Matío 12 - Eka Eswhī

Aziʼne Yɛɛ́so ánɛ aleʼé aswite

¹ Á shʉʼ ŋgɔ́ aleʼé aswite, Yɛɛ́so pɔ́ nnɔ yí é nɔŋ ntɔ́kɔ, á ntē ŋkāʼ mmɔʼ ntií ŋgesáŋ, nzi é záŋ nnɔ yí, pɔ́ zi á lepwɔ̄ʼ mmɔʼ mpfɛ́t.

² Epuɔ Falísia é jʉ́ɔ épúp, ńdé á mbū Yɛɛ́so ŋ́gɛ: «Cʉ megaŋ nnɔ pú njʉ́ɔ. Pɔ́ é si ŋghʉ̄ɛ ajū mīi, lepé tsímpɛ é té véŋ ŋ́gɛ, mɛ́ eghʉ̄ aleʼé aswite ɛ́. »

³ Yɛɛ́so á pwɛt á mbū pɔ́p ŋ́gɛ: «Pɛ laá ntɔ́ŋ á ntē aŋwaʼne Ndém tɛ njúʼ anu zīi, nzi e le záŋ á Efɔ Ndavít pɔ́ a epuɔ pí, á ghʉ ɛ́ lɛ́?

⁴ A le kó á ntē ntap mbotɛ́ Ndém, ḿbɛ́ ecū mīi, mɛ́ nnɔ̄ŋ éwú á mbū Ndém, ḿpfɛ́t, ńzéŋ ŋgyá etsi epuɔ pí, tɛ́ lepé é gɔ́ te si ndʉ́ɛ́ ŋ́gɛ, pɔ́ gɔ epfɛ́t ɛ́, ńdaʼ wɔ nɔŋ‑epɔʼ.

⁵ Kɛ pɛ la tɔ́ŋ á ntē aŋwaʼne Mɔɔ́sɛ tɛ njúʼ páʼ, á kuūʼ aleʼé aswite, wɔ nɔŋ‑epɔʼ pīi, é ghʉɛ afaʼ á Mía Ŋgyā Ndém, é té ghʉ̄ ajū mīi, lepé é si nzɛ́ttɛ ŋ́gɛ, mɛ́ eghʉ̄ aleʼé aswite ɛ́, amɔ̄ʼ azō á piŋ te wɔ́p ghʉ ɛ́ lɛ́?

⁶ Meŋ ké eshúŋɔ á wɛ́ ŋ́gɛ, mmɔʼ ŋiŋ a á ega, nzwiŋ yí é te ntɔ́k eyi Mía Ŋgyā Ndém.

⁷ Á ŋgwíʼi ŋgɔ́ éyi, pɛ le júʼ anu zīi, Ndém a leé á ntē aŋwaʼne yí ŋ́gɛ: “Meŋ á si ŋkɔ̄ŋɔ ŋ́gɛ, epuɔ menɔŋ e ewɛ̄ atsāmezeŋɛ, ńtɔ́k á leyā azō, ńdɔk ŋgūʼte á gá.” Mbɔ a ke gɔ́, pɛ é le néŋ ndɔ á athū epuɔ puɔ pīi, é ka fā la á. »

⁸ Yɛɛ́so á zéŋ ndé mé pɔ́p ŋ́gɛ: «Méŋ‑Ŋiŋnɔŋ mé pɔŋteé á leshūŋ ajū mīi, mɛ́ gɔ eghʉ̄ʉ ánɛ aleʼé aswite. »

Apū ŋiŋ zīi á lē ŋkwhʉ́, á ega ntʉ̄ɛ̄

⁹ Yɛɛ́so á fhó ajʉʼ mɛ́t ŋgʉ̄ɔ, ŋ́gɔ ŋkó á ŋgyā aswiŋte epuɔ Yúda.

¹⁰ Ŋ́gē eshʉʼe, mmɔʼ ŋiŋ á gɔ́ éwú, mbɔ apū zí á lē ŋkwhʉ́. Epuɔ Falísia é nɔŋ efāʼa eshhʉ̄ á lelɔk ntshí anu á athū Yɛɛ́so, ńzɛ́tte á yí ŋ́gɛ: «Tɛ lepé tsímpɛ, é veéŋ ŋ́gɛ, mɛ́ gɔ eghʉ̄ʉ, ŋiŋ á te aleʼé aswite e?»

¹¹ Yɛɛ́so á pwɛt á mbū pɔ́p ŋ́gɛ: «Awɔ́ a á nnɔ pɛ ŋgɔ́ éyi, a wiɛ taʼ mvhō ndaʼ, mvhō mɛ́t é pīŋ ntém á ntē lephʉ̄ á aleʼé aswite, á néŋ té gʉɔ éwú efók á yí í?

¹² Ŋiŋnɔŋ a piīŋ ntē nzwiŋ, ńtɔ́k mvhō. Púp, mɛ́ ghʉɛ, ŋiŋ á tē aleʼé aswite, mbɔ mɛ́ ka fā á. »

¹³ Ńdɛ ndé á mbū ŋiŋ mɛ́t ŋ́gɛ: «Seŋte apū jú. » Á seŋte. Mɛ́ jʉ́ɔ mbɔ, á pú nte tɛ mbɔŋ, páʼ azi amɔ̄ʼ.

¹⁴ Epuɔ Falísia é lɛ efhó á ŋgyā aswiŋte ntó, ńcúʼte, éfāʼ eshhʉ̄ páʼ pɔ́ e ghʉ épúp, tɛ́ ezwhí á Yɛɛ́so.

Yɛɛ́so, a á si ŋgɔ́ á ŋgaŋ afaʼ Ndém

¹⁵ Yɛɛ́so á zhɛ́ á légɛ, epuɔ Falísia é si efāʼa á lezwhī á yí, éfhó á tésɔŋ mɛ́t ŋgʉ̄ɔ. Alāʼ epuɔ á gɔ́ á nzem nzhɛ̄nɛ á yí. Á ghʉ, megaŋ agɔ ntsem pīi, é nnɔ alāʼ mɛ́t, é te.

¹⁶ Á tɔ́ŋ á wɔ́p, ḿbé á wɔ́p ŋ́gɛ, ndɛ́ʼ pɔ́ ghʉ tɛ mɛ́ zhɛ́ á légɛ, yí mé ghʉ pɔ́ te.

¹⁷ Púp tɛ́, anu zīi, Ndém a le lɔ̄k nchu ntswi‑ŋke yi Izayi ndé, a elɔ̄k mbō.

¹⁸ A le lé ŋ́gɛ: «Ewuɔ, a á páʼa ŋgɔ́ á njuʼ‑nchu ga yīi, meŋ á tsɔ́ʼ á yí. Meŋ kɔɔ̄ŋ á yí tɛʼ. Yí mé ghʉʉ̄, ntē gá é kák. Meŋ a shʉʼ enéŋ Azwakne zá ánɛ yí. A a shʉʼ eshúŋ á mbū alāʼ ntsem, tɛ mbɔɔ á mbū epuɔ pīi, é té epuɔ Yúda á, á ajū mīi, meŋ á si ŋkɔ̄ŋɔ.

¹⁹ A te shʉʼ eták ntsaŋ á, a á le shúŋne tɛ ŋghi zi é kɔ́ʼ á athʉ́ ɛ́. Mɛ́ piīŋ le júʼ á tshí á methū nzhɛ, éshúŋnɛ ɛ́.

²⁰ A te ndáʼa mbwɔ́ʼɔ akekaʼa zīi, á nzi nté njhʉ̄ nnɔŋ ntéŋnɛ ɛ́. A te mbíkɛ mmók ánɛ láam yīi, a á si nnɔŋ ŋgʉ̄ɔ mé mbí í. A shʉʼ eghʉ épúp, tɛ́ lɔk eghʉ, ajū mīi meŋ á si ŋkɔ̄ŋɔ, a etshí mvhɔ.

²¹ Epuɔ pīi é té epuɔ Yúda á, e ecʉ́ʼɛ mbúu nnéŋɛ azɔ́p akwaŋte áa ánɛ yí, tɛ́ ndɔkɔ nnáŋa. »

Yɛɛ́so a á ega ntsɔ́ʼɔ anu zīi mɛ́ é tshí á athū yí

²² Mɛ́ lɛ ndɔ̄k mmɔʼ ŋiŋ eshʉ̄ʼ á mvhɔ Yɛɛ́so, mbɔ esī e lē ŋgɔ á yí, ḿbík menēk mí, ńtsɛ́t nchu yí. Yɛɛ́so á juŋ esī mɛ́t ánɛ yí, tɛ á zi á leshūŋne, ńzéŋ njʉ́ɔ ejʉʼ.

²³ Alāʼ ntsem á jʉ́ɔ épúp, á pú ntsyā á wɔ́p tsyaa, tɛ pɔ́ lé ŋ́gɛ: «Ŋiŋ wuɔ a te ŋiŋ, ánɛ nzwɛt Efɔ Ndavít ɛ́ lɛ́?»

²⁴ Epuɔ Falísia é júʼ azɔ́p, ńdé ŋ́gɛ: «Bɛlzebul, á efɔ mesī mé yáa á yí mete, tɛ́ á lɔkɔ njūŋɔ mesī ánɛ epuɔ. »

²⁵ Yɛɛ́so á zhɛ́ ajū mīi, pɔ́ é ntē pɔ́p ŋkwāŋtɛ, ńdé mé pɔ́p ŋ́gɛ: «Epuɔ taʼ alāʼ é náŋa tɛ esɛ̄nne, ńdʉɔ́ʼne mennɛ̄t mɔ́p, mbɔ alāʼ mɛ́t, á gʉɔ mé mbií. Epuɔ taʼ tésɔŋ é náŋa tɛ esɛ̄nne, ńdʉɔ́ʼne mennɛ̄t mɔ́p, mbɔ tésɔŋ mɛ́t, a te ŋgʉ̄ɔ mé nnáŋa á. Epuɔ taʼ atseŋ ŋgyā é náŋa tɛ esɛ̄nne, ńdʉɔ́ʼne mennɛ̄t mɔ́p, mbɔ atseŋ ŋgyā mɛ́t, á té ŋgʉ̄ɔ mé nnáŋa á.

²⁶ Á zéŋ ŋgɔ́ épúp á mbū Sɛ́ta. A náŋa tɛ esɛ̄nne, ńjūŋ á Sɛ́ta ánɛ epuɔ, mbɔ a lɔkɔ ndʉɔ́ʼɔ athū nnɛ̄t zí méŋwɛ̄t. A ghʉɛ epúp, mbɔ lefɔ tsí é gɔ egaá tɛ́ nnáŋ ŋ́?

²⁷ Páʼ menɔ mɛ́ é si njūŋɔ azɔ́p mesī lā, a gɔ́ éyi meŋ ndɔkɔ mete Sɛ́ta tɛ́ njūŋɔ azá, mbɔ pɔ́ tswíi mete á mbū awɔ́ tɛ́ ndɔkɔ njūŋɔ azɔ́p é? Menɔ mɛ́ mɛ́t, mé láʼ eshúŋ á wɛ́ ŋ́gɛ, pɛ lʉ́ɛ́ páʼā, ńdɔkɔ efā faa.

²⁸ Á gɔ́ áa lɛ, meŋ ndɔkɔ mete Azwakne Ndém tɛ́ njūŋɔ mesī ánɛ epuɔ. Á lɔkɔ ntswīi á légɛ, Lefɔ Ndém é ndáʼ nzī á ndo esī atsetsáʼ, tɛ é shʉʼ tɛ ntswɛ́tte á wɛ́.

²⁹ «Ŋ́ké te épúp ɔ́, mbɔ ŋiŋ a gɔ egaá, ńzíʼ ŋkó á ŋgyā tɛnte ŋiŋ, ŋ́kú á tsitsi yi tɛ á mi, té gɔ́ yīi a á nté njhʉ̄, ŋ́kwɛ́t á tɛnte ŋiŋ wuɔ mɛ́t é? A pikɛ tɛ ŋkwɛ́t á yí, mbɔ a a túʼ akʉ̄ɛ akʉ̄ɛ á ŋgyā, páʼ a á kɔŋ.

³⁰ Ŋiŋ a lʉʼɛ ŋ́gɛ, pek yí é gɔ le gɔ́ nnɔ ɔ́, mbɔ a lɔkɔ ntáka anu zá. Ŋiŋ yīi, a te si ntswítɛ á gá á lecūʼte epuɔ, ŋ́gyá á mbū Ndém ɛ́, a á si ŋŋwāŋa á wɔ́p ŋwaŋ.

³¹ «Púp tɛ́, meŋ shúŋɔ á wɛ́ ŋ́gɛ, Ndém a gɔ elēkne mefa ntsem á mbū epuɔ menɔŋ, mbɔɔ nzɔ ntsem zīi, mɛ́ lɔk nzɔ̄te á yí. Táʼ, ŋiŋ a eké nzɔ̄te á Azwakne Ndém, mbɔ Ndém a gɔ le emuɔ mefa mɛ́t á mbū ŋgaŋ lēkne.

³² Ŋiŋ a shúŋnɛ tépɔŋ ánɛ Méŋ‑Ŋiŋnɔŋ wuɔ, mbɔ Ndém a a lekne á mbū ŋgaŋ. Táʼ, ŋiŋ a piŋɛ eshúŋne tépɔŋ ánɛ Azwakne Ndém, mbɔ Ndém a te e láʼ elekne á mbū ŋgaŋ, ánɛ ŋgɔŋ jʉɔ ɔ́, épīŋ le láʼ ndēkne ánɛ ŋgɔŋ zīi, e e fú tɛ́ shʉʼ ɛ́. »

Mɛ́ zhɛɛ́ athʉ́ áa ánɛ ntá zí

³³ Yɛɛ́so á zéŋ ndé ŋ́gɛ: «Athʉ́ á gɔ́ athʉ́ mbɔŋ, mbɔ a zém ntá mbɔŋ. Ḿbīŋ ŋgɔ́ á athʉ́ tepɔŋ, mbɔ a zém ntá tepɔŋ. Mɛ́ zhɛɛ́ athʉ́ áa ánɛ ntá zí.

³⁴ Pɛ pīi, pɛ yikɛ, ńzīŋɛ ŋŋɛ́tte ŋɛtté páʼ menū, pɛ gɔ egaá, ŋ́gɔ́ epuɔ tepɔŋ ezi ntií péʼe, anu mbɔŋ á piŋ ntó á nchu pɛ ɛ̄? Anu zīi á toó á nchu ŋiŋ, mé tswiī ajū mīi, ŋgaŋ a á aziɛ́.

³⁵ Ntē ŋiŋ é si ŋgɔ́ páʼ ajʉʼ zīi, a féŋɛ lewūʼ tsí éwú lā. Mɛ́ gē ezhɛ́ á légɛ, ŋiŋ mbɔŋ a wuɔ, ńjʉ́ɔ menu mbɔŋ mīi, é fhó á ntē yí, ńtó á nchu yí. Ḿbiŋ ŋgē ezhɛ́ á légɛ, ŋiŋ tepɔŋ a wuɔ, ńjʉ́ɔ menu tepɔŋ mīi, é fhó á ntē yí, ńtó á nchu yí.

³⁶ Meŋ shúŋɔ á wɛ́ ŋ́gɛ, a láʼ aleʼé zīi, Ndém a záʼa ntsaŋ epuɔ menɔŋ, awɔ́ ŋiŋ lɛ́ a eshʉ̄ʼ, ŋ́kɛ́ʼte eshúŋ á Ndém, ntií metepɔŋ eshuŋne ntsem mīi, é lé tó á nchu yí.

³⁷ Ndém a a láʼ efhó áa ánɛ meshuŋne ŋiŋ, tɛ́ ezhɛ́ á légɛ, ŋgaŋ a á ŋiŋ ndeŋ ndeŋ, kɛ́ á légɛ, ŋgaŋ a á whʉ asāʼ. »

Epuɔ menɔŋ é faāʼ áa lejʉ̄ɔ meŋkʉʼne anu

³⁸ Yɛɛ́so á shúŋ épúp tɛ á mi, emɔ̄ʼ epuɔ ánɛ nnɔ wɔ kɛ́ʼte‑mbé Ndém, mbɔɔ ánɛ nnɔ epuɔ Falísia, é shʉʼ ndé á mbū yí ŋ́gɛ: «Ńziʼnɛ, pek é si ŋkɔ̄ŋɔ ŋ́gɛ, o eghʉ̄ á taʼ ŋkʉʼne anu, a egɔ́ ayiŋne zīi, á tswii á légɛ, mete mú é fhɔ́ɔ á mbū Ndém, pek ejʉ́ɔ. »

³⁹ Yɛɛ́so á pwɛt á mbū pɔ́p ŋ́gɛ: «Epuɔ ŋguʼ puɔ é té pɔŋ, ŋ́gɔ́ wɔ teē‑athū á mbū Ndém. Pɔ́ é si ŋkōnɛ á gá ŋ́gɛ, meŋ eghʉ̄ á taʼ ŋkʉʼne anu, a egɔ́ ayiŋne zīi á tswii á légɛ, mete má é fhɔ́ɔ á mbū Ndém. Amɔ̄ʼ ayiŋne anu zīi, meŋ gɔ á ntswiī pɔ́p, á té éwú ú, ńdaʼ gá á leghʉ taʼ ŋkʉʼne anu, páʼ ezi, Ndém a le ghʉ̄ ánɛ ntswi‑ŋke yi Jonási.

⁴⁰ Ndeŋ ndeŋ páʼ, Jonási a le náŋ á levem mía esōh eleʼé tɛ́t, ézokó pɔ́ etsōʼ lā, Méŋ‑Ŋiŋnɔŋ wuɔ a a shʉʼ enáŋ á nzem esī eleʼé tɛ́t, ézokó pɔ́ etsōʼ.

⁴¹ A láʼ ekuʼ aleʼé zīi, Ndém a ŋaka epuɔ menɔŋ, epuɔ tésɔŋ Ninive, e enéŋ mefa á apa epuɔ ŋguʼ puɔ, melaʼ mīi pɔ́p, épuɔ Ninive, é le júʼ anu Jonási, ŋ́gɔ̄ nnɛ̄t zɔp, ŋ́gwáʼ atswhī tepɔŋ zɔ́p. Mmɔʼ ŋiŋ a piīŋ ŋgɔ́ éwú tsetsɔŋɔ, azí anu á fáŋ ntɔ́k azi Jonási. Epuɔ ŋguʼ puɔ mɛ́t, é piŋ te á yí júʼ.

⁴² A láʼ ekuʼ aleʼé mɛ́t, efɔ ŋgɔŋ Sába, ŋ́gɔ́ á menzwí, a eshʉʼ ntshí á mvhɔ epuɔ ŋguʼ puɔ, ńnéŋ mefa á apa pɔ́p, melaʼ mīi, pɔ́ é fa tɛ á tsia. A le tshí á alāʼ te ndeŋɛ́, ńjúʼ mɛ́ nɔŋ ŋghítɛ azhɛ̄‑anu Efɔ Salomɔŋ, á shʉʼ tɛ ntshí lezēk tsí éwú. Mmɔʼ ŋiŋ a piīŋ ŋgɔ́ wuɔ tsetsɔŋɔ, azhɛ̄‑anu zí á fáŋ ntɔ́k azi Salomɔŋ. Táʼ, mɛ́ piīŋ te si ncʉ̄tɛ á yí í.

Anu ŋiŋ yīi, esī e é tó ánɛ yí, ńzéŋ mbīŋ nzem

⁴³ «Esī e toó ánɛ ŋiŋ páʼā, ŋ́gʉɔ nzók á késáatswɛt ŋkɛ́tɛ, éfāʼa ajʉʼ zīi, e e pwɛ́ne enáŋ éwú. Páʼ e é faʼ kékáŋ lā,

⁴⁴ ńdɛ ndé ŋ́gɛ: “Meŋ a piŋ nzem mé mba za, ájʉʼ zīi, meŋ ke zī ntó éwú.” Ŋ́gɔ́ éyi, e piŋɛ nzem, ŋ́kó ŋgē eshʉʼe, ŋiŋ mɛ́t á gɔ́ páʼ ŋgyā zīi, ŋiŋ a te éwú náŋ, mbɔ mɛ́ ncuŋte njɔ̄k, ńtséŋte á mbɔŋɔ́,

⁴⁵ mbɔ a lɛ gʉɔ egɔ efaʼ emɔ̄ʼ mesī esambīa, émi é pú ŋgáʼ ńtɔ́k á yí. Pɔ́ a pɔ́p e eshʉʼ ŋkó á ŋgyā mɛ́t, ńnáŋ. Anu ŋiŋ wuɔ mɛ́t, a epīŋ ŋgē emakne, ḿbék ntɔ́k páʼ, á ke zī ŋgɔ́ épúp. Páʼ epuɔ ŋguʼ puɔ é tépɔŋ lā, a shʉʼ ezéŋ egɔ́ ndeŋ ndeŋ épúp, á mbū pɔ́p. »

Wɔ awɔ́ é si ŋgɔ́ epɔ̄ memía Yɛɛ́so mbɔɔ mɛ́ wɔp ē?

⁴⁶ Yɛɛ́so a le zɛ́t eshúŋne shuŋné á mbū alāʼ, epɔ̄ memía pí mbɔɔ mɛ́ wɔp, é shʉʼ ntshíte á apɛ́, ńnɔŋ efāʼa á leshūŋne á mbū yí. [

⁴⁷ Ŋiŋ á gʉɔ eshúŋ á yí ŋ́gɛ: «A ayi mɛ́ wu, pɔ́ a epɔ̄ memía pú, é tshiteé á apɛ́, ńnɔŋ efāʼa á leshūŋne á mbū wu lée. »]

⁴⁸ Yɛɛ́so á pwɛt á mbū ŋiŋ mɛ́t ŋ́gɛ: «Awɔ́ a á mɛ́ ga ā? Wɔ awɔ́ é gɔ́ epɔ̄ memía pá á?»

⁴⁹ Ńdé épúp, ńdɔ̄k apū ntswī megaŋ nnɔ pí, ńdé ŋ́gɛ: «Mɛ́ ga a wuɔ, epɔ̄ memía pá é gɔ́ puɔ.

⁵⁰ Ŋiŋ yīi, a ghʉʉ̄ ajū mīi, Mɔʼɔ́ ga yīi, a á athʉ́ lephū, a á si nzɛ́ttɛ, ŋgaŋ mé méŋ mɔ́ ga, éyi menzwí ká eyi mbaŋa, ńzéŋ ŋgɔ́ á mɛ́ ga. »