Málkúsi 15 - Eka Eswhī

Pilat, á ŋgɔpna a á ega ŋŋāka á Yɛɛ́so

¹ Njhʉ̄ é lá nzemɛ́nzēm, wɔ nɔŋ‑epɔʼ epi melʉɛ, mbɔɔ mekém alāʼ, pɔ́ wɔ kɛ́ʼte‑mbé Ndém, ŋ́ghʉ̄ wɔ sáʼ‑alāʼ metsem, é cúʼte ánɛ mía asāʼ. Ŋ́ghʉ ntswī mɛ́ kwɛ́t á Yɛɛ́so, pɔ́ lɔk á yí ŋgʉɔ ŋgyá á mbū Pilat.

² Pilat á zɛ́tte á yí ŋ́gɛ: «Wu mé efɔ epuɔ Yúda a?» Yɛɛ́so á pwɛt ŋ́gɛ: «Á tó á nchu wu. »

³ Wɔ nɔŋ‑epɔʼ epi melʉɛ, pɔ́ tshí menu tɛ é zá tɛʼ á athū Yɛɛ́so.

⁴ Pilat á zéŋ nzɛ́tte á yí leswhī leswhī ŋ́gɛ: «Mɛ́ é si mbúu ntshíɛ menu ánɛ wu páʼa, o te mbwɛ̄tɛ lɛ̄?»

⁵ Yɛɛ́so á pú te zéŋ anu ndé ɛ́, tɛ á kʉʼne á Pilat.

⁶ Á lɛɛ́ ŋgɔ́ɔ ánɛ etsiɛ́ lekāk Páska lɛ́, Pilat a epɔ́ŋte á lefōk taʼ ŋgaŋ atʉɛ́ yīi, alāʼ á si nzɛ́ttɛ.

⁷ Á gē egɔ́ épúp, mmɔʼ ŋiŋ á gɔ́ á ŋgyā atʉɛ́, lezēŋ tsí é gɔ́ lɛ Balabas. Pɔ́ a akhu zɔ́p é lɛ á ŋgyā atʉɛ́, melaʼ mīi, pɔ́ le māʼ á tákté á tésɔŋ, ńzwhí á ŋiŋ.

⁸ Alāʼ á shʉʼ nzɛ́tte á Pilat ŋ́gɛ, a eghʉ̄ anu zīi, a gɛ nzī ŋghʉ̄ɛ á mbū pɔ́p, á afʉʼ lekāk Páska.

⁹ Pilat á pwɛt á mbū pɔ́p ŋ́gɛ: «Pɛ kɔŋɔ ŋ́gɛ, meŋ eyá á efɔ epuɔ Yúda wuɔ, á mbū pɛ lɛ́?»

¹⁰ A lɛɛ́ nzɛ́ttɛ épúp melaʼ mīi, a le nɔ̄ŋ nzhɛ́ɛ á légɛ wɔ nɔŋ‑epɔʼ epi melʉɛ, é záa esɔ̄ ánɛ Yɛɛ́so zaá tɛ́ eswīŋɛ á yí.

¹¹ Wɔ nɔŋ‑epɔʼ epi melʉɛ é ke nnɔ̄ŋ eswītɛ alāʼ swite ŋ́gɛ, pɔ́ etswī Pilat a eké efók áa Balabas ŋgyá mé pɔ́p.

¹² Pilat á zéŋ nzɛ́tte á wɔ́p ŋ́gɛ: «Pɛ kɔŋɔ ŋ́gɛ, meŋ mbiŋ ŋghʉ̄ páʼ lā, ánɛ ŋiŋ wuɔ yīi, pɛ tɔ́ŋɔ á yí lɛ, efɔ epuɔ Yúda la ā?»

¹³ Pɔ́ zéŋ mbú ńdéŋte ŋguŋ, ndé á mbū yí ŋ́gɛ: «Kwɛte á yí ánɛ mbaŋne paŋné. »

¹⁴ Pilat á zɛ́tte á wɔ́p ŋ́gɛ: «Anu tepɔŋ zīi a á ghʉ, á lɛɛ̄ ŋgɔ́ á aziɛ́ ɛ́?» Pɔ́ zɛ́t ntswīʼnɛ ndéŋtɛ meŋguŋ mé nte leŋté, ńdé ŋ́gɛ: «Kwɛte á yí ánɛ mbaŋne paŋné. »

¹⁵ Pilat á nɔŋ efāʼa á leghʉ ajū mīi, á pɔŋ alāʼ páʼā, éfók á Balabas á ŋgyā atʉɛ́. Ḿbiŋ ntswī mɛ́ lɔk ntɛ̄ ntswá Yɛɛ́so, ńdɔ̄k á yí ŋgʉɔ ŋkwɛ̄te ánɛ mbaŋne paŋné.

Wɔ lʉɔ́ʼ‑ncu é ega nnéŋɛ esē á athū Yɛɛ́so

¹⁶ Wɔ lʉɔ́ʼ‑ncu é tɔ́ŋ nnɔ wɔ́p metsem, pɔ́ a pɔ́p é lɔk á Yɛɛ́so ntɔ́k mé atetá ŋgɔpna.

¹⁷ Ḿbɛ́ á paŋ nzhó mmāʼ ánɛ yí, ndɔ̄k menzɔ̄ŋ mbáʼ acɔʼ lefɔ, éshū á athū yí.

¹⁸ Ńzī á leyā mekuʼ á mbū yí, ńdé ŋ́gɛ: «Zaá efɔ epuɔ Yúda. »

¹⁹ Ńdɔ̄k á taʼ akekaʼa ntswá á yí á athū yí, ńnɔŋ ntsōko mekī ánɛ yí, ńtswíʼte á esī ŋŋɔ́ʼne á mvhɔ yí, páʼ mɛ́ wuʼtɛ á yí lā.

²⁰ Ńzɔ̄te á yí épúp tɛ afʉʼ á kuʼ, pɔ́ zéŋ esɔ̄ŋ á paŋ nzhó wɔ̄ ánɛ yí, ḿbɛ́ menzhó mí nzéŋ mmāʼ ánɛ yí, ńdɔ̄k á yí ntó ŋgʉ̄ɔ mé ŋkwɛtɛ́ ánɛ mbaŋne paŋné.

Mɛ́ é ega ŋkwɛ̄tɛ Yɛɛ́so ánɛ mbaŋne paŋné

²¹ Pɔ́ gʉɔ ŋkó á mɛnzhɛ, ńjʉ́ɔ mmɔʼ ŋiŋ, á nɔŋ efhɔ́ɔ mé ŋkāʼ, lezēŋ tsí é gɔ́ lɛ Simɔŋ, á gɔ́ á ŋiŋ tésɔŋ Silɛ̄ne, ŋ́gɔ́ á mɔʼɔ́ Alɛkzaŋdle pɔ́ Lufus. Wɔ lʉɔ́ʼ‑ncu é lɔk mbʉʼ ŋgɔ̄ á yí, ŋ́gɛ a epīʼ á mbaŋne paŋné Yɛɛ́so.

²² Á piʼ, pɔ́ a Yɛɛ́so lɔk ŋgʉ̄ɔ tɛ ŋkó amɔ̄ʼ ajʉʼ, mɛ́ tɔ́ŋ lɛ Gɔlgota, ńdɔkɔ ŋ́gɛ, Akwɛ́ Athū.

²³ Ŋ́kó éwú, ńnɔŋ efāʼa ŋ́gɛ Yɛɛ́so a enú meluʼ mīi, mɛ́ ndɔ̄k amɔ̄ʼ azō mvūŋ, mɛ́ tɔ́ŋ lɛ míi, tɛ́ Yɛɛ́so a te nú.

²⁴ Pɔ́ kwɛte á yí ánɛ mbaŋne paŋné. Ḿbɛ́ menzhó mí, ŋ́gē egapte, ńdɔ̄k nzikɛ́, ŋ́gɔ̄ á nzhɛ́ɛ ezi taʼ ŋiŋ a a lɔk.

²⁵ Pɔ́ lɛɛ́ ŋkwɛtɛ á yí épúp, á gɔ́ ánɛ menu levuʼɔ́ nzemɛ́nzēm.

²⁶ Mɛ́ tí nthū lewhʉ̄ yí, ḿblɛ́ ánɛ athū athʉ́ mbaŋne paŋné mɛ́t ŋ́gɛ: «Efɔ epuɔ Yúda. »

²⁷ Mɛ́ le zéŋ ŋkwɛte metsɔ́ŋ azɔ́p mémpīa, ánɛ epɔ́p membaŋne paŋné. Mmɔʼ ŋgaŋ á gɔ́ á ŋkɔʼɔ́ apū ete Yɛɛ́so, mmɔʼ á gɔ́ á ŋkɔʼɔ́ apū tswioɛ. [

²⁸ Púp, ajū mīi mɛ́ le tí á ntē aŋwaʼne Ndém ŋ́gɛ: «Mɛ́ e láʼ esáŋ á yí á nnɔ epuɔ tepɔŋ», á lɔkɔ mbūɔ̄.]

²⁹ Yɛɛ́so á zɛ́t ánɛ mbaŋne paŋné ntsēŋne, metsia‑nzhɛ é ge etɔ́ke, ésɛ̄ á po ŋgyá á mbū yí, ńzɔ̄te á yí, ḿvhó á yí ndé ŋ́gɛ: «Hḿ, o ke nɔ̄ŋ ndʉ́ɛ́ ŋ́gɛ, o o shʉʼ eták á Mía Ŋgyā Ndém, épiŋ elɔk eleʼé tɛ́t, ékwɛ́t ezi ndɛʼɛ.

³⁰ Tswí athū jú á mbū lewhʉ̄ wu méŋwɛ̄t, éfhó ánɛ mbaŋne paŋné esóʼo lɔ. »

³¹ Wɔ nɔŋ‑epɔʼ epi melʉɛ azɔ́p pɔ́ wɔ kɛ́ʼte‑mbé Ndém, é zéŋ nnɔ̄ŋ nzɔ̄tɛ Yɛɛ́so á nnɔ pɔ́p ndʉ́ɛ́ ŋ́gɛ: «A lɛɛ́ ŋkʉ́ʼnɛ ntswíi epuɔ á mbū lewhʉ̄, a etswí athū nnɛ̄t zí lɔ.

³² Efɔ epuɔ Islaɛl, á Nzaʼ‑Ŋkhʉ yīi Ndém a le laʼnē lā, á efhó ánɛ mbaŋne paŋné tsetsɔŋɔ esóʼo, pek ejʉ́ɔ épúp, ḿvéŋ á mbū yí. » Epuɔ pīi mɛ́ ŋkwɛ̄te á wɔ́p a pɔ́p, é nɔŋ nzɔ̄tɛ á yí azɔ́p.

Lekwhʉ̄ Yɛɛ́so

³³ Á kó ŋgɔ́ á táŋ‑azokó ndeŋ ndeŋ, nzém é pú eséŋ á esī atsetsáʼ ntsem, tɛ ndáʼ ntshí menu ntɛ́t mbwɛɛ́t‑njhʉ̄.

³⁴ Menu ntɛ́t mɛ́t á kuʼ páʼā, Yɛɛ́so á gaʼte mé ŋghi teté ŋ́gɛ: «Eloyi, Eloyi lema sabaktani», ńdɔkɔ ŋ́gɛ: «Ndém ga, Ndém ga, o ó wáʼ á gá melaʼ akɔ̄?»

³⁵ Emɔ̄ʼ epuɔ á nnɔ epuɔ pīi, é ŋgɔ́ éwú, é júʼ ndé ŋ́gɛ: «Pɛ ejúʼ páʼ a á ege ntɔ́ŋɔ á Eli.

³⁶ Mmɔʼ ŋiŋ nnɔ wɔp á kʉte, ŋ́gʉɔ ncɔ̄ʼ á pwɛt ánɛ akiɛ́‑meluʼ, éswík ánɛ athū akekaʼa, ŋ́gē etsakne enéŋ á nchu Yɛɛ́so ŋ́gɛ a eswɛ́te, ńnɔŋ ndʉ́ɛ́ ŋ́gɛ: «Ḿpɛ ecʉ́ʼ njʉ́ɔ, kɛɛ Eli a a shʉʼ efhó ánɛ mbaŋne paŋné esóʼne á yí lɛ́ɛ. »

³⁷ Yɛɛ́so á piŋ ŋgāʼte mé ŋghi teté, ńdɛ ŋkwhʉ́.

³⁸ Ŋ́kwhʉ́ épúp, nzhó zīi mɛ́ le lɔ̄k esáne ntē Mía Ŋgyā Ndém, é fhó á ŋkɔŋ, ésīa nnɛ̄t epak pīa, tɛ ntshí á ntsēŋ.

³⁹ Tɛŋgyā wɔ lʉɔ́ʼ‑ncu yīi a le tshí mbeŋne Yɛɛ́so, á jʉ́ɔ ntií zīi a á lɔk ŋkwhʉ́, tɛ ndé ŋ́gɛ: «Anuúnē, ŋiŋ wuɔ a á ŋgɔ́ á Méŋ Ndém. »

⁴⁰ Emɔ̄ʼ wɔnzwí é le tshí azɔ́p tɛ éwú, tɛ́ njʉ́ɔ emuɔ menu mɛ́t. Á lɛ á nnɔ pɔ́p, ŋ́gɔ́ Malía mɔ́ Makdala, ŋ́ghʉ̄ á Malía mía Jáak eyi ŋkhʉ̄, ńzéŋ ŋgɔ́ eyi Jozé, ŋ́ghʉ̄ á Salɔmɛ.

⁴¹ Ŋ́gɔ́ wɔnzwí pīi, pɔ́ a Yɛɛ́so é lɛɛ́ ŋkʉ́ʼnɛ á Ŋgaliléa nzīŋɛ, pɔ́ nɔŋ ntswítɛ á yí. Pɔ́ tshíte éwú, pɔ́ a emɔ̄ʼ wɔnzwí tɛ nzáne, épi pɔ́ a pɔ́p le tsé á nzem Yɛɛ́so, éshʉ̄ʼ mé Yelósalɛm.

Mɛ́ é ega ntúŋɔ á Yɛɛ́so

⁴² Á kó ŋgɔ́ aleʼé zīi, mɛ́ gɔ ezi á lepɛ̄tte aleʼé aswite. Aleʼé aswite mɛ́t, á nɔŋ ŋgɔ̄ ezi mbwɛɛ́t‑njhʉ̄ mɛ́t.

⁴³ Mmɔʼ ŋiŋ á shʉʼ, lezēŋ tsí é gɔ́ lɛ Yosɛ́p, ŋ́gɔ́ á ŋiŋ tésɔŋ Alimaté. A lɛ mmɔʼ ŋiŋ á nnɔ wɔ sáʼ‑alāʼ, mɛ́ yá mekuʼ á mbū yí, mbɔ a gɛ nzwíʼtɛ azí afʉʼ zīi, Ndém a gɔ eshʉʼ ezi lefɔ tsí á ndo esī atsetsáʼ ega. Á lɛ ŋkwɛ́t ntē yí, ŋ́gʉɔ njʉ́ɔ á Pilat, ńdɔ́ á apfhō Yɛɛ́so, ŋ́gɔ̄ á ntúŋɔ.

⁴⁴ Pilat á júʼ á légɛ Yɛɛ́so a á ndáʼ ŋkwhʉ́, á kʉʼne á yí tɛ́ʼ. Á tɔ́ŋ á tɛŋgyā wɔ mmaʼ‑ncu, ńzɛ́tte á yí ŋ́gɛ, Yɛɛ́so a á ndáʼ ŋkwhʉ́ tɛ afʉʼ kɛɛ́ lɛ́?

⁴⁵ Á shúŋ á yí, á véŋ á légɛ Yosɛ́p, a egʉɔ esóʼne apfhō Yɛɛ́so ndɔ̄k ŋgʉ̄ɔ.

⁴⁶ Yosɛ́p mɛ́t á gʉɔ nzó mmɔʼ ntií mɛkúkú, ŋ́gʉɔ esóʼne apfhō Yɛɛ́so ánɛ mbaŋne paŋné, ńdɔk nzémte. Ŋ́gʉɔ nnɔ̄ŋ á ntē mmɔʼ lesi tsīi, mɛ́ le gʉɔ́p á mbe mía tɔ́, ńzéŋ ŋkʉ̄ŋte mmɔʼ mía tɔ́, ńdɔk ŋkápte nchu.

⁴⁷ A ge enéŋ épúp, Malía mɔ́ Makdala, mbɔɔ Malía mía Jozé é nɔŋ njʉ́ɔ ajʉʼ zīi, mɛ́ féŋɛ apfhō Yɛɛ́so éwú.