Mefaʼ Meziŋ-ntō 12 - Eka Eswhī

Efɔ Elōde a á ega ndʉɔ́ʼɔ epuɔ Yɛɛ́so

¹ Á lɛ afʉʼ mɛ́t, Efɔ Elōde á zi á lelʉɔ̄ʼ emɔ̄ʼ epuɔ, ánɛ alúŋ epuɔ Yɛɛ́so.

² Ńtswī mɛ́ gɔ á Jáak yīi, a á méŋ mɔ́ Jáaŋ, ńzáʼ athū zí.

³ Á jʉ́ɔ páʼ a á ghʉ épúp, á pɔŋ epuɔ Yúda, ńzéŋ ntswī mɛ́ gɔ Piɛ azí. Mɛ́ lɛɛ́ ŋgɔ á yí ánɛ meleʼé mīi, pɔ́ lɛɛ́ mpfɛ́tɛ mmɔʼ ntií mblɛ té levwi, ńdɔkɔ mbɛ́ttɛ lekāk Páska.

⁴ Mɛ́ gɔ á Piɛ páʼā, ńnéŋ á yí á ŋgyā atʉɛ́, ńtsékne á yí á mbū wɔ maʼ‑ncu nnɔ lekua, ŋ́gɛ ewiɛ́ nnɔ lɛ́, e epíp á yí ánɛ azɔ́p afʉʼ, taʼ nnɔ á wɛ wɔ maʼ‑ncu lekua. Elōde a le gɔ́ mbɔ a á ndáʼ nzápa páʼ, lekāk e shʉʼ etɔ́ke, tɛ́ yí efók á Piɛ ntshí á mvhɔ alāʼ, mɛ́ eŋāk á yí.

⁵ Piɛ á gɔ́ á ŋgyā atʉɛ́ épúp, megaŋ alúŋ epuɔ Yɛɛ́so, é ké ŋgɔ́ si eswíŋtɛ á Ndém té ká té ká, ánɛ athū zí.

Cɔʼ Ndém a á ega ŋghʉ̄ɛ, Piɛ á túɔ́ á ŋgyā atʉɛ́

⁶ Á shʉʼ ŋgɔ́ ŋkɔʼɔ́‑atswɛt yīi, njhʉ̄ e le nɔ̄ŋ ŋgɔ̄ elá, Elōde a efók á Piɛ, mɛ́ eŋāk á yí. Piɛ á nɔŋ á tsetsɛlɛ wɔ maʼ‑ncu mémpīa, ńnɔŋ ndíi, mbɔ mɛ́ ndɔ̄k meŋkhʉ atʉɛ́ mɛ́mbīa ŋkwɛ́t á yí. Emɔ̄ʼ wɔ maʼ‑ncu é zéŋ nnɔ̄ŋ mbípɛ nchu ŋgyā atʉɛ́.

⁷ Mɛ́ lɛ ŋgē ejʉ́ɔ, taʼ cɔʼ Ndém á ŋwak, ŋgyā é pú ŋkɛ̄ʼɛ. Á pfeŋte á Piɛ á lekwɛ̄ yí, ńzīɛ á yí, ńdé á mbū yí ŋ́gɛ: «Gáknɛ́ ndū á esī. » Meŋkhʉ atʉɛ́ é lɛ efhó á mbū yí, ŋ́kɛ́ʼte ŋgwhʉ̄te á esī.

⁸ Cɔʼ Ndém á zéŋ ndé á mbū yí ŋ́gɛ: «Maʼ nzhó ju, ńzwík meláŋ mú. » Á ghʉ épúp. Á zéŋ ndé á mbū yí ŋ́gɛ: «Zwík nzhó efwɔ̄k ju, éshʉʼ ŋgɔ́ á nzem meŋ. »

⁹ Piɛ á nɔŋ nzhɛ̄nɛ á yí, pɔ́ yí é nɔŋ efhɔ́ɔ á ŋgyā atʉɛ́ ntúɔ́, táʼ, Piɛ á ké nnɔ̄ŋ te nzhɛ́ɛ á légɛ, ajū mīi cɔʼ Ndém a ghʉɛ, á si ŋgɔ́ anuúnē ɛ́, ńnɔŋ ŋkwāŋtɛ ŋ́gɛ yí é jʉ́ɔ njʉɔ te lí.

¹⁰ Páʼ mɛ́ kaá ntshí wɔ maʼ‑ncu á taʼ ajʉʼ ɛ́ lā, pɔ́ Piɛ é tɔ́k megaŋ mvhɔ, ńzéŋ ntɔ́k mezoknzem. Ŋ́gʉɔ tɛ ŋkó ánɛ nchu ŋgyā yīi, mɛ́ lɔkɔ efhɔ́ɔ á ŋgyā atʉɛ́ ntúɔ́. Nchu ŋgyā mɛ́t, é tó ncʉ̄te á tésɔŋ, mbɔ mɛ́ le lɔ̄k atʉɛ́ tɛ́ ncūŋte, é ŋímne ntsɔ́ʼɔ yí méŋwɛ̄t, á mvhɔ pɔ́p. Pɔ́ Piɛ é tó, ŋ́gɔ́ ánɛ mmɔʼ mɛnzhɛ, ńnɔŋ nzīŋɛ, cɔʼ Ndém á lɛ ntshī á yí éwú nnéŋ, ŋ́gʉ̄ɔ.

¹¹ Leghi Piɛ é lɛ eshʉ̄ʼ, á lé ŋ́gɛ: «Tsetsɔŋɔ wuɔ, meŋ á zhɛ́ á mbɔŋɔ́ á légɛ, Atsyapuɔ Ndém a á tó á cɔʼ yi, á shʉʼ ŋkú á gá á mbū Elōde, ńzéŋ efók á gá ánɛ ŋgʉɔ̄ʼ zīi, epuɔ Yúda é ke nɔ̄ŋ ŋgɔ̄ eshʉʼ eghʉ, e ekó á athū meŋ. »

¹² Páʼ leghi Piɛ é pú eshʉ̄ʼ ánɛ ajū mīi, á tɔ́k ánɛ yí lā, á gʉɔ mé mba Malía, mía Jáaŋ Málkúsi. Á ge egɔ́, mbɔ epuɔ tɛ nzá, é ncúʼte éwú, ńnɔŋ eswíŋtɛ á Ndém.

¹³ Á kwáʼte nchu akɛ. Mmɔʼ menzwí á shʉʼ. Mɛ́ tɔ́ŋ á yí lɛ Lode, ŋ́gɔ́ á méŋ ŋkhʉ̄ á mba mɛ́t.

¹⁴ Á shʉʼ épúp, ŋ́gīŋ, ńjúʼ é gɔ́ ŋghi Piɛ, ŋgɔŋ é pú mbɔ̄ŋ á yí tɛʼ. Á kʉte mbīŋ nzem á ŋgyā, éshúŋ epuɔ ŋ́gɛ, Piɛ a á apɛ́. Ŋ́gē egɔ́ mbɔ, a á lekne á letsɔ̄ʼ nchu akɛ.

¹⁵ Mɛ́ pwɛt á mbū yí ŋ́gɛ: «O gɔ́ áa apia. » Á ké ŋŋíŋ ŋīŋ ŋ́gɛ, a gɔ́ áa Piɛ. Mɛ́ gɛ, a gaá lɛ́, mbɔ agega zí.

¹⁶ Piɛ á ké nzɛ́t ntswiʼnɛ ŋkwáʼtɛ nchu akɛ kwaʼté. Mɛ́ tsɔ́ʼ, ńjʉ́ɔ á gɔ́ kwaʼ yí, ŋgɔŋ é kʉʼne epuɔ tɛʼ.

¹⁷ Á kó á mba, ńtsɛ̄tte apū ŋ́gɛ, pɔ́ eláŋte. Ńzī á lepɛ̄te eshúŋ páʼ Atsyapuɔ Ndém, a á ŋghʉ̄ épúp, tɛ́ efók á yí á ŋgyā atʉɛ́. Ḿbɛ́te tɛ mīi, á lé ŋ́gɛ, mɛ́ egʉ̄ɔ mbɛ́te eshúŋ á Jáak, ńzéŋ eshúŋ á mbū epɔ̄ memía metsem, ńdɛ efhó éwú ŋgʉ̄ɔ mé amɔ̄ʼ ajʉʼ ndɛʼɛ.

¹⁸ Njhʉ̄ é lá, wɔ maʼ‑ncu é cʉte, éfāʼ á Piɛ, pɔ́ té á yí jʉ́ɔ. Leghi tsɔ́p é pú ntákte ánɛ ajū mīi, á ŋghʉ̄ á yí.

¹⁹ Efɔ Elōde á júʼ épúp, ńtó epuɔ ŋ́gɛ, pɔ́ egʉɔ efāʼ á Piɛ. Pɔ́ gʉɔ emɔ̄ ejʉʼ, éfāʼ á yí, pɔ́ té yí jʉ́ɔ. Á tɔ́ŋ wɔ maʼ‑ncu mɛ́t, ŋ́ŋāk á wɔ́p tɛ ŋgē emakne, ńtswī ŋ́gɛ, mɛ́ ezwhíte á wɔ́p. Á tɔ́k épúp, Elōde á fhó Yudéa egā, ńcú ŋgʉ̄ɔ mé tésɔŋ Sezale, ńnáʼ nnáŋ éwú.

Lekwhʉ̄ Efɔ Elōde

²⁰ Afʉʼ mɛ́t, Efɔ Elōde á nɔŋ nzáŋa á lɔ́ŋ á mbū epuɔ Tíi, mbɔɔ á mbū epuɔ Sidɔŋ. Epuɔ alāʼ puɔ mɛ́t, é cuŋte páʼ pɔ́ e gʉɔ ejʉ́ɔ á yí épúp. Ŋ́gʉɔ ŋkó ńjʉ́ɔ mmɔʼ mɔʼɔ́ efɔ, lezēŋ tsí é gɔ́ lɛ Blastus. Ńdɔ̄k á yí, ŋ́ghʉ̄ á mɛmekém, ŋ́gɛ a egʉɔ nzīŋ ekém á mbū Elōde, melaʼ mīi, pɔ́ lɛɛ́ ŋgē ewiɛ etsō lejhʉ̄, é fhɔ́ɔ á alāʼ yí.

²¹ Aleʼé zīi mɛ́ ndāʼne á kuʼ, Elōde á maʼ nzhó zi, ŋ́kɔ́ʼ nnáŋ ánɛ akɔʼ lefɔ zí, éshúŋne á mbū epuɔ mɛ́t.

²² Alāʼ á náŋ tɛ ndé mé ŋghi teté ŋ́gɛ, mmɔʼ ndém mé shúŋnɛ loo, ŋiŋnɔŋ mé té shúŋnɛ ɛ́.

²³ Afʉʼ mɛ́t afʉʼ mɛ́t, taʼ cɔʼ Ndém á maʼ agɔ ánɛ Efɔ Elōde, melaʼ mīi a ka pīŋne awuʼte jʉɔ mɛ́t, ŋ́gyá á mbū Ndém ɛ́. Ntentwɛt é zi á lejhʉ̄ á yí, á kwhʉ́.

²⁴ Ŋ́gɔ́ mé ashuŋne Ndém, mbɔ á le nɔ̄ŋ ntswiʼnɛ esāŋa ejʉʼ, epuɔ tɛ nzáne é nɔŋ mvéŋɛ.

²⁵ Páʼ mɛ́ le tó á Baanabas pɔ́ Sɔ́ɔl á Yelósalɛm lā, pɔ́ kó éwú, ḿmāk ajū mīi, pɔ́ ŋgʉ̄ɔ á ŋghʉ̄ɛ, ḿbīŋ nzem mé Aŋtiɔsh. Ŋ́gē epiŋ nzem, ńdɔ̄k á Jáaŋ Málkúsi.