Mefaʼ Meziŋ-ntō 10 - Eka Eswhī

Kɔɔnɛye a á tó ŋ́gɛ mɛ́ egʉɔ ntɔ́ŋ á Piɛ

¹ Mmɔʼ ŋiŋ a lɛ á tésɔŋ Sezale, lezēŋ tsí é gɔ́ lɛ Kɔɔnɛye. Ŋ́gɔ́ á tɛŋgyā ncu, ḿbɔ́ŋ wɔ lʉɔ́ʼ‑ncu epuɔ ŋkhʉ, ánɛ emɔ̄ʼ nnɔ ncu yīi mɛ́ tɔ́ŋɔ lɛ, eyi ŋgɔŋ Itália.

² A lɛ ŋiŋ, ŋ́ghʉ̄ páʼ Ndém a á si ŋkɔ̄ŋɔ. Pɔ́ a epuɔ pīi, é puú ŋgɔ́ á ŋgyā yí metsem, é nɔŋ ŋgūʼtɛ á Ndém. A lɛɛ́ ntwítɛ epuɔ Yúda pīi pɔ́ é wɔ te kuʼ ánɛ azō. A lɛɛ́ ŋgɔ́ɔ efʉʼ metsem, ńnɔŋ eswíŋtɛ á Ndém.

³ Á shʉʼ ŋgɔ́ amɔ̄ʼ aleʼé, ánɛ menu ntɛ́t mbwɛɛ́t‑njhʉ̄, mmɔʼ njʉɔ te lí é shʉʼ á mbū yí. Á chʉ́ nnɛ̄t, ńjʉ́ɔ á cɔʼ Ndém á kó á ŋgyā yí, ńtɔ́ŋ á yí ŋ́gɛ: «Kɔɔnɛye. »

⁴ Á tshí menēk ánɛ yí, ḿbɔ́k, ńzɛ́tte á yí ŋ́gɛ: «Anu akɔ̄ Ndi?» Cɔʼ Ndém á pwɛt ŋ́gɛ: «Ndém a á júʼ meswiŋte mú, ńzéŋ njʉ́ɔ menu mbɔŋ mīi, o gɛ ŋghʉ̄ɛ, ŋ́kímte á wú.

⁵ Lɛ ntó epuɔ tsetsɔŋɔ á tésɔŋ Jope, pɔ́ egʉɔ ntɔ́ŋ mmɔʼ ŋiŋ yīi a á éwú, ńdɔk eshʉ̄ʼ, lezēŋ tsí é gɔ́ lɛ Simɔŋ Piɛ.

⁶ A ke shʉ̄ʼ éwú, pɔ́ Simɔŋ yīi a lɔkɔ mentū ndáa meŋgup, é nɔŋ nnáŋa, mba zi é gɔ́ á akʉŋɛ́ mía Mɛditelanɛ. »

⁷ Cɔʼ Ndém á tswi mé yí épúp tɛ ŋgʉ̄ɔ, Kɔɔnɛye á cʉ́ʼ eshʉ̄ʼ ánɛ megaŋ afaʼ pí, ńtsɔ́ʼ epi mémpīa, ńzéŋ eshʉ̄ʼ á nnɔ wɔ maʼ‑ncu pīi, é lɛ á lezēŋ yí tɛ efhó tɛ efʉʼ, ńtɔ́ŋ mmɔʼ yīi a lɛ éwú, ŋ́gɔ́ á ŋiŋ, ŋ́ghʉ̄ páʼ Ndém a á si ŋkɔ̄ŋɔ.

⁸ Pɔ́ shʉʼ, á pɛ́te akʉ̄ɛ akʉ̄ɛ zīi á tɔ́k, éshúŋ á wɔ́p, ḿbiŋ ntó á wɔ́p á tésɔŋ Jope.

Ndém a á ega ndɔ̄kɔ njʉɔ te lí, ńtúɔ́ á Piɛ á mbū kɔɔnɛye

⁹ Njhʉ̄ é lá, pɔ́ tsé á mɛnzhɛ, ŋ́gʉɔ tɛ nnɔ̄ŋ mbátɛ á tésɔŋ Jope, á ge egɔ́, mbɔ Piɛ a á ŋkɔ́ʼ mé atetá á athʉ́ ŋgyā, á tsetsɛlɛ ezokó, ńnɔŋ eswíŋtɛ á Ndém.

¹⁰ Nzi é záŋ á yí, á nɔŋ ŋkɔ̄ŋɔ á lepfɛ̄t azō. Mɛ́ zɛ́t á nzhɛ á ndáa etsō, Ndém á lɔk mmɔʼ ntií njʉɔ te lí, ńtswī á yí azō.

¹¹ Á jʉ́ɔ lephū é tsɔ́ʼɔ ntshí, amɔ̄ʼ azō á fhó éwú esóʼo ntshí á esī, ŋ́gɔ́ páʼ mía apū nzhó zīi, mɛ́ kuʼteé meshhʉ̄ lekua lā.

¹² Mena nzhɛ zhɛ ntií ntsem, é pú ŋgɔ́ á ntē éwú, emɔ̄ʼ é gɔ́ epi é shuŋɔ levem tsɔ́p á esī, emɔ̄ʼ é gɔ́ meséŋ.

¹³ Á júʼ ŋghi ŋiŋ é tɔ́ŋ á yí, ŋ́gɛ: «Piɛ, lu á esī, ńzwhíte mpfɛ́t. »

¹⁴ Piɛ á tsɔ́ʼ ŋ́gɛ: «Azaŋa zá me Atsyapuɔ, meŋ ndaá nzi ŋgɔ́ aleʼé, ḿpfɛ́t á ajūɔ epe ɛ́, meŋ te pfɛ́t á ajūɔ nzhɛ ɛ́. »

¹⁵ Ŋghi mɛ́t é zéŋ eshúŋne á mbū yí mmɔʼ legʉɔ, ńdé ŋ́gɛ: «O te pɔŋté á letɔ̄ŋ ajū mīi, Ndém a á fók epe éwú, é lɛ ajūɔ epe ɛ́. »

¹⁶ Á jʉ́ɔ épúp, tɛ njʉ́ɔ ŋgʉɔ ntɛ́t, mía apū nzhó mɛ́t, á lɛ mbīŋ nzem mé lephū.

¹⁷ Piɛ á cʉ́ʼ ŋkwāŋte ŋ́gɛ, ejʉɔ njʉɔ te lí zīi meŋ á jʉ́ɔ la, e é páʼa ndɔkɔ ŋ́gɛ akɔ̄? Ŋ́gē ekwaŋ épúp, mbɔ epuɔ pīi Kɔɔnɛye a á ntó á wɔ́p, pɔ́ é zɛ́tte mba Simɔŋ, tɛ eshʉ̄ʼ ntshíte á nchu ŋgyā.

¹⁸ Ńtɔ́ŋ, ńzɛ́tte ŋ́gɛ, mba zīi mmɔʼ ŋge, a ke shʉ̄ʼ nnáŋ éwú, ŋ́gɔ́ lɛ Simɔŋ Piɛ, e ejʉɔ kɛ ɛ́?

¹⁹ Piɛ á náŋ á esī, ńzɛ́t ŋkwāŋa ajū mīi, a á jʉ́ɔ. Azwakne Ndém á lé á mbū yí ŋ́gɛ: «Júʼɔ́, epuɔ métɛ́t é shʉʼ ntshí á nchu ŋgyā, ńnɔŋ efāʼa á wú.

²⁰ Lu á esī, ésóʼo ŋgʉɔ ńjʉ́ɔ á wɔ́p, pɛ a pɔ́p e egʉ̄ɔ, te miʼte, meŋ mé tó á wɔ́p. »

²¹ Piɛ á lɛ esóʼo, ńdé á mbū epuɔ mɛ́t ŋ́gɛ: «Meŋ wuɔ, ŋ́gɔ́ á ŋiŋ yīi pɛ faʼa lā. Pɛ shʉʼɛ páʼa, ŋ́gɛ akɔ̄?»

²² Pɔ́ pwɛt ŋ́gɛ: «Kɔɔnɛye tɛŋgyā wɔ lʉɔ́ʼ‑ncu mé tó á wék. A á ŋiŋ ndeŋ ndeŋ, mbɔ a gɛ ŋgūʼtɛ á Ndém. Ŋgɔŋ epuɔ Yúda ntsem, é kiím lezēŋ tsí á mbɔŋɔ́. Cɔʼ Ndém a ke shʉ̄ʼ ndé á mbū yí ŋ́gɛ, a etɔ́ŋ á wú, o eshʉ̄ʼ á mba yí, yí ejúʼ anu zīi o gɔ á ndʉ́ɛ́. »

²³ Piɛ á lɛ ntswī pɔ́ kó á ŋgyā, pɔ́ a pɔ́p é láʼ. Njhʉ̄ é lá, pɔ́ a pɔ́p é lu á esī ŋgʉ̄ɔ. Pɔ́ a emɔ̄ʼ epɔ̄ memía, épuɔ Jope.

Piɛ a á ega mbɔ a á gʉɔ tɛ ŋkó á mba Kɔɔnɛye

²⁴ Pɔ́ ziŋ tɛ ndáʼ. Njhʉ̄ é lá, pɔ́ gʉɔ tɛ ŋkó á Sezale. Mbɔ Kɔɔnɛye a á ncʉ́ʼ nzem, ńtɔ́ŋ memɔʼɔ́ pí, mbɔɔ mesoó ntē pí, pɔ́ a pɔ́p é cúʼte, ńnɔŋ nzwíʼtɛ á Piɛ.

²⁵ Piɛ á gʉɔ tɛ nnɔ̄ŋ ŋkúɔ́ á mba Kɔɔnɛye, á tshí njʉ́ɔ á yí, ńnáte eshʉ̄ʼ, ŋ́gwhʉ̄ á mekhu yí, ŋ́gūʼte á yí.

²⁶ Piɛ á pʉ́ʼɛ á yí á esī, ńdé á mbū yí ŋ́gɛ: «Lu á esī, meŋ á azá á ŋiŋnɔŋ páʼ wu. »

²⁷ Á lɛ ndū á esī, Piɛ á ziŋɛ eshúŋnɛ á mbū yí, tɛ pɔ́ yí é kó á ŋgyā. Piɛ á jʉ́ɔ mbɔ epuɔ tɛ nzá, é mbú ncúʼte éwú.

²⁸ Á lé á mbū pɔ́p ŋ́gɛ: «Pɛ é si nzhɛ́ɛ á légɛ, é lepé á mbū ŋiŋ Yúda pɔ́ ŋge, á leziŋ, tɛ mbɔɔ á lewūa á yí. Táʼ, Ndém a ke tswī á gá ŋ́gɛ, meŋ te pɔŋté á gá á letɛʼte á ŋiŋ ŋ́gɛ, ŋiŋ tepɔŋ, melaʼ epe ká melaʼ nzhɛ ɛ́.

²⁹ Melaʼ épúp tɛ́ pɛ é ntɔ́ŋ á gá, meŋ ndɛ̄ ndū á esī eshʉ̄ʼ, té miʼte. Tsetsɔŋɔ, meŋ á si ŋkɔ̄ŋɔ á lezhɛ̄ anu zīi, pɛ tɔ́ŋɔ á gá melaʼ épúp. »

³⁰ Kɔɔnɛye á pwɛt ŋ́gɛ: «Á ayáʼa eleʼé lekua, páʼ meŋ ke nɔ̄ŋ eswíŋtɛ á Ndém á ŋgyā meŋ, ánɛ menu ntɛ́t mbwɛɛ́t‑njhʉ̄. Ńdɛ ŋgē ejʉ́ɔ, ŋiŋ á shʉʼ ntshí á mvhɔ meŋ, ḿmāʼ menzhó ánɛ yí, é ŋwaŋne tɛʼ.

³¹ Ńtɔ́ŋ á gá ŋ́gɛ: “Kɔɔnɛye, Ndém a á júʼ á aswiŋte jú, ńnɔŋ njʉ́ɔ menu membɔŋ mīi, o ghʉɛ ánɛ wɔ te kuʼ ánɛ azō.

³² Tó epuɔ á Jope, pɔ́ egʉɔ ntɔ́ŋ mmɔʼ ŋiŋ yīi a á éwú, ńdɔk eshʉ̄ʼ, lezēŋ tsí é gɔ́ lɛ Simɔŋ Piɛ. A ke shʉ̄ʼ éwú, pɔ́ Simɔŋ yīi, a lɔkɔ mentū ndáa meŋgup, é nɔŋ nnáŋa. Mba zi é gɔ́ á akʉŋɛ́ mía Mɛditelanɛ.”

³³ Meŋ júʼ épúp, ńdɛ ntó ŋke, mɛ́ shʉʼ ntɔ́ŋ á wú. O ó ghʉ á mbɔŋɔ́, páʼ o ó shʉʼ tɛ ŋgɔ́ á esī la. Jʉ́ɔ́, pek puú ŋgɔ́ ega tsetsɔŋɔ metsem, á mvhɔ Ndém, ŋgɔ̄ á njúʼ ŋke yīi, Atsyapuɔ Ndém a á ntsékne á mbū wu, ŋ́gɛ o eshʉ̄ʼ ntswī á mbū pek. »

Piɛ a á ega eshúŋnɛ á mbū Kɔɔnɛye pɔ́ a epuɔ pí

³⁴ Piɛ á lɛ ŋŋáʼa nchu yí, ńdé á mbū Kɔɔnɛye pɔ́ a epuɔ pí ŋ́gɛ: «Tsetsɔŋɔ, meŋ á chʉ́ nnɛ̄t nzhɛ́ ndeŋ ndeŋ ŋ́gɛ, Ndém a te ŋiŋ tɛ̄ʼte.

³⁵ Ŋiŋ a nɔŋɔ ŋgūʼtɛ á Ndém, ŋ́gɔ́ á ŋiŋ ndeŋ ndeŋ, mbɔ Ndém a á véŋ á yí véŋ. Tɛ a zi mbú ntó ánɛ aziɛ́ alāʼ lɛ́.

³⁶ Pɛ ke júʼ ŋke mbɔŋ yīi, Ndém a ke tó á mbū epuɔ Islaɛl ŋ́gɛ, Yɛɛ́so Klísto a ke shʉʼē, á letswaŋ epuɔ menɔŋ, pɔ́ a Ndém é cʉ́ʼ á taʼ nchu. Yɛɛ́so mɛ́t, a á Atsyapuɔ ŋgɔŋ epuɔ metsem.

³⁷ Ŋke wuɔ mɛ́t, é páte yīi Jáaŋ a le tswīi, á afʉʼ zīi, a le nɔ̄ŋ nnōʼo epuɔ á ntshi. Ŋke Yɛɛ́so wuɔ mɛ́t, é pú esāŋ ejʉʼ, tɛ efhó á Ŋgaliléa, ŋ́gʉɔ ŋkó á Yudéa ntsem.

³⁸ Pɛ é si nzhɛ́ɛ páʼ, Ndém a ke néŋ Azwakne zí, ánɛ Yɛɛ́so ŋiŋ Naázalɛt, ŋ́gyá á yí mete, ŋ́gɔ́ mé yí, á kʉ́ʼne egʉ́ɛ egʉ́ɛ, ŋ́ghʉ̄ɛ anu mbɔŋ, ńnɔŋ ŋkɛ́ʼɛ epuɔ pīi, mesī é lē ŋkwɛ́t á wɔ́p.

³⁹ Ḿpek puɔ metsem, é wɔ njhʉɛ‑njʉ́ɔ ánɛ menu mīi, a le ghʉ̄ á Yelósalɛm, mbɔɔ á ntē ŋgɔŋ epuɔ Yúda mɛ́t ntsem. Epuɔ Yúda é shʉʼ ŋgē emakne, ŋ́gɔ̄ á yí, ŋ́kwɛ̄te ánɛ mbaŋne paŋné, ńzwhí.

⁴⁰ Táʼ, Ndém á shʉʼ ánɛ mbáte eleʼé tɛ́t, ŋ́gē eghʉ a ezím ánɛ lewhʉ̄, ŋ́gyá á yí mete, á lɔk ntswī nnɛ̄t zi, epuɔ é jʉ́ɔ á yí.

⁴¹ Epuɔ metsem mé le ké te á yí jʉ́ɔ, ndaʼ wék pīi, Ndém a le té njhʉ̄ ntsɔ́ʼ á wék, ŋ́gɛ pek ekʉ́ʼne esáʼ éshúŋ páʼ, a le zím ánɛ lewhʉ̄. Ndém a le ghʉ̄ á zím épúp, pek a pɔ́p é pfɛ́t, ńzéŋ nnú.

⁴² Yɛɛ́so a le tswī me pek ŋ́gɛ, pek mé pɔŋteé á letswi á mbū alāʼ ŋ́gɛ, yí tɛ́ Ndém a le chʉ́ʉ̄, ńdɔk ŋghʉ̄ á ŋiŋ yīi, a záʼa ntsaŋ zɔp a epuɔ mete mbɔɔ ezɔp a mepfhō.

⁴³ Yɛɛ́so mɛ́t, tɛ́ metswi‑ŋke Ndém metsem, é le lé ánɛ lezēŋ tsí ŋ́gɛ, ŋiŋ a fíɛ́ nnɛ̄t ŋgyá mé yí, mbɔ Ndém a a shʉʼ elekne mefa ŋgaŋ, melaʼ mí. »

Azwakne Ndém á ega esóʼo ánɛ epuɔ pīi, pɔ́ té epuɔ Yúda á

⁴⁴ Piɛ á zɛ́t eshúŋne shuŋné, Azwakne Ndém á sóʼo ŋkó á ntē epuɔ metsem pīi, pɔ́ nnɔŋ njúʼɔ ashuŋne zí.

^45-46 Wɔ fɛ́ nnɛ̄t ŋgyá mé Yɛɛ́so pīi, pɔ́ a Piɛ é ke fhó á Jope eshʉ̄ʼ, é lɛ epuɔ Yúda. Pɔ́ júʼ epuɔ mɛ́t, é cʉ́ʼɛ eshúŋnɛ áa melāʼ mendɛʼɛ, ńdɔkɔ ŋgūʼtɛ á Ndém. Á pú ŋkʉ̄ʼne á wɔ́p tɛʼ, páʼ Ndém a á yá Azwakne zí á mbū epuɔ pwɔ̄ pīi, pɔ́ té epuɔ Yúda á. Piɛ á lɛ nzɛ́tte á wɔ́p ŋ́gɛ:

⁴⁷ «Azwakne Ndém á shʉʼ ánɛ epuɔ puɔ, ńdeŋ ndeŋ páʼ á le shʉ̄ʼ ánɛ pímpɛ lā. Ŋiŋ a gɔ eké nzéŋ ńdʉ̄ʼ ŋ́gɛ, mɛ́ té noʼ á wɔ́p á ntshi ɛ́ kɛ?»

⁴⁸ Ńdɛ ntswī ŋ́gɛ, mɛ́ enōʼ á wɔ́p á ntshi, ánɛ lezēŋ Yɛɛ́so Klísto. Epuɔ mɛ́t é piŋ mbúʼ mbū ŋ́gɛ, pɔ́ a Piɛ e enáʼ nnáŋ tsɔ eleʼé shɔ́ʼɔ́ lɛ́, tɛ́ a egʉ̄ɔ.