Málkúsi 9 - Eka Eswhī

¹ Yɛɛ́so á zéŋ ndé á mbū pɔ́p ŋ́gɛ: «Meŋ a shúŋ á wɛ́ á kwaʼ anuúnē, emɔ̄ʼ epuɔ é nnɔ pɛ ega tsetsɔŋɔ pīi, pɔ́ té shʉʼ ekwhʉ́, té gɔ́ yīi pɔ́ jʉ́ɔ páʼ, Ndém a lɔkɔ mete mí esáʼa ŋgɔŋ ɔ́.

Yɛɛ́so a á ega ntswīi páʼ ayiŋ zí á épúp

² Á tɔ́k eleʼé ntokó, Yɛɛ́so á tsɔ́ʼ á Piɛ pɔ́ Jáak mbɔɔ Jáaŋ, pɔ́ a pɔ́p é pe mé mmɔʼ sisia lekwɛ̄t, ŋ́gɔ́ éwú pɔ́plépɔ̄p. Pɔ́ jʉ́ɔ, ayiŋ zí á pú ŋkúmne á mvhɔ pɔ́p.

³ Menzhó mí é pú ncʉ́ʼɛ ŋwāŋne ŋwaŋne, ḿbú efók tɛ amɔ̄ʼ ajū mīi, ŋiŋ gɔ elɔ̄k esōk nzhó á ndo esī atsetsáʼ tɛ é fók épúp, á té éwú ú.

⁴ Pɔ́ lɛ njʉ́ɔ, Eli pɔ́ Mɔɔ́sɛ é ŋwak, pɔ́ a Yɛɛ́so é nɔŋ eshúŋnɛ.

⁵ Piɛ á vɛtte tɛ ndé á mbū Yɛɛ́so ŋ́gɛ: «Mɔʼɔ́ wek, á mbɔŋ ŋ́gɛ, ḿpɛ a pɔ́p e epú ŋgɔ́ ega. Pek e kwɛ́t mentap mɛ́ntɛ́t, taʼ e egɔ́ eju, taʼ e egɔ́ ezi Mɔɔ́sɛ, mmɔʼ e egɔ́ ezi Eli. »

⁶ Piɛ a lɛɛ́ mvɛttɛ tɛ ndʉ́ɛ́ épúp melaʼ mīi, ecɔʼ é mbú ŋgɔ̄ á wɔ́p. A lɛɛ́ te nzhɛ́ɛ ajū mīi a shúŋɔ ɔ́.

⁷ Pɔ́ zéŋ ŋgē ejʉ́ɔ, amɔ̄ʼ alɔ á shʉʼ á ajʉʼ zīi, pɔ́ ŋgɔ́ éwú, ńdɔ̄k á zézeéŋ yi ŋkʉ̄ŋɛ á wɔ́p. Ŋghi Ndém é fhó á ntē éwú ndé ŋ́gɛ: «Ŋiŋ wuɔ, a á méŋ ga, meŋ kɔ̄ɔŋ á yí tɛʼ, pɛ ejúʼ á yí. »

⁸ Pɔ́ lɛ ncʉ̄te ejʉʼ, pɔ́ té zéŋ epi emɔ̄ʼ epuɔ njʉ́ɔ, ndaʼ Yɛɛ́so yíléyī mé zɛ́t á lezēŋ pɔ́p.

⁹ Pɔ́ a pɔ́p é ghʉ nnɔ̄ŋ efhɔ́ɔ á ndo lekwɛ̄t esóʼo, Yɛɛ́so á tsɛne á wɔ́p ŋ́gɛ, ndɛ́ʼ pɔ́ eghʉ tɛ ŋiŋ á zho nzhɛ́ ajū mīi, pɔ́ é jʉ́ɔ, tɛ ndáʼ ŋkó á afʉʼ zīi, Méŋ‑Ŋiŋnɔŋ a á zím ánɛ lewhʉ̄.

¹⁰ Pɔ́ lɛ eféŋ ajū mīi pɔ́ njʉ́ɔ á ntē pɔ́p, tɛ́ ŋké ntúŋte á tsetsɛlɛ pɔ́p ŋ́gɛ: «Ńzím ánɛ lewhʉ̄, ńdɔkɔ ŋ́gɛ akɔ̄?»

¹¹ Pɔ́ zéŋ nzɛ́tte á Yɛɛ́so ŋ́gɛ: «Melaʼ akɔ̄ wɔ kɛ́ʼte‑mbé Ndém é gɛ ndʉ́ɛ́ ŋ́gɛ, Eli a a fú eté njhʉ̄ eshʉʼ ē?»

¹² Á pwɛt á mbū pɔ́p ŋ́gɛ: «Anuúne, Eli a pɔŋteé á letē njhʉ̄ eshʉ̄ʼ, ŋ́ghʉ̄, akʉ̄ɛ akʉ̄ɛ á zéŋ ntshí á ajʉʼ yí. Aŋwaʼne Ndém á piīŋ ndé ŋ́gɛ, Méŋ‑Ŋiŋnɔŋ a a fú ejʉ́ɔ ŋgʉɔ̄ʼ tɛʼ, mɛ́ le lɔ̄k á yí ntɔ́ŋ azō ɔ́ péʼe, ńdɔkɔ ŋ́gɛ akɔ̄?

¹³ Meŋ ké ndɔkɔ eshúŋɔ á wɛ́ ŋ́gɛ, Eli a lē ndáʼ eshʉ̄ʼ, epuɔ menɔŋ é piŋ ŋgyá á yí ŋgʉɔ̄ʼ páʼ pɔ́ é kɔŋ, ńdeŋ ndeŋ páʼ mɛ́ le tí á ntē aŋwaʼne Ndém épúp. »

Yɛɛ́so a á ega njūŋɔ esī zīi, e lē ŋgɔ mmɔʼ méŋkhʉ̄

¹⁴ Pɔ́ piŋ nzem tɛ ŋkó á ajʉʼ zīi, emɔ̄ʼ nnɔ Yɛɛ́so é nzɛ́t éwú, ńjʉ́ɔ mbɔ atʉtʉ epuɔ á mbú ncúʼte á lezēŋ pɔ́p. Nnɔ yí mɛ́t pɔ́ a wɔ kɛ́ʼte‑mbé Ndém é nɔŋ ŋŋāka.

¹⁵ Nnɔ epuɔ mɛ́t é lɛ ŋgē ejʉ́ɔ á Yɛɛ́so, ejʉʼ é pú ncʉ̄ʼne. Pɔ́ pú nnáte, éshʉʼ ntsāʼte á yí.

¹⁶ Á zɛ́tte megaŋ nnɔ pí ŋ́gɛ: «Pɛ a pɔ́p é ŋaka akɔ̄ páʼa ā?»

¹⁷ Mmɔʼ ŋiŋ á tó á nnɔ alāʼ, mbwɛ̄t á mbū yí ŋ́gɛ: «Ndi, meŋ á lɔk á méŋ ga wuɔ eshʉ̄ʼ á njʉ́ɔ wu, mbɔ mmɔʼ esī e lē ŋgɔ á yí, ńtsɛ́t nchu yí.

¹⁸ Esī mɛ́t e gɔɔ̄ á yí mbɔɔ akɔ̄ ajʉʼ lɛ́, ńtswíʼ á yí ŋŋém á esī, á tiŋ, éfūʼ mekī, ḿpfɛ́t mesɔŋ mí. Meŋ á púʼ mbū ŋ́gɛ, megaŋ nnɔ pú e ejūŋ esī mɛ́t, tɛ́ pɔ́ té mete wɛ̄ ɛ. »

¹⁹ Yɛɛ́so á lé á mbū pɔ́p ŋ́gɛ: «Pɛ epuɔ ŋguʼ puɔ, pɛ te ntē ánɛ Ndém tshí, Meŋ a láʼ esek ánɛ ŋghʉʉ́‑menu mɛ́, tɛ eláʼ etshí eséŋɛ́ ɛ́? Pɛ é kwaŋ ŋ́gɛ, ḿpɛ mé náŋa náŋa lɛ́? Pɛ elɔ̄k á mɔ́ mɛ́t, éshʉʼ ŋgyá mé meŋ. »

²⁰ Pɔ́ lɔk á yí eshʉ̄ʼ. Esī zīi e é ŋgɔ́ ánɛ mɔ́, é lɛ ŋgē ejʉ́ɔ á Yɛɛ́so, ńcʉ̄ʼne á mɔ́ mɛ́t, ńtswíʼ á yí ntém á esī, á kɛnne nnɛ̄t zi á esī, ńnɔŋ efūʼu mekī.

²¹ Yɛɛ́so á zɛ́tte á mɔʼɔ́ yi ŋ́gɛ: «Esī jʉɔ, e é ánɛ mɔ́ wuɔ tɛ efhó eséŋɛ́ ɛ́?» Á gɛ: «Tɛ efhó páʼ a le zɛ́t á méŋ agáʼ mɔ́.

²² Esī mɛ́t e é amɔ̄ʼ afʉʼ, ŋ́ghʉ̄, a ewhʉ̄ á ntē mmók, ŋ́gɔ́ amɔ̄ʼ afʉʼ, ŋ́ghʉ̄, a ewhʉ̄ á ntē ntshi. Ḿbú nnɔŋ efāʼa eshhʉ̄ á lezwhī á yí. A ké ŋgɔ́ éyi o gɔ ekūʼ á leghʉ azō, o etswíte á wék, tɛ ntsá á wék tsá. »

²³ Yɛɛ́so á lé á mbū yí ŋ́gɛ: «O ó gɛ éyi meŋ á kuʼ e? Amɔ̄ʼ azō á té éwú zīi, á gɔ etsya á ŋiŋ yīi, a fɛɛ́ nnɛ̄t ŋgyā á mbū Ndém ɛ́. »

²⁴ Mɔʼɔ́ mɔ́ mɛ́t, á lɛ ndé mé ŋghi teté ŋ́gɛ: «Meŋ gɔ efíɛ́ nnɛ̄t ŋgyáa á mbū Ndém. Lɛ ntswíte á gá, á letswiʼne efɛ́ nnɛ̄t. »

²⁵ Yɛɛ́so á jʉ́ɔ páʼ alāʼ á si mbúu ntswiʼnɛ ŋkɔ́ʼɔ, ńcɔ́k esī mɛ́t, ńdé á mbū yí ŋ́gɛ: «Esī ntsɛt‑nchu pɔ́ metuúŋ, meŋ mé lʉ́ɛ́ á mbū wu, fhó ánɛ mɔ́ wuɔ ntó, tɛ te láʼ nzéŋ ánɛ yí mbīŋ. »

²⁶ Esī mɛ́t é ge efhó ánɛ mɔ́ mɛ́t etó, ŋ́gāʼte, ńcʉ̄ʼne á yí ménte, á nɔŋ á esī, ńcʉ́ʼ páʼ apfhō ŋiŋ lā, tɛ epuɔ pīi é ŋgɔ́ ajʉʼ mɛ́t, é lé ŋ́gɛ, a á kwhʉ́.

²⁷ Tɛ́ Yɛɛ́so á kúʼte apū zí, ŋ́ghʉ̄ á lu á esī ntshí á ajʉʼ.

²⁸ Yɛɛ́so á ghʉ ŋgʉ̄ɔ tɛ ŋkó á mba, tɛ pɔ́ a nnɔ yí mé cʉ́ʼ á esī, pɔ́ zɛ́tte á yí ŋ́gɛ: «Pek kaá ŋkūʼ á wék á lejuŋ esī mɛ́t ɛ́, melaʼ akɔ̄?»

²⁹ Á lé á mbū pɔ́p ŋ́gɛ: «Mɛ́ gɔ elɔ̄ɔk áa leswīŋte Ndém, tɛ́ njūŋ ejʉɔ ntií esī ánɛ ŋiŋ. »

Yɛɛ́so a á ega nzéŋɛ mbhʉ́ɛ páʼ yí e shʉʼ ekwhʉ́, ézím

³⁰ Pɔ́ ghʉ efhó á ajʉʼ mɛ́t, ńdɔ̄k Ŋgaliléa nzápa ŋgʉ̄ɔ. Yɛɛ́so á lɔkɔ te ŋkɔ̄ŋɔ ŋ́gɛ, mɛ́ ezhɛ́ ajʉʼ zīi, yí é éwú ú,

³¹ melaʼ mīi, a le nɔ̄ŋ nzíʼnɛ nnɔ yí, ndʉ́ɛ́ ŋ́gɛ: «Mɛ́ e swiŋ á Méŋ‑Ŋiŋnɔŋ wuɔ á mbū epuɔ menɔŋ, pɔ́ eghʉ̄ ánɛ yí páʼ pɔ́ kɔŋ, ńzwhí á yí. Ńzwhí á yí épúp, a egɔ́ eleʼé tɛ́t, a ezím ánɛ lewhʉ̄. »

³² Ńdé épúp, nnɔ yí é té júʼ anu zīi a lɔkɔ ndʉ́ɛ́ ɛ́, ḿbiŋ nnɔ̄ŋ mbɔ́kɔ á lezɛ̄tte á yí.

Awɔ́ a á mía ŋiŋ ntɔ́k emɔ̄ʼ é?

³³ Pɔ́ gʉɔ tɛ ŋkó á Kafaanawum, ŋ́gɔ́ á ŋgyā, Yɛɛ́so á zɛ́tte á wɔ́p ŋ́gɛ: «Pɛ é ŋgɔ́ á mɛnzhɛ, ńziŋɛ ŋŋāka akɔ̄ péʼe ē?»

³⁴ Pɔ́ té tsɔ́p, melaʼ mīi, pɔ́ ŋgɔ́ á mɛnzhɛ, ńziŋɛ ŋŋāka, éfāʼa ŋiŋ yīi, a á nnɔ pɔ́p ŋgɔ́ á mía ŋiŋ.

³⁵ Yɛɛ́so á náŋ á esī, ńtɔ́ŋ megaŋ nnɔ pí mɛ́t, épuɔ ntsɔp pīa mé legēm, ńdé á mbū pɔ́p ŋ́gɛ: «Ŋiŋ a nɔŋ ŋkɔ̄ŋɔ á yí á letshī mvhɔ, á ghʉ páʼ a á nzoknzem epuɔ metsem lā, ńcʉ́ʼ á ŋgaŋ afaʼ epuɔ metsem. »

³⁶ Ńdé épúp, ńtɔ́ŋ á méŋ agáʼ mɔ́, ńtshí á mvhɔ pɔ́p, ńtswíʼ á yí ŋgwɛ̄ á mbū yí, ńdé á mbū pɔ́p ŋ́gɛ:

³⁷ «Ŋiŋ a kóknɛ á méŋ agáʼ mɔ́ páʼ ewuɔ lāa, melaʼ má, mbɔ a lɔkɔ ŋkóknɛ áa gá. Ŋiŋ a piŋɛ ŋkókne á gá, mbɔ a te ŋkóknɛ á gá wuɔ ɔ́, mbɔ a lɔkɔ ŋkóknɛ áa ŋiŋ yīi, a le tó á gá. »

Ŋiŋ a nɔŋ te mvɛ́nɛ afaʼ zímpɛ ɛ́, mbɔ ḿpɛ a pɔ́p mé nnɔ

³⁸ Afʉʼ á kuʼ, Jáaŋ á lé á mbū yí ŋ́gɛ: «Mɔʼɔ́ wek, pek é njʉ́ɔ mmɔʼ ŋiŋ á nɔŋ ndɔ̄kɔ lezēŋ cú, ńjūŋɔ mesī ánɛ epuɔ, pek nɔ̄ɔŋ efāʼa á letɔʼ á yí, melaʼ mīi a te á ŋiŋ nnɔ yímpɛ ɛ́. »

³⁹ Yɛɛ́so á gɛ: «Ndɛ́ʼ pɛ ezéŋ á yí ntɔ̄ʼ, ŋiŋ a gɔ le lɔ̄k lezēŋ tsá ŋghʉ̄ ŋkʉʼne anu épúp, ḿbiŋ ńdɛ ŋkím á gá tépɔŋ ɔ́.

⁴⁰ Ŋiŋ a nɔŋ te mvɛ́nɛ afaʼ zímpɛ ɛ́, mbɔ ḿpɛ a pɔ́p mé nnɔ.

⁴¹ Pɛ ezhɛ́ ŋ́gɛ, awíɛ yīi a á lɔk á legɔ̄ yīi, pɛ é megaŋ nnɔ Klísto, tɛ́ ŋgyá á atá ntshi pɛ enú, kwaʼ anuúnē meŋ shúŋɔ á wɛ́ ŋ́gɛ, mbɔ ŋgaŋ a te e láʼ enéŋ té wɛ ntaŋá yí í.

Pɛ epá ecū mīi, é gɔ etshóne á ŋiŋ, ḿmāʼ á ntē mefa

⁴² «Ŋiŋ a tshónɛ taʼ, á nnɔ ewɔŋkhʉ̄ puɔ pīi, é fɛɛ́ nnɛ̄t ŋgyá á mbū meŋ, ńnéŋ á ntē mefa, mvhɔ á gɔ́ á mbū ŋgaŋ, ŋ́gɔ́ mɛ́ á legaŋ mía mía tɔ́ á ntɔ̄ŋ yí, ŋ́kʉ̄ɛ á yí mmāʼ á ntē mía ntshi.

⁴³ Apū jú á nɔŋ ntshónɛ á wú nnéŋɛ ánɛ mefa, o ezáʼ. Á mbɔŋ á mbū wu á lecʉ̄ʼ akem apū, ntā á lezēŋ Ndém, ńtɔ́k á wú á lewɛ mbū mɛ́mbīa, ḿbiŋ ŋgʉ̄ɔ mé alāʼ ŋgʉɔ̄ʼ, á ntē mmók yīi, é té láʼ epí í. [

⁴⁴ Á ajʉʼ mɛ́t, ntentwɛt zīi é jhʉ́ɛ apfhō ŋiŋ, é té kwhʉ́, mmók yīi é éwú, é piŋɛ te mbí í.]

⁴⁵ Akhu jú mé nɔŋ ntshónɛ á wú nnéŋɛ ánɛ mefa, o ezáʼ. Á mbɔŋ á mbū wu á lecʉ̄ʼ akem akhu, ńtā á lezēŋ Ndém, ńtsyā á lewɛ mekhu mɛ́mbīa, mɛ́ piŋ mmāʼ á wú á alāʼ ŋgʉɔ̄ʼ. [

⁴⁶ Á ajʉʼ mɛ́t, ntentwɛt zīi é jhʉ́ɛ apfhō ŋiŋ é té kwhʉ́, mmók yīi é éwú, é piŋɛ te mbí í.]

⁴⁷ Lezēk cú mé nɔŋ ntshónɛ á wú nnéŋɛ ánɛ mefa, o etsɔ́ʼ ŋgwáʼ. Á mbɔŋ á mbū wu á lecʉ̄ʼ apií‑lezēk, ŋ́kó á ntē Lefɔ Ndém, ńtsyā wú á lewɛ menēk mɛ́mbīa, mɛ́ piŋ mmāʼ á wú á ntē mmók, á alāʼ ŋgʉɔ̄ʼ.

⁴⁸ Á ajʉʼ mɛ́t, ntentwɛt zīi é jhʉ́ɛ apfhō ŋiŋ é té kwhʉ́, mmók yīi é éwú, é piŋɛ te mbí í.

⁴⁹ Á gɔ́ áa lɛ, mɛ́ e láʼ elɔk mmók, énuʼ awíɛ awíɛ, páʼ mɛ́ lɔkɔ ŋgwāŋ nnūʼu etsō.

⁵⁰ Ŋgwāŋ é si ŋgɔ́ ajūɔ mbɔŋ. Táʼ, é piŋɛ te zéŋ ndē ɛ́, mɛ́ lɔk akɔ̄ ŋghʉ̄, tɛ é zéŋ ndē é? Pɛ egɔ́ wɔ ŋgwāŋ á lɔ́ŋ, púp, ŋ́gwɛ̄ apwɛne á tsetsɛlɛ pɛ. »