Matío 26 - Eka Eswhī

Mekém alāʼ ega ntshíɛ ntāŋ Yɛɛ́so

¹ Yɛɛ́so a le māk á leshūŋ menu muɔ mɛ́t ntsem, ńdé á mbū nnɔ yí ŋ́gɛ: «Pɛ é si nzhɛ́ɛ páʼ, á zɛɛ́t eleʼé pīa, mɛ́ ejhʉ́ lekāk Páska ká?

² Mɛ́ e gɔ á Méŋ‑Ŋiŋnɔŋ wuɔ, éyá á mbū wɔ sáʼ‑alāʼ, pɔ́ evéŋ ŋ́gɛ, mɛ́ ekwɛ̄te á yí ánɛ mbaŋne paŋné. »

³ Á gɔ́ ánɛ meleʼé mɛ́t, wɔ nɔŋ‑epɔʼ epi melʉɛ, mbɔɔ mekém epuɔ Yúda, é cúʼte á atetá tɛŋgyā wɔ nɔŋ‑epɔʼ, lezēŋ tsí é gɔ́ lɛ Kayif.

⁴ Ńcúʼte épúp, ŋ́gɔ́ á taʼ nchu á légɛ, mɛ́ efāʼ eshhʉ̄ á lelɔk ŋgɔ̄ á Yɛɛ́so nzwhí, tɛ alāʼ á le zhɛ́.

⁵ Pɔ́ le ké nnɔŋ ndʉ́ɛ́ á nnɔ pɔ́p ŋ́gɛ: «Ndɛ́ʼ ḿpɛ egɔ á yí á aleʼé lekāk, ḿbɔ́k alāʼ á lecʉʼne. »

Mmɔʼ menzwí a á ega ndɔ̄kɔ alamńda nzɔ́ʼɔ athū Yɛɛ́so

⁶ Yɛɛ́so á ghʉ ŋgɔ́ á Betani, á ŋgyā Simɔŋ ŋgaŋ kaʼpáp.

⁷ Ŋ́kó nnáŋ á esī, ńnɔŋ mpfɛ́tɛ azō, mmɔʼ menzwí á tshóte nnɛ̄t mé lezēŋ tsí, ŋ́gwɛ̄ mmɔʼ ntií atūʼ, mɛ́ lɔk albaatle tɛ́ ncūŋte, alamńda zīi á teē nzwiŋ tɛʼ, á gɔ́ á ntē éwú. Ńtsɔ́ʼ atūʼ mɛ́t, ńnéŋ alamńda á athū Yɛɛ́so.

⁸ Nnɔ yí é jʉ́ɔ épúp, ńzwɛ́tte ndé ŋ́gɛ: «Menzwí yi a tseŋtɛ alamńda zi péʼe, ŋ́gɛ akɔ̄?

⁹ Á ŋgɔ́ yīi a ke gɔ́, mɛ́ swiŋ á atʉɛ́ nzwiŋ, ńdɔ̄k ŋkāp ntswíte mepūŋ. »

¹⁰ Yɛɛ́so á júʼ, ńdé á mbū pɔ́p ŋ́gɛ: «Pɛ zwɛ́ttɛ ánɛ menzwí wɔ̄, ŋ́gɛ akɔ̄? Ajū mīi a á ghʉ ánɛ meŋ, á si ŋgɔ́ á kwaʼ anu mbɔŋ.

¹¹ Pɛ a mepūŋ mé á esī efʉʼ metsem, ḿbiŋ ŋgɔ́ mé meŋ, mbɔ ḿpɛ mé té shʉʼ egɔ́ á esī efʉʼ metsem ɛ́.

¹² A á lɔk alamńda, ńté njhʉ̄ nzɔ́ʼ nnɛ̄t za, tɛ́ aleʼé zīi mɛ́ e néŋ á gá á lesi, a ekūʼ.

¹³ Meŋ shúŋɔ á wɛ́ á kwaʼ anuúnē ŋ́gɛ: mbɔɔ egɔ́ lɛ́ yīi, mɛ́ e shʉʼ enɔŋ etswii ŋke mbɔŋ éwú, á ntē ŋgɔŋ ntsem, mɛ́ e shʉʼɛ ekímɛ á menzwí wuɔ, épiŋɛ eshúŋɔ anu mbɔŋ zīi a á ghʉ, epuɔ menɔŋ e elɔkɔ nnáŋa ŋkímtɛ á yí. »

Yúdas a á ega njhʉ́ɛ á zoʼ Yɛɛ́so

¹⁴ Á tɔ́k épúp, mmɔʼ ŋiŋ ánɛ nnɔ Yɛɛ́so ntsɔp pīa mé legēm, lezēŋ tsí é gɔ́ lɛ Yúdas Iskaliɔt, á gʉɔ á mba wɔ nɔŋ‑epɔʼ epi melʉɛ,

¹⁵ ńdé á mbū pɔ́p ŋ́gɛ: «Meŋ shúŋɔ páʼ pɛ e ghʉ épúp tɛ́ egɔ á Yɛɛ́so, pɛ eyá elá á mbū meŋ ŋ̄?» Pɔ́ yá ŋkāp epak megēm tɛ́t á mbū yí.

¹⁶ Á tswí, ńdɛ nzī á lefaʼ eshhʉ̄ á lelɔk nnéŋ á Yɛɛ́so á mbū pɔ́p.

Yɛɛ́so a á ega ntúɔ́ megaŋ nnɔ pí mémpīa ŋ́gɛ, pɔ́ egʉ̄ɔ ncūŋte etsō Páska

¹⁷ Á shʉʼ ŋgɔ́ mvhɔ aleʼé ánɛ ŋgap alāʼ zīi, mɛ́ lɛɛ́ mpfɛ́tɛ mblɛ te levwi, nnɔ Yɛɛ́so é shʉʼ nzɛ́tte á yí ŋ́gɛ: «O ó si ŋkɔ̄ŋɔ ŋ́gɛ, pek ecūŋte ecú etsō lekāk Páska egɔ́?»

¹⁸ Á pwɛt ŋ́gɛ: «Pɛ egʉ̄ɔ á tésɔŋ, á mba mɛ́kiki, ńdé á mbū yí ŋ́gɛ: nziʼnɛ a á lé ŋ́gɛ, njhʉ̄ zi e é si ŋkūʼu. Yí e jhʉ́ lekāk Páska pɔ́ a nnɔ yí áa mba yí. »

¹⁹ Nnɔ Yɛɛ́so é ghʉ ndeŋ ndeŋ páʼ Yɛɛ́so a á ndé épúp, ńcūŋte etsō lekāk Páska éwú.

Yɛɛ́so a á ega eshúŋɔ á ŋiŋ yīi a á si eswīŋɛ á yí

²⁰ Á kó ŋgɔ́ eseéŋ‑njhʉ̄, Yɛɛ́so pɔ́ nnɔ yí ntsɔp pīa mé legēm, é náŋ á esī ŋgɔ̄ á mpfɛ́t azō.

²¹ Ńnɔŋ mpfɛ́tɛ azō, á gɛ: «Meŋ a shúŋ á wɛ́ á kwaʼ anuúnē, mmɔʼ ŋiŋ a á nnɔ pɛ yīi, a a shʉʼ eswiŋ á gá. »

²² Nnɔ yí é júʼ épúp, ŋ́kwhʉ́ tɛ mmī, awíɛ á zɛ́tte á yí ŋ́gɛ: «Mɔʼɔ́ wek, a ké ŋgɔ́ á gá kɛ?»

²³ Á pwɛt á mbū pɔ́p ŋ́gɛ: «Ŋiŋ yīi, apū zék yí á pote á ntē ŋgwʉ́ŋ, yí mé ŋiŋ yīi, a gʉɔ mé eswiīŋ meŋ.

²⁴ Méŋ‑Ŋiŋnɔŋ wuɔ a a shʉʼ egʉɔ áa páʼ, mɛ́ le tí ánɛ yí á ntē aŋwaʼne Ndém épúp. Táʼ, ndɔ e ké ŋgɔ́ á athū ŋiŋ wɔ̄ yīi, a gɔ á eswiīŋ Méŋ‑Ŋiŋnɔŋ wuɔ. Á lɛ mbɔŋ, á lezi mbú ŋgɔ́ le á ŋgaŋ zhí. »

²⁵ Yúdas, á ŋiŋ yīi a le nɔ̄ŋ eswiŋɛ á Yɛɛ́so, á tswí azí ashuŋne, nzɛ́tte á yí ŋ́gɛ: «Ńziʼnɛ, a ké ŋgɔ́ á gá kɛ?» Yɛɛ́so á pwɛt á mbū yí ŋ́gɛ: «Wu mé lʉ́ɛ́ épúp. »

Mbe nnɛ̄t pɔ́ metshi Yɛɛ́so

²⁶ Yɛɛ́so pɔ́ a nnɔ yí é zɛ́t nzhɛ á mpfɛ́t etsō, á pɛ́ mblɛ, ésyákne á Ndém, ḿbwɔ́ʼte, ŋ́gē egapte á mbū pɔ́p, ńdé ŋ́gɛ: «Pɛ ekɔ mpfɛ́t, ejʉɔ e é si ŋgɔ́ nnɛ̄t za. »

²⁷ Ńzéŋ ŋkʉ̄ɛ ndɔ̄ŋ meluʼ, ésyákne á Ndém, ŋ́gē eyá mé pɔ́p, ńdé ŋ́gɛ: «Pɛ metsem e ekɔ nnú.

²⁸ Emuɔ é si ŋgɔ́ metshi má, métshi eka Ndém pɔ́ a epuɔ pí. Meŋ pfɛttɛ ánɛ athū atʉtʉ epuɔ, Ndém a elɔk ndēkne mefa mɔ́p.

²⁹ Meŋ shúŋɔ á wɛ́ ŋ́gɛ: meŋ te e láʼ ezéŋ emuɔ meluʼ enú ú, tɛ eláʼ etshí ánɛ aleʼé zīi, ḿpɛ é kó á ntē Lefɔ Mɔʼɔ́ ga, tɛ́ ḿpɛ e ezéŋ nnú emi meswhī. »

³⁰ Pɔ́ a Yɛɛ́so é zɔp ntshi, ńdɔk ŋgūʼte á Ndém. Éfhó á ŋgyā ntó, ḿbē mé lekwɛ̄t Methʉ́ Olive.

Yɛɛ́so a á ega esīa ŋ́gɛ, Piɛ a a shʉʼ epuŋne á yí

³¹ Ńnɔŋ mbʉ̄ɛ̄, Yɛɛ́so á lé á mbū pɔ́p ŋ́gɛ: «Ɔ́ɔ etsōʼ wuɔ, pɛ metsem e jʉ́ɔ anu zīi, á gɔ á ŋghʉʉ̄ meŋ, épuŋne á gá, éfhó ánɛ páʼ mɛ́ le tí á ntē aŋwaʼne Ndém ŋ́gɛ: “Meŋ a shʉʼ ezwhí á mbio‑memvhō, memvhō e epú efhó á ŋgē, ńtáka ŋgʉ̄ɔte.”

³² Táʼ, afʉʼ zīi meŋ á piŋ nzím ánɛ lewhʉ̄, meŋ mbīk á Ŋgaliléa nzwíʼte á wɛ́. »

³³ Piɛ á tswí ashuŋne, ńdé á mbū yí ŋ́gɛ: «Epuɔ metsem é zi mbú efhó ánɛ anu zīi, á ghʉ á wú, ḿbūŋne á wú, mbɔ meŋ mbúu ŋgɔ́ le á wú puŋne. »

³⁴ Yɛɛ́so á pwɛt á mbū yí ŋ́gɛ: «Meŋ a shúŋ á wú á kwaʼ anuúnē, ɔ́ɔ etsōʼ wuɔ, ŋkʉɔʼ a a ghʉ ege etɔ́ŋ, mbɔ o ó lɛʼte ŋgʉɔ ntɛ́t ŋ́gɛ, o ka á gá zhɛ́ ɛ́. »

³⁵ Piɛ á pwɛt á mbū yí ŋ́gɛ: «Ŋgáŋ, meŋ gɔ le shʉ̄ʼ ndé ŋ́gɛ, meŋ ka á wú zhɛ́ ɛ̄. A zi mbú ŋgɔ́ áa lewhʉ̄, mbɔ pɔkɔ mé pú ekwhʉ́. » Nnɔ Yɛɛ́so metsem é pú nzéŋ ńdé azɔ́p épúp.

Yɛɛ́so a á ega eswíŋtɛ á Ndém á Getsemani

³⁶ Yɛɛ́so pɔ́ a nnɔ yí, é lɛ ŋgʉ̄ɔ tɛ ŋkó á amɔ̄ʼ ajʉʼ, mɛ́ tɔ́ŋ lɛ Getsemani, á lé á mbū pɔ́p ŋ́gɛ: «Pɛ ezɛ́t ega nnáŋ, meŋ egʉ̄ɔ ege eswíŋte á Ndém. »

³⁷ Ńdé épúp, ńtɔ́ŋ á Piɛ mbɔɔ ewɔŋkhʉ̄ Zebedé mémpīa, pɔ́ a pɔ́p é nɔŋ ŋgʉ̄ɔ, além zí á tsɔ́ʼɔ, á zi á levɛt.

³⁸ Ńdɛ ndé á mbū pɔ́p ŋ́gɛ: «Anu á ntē meŋ mpfɛ́tɛ á gá, tɛ ŋgɔ́ yīi meŋ gɔ ekwhʉ́. Pɛ enáŋ ega mbíp, ndɛ́ʼ ŋiŋ yímpɛ á lí. »

³⁹ Ńdé épúp, ńnáʼ ŋgʉ̄ɔ tɛ ŋgia é sak, ésóʼo ntswíʼte á esī, ŋ́ŋɔ́ʼne tɛ eshhʉ̄ yí é pfeŋ esī, éswíŋte á Ndém ŋ́gɛ: «Mɔ́ʼɔ, o kɔŋɔ, o epāʼne ejʉɔ ntūʼ ŋgʉɔ̄ʼ, tɛ meŋ ńde nú. Táʼ, akʉ̄ɛ a eké ntɔ́k áa páʼ o ó kɔŋ épúp, te ghʉ̄ʉ ajū mīi meŋ mé kɔŋ. »

⁴⁰ Éswíŋte tɛ á kuʼ, á sɛt nnɛ̄t mé lezēŋ nnɔ yí wɔ̄ epuɔ métɛ́t, ŋ́gē eshʉʼe, pɔ́ nɔŋ ndíi. Á lé á mbū Piɛ ŋ́gɛ: «Ńdɔkɔ ŋ́gɛ, pɛ ka ekūʼ á wɛ́ á lenāʼ nnáŋ á méŋ afʉʼ, té lí páʼ meŋ lā lɛ̄?

⁴¹ Pɛ egē enáŋ efʉʼ metsem, ńnɔŋ mbípɛ, éswíŋte á Ndém, ḿbɔ́k á wɛ́ á lewhʉ ánɛ táté. Ntē ŋiŋnɔŋ é kɔɔ̄ŋ á leghʉ anu mbɔŋ, mbe nnɛ̄t é piŋ ŋká ká. »

⁴² Ńdé épúp, ńzéŋ ŋgʉ̄ɔ leswhī leswhī ánɛ mbáte pīa, ńzéŋ eswíŋte á Ndém ndé ŋ́gɛ: «Mɔ́ʼɔ, a lɛ ŋgɔ́ éyi ejʉɔ ntūʼ ŋgʉɔ̄ʼ, é gɔ etɔ́k té gɔ́ yīi meŋ á nú, o eghʉ̄ áa páʼ wu mé kɔŋ. »

⁴³ Ńzéŋ mbīŋ nzem, ŋ́gē eshʉʼe, pɔ́ nɔŋ ndíi, mbɔ lelɔ̄k a á mbú ŋgɔ́ á menēk pɔ́p tɛʼ.

⁴⁴ Á tshi á wɔ́p nnéŋ, ńzéŋ ŋgʉ̄ɔ leswhī leswhī, ńzéŋ eswíŋte á Ndém ánɛ mbáte tɛ́t, ńdé áa menu mīi a á zi ndɔ̄k eswíŋte á yí.

⁴⁵ Ńzéŋ mbīŋ nzem ntswɛ́tte nnɔ yí, ńdé á mbū pɔ́p ŋ́gɛ: «Pɛ é egā nzwītɛ lɛ́? Pɛ etswiʼne ndí mbōo? Njhʉ̄ e ejʉɔ zīi e é tshóne tɛ mbáte lā. A ayi mɛ́ gɔ á efɛ́ Méŋ‑Ŋiŋnɔŋ, á mbū epuɔ tepɔŋ lāa.

⁴⁶ A ayi ŋiŋ yīi, a gɔ á eswiīŋ meŋ, a á shʉʼ tɛ mbáte la. Pɛ elū á esī, ḿpɛ egʉɔ njʉ́ɔ á yí. »

Mɛ́ é gɔ á Yɛɛ́so

⁴⁷ Yɛɛ́so a le zɛ́t eshúŋne shuŋné, Yúdas, ḿmɔʼ ŋiŋ ánɛ meziŋ‑ntō pí ntsɔp pīa mé legēm, á sáʼne, atʉtʉ epuɔ á gɔ́ á nzem yí, ŋ́gwɛ̄te mekéseŋ pɔ́ a meŋí ncu, mbɔ wɔ nɔŋ‑epɔʼ epi melʉɛ, pɔ́ mekém alāʼ mé ntó á wɔ́p.

⁴⁸ A ge egɔ́ mbɔ mɛnāŋ wɔ̄, a á nté njhʉ̄, éshúŋ ayiŋne á mbū nnɔ alāʼ mɛ́t, ŋ́gɛ: «Ŋiŋ yīi meŋ a kó etsaʼte á yí, éseŋte á yí, yí tɛ́ pɛ é si ŋkɔ̄ŋɔ. Pɛ egɔ̄ á yí. »

⁴⁹ Pɔ́ shʉʼ tɛ ndɛ̄ ŋgē ekó éwú, Yúdas á tshóte nnɛ̄t mé lezēŋ Yɛɛ́so, ńdé ŋ́gɛ: «Ńziʼnɛ, meŋ á tsaʼte á wú. » Ńnɔŋ esēŋtɛ á yí.

⁵⁰ Yɛɛ́so á pwɛt á mbū yí ŋ́gɛ: «Esoó ga, ghʉ áa ajū mīi, o ó eshʉ̄ʼ á ŋghʉɛ́. » Mvuʼ epuɔ é lɛ eshʉ̄ʼ, ńdáʼ mbū ánɛ Yɛɛ́so, ŋ́kúʼte á yí.

⁵¹ Mɛ́ lɛ ŋgē ejʉ́ɔ, mmɔʼ ŋiŋ á nnɔ epuɔ pīi pɔ́ a Yɛɛ́so é ŋgɔ́ nnɔ, á sɔŋ ŋŋí ncu á mbā, ŋ́gɔ̄ á ŋkʉɔ́ʼ ŋiŋ, ŋ́kó mbāŋ letuúŋ ŋiŋ yīi, tɛŋgyā wɔ nɔŋ‑epɔʼ a á nzāp ŋkaʼte yí.

⁵² Yɛɛ́so á lé mé yí ŋ́gɛ: «Piŋne ŋŋí ncu ju á mbā. Ŋiŋ ntsem yīi a á lɔk ŋŋí ncu, ńzwhí á ŋiŋ, a a láʼ ekwhʉ́ áa ŋŋí ncu.

⁵³ O ó kwaŋ ŋ́gɛ, a ke gɔ́ meŋ ńde lā ntɔ́ŋ á Mɔʼɔ́ ga, á gákne ntó mecɔʼ, ajūɔ memía nnɔ ntsɔp pīa mé legēm, pɔ́ shʉʼ ndhʉ̄ á athū zá lɛ̄?

⁵⁴ Meŋ ke wíʼe ŋghʉ̄ épúp, mbɔ ajʉʼ anu zīi, Ndém a leé á ntē aŋwaʼne yí ŋ́gɛ, á mbɔŋ ŋ́gɛ, a egɔ́ páʼa tɛ́ ndɔk mbō, mbɔ á ghʉʉ̄ páʼ lā tɛ́ mbō ó?»

⁵⁵ Afʉʼ mɛ́t afʉʼ mɛ́t, Yɛɛ́so á lé á mbū alāʼ ŋ́gɛ: «Pɛ é gaá ndɔ̄k meŋí pɔ́ a mekéseŋ, éshʉ̄ʼ á ŋgɔɔ̄ meŋ, páʼ pɛ gɔ á ŋgɔɔ̄ ntsɔ́ŋ ŋ́? Meŋ kɛɛ́ nzóko eleʼé tsem á ntē Mía Ŋgyā Ndém, ńnáŋa á esī nzíʼnɛ á wɛ́, pɛ láʼ te á gá pfeŋ.

⁵⁶ Táʼ, menu muɔ ntsem é ké ŋgɔ́ páʼa, tɛ́ menu mīi, metswi‑ŋke Ndém é le tíī, e elɔ̄k mbō. » Mɛ́ gɔ Yɛɛ́so épúp, megaŋ nnɔ pí metsem é pú esákne á yí ŋkʉ̄.

Wɔ sáʼ‑ŋgɔŋ epuɔ Yúda á ega nzīi á leŋak Yɛɛ́so

⁵⁷ Epuɔ pīi é ŋgɔ̄ á Yɛɛ́so lā, é lɔk á yí ŋgʉ̄ɔ mé mba Kayif, á tɛŋgyā wɔ nɔŋ‑epɔʼ. Mbɔ wɔ kɛ́ʼte‑mbé Ndém, pɔ́ mekém alāʼ é mbú ncúʼte éwú.

⁵⁸ Piɛ á gɔ́ á tɛ nzem nzhɛ̄nɛ á Yɛɛ́so, tɛ ndáʼ ŋkó á mba tɛŋgyā wɔ nɔŋ‑epɔʼ, ŋ́kó azí á atetá, ńnáŋ á nnɔ megaŋ afaʼ, ŋ́gɔ̄ á njʉ́ɔ páʼ ajʉɔ anu á emi épúp.

⁵⁹ Wɔ nɔŋ‑epɔʼ epi melʉɛ, pɔ́ a megaŋ asāʼ metsem, é nɔŋ efāʼa anu zīi, pɔ́ e tshí á athū Yɛɛ́so tɛ́ mɛ́ etsīa éwú, ńzwhí á yí,

⁶⁰ ḿbiŋ nnɔ̄ŋ te njʉ́ɔ ɔ́. Tɛ mbɔɔ páʼ wɔ shúŋ epoó‑anu tɛ nzáne é le shʉ̄ʼ azɔ́p. Tɛ ŋgē ezoko, epuɔ mémpīa é tshóte nnɛ̄t,

⁶¹ ńdé ŋ́gɛ: «Ŋiŋ wuɔ a ke lé ŋ́gɛ, yí gɔ eták á Mía Ŋgyā Ndém, ḿbiŋ ndɔ̄k eleʼé tɛ́t, ńzéŋ ŋkwɛ́t. »

⁶² Tɛŋgyā wɔ nɔŋ‑epɔʼ á lu á esī, ńzɛ́tte á Yɛɛ́so ŋ́gɛ: «O te wɛ̄ anu zīi, o o pwɛt ɛ́ lɛ̄? Epuɔ puɔ é swiŋ á wú ejʉɔ ntií páʼa, o te júʼ lɛ́?»

⁶³ Yɛɛ́so á pú te tsɔ́p. Tɛŋgyā wɔ nɔŋ‑epɔʼ á zéŋ nzɛ́tte á yí ŋ́gɛ: «Lɔk lezēŋ Ndém yīi a naáŋ ntē, ŋ́kā, éshúŋ á wék, kɛɛ wu mé Nzaʼ‑Ŋkhʉ, á Méŋ Ndém lɛ́. »

⁶⁴ Yɛɛ́so á pwɛt á mbū yí ŋ́gɛ: «O ó lé épúp. Táʼ, kwaʼ anuúnē, meŋ shúŋɔ á wɛ́ ŋ́gɛ, tɛ efhó tsetsɔŋɔ, pɛ e shʉʼ ejʉ́ɔ páʼ Méŋ‑Ŋiŋnɔŋ wuɔ a naáŋ á ŋkɔʼɔ́ apū ete Atsyantsɔp Ndém. Pɛ e shʉʼ ezéŋ ejʉ́ɔ páʼ, a fhɔ́ɔ á lephū eshʉ̄ʼɛ, á ntē alɔ. »

⁶⁵ Tɛŋgyā wɔ nɔŋ‑epɔʼ á júʼ épúp, ésīate menzhó á mbe nnɛ̄t yí méŋwɛ̄t, ńdé ŋ́gɛ: «A á zɔte á Ndém. Anu á ke ŋgɔ́ páʼa, ḿpɛ é zóko nzéŋɛ efāʼa wɔ njhʉɛ‑njʉ́ɔ kɛ? Pɛ é júʼ páʼ a á zɔte á Ndém.

⁶⁶ Pɛ é kwaŋ azɛ́ ŋ́gɛ akɔ̄?» Epuɔ metsem é pwɛt ŋ́gɛ: «Á pɔŋ ŋ́gɛ mɛ́ ezwhí á yí zwhí. »

⁶⁷ Ńdɛ nzī á letsok mekī á eshhʉ̄ yí, ńtémte mbū ánɛ yí. Emɔ̄ʼ é tém mbū á metuúŋ yí,

⁶⁸ ńnɔŋ ndʉ́ɛ́ ŋ́gɛ: «Wu Nzaʼ‑Ŋkhʉ, ghʉ anu ntswi‑ŋke Ndém, ńtá á ŋiŋ yīi, a á tswá á wú, pek ejʉ́ɔ. »

Piɛ a á ega mbūŋnɛ á Yɛɛ́so

⁶⁹ Á ge egɔ́ épúp, Piɛ á náŋ á apɛ́ á atetá. Mmɔʼ mɔ́ menzwí, ŋ́gɔ́ á ŋgaŋ afaʼ á mba mɛ́t, á tshóte nnɛ̄t mé lezēŋ tsí, ńdé ŋ́gɛ: «O ó ajú mmɔʼ ŋiŋ yīi, pɔ́ a Yɛɛ́so ŋiŋ Ŋgaliléa é kɛɛ́ nziŋɛ. »

⁷⁰ Piɛ á lɛʼte, á mvhɔ epuɔ metsem, ńdé ŋ́gɛ: «Meŋ ka zhɛ́ anu zīi o shúŋɔ lā á. »

⁷¹ Ńdɛ efhó éwú, ńnɔŋ ŋgʉ̄ɔ mé nchu atetá, mmɔʼ ŋgaŋ afaʼ ndɛʼɛ, ŋ́gɔ́ á mɔ́ menzwí, á jʉ́ɔ á yí, ńdé á mbū epuɔ pīi é ŋgɔ́ á ajʉʼ mɛ́t ŋ́gɛ: «Ŋiŋ wuɔ, pɔ́ a Yɛɛ́so ŋiŋ Naázalɛt mé ŋgɔ́ nnɔ. »

⁷² Piɛ á zéŋ ndɛ̄ʼte leswhī leswhī tɛ ŋkā, ńdé ŋ́gɛ: «Meŋ ka ŋiŋ wɔ̄ yīi, o lʉ́ɛ́ lā zhɛ́ ɛ́. »

⁷³ Méŋ afʉʼ á tɔ́k, epuɔ pīi é ŋgɔ́ ajʉʼ mɛ́t, é tshóte nnɛ̄t, ńdé á mbū Piɛ ŋ́gɛ: «Á té anu efaʼ efaʼ á, o ó ajú mmɔʼ ŋiŋ nnɔ yi. Ntií á wú á lelɔk eshúŋne, e é si ntswīi ajʉʼ zīi o fhɔ́ɔ éwú. »

⁷⁴ Piɛ á zi á leka meka ndé ŋ́gɛ: «Ndém á lɛ nzwhí á gá. Meŋ te si zhɛ́ɛ á ŋiŋ wuɔ ɔ́. » Ŋkʉɔʼ á liɛ ntɔ́ŋɔ.

⁷⁵ Piɛ á lɛ ŋkímte páʼ Yɛɛ́so a ke lé á mbū yí ŋ́gɛ: «Ŋkʉɔʼ a a shʉʼ ege etɔ́ŋ, mbɔ o ó lɛʼte ŋgʉɔ ntɛ́t ŋ́gɛ, o ka gá zhɛ́ ɛ́. » Ŋ́kímte épúp, éfhó á atetá ntó, ḿbú ndā mé ŋgʉɔ̄ʼ.