

²⁶ Pɔ́ɔl á zéŋ ndé ŋ́gɛ: «Epɔ̄ memía, pɛ pīi pɛ́ é ndhu Ablaham, mbɔɔ pɛ metsem pīi, pɛ wuʼtɛ á Ndém epuɔ Islaɛl, Ndém a á tó ŋke wuɔ yīi, é tswii páʼ epuɔ é gɔ eghʉ̄ʉ épúp tɛ́ ndáʼ ntswɛ́t lā, á mbū pímpɛ puɔ.

²⁷ Táʼ, epuɔ Yelósalɛm pɔ́ mefɔ pɔ́p, é lɛ te jʉ́ɔ á Yɛɛ́so páʼ ŋiŋ yīi, a ghʉɛ mɛ́ tswɛ́tɛ lā á. Pɔ́ le zéŋ mbuŋne anu zīi, metswi‑ŋke Ndém é lɛɛ́ eshúŋɔ, tɛ́ á ké ŋgɔ́ anu zīi, pɔ́ lɛɛ́ ntɔ́ŋɔ ánɛ eleʼé aswite tsɔ́p ntsem. Pɔ́ mé le ké ŋghʉ̄, anu mɛ́t á po, éfhó ánɛ páʼ, pɔ́ le ghʉ̄ mɛ́ zwhí á Yɛɛ́so.

²⁸ Pɔ́ lɛ te jʉ́ɔ amɔ̄ʼ anu zīi, Yɛɛ́so a á fa, tɛ ŋgɔ́ yīi, mɛ́ gɔ elɛ nzwhí á yí zwhí ɛ́. Táʼ, ŋ́ké ŋŋíŋ ŋīŋ ŋ́gɛ, Pilat a etswī, mɛ́ ezwhí á yí.

²⁹ Pɔ́ le māk á leghʉ ajūɔ tsem zīi, Ndém a le lé á ntē aŋwaʼne ánɛ Yɛɛ́so, mɛ́ fhó ánɛ mbaŋne paŋné, ésóʼne á yí, ńdɔ̄k ŋgʉ̄ɔ ńnéŋ á ntē lesi.

³⁰ Táʼ, Ndém á ké ŋghʉ̄, á zím ánɛ lewhʉ̄,

³¹ ńdɔ̄k eleʼé alāʼ tɛ nzáne, ńtswī athū nnɛ̄t zí á mbū epuɔ pīi, pɔ́ a pɔ́p é le fhó á Ŋgaliléa eshʉ̄ʼ mé Yelósalɛm. Epuɔ mɛ́t mé tsetsɔŋɔ, éshúŋɔ á mbū epuɔ Islaɛl, á ŋiŋ yīi Yɛɛ́so a á ewiɛ́.

³² Pek méŋwɛ̄t azék, é shʉʼ páʼa, ŋ́gɔ̄ á eshúŋ pɛ ŋke mbɔŋ Ndém wuɔ mɛ́t. É gɔ́ lɛ, ajū mīi Ndém a le laʼnē á mbū wɔ maŋgānjʉʼ pímpɛ,

³³ a á ghʉ, á po tsetsɔŋɔ á mbū pímpɛ. Á yímpɛ pīi, ḿpɛ é ndhu mɛ́t. Á ké ŋgē epo, éfhó ánɛ páʼ Ndém a á ghʉ, Yɛɛ́so á zím ánɛ lewhʉ̄. Mbɔ mɛ́ le zī ntí anu jʉ́ɔ mɛ́t á ntē aŋwaʼne ezɔp ntshi, ánɛ epáp pīa ŋ́gɛ: “Ndém a á lé ŋ́gɛ: “O ó Méŋ ga, tɛ efhó ayáʼa, meŋ gɔ́ á Mɔʼɔ́ wu.”

³⁴ Ŋ́gɔ́ ánɛ páʼ, Ndém a le ghʉ̄ Yɛɛ́so á zím ánɛ lewhʉ̄, tɛ a te zéŋ ŋkwhʉ́ tɛ mbe nnɛ̄t zi é lʉ́ ʉ́ lā, mbɔ yí méŋwɛ̄t Ndém a le lé ŋ́gɛ: “Meŋ a láʼ eyá á wɛ́ lepɔŋ tsīi, meŋ nde laʼnē á mbū Ndavít: á kwaʼ lepɔŋ te mi tsīi, é pú efhɔ́ɔ á mbū meŋ.”

³⁵ Mɛ́ le zéŋ ntí á amɔ̄ʼ ajʉʼ ŋ́gɛ: “Ndém a te e láʼ esákne á ŋiŋ yīi, a á eyi, á ntē lesi, a elʉ́ ʉ́.”

³⁶ Ŋ́gɔ́ mé Efɔ Ndavít, mbɔ a le ghʉ̄ ajū mīi, Ndém a le lé ŋ́gɛ, a eghʉ̄ ánɛ azí afʉʼ. Éshʉʼ ŋkwhʉ́, mɛ́ túŋ á yí á lezēŋ wɔ maŋgānjʉʼ pí, mbe nnɛ̄t zi é shʉʼ ndʉ́ á ntē lesi.

³⁷ Táʼ, ŋiŋ yīi Ndém a ke ghʉ̄ á zím ánɛ lewhʉ̄ lā, mbe nnɛ̄t zi, e kɛ te á ntē lesi lʉ́ ʉ́.

³⁸ Epɔ̄ memía, pɛ ezhɛ́ á mbɔŋɔ́ á légɛ, anu zīi pek shúŋɔ á wɛ́ ŋ́gɛ, Ndém a a láʼ elekne mefa epuɔ menɔŋ lā, a a láʼ ege elekne, a gɔ́ áa melaʼ Yɛɛ́so wuɔ mɛ́t. Á piŋ ŋgɔ́ yīi, lepé Mɔɔ́sɛ, é le gɔ́ é le kūʼ á leghʉ, mefa ŋiŋ é mi, tɛ Ndém á jʉ́ɔ á yí páʼ ŋiŋ ndeŋ ndeŋ ɛ́.

³⁹ Awíɛ awíɛ yīi, a á fɛ́ nnɛ̄t ŋgyá á mbū Yɛɛ́so, a a láʼ etswɛ́t ánɛ mefa mí.

⁴⁰ Púp, pɛ elāk á athū zɛ́, ḿbɔ́k anu zīi mɛ́ le tí á ntē aŋwaʼne metswi‑ŋke Ndém, á leghʉ á wɛ́. Mɛ́ le tí éwú ŋ́gɛ:

⁴¹ “Pɛ wɔ wák á Ndém, pɛ ejúʼ. Anu a shʉʼ epú ekʉʼne á wɛ́, pɛ epiŋ ŋkwhʉ́te. Meŋ a shʉʼ eghʉ, amɔ̄ʼ anu á etó á azɛ́ afʉʼ, tɛ ŋgɔ́ yīi, mɛ́ ke shúŋ á wɛ́ shúŋ, pɛ é le véŋ.”»

⁴² Pɔ́ɔl pɔ́ Baanabas é ghʉ nnɔ̄ŋ efhɔ́ɔ á ŋgyā aswiŋte ntúɔ́, epuɔ é swíŋte á wɔ́p ŋ́gɛ, pɔ́ eláʼ á aleʼé aswite ŋgap ayáʼa, ńzéŋ eshʉʼ eshúŋne á mbū pɔ́p, ánɛ anu jʉɔ mɛ́t.

⁴³ Epuɔ é fhó á ŋgyā acuʼte ntó tɛ mmī, epuɔ Yúda tɛ nzá, mbɔɔ epuɔ pīi, pɔ́ le sɛ̄t ncʉ́ʼ epuɔ Yúda, pɔ́ nɔŋ nzhɛ̄nɛ á Pɔ́ɔl pɔ́ Baanabas. Pɔ́ nɔŋ ntékɛ epuɔ puɔ mɛ́t ŋ́gɛ, pɔ́ enáŋ efʉʼ metsem, ńtsēŋne ánɛ Ndém, a enáŋa ntswīi á wɔ́p á apɔŋɔ́ ntē te ndhʉ zí.

Pɔ́ɔl pɔ́ Baanabas é ega ntswīi ŋke Ndém á mbū epuɔ pīi é té epuɔ Yúda á

⁴⁴ Aleʼé aswite ŋgap ayáʼa á shʉʼ ŋkūʼ, epuɔ tésɔŋ ntsem é pú ncúʼte, ńnɔŋ njúʼɔ ashuŋne Ndém.

⁴⁵ Emɔ̄ʼ epuɔ Yúda, é jʉ́ɔ páʼ alāʼ á pú ŋkɔ́ʼ épúp, ńzī á lewɛ sɛ́h ntē ánɛ Pɔ́ɔl pɔ́ Baanabas, ńnɔŋ ŋkwīpnɛ anu zīi, Pɔ́ɔl a lʉ́ɛ́, ḿbiŋɛ nzɔ̄tɛ á wɔ́p.

⁴⁶ Pɔ́ɔl pɔ́ Baanabas é shúŋne á mbū pɔ́p esia sia ŋ́gɛ: «Á nzi mbɔ̄ŋ ŋ́gɛ, pek ezi nté njhʉ̄ eshúŋ anu Ndém á mbū pɛ epuɔ Yúda. Páʼ pɛ é ké ndʉ̄ʼ, ḿbiŋ njʉ́ɔ ŋ́gɛ, pɛ te kūʼ epi, pɛ gɔ efú ntā á lezēŋ Ndém ɛ́ lā, tsetsɔŋɔ, pek e swáŋ, écʉ́ʼɛ etswii ŋke mɛ́t, áa mbū epuɔ pīi, pɔ́ té epuɔ Yúda á.

⁴⁷ Atsyapuɔ Ndém a le té njhʉ̄ ntswī ŋ́gɛ, pek pɔŋteé á leghʉ épúp, éfhó ánɛ páʼ a le lé ánɛ Yɛɛ́so ŋ́gɛ: “Meŋ á chʉ́ á wú, ŋ́gɛ o egɔ́ ŋkaʼ, ŋ́kɛ̄ʼɛ melāʼ ndɛʼɛ, ḿbiŋ ŋghʉ̄ epuɔ menɔŋ á ajʉʼ tsem á ndo esī atsetsáʼ, e eláʼ nzápa á nzem wu, ńtswɛ́t.”»

⁴⁸ Epuɔ pīi é té epuɔ Yúda á, é júʼ épúp, nnɛ̄t zɔp é gáŋte, pɔ́ zi á lewuʼte Ndém melaʼ ŋke mɛ́t. Epuɔ tɛ nzáne é júʼ ŋke Atsyapuɔ Yɛɛ́so, epi pɔ́ é véŋ, é gɔ́ epuɔ pīi, Ndém a le tsɔ́ʼ á wɔ́p ŋ́gɛ, pɔ́ efú ntā á lezēŋ yí.

⁴⁹ Ŋke Atsyapuɔ é lɛ mbú esɛ̄t ejʉʼ, ánɛ aziɛ́ apak ŋgɔŋ ntsem.

⁵⁰ Táʼ, epuɔ Yúda é náŋ tɛ ŋgó menzwí mekém alāʼ pīi, pɔ́ eshʉ̄ʼ azɔ́p á ŋgyā aswiŋte, ńzéŋ eswīte mekém alāʼ, pɔ́ lɛ nzī á lezā esɔ̄ ánɛ Pɔ́ɔl pɔ́ Baanabas, ńjūŋ á wɔ́p á alāʼ pɔ́p, ŋ́gyá tɛ ŋgia é sak.

⁵¹ Pɔ́ lɛ ŋgʉ̄ɔ, ŋ́ké ŋgē egʉɔ, ḿbʉ̄p á avɔ́p á mekhu pɔ́p, ńdɛ ntsé á mɛnzhɛ, ŋgʉ̄ɔ mé Ikoniɔm.

⁵² Ŋ́gɔ́ mé epuɔ Yɛɛ́so á tésɔŋ Aŋtiɔsh ega mɛ́t, Azwakne Ndém á zɛ́t nnáŋ á ntē pɔ́p tɛ ndó, pɔ́ piŋ nnɔ̄ŋ nnáŋa mé lekāk.