Matío 22 - Eka Eswhī

Ashuŋne lepúʼ ánɛ anu alaá‑ŋgyā

¹ Yɛɛ́so á zéŋ ndɔ̄k ashuŋne lepúʼ, ńdé á mbū pɔ́p ŋ́gɛ:

² «Lefɔ Ndém é si ŋgɔ́ páʼ anu mmɔʼ efɔ yīi, a le tɔ́ŋ lekāk alaá‑ŋgyā méŋ yi.

³ Ńtó mecɔʼ pí ŋ́gɛ, pɔ́ egʉɔ ntɔ́ŋ epuɔ pīi, mɛ́ ŋgó á wɔ́p lekāk. Pɔ́ kó ndʉ̄ʼ á wɔ́p á leshʉʼ.

⁴ Á kó nzéŋ ńtó emɔ̄ʼ mecɔʼ pí ŋ́gɛ, pɔ́ egʉɔ ndé á mbū epuɔ pīi, mɛ́ ŋgó á wɔ́p lekāk ŋ́gɛ, yí é ndáʼ ntswī mɛ́ zwhí mefɔŋ mí, ńzwhí mefwɛ̄t na pí, ńcūŋte etsō tɛ ntshí. Ŋ́gɛ akʉ̄ɛ akʉ̄ɛ á ndáʼ ŋgɔ́ mbō po. Pɔ́ eshʉ̄ʼ lekāk.

⁵ Pɔ́ kó njúʼ, mbú te lɔ̄k ntɔ́ŋ azō ɔ́, ńzɛ́t ŋgʉ̄ɔ áa ejʉʼ tsɔ́p. Mmɔʼ ŋgaŋ á gʉɔ mé ŋkāʼ yí, eyi mmɔʼ á gʉɔ mé esaá yí.

⁶ Emɔ̄ʼ é gɔ mecɔʼ efɔ pwɔ̄, ŋ́gyá á wɔ́p ŋgʉɔ̄ʼ, ńzwhí á wɔ́p.

⁷ Efɔ á kó njúʼ anu jʉɔ mɛ́t, ntɔ̄ŋ yí é fuʼ. Á tó wɔ maʼ‑ncu pí, pɔ́ gʉɔ nzwhíte mefwɛ̄t pwɔ̄, ńtɔ̄ á tésɔŋ wɔp.

⁸ Efɔ á piŋ ndé á mbū mecɔʼ pí ŋ́gɛ, mɛ́ ndáʼ mbú mbɛ́tte etsō lekāk tɛ ntshí, epuɔ pīi mɛ́ ŋgó á wɔ́p, é piīŋ te kūʼ epuɔ pīi, pɔ́ gɔ eshʉ̄ʼ mpfɛ́t ɛ́.

⁹ Púp, pɛ egʉ̄ɔ á mefakné‑nzhɛ, ńtɔ́ŋ epuɔ metsem pīi, pɛ é jʉ́ɔ á wɔ́p, pɔ́ eshʉ̄ʼ ánɛ lekāk alaá‑ŋgyā cʉɔ.

¹⁰ Mecɔʼ efɔ pwɔ̄, é tó ŋgʉ̄ɔ mefakné‑nzhɛ, ńcúʼte epuɔ metsem pīi, pɔ́ é jʉ́ɔ á wɔ́p, épuɔ membɔŋ mbɔɔ epuɔ tepɔŋ, ńtɔ́ŋ á wɔ́p ánɛ lekāk, pɔ́ shʉʼ ŋkó tɛ ŋgyā é ló.

¹¹ Efɔ á kó á ŋgyā lekāk, ŋ́gɔ̄ á njʉ́ɔ mege, ńjʉ́ɔ mmɔʼ ŋiŋ, mbɔ a kaá nzwík nzhó lekāk á,

¹² ńdé á mbū yí ŋ́gɛ: “Esoó ga, o ó gaá ŋkó ega té zwík nzhó lekāk ē?” Ŋiŋ wuɔ mɛ́t á pú te pwɛ̄ɛt.

¹³ Efɔ á lɛ ndé á mbū emɔ̄ʼ mecɔʼ pí ŋ́gɛ, pɔ́ egɔ̄ á yí, ŋ́kwɛ́t mekhu mí pɔ́ mbū mí, ḿmāʼ á yí á apɛ́ á ntē nzem, ájʉʼ zīi, mɛ́ éwú ndaa mpfɛ́tɛ mesɔŋ. »

¹⁴ Yɛɛ́so á ge emakne, ńdé ŋ́gɛ: «Ndém a á si ntɔ́ŋɔ epuɔ tɛ nzá ŋ́gɛ, pɔ́ eshʉʼ ŋkó á ntē lefɔ tsí. Táʼ, a a ké eláʼ etsɔ́ʼ áa ntaʼné shɔ́ʼɔ́ lɛ́. »

Mɛ́ é ega ntátɛ á Yɛɛ́so ánɛ anu lemaʼ ncup alāʼ

¹⁵ Á gɔ́ amɔ̄ʼ aleʼé, epuɔ Falísia é cúʼte efāʼ páʼ pɔ́ e ghʉ épúp, tɛ́ ge egɔ á Yɛɛ́so, mbɔ pɔ́ é lɔk ashuŋne ndʉ̄ʼ á yí letā.

¹⁶ Ńtó megaŋ nnɔ pɔ́p, mbɔɔ emɔ̄ʼ epuɔ ánɛ nnɔ Elōde á mbū yí. Pɔ́ gʉɔ nzɛ́ttɛ á yí ŋ́gɛ: «Ńziʼnɛ, pek é si nzhɛ́ɛ á légɛ, o gɛ mbúu eshúŋɔ áa anuúnē. O ó si ntswīi epuɔ á kwaʼ mɛnzhɛ yīi, Ndém a á si ŋkɔ̄ŋɔ ŋ́gɛ, mɛ́ ezīŋ éwú, ńzíʼnɛ té pɔ́k lezēk ŋiŋ. Ḿbú te epuɔ tɛ̄ʼte.

¹⁷ Lɛ eshúŋ á wék á ajú akwaŋte ánɛ anu jʉɔ: “Lepé tsímpɛ é veéŋ ŋ́gɛ, mɛ́ emāʼ ncup á mbū ŋwɛ́t ŋgɔŋ Lóma, kɛ ŋgáŋ ŋ́?”»

¹⁸ Yɛɛ́so á zhɛ́ akwaŋte tepɔŋ zīi, á athū pɔ́p, ńdé mé pɔ́p ŋ́gɛ: «Megaŋ ŋkɔŋ menēk, pɛ lʉʼɛ á gá letā melaʼ akɔ̄?

¹⁹ Pɛ efāʼ apak ŋkāp zīi, mɛ́ lɔkɔ mmāʼa ncup, ńdɔk eshʉ̄ʼ meŋ ejʉ́ɔ. » Pɔ́ faʼ apak ŋkāp, ŋ́gyá á mbū yí.

²⁰ Á zɛ́tte á wɔ́p ŋ́gɛ: «Athū ŋiŋ jʉɔ zīi á éwú la, á azi awɔ́? Lezēŋ é gɔ́ etsi awɔ́?»

²¹ Pɔ́ pwɛt ŋ́gɛ: «É etsi ŋwɛ́t ŋgɔŋ Lóma, athū á zéŋ ŋgɔ́ azí. » Á lé mé pɔ́p ŋ́gɛ: «Á gɔ́ épúp, ajū mīi á azi ŋwɛ́t ŋgɔŋ Lóma, pɛ eyá á mbū yí. A zīi á azi Ndém, pɛ eyá á mbū Ndém. »

²² Pɔ́ júʼ anu jʉɔ mɛ́t, á pú ŋkʉ̄ʼne á wɔ́p tɛʼ. Pɔ́ tshi á yí nnéŋ, ŋ́gʉ̄ɔ.

Yɛɛ́so a á ega mbwɛ̄tɛ anu ánɛ lezīm ánɛ lewhʉ̄

²³ Aleʼé mɛ́t, emɔ̄ʼ epuɔ nnɔ Sadúsia é shʉʼ njʉ́ɔ á Yɛɛ́so. Epuɔ Sadúsia é si ŋgɔ́ epuɔ pīi pɔ́ gɛ ndʉ́ɛ́ ŋ́gɛ, mɛ́ e té fú ezím ánɛ lewhʉ̄ ɛ́. Pɔ́ shʉʼ njʉ́ɔ á Yɛɛ́so épúp, ńzɛ́tte á yí anu jʉɔ ŋ́gɛ:

²⁴ «Ńziʼnɛ, Mɔɔ́sɛ a le lé ŋ́gɛ: ŋiŋ a kwhʉ́ɛ té mɔ́, ntsiʼnzem yi á cʉ́ʼ esōk á mpfók, ńzhí ewɔŋkhʉ̄, ńdɔk mbwɛ̄t ŋgyā ŋgik yi mɛ́t.

²⁵ Á épúp tɛ́, mmɔʼ ŋiŋ a lɛ éwú á alāʼ pímpɛ ega, ŋ́gwɛ̄ mbaŋa esambīa, ŋgaŋ mvhɔ á lá ŋgyā, éshʉʼ ŋkwhʉ́ té wɛ á mɔ́, ńtshī á mpfók yi nnéŋ, ntsiʼnzem yí á cʉ́ʼ esōk.

²⁶ Á shʉʼ nzéŋ ŋgɔ́ ndeŋ ndeŋ épúp ánɛ mbáte epīa, mbɔɔ ánɛ mbáte tɛ́t, tɛ ewɔŋkhʉ̄ pwɔ̄ esambīa é láʼ mmī.

²⁷ Pɔ́ metsem é pú ŋkwʉ́te épúp, ḿbú ŋgē emakne, mpfók á pú ŋkwhʉ́ azí.

²⁸ Páʼ epuɔ pwɔ̄ esambīa é le pú ŋgɔ́ melō menzwí wuɔ lā, a láʼ aleʼé zīi mɛ́ zímɛ ánɛ lewhʉ̄, menzwí a egɔ́ eyi awɔ́ á nnɔ pɔ́p metsem ē?»

²⁹ Yɛɛ́so á pwɛt á mbū pɔ́p ŋ́gɛ: «Pɛ é páʼā, ńnɔŋ efāa nzhɛ. Púp, melaʼ mīi pɛ te si nzhɛ́ɛ anu zīi, á ntē aŋwaʼne Ndém ɛ́, ńnɔŋ te nzhɛ́ɛ páʼ mete Ndém é épúp ɔ́.

³⁰ Mɛ́ e láʼ ezím ánɛ lewhʉ̄ páʼā, mɛ́ le zéŋ ŋgyā ndá á. Epuɔ menɔŋ ecʉ́ʼɛ nnáŋa, áa páʼ mecɔʼ Ndém á athʉ́ lephū lā.

³¹ Ŋ́gɔ́ mé lezīm á nnɔ mepfhō, mbɔ pɛ laá ntɔ́ŋ tɛ njúʼ anu jʉɔ zīi, Ndém a le lé me pɛ ɛ́ lɛ́? A lɛ te lé ŋ́gɛ:

³² “Meŋ a á si ŋgɔ́ á Ndém Ablaham, ŋ́gɔ́ á Ndém Izak, ńzéŋ ŋgɔ́ á Ndém Yakɔ́p lɛ̄?” Ndém a te si ŋgɔ́ á Ndém mepfhō ɔ́, a gɔ́ áa Ndém epuɔ mete. »

³³ Yɛɛ́so á shúŋ meshuŋne muɔ mɛ́t tɛ é mi, ezi ntií lezīʼne epuɔ, é pú ŋkʉ̄ʼne alāʼ zīi, á nɔŋ njúʼɔ á yí á leshūŋne.

Memía membé Ndém

³⁴ Epuɔ Falísia é júʼ páʼ Yɛɛ́so a á tsɛ́t nchu epuɔ Sadúsia, ńcúʼte á taʼ ajʉʼ.

³⁵ Taʼ ŋiŋ nnɔ wɔp, ŋ́gɔ́ á ŋkɛʼte‑mbé Ndém, á lʉʼ á Yɛɛ́so letā, ńzɛ́tte á yí ŋ́gɛ:

³⁶ «Ńziʼnɛ, etsiɛ́ lepé é si mbú ŋgɔ́ á mía, ánɛ membé ntsem m̄?»

³⁷ Yɛɛ́so á pwɛt á mbū yí ŋ́gɛ: «Ŋiŋ a ekɔ̄ŋ Atsyapuɔ Ndém yi, mé ntē yí ntsem, ḿbú ŋgyá athū nnɛ̄t zí á mbū yí, akwaŋte zí ntsem a epú ntshí ánɛ yí.

³⁸ É si ŋgɔ́ á mía lepé, ŋ́gɔ́ etsi é tshií mvhɔ.

³⁹ Emɔ̄ʼ é zéŋ ŋgɔ́ éwú, ńzéŋ te azí kʉɔ́k. Ŋ́gɔ́ lɛ: “Awíɛ a ekɔ̄ŋ á ŋiŋ ntsem, páʼ athū nnɛ̄t zí méŋwɛ̄t.”

⁴⁰ Mbé muɔ mɛ́t mɛ́mbīa, é puú ŋkwɛ́t methū menu ntsem mīi, mɛ́ le tí á ntē aŋwaʼne lepé mbɔɔ á ntē aŋwaʼne metswi‑ŋke. »

Anu ánɛ Nzaʼ‑Ŋkhʉ pɔ́ Efɔ Ndavít

⁴¹ Epuɔ Falísia é zɛ́t ncúʼte épúp, Yɛɛ́so á zɛ́tte á wɔ́p anu jʉɔ, ŋ́gɛ:

⁴² «Pɛ ekwāŋ azɛ́ anu jʉɔ ánɛ Nzaʼ‑Ŋkhʉ eshúŋ á gá. A lɛ péʼe ŋgɔ́ ndhu awɔ́?» Pɔ́ pwɛt á mbū yí ŋ́gɛ: «A lɛ ŋiŋ ánɛ ndhu Efɔ Ndavít. »

⁴³ Yɛɛ́so á lé mé pɔ́p ŋ́gɛ: «Tɛ á piŋ ŋgāa, Azwakne Ndém á tshóne á Efɔ Ndavít, á tɔ́ŋ á yí lɛ, Mɔʼɔ́ yi, á afʉʼ zīi a le lé ŋ́gɛ:

⁴⁴ “Atsyapuɔ Ndém a á lé á mbū mɔʼɔ́ ga ŋ́gɛ, Shʉʼɛ nnáŋ ánɛ ŋkɔʼɔ́ apū ete gá, púp, meŋ eghʉ̄, megaŋ mbo pú e eshʉʼ nnɔ̄ŋte á mvhɔ wu, o etshíte mekhu mú ánɛ pɔ́p é?”

⁴⁵ «Páʼ Efɔ Ndavít a le tɔ́ŋ á Nzaʼ‑Ŋkhʉ lɛ Mɔʼɔ́ yi lā, Nzaʼ‑Ŋkhʉ mɛ́t, a gɔ epīiŋ ŋgāa nzéŋ ŋgɔ́ á méŋ yi ī?»

⁴⁶ Ŋiŋ á pú te kūʼ á letsɔ̄ʼ anu á mbū yí í. Tɛ efhó aleʼé mɛ́t, ŋiŋ a te zéŋ á yí anu nzɛ́ttɛ ɛ́.