Málkúsi 8 - Eka Eswhī

Yɛɛ́so a á ega nzékɛ epuɔ menɔŋ ntsāʼ lekua

¹ Á lɛ ánɛ meleʼé mɛ́t, alāʼ á zéŋ ncúʼte leswhī leswhī á lezēŋ Yɛɛ́so tɛ nzáne, ńnáŋ tɛ pɔ́ té zéŋ ŋgwɛ̄ ajū mīi, pɔ́ e pfɛ́t ɛ́, Yɛɛ́so á tɔ́ŋ megaŋ nnɔ pí, ńdé á mbū pɔ́p ŋ́gɛ:

² «Meŋ á si mbúu ntsáa atʉtʉ epuɔ jʉɔ tɛʼ. Á ayáʼa eleʼé tɛ́t, páʼ pɔ́ é nzem meŋ, pɔ́ piīŋ te zɛ́t ŋgwɛ̄ ajū mīi pɔ́ gɔ epfɛ́t ɛ́.

³ Meŋ tswii ŋ́gɛ, pɔ́ epīŋ nzem mé memba mɔ́p té pfɛ́t azō, mbɔ pɔ́ e kó á mɛnzhɛ ewhʉte nzi. Emɔ̄ʼ epuɔ é nnɔ pɔ́p, éfhɔ́ɔ á tɛ ŋgia sisia. »

⁴ Nnɔ yí é tsɔ́ʼ á mbū yí ŋ́gɛ: «Mɛ́ gɔ elɔ̄ɔk etsō lejhʉ̄ egɔ́, á késáatswɛt ega, tɛ́ ndɔk nzék á wɔ́p tɛ pɔ́ zwɛ́t ē?»

⁵ Á zɛ́tte á wɔ́p ŋ́gɛ: «Pɛ wɛɛ̄ mblɛ egā ntāʼ shɔ́ʼɔ́?» Pɔ́ gɛ: «Ntāʼ esambīa. »

⁶ Á lɛ ntswī á mbū alāʼ ŋ́gɛ, pɔ́ enáŋte á aláŋ esī. Ńtswí mblɛ mɛ́t ntāʼ esambīa, ésyákne á Ndém. Ńnɔŋ mbwɔ́ʼtɛ ŋgyáa á mbū nnɔ yí ŋ́gɛ, pɔ́ egāpte, pɔ́ tswii ŋgāptɛ á mbū alāʼ.

⁷ Pɔ́ le zéŋ ŋgwɛ mezízí mesōh tsɔ ntāʼ shɔ́ʼɔ́ lɛ́, Yɛɛ́so á tswí, ésyákne á Ndém éwú, ŋ́gyá mé pɔ́p ŋ́gɛ, pɔ́ ezéŋ ŋgāpte.

⁸ Awíɛ awíɛ á pfɛ́t tɛ nzwɛ́t. Nnɔ yí é lakte epwɔ̄ʼ tsīi, é vuʼu, é pɔ́ metúŋ akelaʼ esambīa.

⁹ Epuɔ pīi é le pfɛ́t ecū muɔ mɛ́t, a lɛ ŋiŋnɔŋ ajūɔ ntsāʼ lekua. Yɛɛ́so á tswi ŋ́gɛ, pɔ́ epīŋ nzem mé memba mɔ́p.

¹⁰ Ńdɛ ŋkɔ́ʼ ŋ́kó á ntē akɛnūʼ, pɔ́ a nnɔ yí é gʉɔ mé apak ŋgɔŋ Dalmanūta.

Yɛɛ́so a á ega ndʉ̄ʼɛ á leghʉ meŋkʉʼne anu á mvhɔ epuɔ Falísia

¹¹ Ŋ́kó éwú, epuɔ Falísia é liɛ eshʉ̄ʼɛ, pɔ́ a Yɛɛ́so é zii á leŋak. Pɔ́ ge elʉʼ á yí letā, ńdé á mbū yí ŋ́gɛ, a eghʉ̄ á taʼ ŋkʉʼne anu, a egɔ́ ayiŋne zīi, á tswii á légɛ, mete mí é fhɔ́ɔ á mbū Ndém.

¹² Yɛɛ́so á chʉ́ nnɛ̄t ŋkɔ́ʼne azwakne zí, ńdé á mbū pɔ́p ŋ́gɛ: «Epuɔ ŋguʼ puɔ é zɛ́ttɛ ŋ́gɛ, meŋ eghʉ̄ á taʼ ŋkʉʼne anu, a egɔ́ ayiŋne zīi, á tswii á légɛ, mete má é fhɔ́ɔ á mbū Ndém melaʼ akɔ̄? Meŋ shúŋɔ á wɛ́ á kwaʼ anuúnē ŋ́gɛ, meŋ té ndáʼa ntswīi amɔ̄ʼ ayiŋne anu, á mbū epuɔ ŋguʼ puɔ ɔ́. »

¹³ Ńdé épúp, éfhó á lezēŋ pɔ́p, ńzéŋ ŋgʉ̄ɔ ŋ́kó á ntē akɛnūʼ, ńtó mé nzéŋ mmɔʼ.

Nnɔ Yɛɛ́so é té si njúʼɔ anu zīi, a zíʼnɛ á wɔ́p ɔ́

¹⁴ Yɛɛ́so pɔ́ a nnɔ yí é le gē etó ntshi egʉɔ mé nzéŋ mmɔʼ, mbɔ nnɔ yí é ndēkne té pɛ́ mblɛ, ńdɛ ŋgwɛ̄ á taʼ ndaʼ á ntē akɛnūʼ.

¹⁵ Pɔ́ nɔŋ ŋgʉ̄ɔ épúp, Yɛɛ́so á tswɛte á wɔ́p ŋ́gɛ: «Pɛ epá á mɛt epuɔ Falísia, ńzéŋ mbá eyi efɔ Elōde, a á páʼ levwi lā. »

¹⁶ Pɔ́ júʼ páʼ a kímɛ levwi, ńzī á lepyākne á tsetsɛlɛ pɔ́p ŋ́gɛ, a shúŋnɛ ezi ntií péʼe, melaʼ mīi ḿpɛ é té zɛ́t ŋgwɛ̄ mblɛ ɛ́.

¹⁷ Yɛɛ́so á zhɛ́ ajū mīi pɔ́ é pyákne, ńzɛ́tte á wɔ́p ŋ́gɛ: «Pɛ lʉ́ɛ́ á tsetsɛlɛ pɛ ŋ́gɛ, pɛ te mblɛ wɛ̄ɛ melaʼ akɔ̄? Pɛ ka zhɛ́ ajū mīi, á lɔkɔ ndʉ́ɛ́, pɛ lɔkɔ nzɛ́t áa te júʼ lɛ́? Leghi tsɛ́ é zɛɛ́t ntsɛ́tte tsɛtté lɛ́?

¹⁸ Pɛ wɛɛ̄ menēk, ḿbiŋ nnɔ̄ŋ te njʉ́ɔ ejʉʼ ɛ́ lɛ̄? Pɛ wɛɛ̄ metuúŋ, ḿbiŋ nnɔ̄ŋ te njúʼu ejʉʼ ɛ́ lɛ̄? Pɛ ka zéŋ ŋkímte anu zīi, meŋ nde ghʉ̄ ɛ́ lɛ̄?

¹⁹ Meŋ nde pwɔʼté mblɛ ntāʼ táa, ńdɔk nzék epuɔ ntsāʼ táa péʼe, pɛ pɛ́te epwɔ̄ʼ tsīi é vuʼɔ, é ló metúŋ méshɔ́ʼɔ́?» Pɔ́ gɛ: «Metúŋ ntsɔp pīa mé legēm. »

²⁰ «Ḿbwɔ́ʼte mblɛ ntāʼ esambīa, ńdɔk nzék á ŋiŋnɔŋ ntsāʼ lekua péʼe, é vuʼu metúŋ akelaʼ mɛ́shɔ́ʼɔ́, pɛ lɔ̄k ŋgʉ̄ɔ ɔ́?» Pɔ́ gɛ: «Metúŋ esambīa. »

²¹ Yɛɛ́so á lɛ nzɛ́tte á wɔ́p ŋ́gɛ: «Tɛ ntshí tsetsɔŋɔ, pɛ zeéŋ nzɛ́t áa te júʼ lɛ́?»

Yɛɛ́so a á ega ŋghʉ̄ɛ afʉʉ́‑menēk á tʉɛ á tésɔŋ Betsayída

²² Yɛɛ́so pɔ́ a nnɔ yí é gʉɔ tɛ ŋkó á Betsayída, ámɔ̄ʼ alāʼ, mɛ́ lɔk amɔ̄ʼ afʉʉ́‑menēk eshʉ̄ʼ á mbū yí, éswíŋte á yí ŋ́gɛ, a elɛ mpfēŋ á yí.

²³ Yɛɛ́so á kímne apū zí, ńtsāŋ á yí ndɔk efhó á alāʼ mɛ́t ntó, ńtsōkte mekī á menēk yí, ńzápa mbū ánɛ yí, ńzɛ́tte á yí ŋ́gɛ: «O ó si njʉ́ɔ ejʉʼ e?»

²⁴ Afʉʉ́‑menēk á ŋáʼa menēk mí, ńdé ŋ́gɛ: «Meŋ á si njʉ́ɔ epuɔ menɔŋ pɔ́ nɔŋ nzīŋɛ, tɛ́ ŋké ŋgɔ́ páʼ methʉ́ lā. »

²⁵ Yɛɛ́so á zéŋ nzápa mbū mí leswhī leswhī á menēk yí. Á lɛ njʉ́ɔ ejʉʼ á mbɔŋɔ́, mbɔ a á te, tɛ nnɔ̄ŋ nchʉ́ɛ nnɛ̄t njʉ́ɔ akʉ̄ɛ akʉ̄ɛ á mbɔŋɔ́.

²⁶ Yɛɛ́so á lɛ ndé á mbū yí ŋ́gɛ, a epīŋ nzem mé mba zi, ndɛ́ʼ á zéŋ mbɔɔ á tésɔŋ mɛ́t, á alāʼ mɛ́t ntsīa.

Piɛ a á ega ndʉ́ɛ́ ŋ́gɛ, Yɛɛ́so a á Nzaʼ‑Ŋkhʉ

²⁷ Yɛɛ́so pɔ́ a nnɔ yí é lu á esī, ńnɔŋ ŋgʉ̄ɔ mé eshhʉ̄ emɔ̄ʼ mekap alāʼ mīi, é pateé akap zīi, mɛ́ tɔ́ŋɔ lɛ Sezale Fílíio. Ŋ́kó á mɛnzhɛ, á zɛ́tte wɔ́p ŋ́gɛ: «Epuɔ é si ndʉ́ɛ́ ŋ́gɛ akɔ̄, ánɛ meŋ ŋ̄?»

²⁸ Pɔ́ pwɛt á mbū yí ŋ́gɛ: «Epuɔ é si ndʉ́ɛ́ ŋ́gɛ, o ó Jáaŋ nnoʼ‑epuɔ á ntshi, emɔ̄ʼ epuɔ é nɔŋ ndʉ́ɛ́ ŋ́gɛ, o ó Eli, emɔ̄ʼ é kó nnɔ̄ŋ ndʉ́ɛ́ ŋ́gɛ, o ó mmɔʼ ntswi‑ŋke Ndém yīi, a lɛ efʉʼ mvhɔ. »

²⁹ Á zɛ́tte á wɔ́p ŋ́gɛ: «Ḿbiŋ ŋgɔ́ mé pɛ, pɛ nɔ̄ɔŋ ndʉ́ɛ́ azɛ́ ŋ́gɛ akɔ̄?» Piɛ á pwɛt ŋ́gɛ: «O ó páʼā, ŋ́gɔ́ á Nzaʼ‑Ŋkhʉ á ntɔ̄ŋ apuʼ. »

³⁰ Yɛɛ́so á chʉ́ nnɛ̄t ntswɛ̄te á wɔ́p ŋ́gɛ, ndɛ́ʼ pɔ́ eghʉ tɛ ŋiŋ á zhɛ́.

Yɛɛ́so a á ega eshúŋɔ páʼ, yí gɔ̄ eshʉʼ ekwhʉ́, épiŋ ezím

³¹ Á fhó épúp, Yɛɛ́so á zi á lezīʼne nnɔ yí anu, ńdé ŋ́gɛ: «Méŋ‑Ŋiŋnɔŋ wuɔ a pɔŋteé á yí á lejʉ̄ɔ ŋgʉɔ̄ʼ tɛʼ. Mekém alāʼ pɔ́ a wɔ nɔŋ‑epɔʼ epi melʉɛ, ŋ́ghʉ̄ wɔ kɛ́ʼte‑mbé Ndém e shʉʼ epuŋne á yí, éghʉ mɛ́ ezwhí á yí, a epiŋ ŋgɔ́ eleʼé tɛ́t, Ndém a eghʉ̄, a ezím ánɛ lewhʉ̄. »

³² A le pú nnɔŋ eshúŋɔ anu jʉɔ mɛ́t esia sia. Piɛ á tɔ́ŋ á yí, pɔ́ yí é náʼ efwɔ̄ʼ nnɛ̄t, á zi á lecɔ̄k á yí.

³³ Yɛɛ́so á pekne nnɛ̄t ncʉ̄te nnɔ yí, ńcɔ́k á Piɛ ndé mé yí ŋ́gɛ: «Sɛ́ta, fhó á nzem meŋ ŋgʉ̄ɔ, akwaŋte jú á té si ŋgɔ́ akwaŋte Ndém ɛ́, á si ŋgɔ́ áa azi epuɔ menɔŋ. »

³⁴ Ńtɔ́ŋ alāʼ pɔ́ a nnɔ yí, ńdé á mbū pɔ́p ŋ́gɛ: «Ŋiŋ a nɔŋ ŋkɔ̄ŋɔ á yí á letsē á nzem meŋ, á tshi á yí á lelhʉ athū zí yí méŋwɛ̄t nnéŋ, ḿvéŋ á yí á lekʉɛ á mbaŋne paŋné yi, mbīʼ, ńdɔk ŋgɔ́ á nzem meŋ.

³⁵ Ŋiŋ a nɔŋ ŋkɔ̄ŋɔ á lepīp athū nnɛ̄t zí, ḿbɔ́kɔ á lewhʉ̄, mbɔ a a láʼ ekwhʉ́, épíi. Ŋiŋ a piŋɛ ŋgwáʼ athū nnɛ̄t zí melaʼ má, mbɔɔ melaʼ ŋke mbɔŋ, mbɔ a a láʼ egɔ́ éwú.

³⁶ Ŋiŋ a púu ŋgwɛ̄ lewūʼ ŋgɔŋ ntsem, á ndo esī atsetsáʼ, ḿbīŋ ŋkwhʉ́ ḿbí ndaʼ, mbɔ a á jhʉ́ apɛ akɔ̄?

³⁷ Ŋiŋ a gɔ eyá akɔ̄, ńdɔk ŋkúmne athū nnɛ̄t zí í?

³⁸ Ŋiŋ a nɔŋ ŋkúu esē á legɔ̄ á ŋiŋ nnɔ ga, ńnɔ̄ŋ ŋkúu esē á lekūʼte ashuŋne zá, á mvhɔ epuɔ ŋguʼ puɔ pīi, pɔ́ lē ŋgwáʼ á Ndém, ńcʉ́ʼɛ ŋghʉ̄ɛ áa menu tepɔŋ, mbɔ Méŋ‑Ŋiŋnɔŋ wuɔ a a láʼ epuŋne á ŋgaŋ, áfʉʼ zīi a láʼa mbīŋɛ nzem pɔ́ a mecɔʼ Ndém, á ntē shʉ́shɔ́k Mɔʼɔ́ yi.