Matío 25 - Eka Eswhī

Ashuŋne lepúʼ ánɛ epɔ̄ ŋgɔ legēm

¹ Yɛɛ́so á zéŋ ndé ŋ́gɛ: «Lefɔ Ndém é swhií anu epɔ̄ ŋgɔ legēm pīi, pɔ́ le tswíʼ meláam pɔ́p, ńdɔk ntó ŋ́gɔ̄ á nzwíʼte tɛnzwí ŋge.

² Epi métáa é gɔ́ á nnɔ éwú, ŋ́gɔ́ metsetseŋ, epi métáa é gɔ́ meghi.

³ Mbɔ metsetseŋ epɔ̄ ŋgɔ, é ŋgē etswíʼ meláam pɔ́p, pɔ́ té wɛ̄ emɔ̄ʼ mevɛ̄t ndɛʼɛ ɛ́.

⁴ Meghi epɔ̄ ŋgɔ, é ge etswíʼ epɔ́p, ńnéŋ emɔ̄ʼ mevɛ̄t ánɛ ndāŋ ndɛʼɛ.

⁵ Páʼ tɛnzwí ŋge a á náŋ á leshʉʼ lā, pɔ́ metsem é pú ŋŋíʼ ndí.

⁶ Á kó ŋgɔ́ á tée‑etsōʼ, mɛ́ júʼ ŋiŋ á lé mé nte ŋ́gɛ: “Tɛnzwí ŋge a wuɔ. Pɛ etó ntswɛ́tte á yí.”

⁷ Epɔ̄ ŋgɔ pwɔ̄ legēm é júʼ épúp, ḿbú ndū á esī metsem, ḿbɛ́tte meláam pɔ́p.

⁸ Metsetseŋ é lé á mbū meghi ŋ́gɛ: “Pɛ elɛ ŋgyá á wék á méŋ agáʼ mevɛ̄t. Epék meláam é cʉ́ʼɛ mbí pií.”

⁹ Meghi é tsɔ́ʼ ŋ́gɛ: “Ŋgáŋ, pek gɔ le wɛ̄ tɛ é kuʼ á mbū pek, ńzéŋ ŋkūʼ á mbū pɛ ɛ́. Pɛ elɛ ŋgʉ̄ɔ á mbū megaŋ esaá, ńzó emɛ́.”

¹⁰ Pɔ́ nɔŋ ŋgʉ̄ɔ mé njuɔ́, tɛnzwí ŋge á lɛ eshʉ̄ʼ. Pɔ́ a epɔ̄ ŋgɔ pīi pɔ́ mbɛ́tte, é kó á ŋgyā lekāk, mɛ́ lɛ ŋkɛ̄ nchu ŋgyā.

¹¹ Mɛ́ kó nnáŋ tɛ njúʼ epi emɔ̄ʼ epɔ̄ ŋgɔ é shʉʼ azɔ́p, ńdé ŋ́gɛ: “Ŋkɔbé, ŋkɔbé, lɛ ntsɔ́ʼ nchu ŋgyā á mbū pek.”

¹² Á tsɔ́ʼ á mbū pɔ́p ŋ́gɛ: “Meŋ shúŋɔ á wɛ́ á kwaʼ anuúnē ŋ́gɛ, meŋ te si nzhɛ́ɛ á wɛ́ ɛ́.”

¹³ Yɛɛ́so á ge emakne ndé ŋ́gɛ, pɛ egē enáŋ, ńnɔŋ mbípɛ, melaʼ mīi, pɛ te si nzhɛ́ɛ kɛ aleʼé lɛ́ɛ, kɛ njhʉ̄ lɛ́ɛ, ézi meŋ a a fú ezéŋ eshʉʼ ɛ́.

Ashuŋne lepúʼ ánɛ megaŋ afaʼ métɛ́t

¹⁴ «Lefɔ Ndém e láʼ egɔ́ páʼ anu mmɔʼ ŋiŋ yīi, a le gē egʉɔ mé leziŋ, ńtɔ́ŋ megaŋ afaʼ pí, ńtsékne ŋkāp zi á mbū pɔ́p.

¹⁵ Ŋ́gyá á mbū awíɛ awíɛ ánɛ páʼ e gɔ ekūuʼ á mbū yí. Ŋ́gyá á mbū mmɔʼ ŋiŋ ŋkhʉ táa. Ŋ́gyá á mbū mmɔʼ ŋkhʉ pīa, ŋ́kó ŋgyá á mbū mmɔʼ ŋkhʉ, ńdɛ ŋgʉ̄ɔ.

¹⁶ Ŋgaŋ afaʼ yīi, mɛ́ le yá ŋkāp ŋkhʉ táa á mbū yí lā, á gʉɔ ndɔ̄k ŋkāp mɛ́t ntáŋ esaá, tɛ njhʉ́ apɛ emɔ̄ʼ ŋkhʉ táa.

¹⁷ Eyi mɛ́ le yá ŋkāp ŋkhʉ pīa á mbū yí lā, á jhʉ́ azí apɛ mmɔʼ ŋkāp ŋkhʉ pīa.

¹⁸ Ḿbiŋ eshʉ̄ʼ á mbū ŋiŋ yīi, mɛ́ le yá ŋkhʉ á mbū yí lā, á gʉɔ, ńtúŋ lephʉ̄ á esī, éféŋ ŋkāp mɔʼɔ́ yi wɔ̄ éwú.

¹⁹ Á náʼ nzī nnáŋ, mɔʼɔ́ megaŋ afaʼ pwɔ̄ á kɔ́ʼ, pɔ́ a pɔ́p é ghʉ nnáŋ á esī, ŋ́gɔ̄ á njʉ́ɔ páʼ ŋkāp zi e ké cʉ́ʼ nzīŋ épúp.

²⁰ Ŋiŋ yīi mɛ́ le yá ŋkāp ŋkhʉ táa á mbū yí lā, á tshóte nnɛ̄t, ńtswī mmɔʼ ŋkāp ŋkhʉ táa, ńdé ŋ́gɛ: “Ŋkɔbé, o le yá ŋkāp á mbū meŋ ŋkhʉ táa, mmɔʼ e zeéŋ ŋgɔ́ ejʉɔ ŋkhʉ táa, ézi meŋ ke cʉ́ʼ njhʉ́ éwú.”

²¹ Mɔʼɔ́ yí á lé á mbū yí ŋ́gɛ: “Meŋ á kɔŋte á wú. O ó mbɔŋ ŋgaŋ afaʼ yīi, mɛ́ gɔ etém nzem ŋgyá á mbū yí. Páʼ o ke lɔ̄k anuúnē ŋghʉ̄ mezízí menu lā, meŋ a tsékne memía menu á mbū wu. Shʉʼɛ̄, pɛ mɔʼɔ́ wu e epúte ŋkák.”

²² Ŋiŋ yīi mɛ́ le yá ŋkhʉ pīa á mbū yí lā, á tshóte azí nnɛ̄t, ńdé ŋ́gɛ: “Ŋkɔbé, o le yá ŋkāp á mbū meŋ ŋkhʉ pīa, mmɔʼ e zeéŋ ŋgɔ́ ejʉɔ ŋkhʉ pīa, ézi meŋ ke cʉ́ʼ njhʉ́ éwú.”

²³ Mɔʼɔ́ yí á lé á mbū yí ŋ́gɛ: “Meŋ á kɔŋte á wú. O ó mbɔŋ ŋgaŋ afaʼ yīi, mɛ́ gɔ etém nzem ŋgyá á mbū yí. Páʼ o ke lɔ̄k anuúnē ŋghʉ̄ mezízí menu lā, meŋ a tsékne memía menu á mbū wu. Shʉʼɛ̄, pɛ mɔʼɔ́ wu e epúte ŋkák.”

²⁴ Ŋiŋ yīi mɛ́ le yá ŋkhʉ á mbū yí lā, á tshóte azí nnɛ̄t, ńdé ŋ́gɛ: “Ŋkɔbé, meŋ nde zhɛ́ á légɛ, o ó ŋiŋ, ŋ́kʉ̄ʼne ejʉʼ, o te gē efaʼ etsō á ajʉʼ, mbɔ o le jʉ́ʼ ɛ́, o te gē ekáp azō á ŋkāʼ, mbɔ o le phī ɛ̄.

²⁵ Meŋ nde zhɛ́ épúp, ńnɔŋ ncɔ̄ʼɔ, ŋ́gʉɔ ntúŋ esī, éféŋ ŋkāp ju éwú. E ejʉɔ.”

²⁶ Mɔʼɔ́ yi á pwɛt á mbū yí ŋ́gɛ: “O ó tepɔŋ ŋgaŋ afaʼ, ŋ́gɔ́ á ndɔ́ŋ. O ke nɔ̄ŋ nzhɛ́ɛ á légɛ, meŋ te gē efaʼ etsō á ajʉʼ, mbɔ meŋ nde jʉ́ʼ ɛ̄, meŋ te gē ekáp azō á ŋkāʼ, mbɔ meŋ nde phī ɛ̄.

²⁷ O ke nɔ̄ŋ nzhɛ́ɛ épúp, akɔ̄ á ghʉ, o te gʉ̄ɔ nnéŋ ŋkāp za á báaŋ, meŋ ndáʼ ŋkɔ́ʼ, ŋ́gē efóke, apɛ á zápne éwú ū?”

²⁸ Ńdɛ ndé á mbū epuɔ pīi, é ŋgɔ́ á ajʉʼ mɛ́t ŋ́gɛ: “Pɛ efhó á mbū yí, ŋ́kú ŋkāp za ŋkhʉ, ŋ́gyá á mbū ŋiŋ yīi, a á pú ŋgwɛ̄ ŋkāp á taʼ ntsāʼ lā.

²⁹ Pɛ ezhɛ́ á mbɔŋɔ́ á légɛ, mɛ́ e shʉʼ etswiʼne azō áa mbū ŋiŋ yīi, a á nzi ŋgwɛ̄ tɛ á zá, a epú ŋgwɛ̄, a etswiʼne nzá. Ŋiŋ yīi a kaá ŋgwɛ̄ azō ɔ́, mɛ́ ekú mbɔɔ méŋ agáʼ yīi, a á nzi ŋgwɛ̄.

³⁰ Ḿbiŋ ŋgɔ́ mé tepɔŋ ŋgaŋ afaʼ wɔ̄, pɛ egɔ̄ á yí mmāʼ á apɛ́, á ntē nzém, ájʉʼ zīi, mɛ́ é éwú ndaa mpfɛ́tɛ mesɔŋ.”»

Méŋ‑Ŋiŋnɔŋ a a fú ezáʼ ntsaŋ zɔp a epuɔ menɔŋ

³¹ «A láʼ ekuʼ afʉʼ zīi, Méŋ‑Ŋiŋnɔŋ a piŋɛ nzem á ntē shʉ́shɔ́k yí, pɔ́ a mecɔʼ Ndém metsem e egɔ́ nnɔ. A elɛ nnáŋ ánɛ akɔʼ lefɔ zí.

³² Melāʼ ntsem e eshʉʼ ncúʼte á mvhɔ yí, a efāk epuɔ menɔŋ nzhɛ pīa, ńdeŋ ndeŋ páʼ, mbio‑mvhō a faka menjʉnjhʉ ánɛ memvhō lā.

³³ Étshí epuɔ membɔŋ á ŋkɔʼɔ́ apū ete yí, épiŋ etshí epuɔ tepɔŋ á ŋkɔʼɔ́ apū tswioɛ.

³⁴ Méŋ‑Ŋiŋnɔŋ mɛ́t, ŋgɔ́ á efɔ, a elɛ ndé á mbū epuɔ pīi, pɔ́ é ánɛ ŋkɔʼɔ́ apū ete yí ŋ́gɛ: “Pɛ pīi Mɔʼɔ́ ga a lē nnéŋ mbwɛ́né ánɛ pɛ, pɛ eshʉʼ ŋkó á ntē lefɔ tsí tsīi, a le cuŋtē ndɔk ńzwíʼte á wɛ́, tɛ efhó páʼ a le nɔ̄ŋ ŋgɔŋ.

³⁵ Pɛ eshʉʼ ŋkó éwú melaʼ mīi, nzi e le nɔ̄ŋ nzáŋa á gá, pɛ eyá á gá azō meŋ mpfɛ́t. Agāk zá á nɔŋ eshhʉ́ɛ, pɛ eyá á gá ntshi meŋ nnú. Meŋ ndɛ á mbū pɛ, ŋ́gɔ́ á ŋiŋ ndɛʼɛ, pɛ ekókne á gá.

³⁶ Meŋ ndɛ atseŋ te nzhó, pɛ eyá á gá nzhó meŋ emāaʼ. Meŋ nde nɔ̄ŋ ŋgɔɔ, pɛ eshʉ̄ʉʼ efúŋ á gá. Meŋ ndɛ á ŋgyā atʉɛ́, pɛ eshʉ̄ʉʼ éwú ncʉ̄te á gá.”

³⁷ Wɔ júʼ‑nchu Ndém puɔ mɛ́t, e elɛ mbwɛ̄t á mbū yí ŋ́gɛ: “Atsyapuɔ, pek le jʉ́ɔ á wú egɔ́, nzi é nɔŋ nzáŋa á wú, pek eyá á wú azō, o epfɛ́t ē? Agāk jú á nɔŋ eshhʉ́ɛ, pek eyá á wú ntshi, o enú ū?

³⁸ Pek le jʉ́ɔ á wú egɔ́, o gɔ́ á ŋiŋ ndɛʼɛ, pek ekókne á wú ú? Ŋ́gɔ́ atseŋ te nzhó, pek eyá á wú nzhó, o emaʼ ē?

³⁹ Pek le jʉ́ɔ á wú egɔ́, o nɔŋ ŋgɔ̄ɔ, o gɔ́ á ŋgyā atʉɛ́, pek eshʉ̄ʉʼ ncʉ̄te á wú ú?”

⁴⁰ Efɔ a etsɔ́ʼ á mbū pɔ́p ŋ́gɛ: “Meŋ a shúŋ á wɛ́ á kwaʼ anuúnē. Efʉʼ metsem yīi, pɛ le ghʉ̄ épúp tɛ mbɔɔ á mbū méŋ agáʼ mɔ́ á nnɔ epuɔ pá, pɛ lɛ páʼā, ńdɔkɔ ŋghʉ̄ɛ áa mbū meŋ.”

⁴¹ Epuɔ pīi é ŋgɔ́ á ŋkɔʼɔ́ apū tswioɛ yí lā, a elé mé pɔ́p ŋ́gɛ: “Pɛ pīi Ndém a le jʉ́ɔ ŋ́gɛ, pɛ é megaŋ epe, pɛ efhó á lezēŋ meŋ ŋgʉ̄ɔ tɛ ŋgia e esāk, mé ntē mmók yīi é té láʼ epí í, mbɔ a lē ncuŋte á mbū Sɛ́ta pɔ́ a mecɔʼ pí.

⁴² Pɛ egʉ̄ɔ mé éwú melaʼ mīi, nzi e le nɔ̄ŋ nzáŋa á gá, pɛ te eyá á gá azō meŋ epfɛ́t ɛ́. Agāk zá á le nɔ̄ŋ eshhʉ́ɛ, pɛ te eyá á gá ntshi meŋ enú ú.

⁴³ Meŋ ndɛ á ŋiŋ ndɛʼɛ, pɛ te á gá kókne. Ŋ́gɔ́ atseŋ te nzhó, pɛ te eyá á gá nzhó meŋ emāʼ á. Meŋ nde nɔ̄ŋ ŋgɔɔ, meŋ ndɛ á ŋgyā atʉɛ́, pɛ te eshʉ̄ʼ ncʉ̄te á gá á.”

⁴⁴ Pɔ́p azɔ́p, e ezéŋ mbwɛ̄t á mbū yí ŋ́gɛ: “Atsyapuɔ, pek le jʉ́ɔ á wú egɔ́, nzi é nɔŋ nzáŋa á wú, agāk jú á nɔŋ eshhʉ́ɛ, o gɔ́ á ŋiŋ ndɛʼɛ, o gɔ́ atseŋ te nzhó, o nɔŋ ŋgɔ̄ɔ, o gɔ́ á ŋgyā atʉɛ́, tɛ́ pek te á wú etswíte ē?”

⁴⁵ A elɛ ntsɔ́ʼ á mbū pɔ́p ŋ́gɛ: “Meŋ a shúŋ á wɛ́ á kwaʼ anuúnē. Efʉʼ metsem yīi, pɛ kɛ te ghʉ̄ épúp, tɛ mbɔɔ á mbū méŋ agáʼ mɔ́ ɔ́, á lɛ páʼā, pɛ zéŋɛ te ndɔ̄kɔ ŋghʉ̄ɛ épúp ánɛ meŋ ɛ́.”

⁴⁶ Epuɔ puɔ mɛ́t, e egʉ̄ɔ mé alāʼ ŋgʉɔ̄ʼ te mi. Wɔ júʼ‑nchu Ndém, e egʉ̄ɔ mé lezēŋ Ndém, pɔ́ a pɔ́p mé ecʉ́ʼɛ mbúu nnáŋa. »