Matío 3 - Eka Eswhī

Jáaŋ Mbaptísi a á ega ntswīi ŋke Ndém

¹ Á lɛ ánɛ afʉʼ mɛ́t, Jáaŋ nnoʼ‑epuɔ á ntshi á sáʼ, á késáatswɛt Yudéa, ńnɔŋ esáʼa eshúŋɔ ŋ́gɛ:

² «Pɛ egɔ̄ nnɛ̄t zɛ, ŋgwáʼ atswhī tepɔŋ zɛ́, melaʼ mīi afʉʼ zīi, Ndém a gɔ á esáʼ lefɔ tsí, á tshóne tɛ mbáte. »

³ Jáaŋ mɛ́t a á si ŋgɔ́ á ŋiŋ yīi, Izayi ntswi‑ŋke Ndém a le lé ánɛ athū zí ŋ́gɛ: «Ŋiŋ a á késáatswɛt, ńdʉ́ɛ́ mé ŋghi teté ŋ́gɛ, pɛ ecūŋte á mɛnzhɛ Atsyapuɔ, ésēŋte meliɛ́‑nzhɛ mí, e etshí ndeŋ ndeŋ. »

⁴ Jáaŋ a lɛ késáatswɛt épúp, ḿmāʼ nzhó, mbɔ mɛ́ le lɔ̄k menɔŋ shamo tɛ́ mbáʼ. Ńzwík ekɔp ŋgup na, á mbembéŋ yí. Etsí etsō lejhʉ̄, é gɔ́ ŋgím, ŋ́ghʉ̄ ŋŋwāʼ atswɛt.

⁵ A le nɔ̄ŋ esáʼa épúp, atʉtʉ epuɔ á nɔŋ efhɔ́ɔ á Yelósalɛm, éfhɔ́ɔ á Yudéa ntsem, ḿbúu efhɔ́ɔ á eshhʉ̄ ntshi Juldɛŋ ntsem, éshʉʼɛ njʉ́ɔ á yí,

⁶ ḿvéŋɛ mefa mɔ́p á ntentā, á noʼo á wɔ́p á ntē ntshi Juldɛŋ.

Jáaŋ a á ega ntswīi ŋ́gɛ alāʼ a ewáʼ atswhī tepɔŋ zɔ́p

⁷ Jáaŋ á jʉ́ɔ páʼ epuɔ Falísia mbɔɔ epuɔ Sadúsia tɛ nzá, é si eshʉ̄ʼɛ ŋ́gɛ, a enōʼ á wɔ́p á ntshi, ńdé á mbū pɔ́p ŋ́gɛ: «Pɛ pīi pɛ yikɛ, ńzīŋɛ ŋŋɛ́tte ŋɛtté páʼ menū, awɔ́ a á shúŋ á wɛ́ ŋ́gɛ, pɛ gɔ ekʉ̄ʉ ŋgʉɔ̄ʼ zīi, Ndém a gɔ emaʼ á athū epuɔ tɛ ntswɛ́t é?

⁸ Pɛ eghʉ̄ menu membɔŋ mīi, é si ntswīi á légɛ, pɛ é wáʼ atswhī tepɔŋ zɛ́.

⁹ Pɛ epá á lelɛ ndɔ̄k áa nchu ndaʼ, ńdé ŋ́gɛ: “Pek é ndhu Ablaham.” Meŋ shúŋɔ á wɛ́ ŋ́gɛ, Ndém a kuūʼ á lesɛt metɔ́ puɔ, ńdɔk ŋghʉ̄ nzwɛt Ablaham.

¹⁰ Mɛ́ ndáʼ ŋkāʼ nza, ńdɔ̄kɔ ŋgɔ̄ á ŋkʉɔ́ʼ tɛ mbɔɔ aziɛ́ athʉ́ lɛ́ zīi, á ka ntá mbɔŋ zém ɛ́. Éfhó á esī, ékʉɔ́ʼ ánɛ meŋgaŋ, étɔ á mmók.

¹¹ Meŋ, meŋ á si nnōʼo á wɛ́ áa ntshi ndaʼ, ńdɔkɔ ntswīi á légɛ, pɛ é wáʼ atswhī tepɔŋ zɛ́. Táʼ, ndʉɛ yīi a á nzem meŋ eshʉ̄ʼɛ, a puú ntsyā á gá, tɛ meŋ zi te kūʼ yīi, meŋ gɔ eŋɔ́ʼne á esī, ésɔ̄ŋ meláŋ mí í. A a shʉʼ azí páʼā, énéŋ Azwakne Ndém ánɛ epuɔ, ézéŋ enéŋ mmók ánɛ epuɔ.

¹² A wɛɛ̄ á túŋ á mbū yí, ńdɔkɔ efwɔ́kɔ etsō tsí. Éfwɔ́k épúp, énéŋ etsi mbɔŋ á ŋkiŋ, épiŋ etɔ ekaŋne á ntē mmók yīi, é té láʼ epí í. »

Jáaŋ a á ega nnōʼo Yɛɛ́so á ntshi

¹³ Jáaŋ a le nɔ̄ŋ eshúŋnɛ épúp, Yɛɛ́so á lɛ esáʼne, éfhɔ́ɔ á Ŋgaliléa. Éshʉʼ tɛ ŋkó á lezēŋ yí, á ntē ntshi Juldɛŋ, ŋ́gɛ a enōʼ á yí á ntshi.

¹⁴ Jáaŋ á nɔŋ ndʉ̄ʼɛ, ńdʉ́ɛ á mbū yí ŋ́gɛ: «Meŋ mé eyi, o gɔ enōoʼ á gá á ntshi, o ó piŋ eshʉ̄ʼ ŋ́gɛ, meŋ enōʼ á wú á ntshi lɛ́?»

¹⁵ Tɛ́ Yɛɛ́so á tsɔ́ʼ á mbū yí ŋ́gɛ: «Véŋ ŋ́gɛ, a egɔ́ épúp tsetsɔŋɔ. O o ghʉ épúp, tɛ́ pɔkɔ elɔk ŋghʉ̄, anu tsem zīi Ndém a le léē, a ezīŋ ndeŋ ndeŋ. » Jáaŋ á lɛ mvéŋ.

¹⁶ Ńnōʼ á Yɛɛ́so á ntshi, tɛ á fhó éwú ntó. Ńdɛ ŋgē ejʉ́ɔ, lephū é tsɔ́ʼɔ ntshí, á jʉ́ɔ Azwakne Ndém á fhó éwú esóʼo, ŋ́gɔ́ páʼ akepēŋ lā, éshʉʼ nnáŋ ánɛ yí.

¹⁷ Á zéŋ njúʼ mmɔʼ ŋghi é fhó éwú ndé ŋ́gɛ: «Ŋiŋ wuɔ a á Méŋ ga, meŋ kɔ̄ɔŋ á yí tɛʼ, a ghʉʉ̄ ntē gá é gáŋte. »