Matío 28 - Eka Eswhī

Yɛɛ́so a á zím ánɛ lewhʉ̄

¹ Aleʼé aswite á kó ntɔ́k, á gɔ́ nzemɛ́nzēm ánɛ mvhɔ aleʼé ánɛ ŋgap alāʼ, Malía mɔ́ Makdala, pɔ́ eyimɔʼ Malía, é gʉɔ á njʉ́ɔ lesi,

² ŋ́kó éwú, ńdɛ ŋgē ejúʼe, esī atsetsáʼ é pú ncʉ̄ʼne. Pɔ́ jʉ́ɔ cɔʼ Atsyapuɔ á fhó á lephū esóʼo, éshʉʼ mbēkne á mía mía tɔ́ yīi, mɛ́ ke lɔ̄k ŋkápte nchu lesi, ŋ́kɔ́ʼ nnáŋ éwú.

³ Cɔʼ Atsyapuɔ mɛ́t, á le nɔ̄ŋ ŋkɛʼɛ ejʉʼ, páʼ ŋŋí mbeŋ lā, nzhó zí é fók páʼ mewɛ lā.

⁴ Wɔ píp‑lesi é jʉ́ɔ épúp, ḿbú mvɛ̄t, ńtsɔ́ʼɔ ŋŋémte á esī, ńnɔ̄ŋte éwú páʼ mepfhō epuɔ lā.

⁵ Cɔʼ Atsyapuɔ á lé mé wɔnzwí mɛ́t ŋ́gɛ: «Ndɛ́ʼ pɛ ezéŋ mbɔ́k. Meŋ á zhɛ́ á légɛ, pɛ faʼa á Yɛɛ́so, páʼ mɛ́ ke kwɛtē á yí ánɛ mbaŋne paŋné.

⁶ A te zɛ́t ega á, a á nzím ánɛ lewhʉ̄, páʼ a le lé épúp. Pɛ eshʉ̄ʼ njʉ́ɔ á ajʉʼ zīi, apfhō zí á ke nɔ̄ŋ éwú.

⁷ Pɛ egákne ŋgʉ̄ɔ eshúŋ megaŋ nnɔ pí ŋ́gɛ, a á zím ánɛ lewhʉ̄, a á pik á Ŋgaliléa á nzwíʼte pɔ́p. Pɔ́ e kó éwú tɛ́ ejʉ́ɔ á yí. Meŋ á shúŋ á wɛ́ páʼa.

⁸ Pɔ́ lɛ ŋgákne efhó á lesi ŋgʉ̄ɔ, ńnɔŋ ncɔ̄ʼɔ, táʼ, mía lekāk á ke ŋgɔ́ á ntē pɔ́p. Pɔ́ kʉte ŋgʉ̄ɔ á eshúŋɔ ajūɔ anu, á mbū nnɔ Yɛɛ́so,

⁹ ńnɔŋ ŋgʉ̄ɔ épúp, Yɛɛ́so á lɛ ŋŋwāk á mvhɔ pɔ́p, ńdé á mbū pɔ́p ŋ́gɛ: «Meŋ á tsaʼte á wɛ́. » Pɔ́ tshóte nnɛ̄t mé lezēŋ tsí, ŋ́ŋɔ́ʼne á mvhɔ yí tɛ ethū tsɔ́p é pfeŋ esī, ŋ́kúʼte mekhu mí.

¹⁰ Yɛɛ́so á lɛ ndé á mbū pɔ́p ŋ́gɛ: «Ndɛ́ʼ pɛ ezéŋ mbɔ́k. Pɛ egʉɔ eshúŋ epɔ̄ memía pá ŋ́gɛ, pɔ́ egʉ̄ɔ á Ŋgaliléa, pɔ́ e kó éwú tɛ́ ejʉ́ɔ á gá. »

Anu zīi wɔ píp‑ejʉʼ é le léē

¹¹ Wɔnzwí pwɔ̄ é nɔŋ ŋgʉ̄ɔ, ŋ́kó á mɛnzhɛ, ńjʉ́ɔ emɔ̄ʼ epuɔ ánɛ nnɔ wɔ‑maʼ ncu pīi, pɔ́ le nɔŋ mbípɛ lesi, pɔ́ nɔŋ ŋgʉ̄ɔ mé tésɔŋ, á eshúŋ wɔ nɔŋ‑epɔʼ epi melʉɛ ajūɔ tsem zīi á ntɔ́k.

¹² Éshúŋ á wɔ́p épúp, pɔ́ a mekém alāʼ é cúʼte efāʼ, tɛ ŋgyá mbwɔʼ ŋkāp á mbū wɔ maʼ‑ncu pīi é ke nɔ̄ŋ mbípɛ lesi,

¹³ ŋ́gē eyá, ńdé á mbū pɔ́p ŋ́gɛ, pɛ ekó ndé ŋ́gɛ: “Megaŋ nnɔ Yɛɛ́so é ŋgē eshʉ̄ʼ etsōʼ, pɛ nɔ̄ɔŋ ndíi, pɔ́ jʉ apfhō zí.”

¹⁴ Ŋ́gɔ́ éyi anu jʉɔ mɛ́t á whʉ á metuúŋ ŋgɔpna, pek mé zhɛ́ páʼ pek e pwɛ́ne á yí épúp, épiŋ eghʉ tɛ mmɔʼ ŋgʉɔ̄ʼ e é le ánɛ pɛ eshʉ̄ʉʼ. »

¹⁵ Wɔ lʉɔ́ʼ‑ncu é tswi ŋkāp, ŋ́ŋímne nzīŋ ánɛ páʼ mɛ́ eshúŋ á wɔ́p épúp. Anu jʉɔ mɛ́t, á le pú esaŋ ejʉʼ á tsetsɛlɛ epuɔ Yúda tɛ ntshí á ayáʼa.

Yɛɛ́so a á ega ntúɔ́ epuɔ pí á ntē ŋgɔŋ

¹⁶ Meziŋ‑ntō Yɛɛ́so ntsɔp zɛ́mɔʼɔ́ mé legēm é gʉɔ mé Ŋgaliléa, ánɛ lekwɛ̄t tsīi, Yɛɛ́so a le tswī ŋ́gɛ, pɔ́ egʉ̄ɔ mé éwú.

¹⁷ Ŋ́kó éwú, ńjʉ́ɔ á Yɛɛ́so, ŋ́ŋɔ́ʼne tɛ ethū tsɔ́p é pfeŋ esī, emɔ̄ʼ epuɔ é ké ŋgɔ́ si mmīʼte miʼte.

¹⁸ Yɛɛ́so á tshóte nnɛ̄t mé lezēŋ tsɔ́p, ńdé á mbū pɔ́p ŋ́gɛ: «Mɛ́ lē mbú ŋgyá mete ntsem á mbū meŋ, á athʉ́ lephū mbɔɔ á esī atsetsáʼ.

¹⁹ Púp, pɛ egʉ̄ɔ á ŋgɔŋ ŋgɔŋ, ŋ́ghʉ̄ epuɔ menɔŋ e ecʉ́ʼ megaŋ nnɔ pá, ńnōʼ á wɔ́p á ntshi ánɛ lezēŋ Mɔʼɔ́, ánɛ lezēŋ Mɔ́, mbɔɔ ánɛ lezēŋ Azwakne Ndém,

²⁰ ńnɔŋ nzíʼnɛ á wɔ́p á lekūʼte ajūɔ tsem zīi, meŋ ke ziʼné á wɛ́. Ḿbiŋ ŋgɔ́ mé meŋ, ḿpɛ mé náŋa egɔ́ɔ nnɔ eleʼé metsem, tɛ eláʼ etshí ánɛ afʉʼ zīi, ŋgɔŋ e gɔ á mmiī. »