Málkúsi 14 - Eka Eswhī

Mekém alāʼ é ega ntshíɛ ntāŋ Yɛɛ́so

¹ Á shʉʼ nzɛ́t eleʼé pīa, aleʼé lekāk Páska a ekūʼ, ŋ́gɔ́ aleʼé zīi, epuɔ Islaɛl é gɛ mpfɛ́tɛ mmɔʼ ntií mblɛ te levwi. Wɔ nɔŋ‑epɔʼ epi melʉɛ pɔ́ wɔ kɛ́ʼte‑mbé Ndém, é nɔŋ efāʼa eshhʉ̄ yīi, pɔ́ e lɔk egɔ á Yɛɛ́so ezwhí, tɛ alāʼ á le zhɛ́.

² Pɔ́ le nɔ̄ŋ ndʉ́ɛ́ á nnɔ pɔ́p ŋ́gɛ: «Ndɛ́ʼ ḿpɛ egɔ̄ɔ á yí á aleʼé lekāk, ḿbɔ́k alāʼ á lecʉʼne. »

Mmɔʼ menzwí a á ega ndɔ̄kɔ alamńda nzɔ́ʼɔ á Yɛɛ́so

³ Afʉʼ mɛ́t, Yɛɛ́so á gɔ́ á Betani á ŋgyā Simɔŋ ŋgaŋ kaʼpáp, ŋ́ghʉ nnáŋ á esī, ńnɔŋ mpfɛ́tɛ azō, mmɔʼ menzwí á shʉʼ ŋkó azí á ŋgyā, ŋ́gwɛ̄ mmɔʼ ntií atūʼ, mɛ́ lɔk albaatle tɛ́ ncūŋte, alamńda zīi á teē nzwiŋ tɛʼ, á gɔ́ á ntē éwú. Ḿbwɔ́ʼ athū atūʼ mɛ́t, ńnéŋ alamńda á athū Yɛɛ́so.

⁴ Emɔ̄ʼ epuɔ á tsetsɛlɛ epuɔ pīi, é lɛ éwú, é jʉ́ɔ épúp, ńzwɛ́tte ndé ŋ́gɛ: «Menzwí yi, a tseŋtɛ alamńda zi péʼe, ŋ́gɔ̄ á njhʉ́ɛ apɛ akɔ̄ éwú ú?

⁵ Á ŋgɔ́ yīi, a ké gɔ́ mɛ́ swiŋ mevɛ̄t mɛ́t, tsɔ ndenía ŋkhʉ tɛ́t, ńdɔk ntswíte mepūŋ. » Ńdɛ ncʉ́ʼɛ ncɔ́kɔ menzwí mɛ́t cɔ́ke.

⁶ Tɛ́ Yɛɛ́so á lé á mbū pɔ́p ŋ́gɛ: «Pɛ etshī á menzwí wɔ̄ nnéŋ. Pɛ genɛ á yí melāʼ akɔ̄? Ajū mīi a á ghʉ ánɛ meŋ, á si ŋgɔ́ á kwaʼ anu mbɔŋ.

⁷ Pɛ a mepūŋ mé esī efʉʼ metsem, ḿbiŋ ŋgɔ́ yīi pɛ kɔŋɔ efʉʼ akɔ̄ lɛ́, pɛ eghʉ̄ʉ anu mbɔŋ ánɛ pɔ́p. Ŋ́ké ŋgɔ́ mé meŋ, mbɔ ḿpɛ mé te shʉʼ egɔ́ á esī efʉʼ metsem ɛ́.

⁸ Menzwí wuɔ, a á ghʉ ajū mīi a gɔ ekūuʼ éwú. A á té njhʉ̄ ndɔ̄k alamńda nzɔ́ʼ nnɛ̄t za, tɛ́ aleʼé zīi mɛ́ e néŋ á gá á lesi, a eshʉʼ ŋkūʼ.

⁹ Meŋ shúŋɔ á wɛ́ á kwaʼ anuúnē ŋ́gɛ: mbɔɔ egɔ́ lɛ́ yīi, mɛ́ e shʉʼ enɔŋ etswii ŋke mbɔŋ éwú, á ntē ŋgɔŋ ntsem, mɛ́ shʉʼɛ ekímɛ á menzwí wuɔ, épiŋɛ eshúŋɔ anu mbɔŋ zīi a á ghʉ, epuɔ menɔŋ e elɔkɔ nnáŋa ŋkímtɛ á yí. »

Yúdas a á ega ŋgɔ̄ á njhʉ́ zoʼ Yɛɛ́so

¹⁰ Yúdas Iskaliɔt, ḿmɔʼ ŋiŋ ánɛ meziŋ‑ntō ntsɔp pīa mé legēm, á lɛ ŋgʉɔ njʉ́ɔ wɔ nɔŋ‑epɔʼ epi melʉɛ, ŋ́gɛ yí e swiŋ á Yɛɛ́so á mbū pɔ́p.

¹¹ Pɔ́ júʼ épúp, ḿbú ŋkák, ḿbhʉ́ á yí ŋkāp. Á lɛ efhó épúp, Yúdas á zi á lefaʼ eshhʉ̄ yīi, a a lɔk efɛ́ á Yɛɛ́so á mbū pɔ́p.

Yɛɛ́so pɔ́ a nnɔ yí é ega njhʉ́ɛ lekāk Páska

¹² Mvhɔ aleʼé ánɛ ŋgap alāʼ zīi, mɛ́ lɛɛ́ mpfɛ́tɛ mblɛ te levwi, e le kūʼē, ŋ́gɔ́ aleʼé zīi, mɛ́ zwhíɛ á mɔ́ njʉnjhʉ tɛ́ ndɔkɔ njhʉ́ɛ á Páska. Megaŋ nnɔ Yɛɛ́so é zɛ́tte á yí ŋ́gɛ: «O ó si ŋkɔ̄ŋɔ ŋ́gɛ, pek egʉ̄ɔ egɔ́ ncūŋte ecū mīi, o o lɔk ejhʉ́ lekāk Páska ā?»

¹³ Yɛɛ́so á júʼ épúp, éfāk epuɔ mémpīa ánɛ nnɔ yí, ŋ́gē etó á wɔ́p, ńdé ŋ́gɛ: «Pɛ egʉ̄ɔ á tésɔŋ, pɛ e kó éwú, épote mmɔʼ ŋiŋ, a epīʼ atʉ̄ɔ́ ntshi, pɛ ezhɛ̄ne á yí,

¹⁴ tɛ a ekó á ŋgyā, pɛ ekó azɛ́, ńtswī á mbū ŋgaŋ ŋgyā ŋ́gɛ, Ndi a á tó á wɛ́ ŋ́gɛ, pɛ eshʉʼ nzɛ́tte eyí ntē ŋgyā yīi, pɔ́ a nnɔ yí é gɔ á njhʉ́ lekāk Páska éwú.

¹⁵ A etswī á wɛ́ mmɔʼ mía lewup ŋgyā ánɛ leleŋ athʉ́, akʉ̄ɛ akʉ̄ɛ a epú ŋgɔ́ éwú, mbɔ mɛ́ ncūŋte á mbɔŋɔ́, pɛ ekó éwú ntɛ́ne etsímpɛ etsō. »

¹⁶ Epuɔ mémpīa mɛ́t é tó ŋgʉ̄ɔ, ŋ́kó á tésɔŋ, ńjʉ́ɔ akʉ̄ɛ akʉ̄ɛ á gɔ́ ndeŋ ndeŋ páʼ, Yɛɛ́so a á ŋghíte á wɔ́p épúp. Pɔ́ lɛ ncūŋte etsɔ́p etsō lekāk Páska éwú.

Yɛɛ́so a á ega mbhʉ́ɛ ŋ́gɛ, mmɔʼ ŋiŋ nnɔ yi a shʉʼ etshí ntāŋ zi

¹⁷ Á kó ŋgɔ́ mbwɛɛ́t‑njhʉ̄, Yɛɛ́so pɔ́ a megaŋ nnɔ pí ntsɔp pīa mé legēm, é kó á ŋgyā mɛ́t.

¹⁸ Ŋ́ghʉ nnáŋ á esī nnɔŋ mpfɛ́tɛ azō, Yɛɛ́so á gɛ: «Meŋ a shúŋ á wɛ́ á kwaʼ anuúnē, mmɔʼ ŋiŋ a á nnɔ pɛ yīi, a shʉʼ eswiŋ á gá, ŋ́gɔ́ á ŋiŋ tɛ pek yí é si mbútɛ etsō mpfɛ́tɛ. »

¹⁹ Nnɔ yí mɛ́t é júʼ épúp, ḿbú mmēk, awíɛ awíɛ á zɛ́tte á yí ŋ́gɛ: «A ké ŋgɔ́ á gá kɛ?»

²⁰ Á pwɛt á mbū pɔ́p ŋ́gɛ: «A á taʼ ŋiŋ á nnɔ pɛ pwɔ̄ ntsɔp pīa mé legēm. Tɛ apū zék yí á pote á ntē ŋgwʉ́ŋ.

²¹ Méŋ‑Ŋiŋnɔŋ wuɔ a shʉʼ egʉɔ áa páʼ mɛ́ le tí ánɛ yí á ntē aŋwaʼne Ndém épúp. Táʼ, ndɔ e ké ŋgɔ́ á athū ŋiŋ wɔ̄ yīi, a gɔ á eswiīŋ Méŋ‑Ŋiŋnɔŋ wuɔ. Á lɛ mbɔŋ á lezi mbú ŋgɔ́ le á ŋgaŋ zhí. »

Mbe nnɛ̄t pɔ́ metshi Yɛɛ́so

²² Yɛɛ́so pɔ́ a megaŋ nnɔ pí é zɛ́t nzhɛ á mpfɛ́t etsō, á pɛ́ mblɛ, ésyákne á Ndém, ḿbwɔ́ʼte, ŋ́gē egapte á mbū pɔ́p, ńdé ŋ́gɛ: «Pɛ ekɔ̄, ejʉɔ é si ŋgɔ́ nnɛ̄t za. »

²³ Ńzéŋ ŋkʉ̄ɛ ndɔ̄ŋ meluʼ, ŋ́gē eyá mé pɔ́p, ésyákne á Ndém, pɔ́ tswí nnú metsem.

²⁴ Á lé á mbū pɔ́p ŋ́gɛ: «Emuɔ é si ŋgɔ́ metshi má, métshi eka Ndém pɔ́ a epuɔ pí, meŋ pfɛttɛ ánɛ athū atʉtʉ epuɔ.

²⁵ Meŋ a shúŋ á wɛ́ á kwaʼ anuúnē: meŋ te láʼ ezéŋ emuɔ meluʼ enú ú, tɛ eláʼ etshí ánɛ aleʼé zīi, meŋ á kó á ntē Lefɔ Ndém, tɛ́ meŋ ezéŋ nnú emi meswhī. »

²⁶ Pɔ́ a Yɛɛ́so é zɔp ntshi, ńdɔk ŋgūʼte á Ndém. Éfhó á ŋgyā ntó, ḿbē mé lekwɛ̄t Methʉ́ Olive.

Yɛɛ́so a á ega esīa ŋ́gɛ Piɛ a shʉʼ epuŋne á yí

²⁷ Ńnɔŋ mbʉ̄ɛ̄, Yɛɛ́so á lé á mbū pɔ́p ŋ́gɛ: «Pɛ metsem e shʉʼ epuŋne á gá, éfhó páʼ mɛ́ le tí á ntē aŋwaʼne Ndém ŋ́gɛ: “Meŋ a shʉʼ ezwhí á mbio‑memvhō, memvhō e epú ntáka ŋ́gʉ̄ɔte”.

²⁸ Táʼ, afʉʼ zīi meŋ á piŋ nzím ánɛ lewhʉ̄, meŋ mbīik á Ŋgaliléa nzwíʼte á wɛ́. »

²⁹ Piɛ á lé á mbū yí ŋ́gɛ: «Epuɔ metsem é zi mbú mbūŋne á wú, mbɔ meŋ ké ŋgɔ́ le á wú puŋne. »

³⁰ Yɛɛ́so á pwɛt á mbū yí ŋ́gɛ: «Meŋ a shúŋ á wú á kwaʼ anuúnē: ɔ́ɔ etsōʼ wuɔ, ŋkʉɔʼ a ghʉ ege etɔ́ŋ ŋgʉɔ mbīa, mbɔ wu wɔ̄, o ó lɛʼte ŋgʉɔ ntɛ́t ŋ́gɛ, o ka gá zhɛ́ ɛ́. »

³¹ Táʼ, Piɛ á lé tɛ ŋkʉɔ́ʼ ŋkwɛ ŋ́gɛ: «Ŋgáŋ, meŋ gɔ le shʉ̄ʼ ndé ŋ́gɛ, meŋ ka á wú zhɛ́ ɛ̄. A zi mbú ŋgɔ́ áa lewhʉ̄, mbɔ pɔkɔ mé pú ekwhʉ́. » Mmɔʼ megaŋ nnɔ Yɛɛ́so, é pú nzéŋ ńdé azɔ́p metsem épúp.

Yɛɛ́so a á ega eswíŋtɛ á Ndém á Getsemani

³² Yɛɛ́so pɔ́ a megaŋ nnɔ pí, é gʉɔ tɛ ŋkó á amɔ̄ʼ ajʉʼ, mɛ́ tɔ́ŋ lɛ Getsemani, á lé á mbū pɔ́p ŋ́gɛ: «Pɛ ezɛ́t ega nnáŋ, meŋ egʉɔ eswíŋte á Ndém. »

³³ Ńtɔ́ŋ á Piɛ pɔ́ Jáak, mbɔɔ Jáaŋ, pɔ́ a pɔ́p é nɔŋ ŋgʉ̄ɔ, além zí á tsɔ́ʼɔ, á zi á levɛt á ntē yí.

³⁴ Ńdé á mbū pɔ́p ŋ́gɛ: «Anu á ntē meŋ mpfɛ́tɛ á gá, tɛ ŋgɔ́ yīi, meŋ gɔ ekwhʉ́. Pɛ enáŋ ega mbíp, ndɛ́ʼ ŋiŋ á lí. »

³⁵ Ńdé épúp, ńnáʼ ŋgʉ̄ɔ tɛ ŋgia é sak, ésóʼo ntswíʼte á esī, éswíŋte á Ndém ŋ́gɛ, a kɔŋɔ, á ghʉ tɛ ejʉɔ ŋgʉɔ̄ʼ, e é le ánɛ yí shʉʼ.

³⁶ Éswíŋte ndé ŋ́gɛ: «Abba, Mɔʼɔ́ ga, amɔ̄ʼ azō á gɔ le á wú tsya, lɛ ŋghʉ̄ meŋ ńde ntūʼ ŋgʉɔ̄ʼ jʉɔ nú. A eké ŋgɔ́ áa páʼ o ó kɔŋ épúp, te ghʉ̄ʉ ajū mīi, meŋ mé kɔŋ. »

³⁷ Éswíŋte tɛ á kuʼ, á sɛt nnɛ̄t, ŋ́gē eshʉʼe, epuɔ métɛ́t pwɔ̄ é nɔŋ ndíi. Á lé á mbū Piɛ ŋ́gɛ: «Simɔŋ, o ó si ndíi lɛ́? O ka kūʼ á wú á lenāʼ nnáŋ á méŋ afʉʼ, té lí lɛ̄?

³⁸ Pɛ egē enáŋ efʉʼ metsem, ńnɔŋ mbípɛ, éswíŋte á Ndém, ḿbɔ́k á lewhʉ ánɛ táté. Ntē ŋiŋnɔŋ é kɔɔ̄ŋ á leghʉ anu mbɔŋ, mbe nnɛ̄t é piŋ ŋká ká. »

³⁹ Ńdé épúp, ńzéŋ ŋgʉ̄ɔ tɛ ŋgia é sak, ńzéŋ eswíŋte á Ndém mé menu mīi, a á nzi ndɔ̄k eswíŋte á yí.

⁴⁰ Ńzéŋ mbīŋ nzem, ŋ́gē eshʉʼe, pɔ́ nɔŋ ndíi, mbɔ lelɔ̄k a á mbú ŋgɔ́ á menēk pɔ́p tɛʼ. Pɔ́ té zéŋ nzhɛ́ anu zīi, pɔ́ e lé á mbū Yɛɛ́so ó.

⁴¹ Á zéŋ eshʉ̄ʼ ánɛ mbáte tɛ́t, ńdé á mbū pɔ́p ŋ́gɛ: «Pɛ é egā nzwītɛ lɛ́? Pɛ etswiʼne ndí mbōo. Njhʉ̄ e ejʉɔ, á kuʼ. A ayi mɛ́ gɔ á efɛ́ Méŋ‑Ŋiŋnɔŋ, á mbū epuɔ tepɔŋ lāa.

⁴² A ayi ŋiŋ yīi a gɔ á eswiīŋ meŋ, a á shʉʼ tɛ mbáte la. Pɛ elū á esī, ḿpɛ egʉɔ njʉ́ɔ á yí. »

Mɛ́ é ega ŋgɔ̄ɔ á Yɛɛ́so

⁴³ Yɛɛ́so a le zɛ́t eshúŋne shuŋné, Yúdas, ḿmɔʼ ŋiŋ ánɛ meziŋ‑ntō pí ntsɔp pīa mé legēm, á sáʼne, atʉtʉ epuɔ á gɔ́ á nzem yí, ŋ́gwɛ̄te mekéseŋ pɔ́ a meŋí ncu, mbɔ wɔ nɔŋ‑epɔʼ epi melʉɛ, pɔ́ wɔ kɛ́ʼte‑mbé Ndém mbɔɔ mekém alāʼ mé ntó á wɔ́p.

⁴⁴ Mbɔ mɛnāŋ wɔ̄ a á nté njhʉ̄, éshúŋ ayiŋne á mbū nnɔ alāʼ mɛ́t, ŋ́gɛ: «Ŋiŋ yīi meŋ a kó etsaʼte á yí, éseŋte á yí, yí tɛ́ pɛ é si ŋkɔ̄ŋɔ. Pɛ egɔ̄ á yí, ńdɔ̄k á yí ŋgʉ̄ɔ, ńziŋɛ mbípɛ á yí á mbɔŋɔ́. »

⁴⁵ Pɔ́ shʉʼ tɛ ndɛ̄ ŋgē ekó éwú, Yúdas á tshóte nnɛ̄t mé lezēŋ Yɛɛ́so, ŋ́gɛ: «Mɔʼɔ́ wek», ńtsāʼte á yí, ésēŋte á yí.

⁴⁶ Mvuʼ epuɔ é lɛ eshʉ̄ʼ, ńdáʼ mbū ánɛ yí, ŋ́kúʼte á yí.

⁴⁷ Mmɔʼ ŋiŋ á nnɔ epuɔ pīi, é ŋgɔ́ éwú, á sɔŋ ŋŋí ncu, ŋ́gɔ̄ á ŋkʉɔ́ʼ ŋiŋ, ŋ́kó mbāŋ letuúŋ ŋiŋ yīi tɛŋgyā wɔ nɔŋ‑epɔʼ a á nzāp ŋkaʼte yí.

⁴⁸ Yɛɛ́so á zɛ́tte epuɔ mɛ́t ŋ́gɛ: «Pɛ é gaá ndɔ̄k meŋí pɔ́ a mekéseŋ, éshʉ̄ʼ á ŋgɔɔ̄ meŋ, páʼ pɛ gɔ á ŋgɔɔ̄ ntsɔ́ŋ ŋ́?

⁴⁹ Ḿpɛ mé kɛɛ́ nzóko eleʼé tsem á ntē Mía Ŋgyā Ndém, meŋ nɔŋ nzíʼnɛ á wɛ́, pɛ láʼ te á gá pfeŋ, táʼ, ajʉɔ anu á ké ŋgɔ́ páʼa, tɛ́ menu mīi, mɛ́ le tí á ntē aŋwaʼne Ndém, e elɔk mbō. »

⁵⁰ Megaŋ nnɔ Yɛɛ́so metsem é jʉ́ɔ páʼ mɛ́ é gɔ á yí, ńdɛ mbú ŋ́gwáʼ á yí ŋkʉ̄.

⁵¹ Mmɔʼ mɔ́ ŋgwɛso a le nɔ̄ŋ nzhɛnɛ á Yɛɛ́so, ńzémte apū nzhó ánɛ yí, mɛ́ gɔ á yí,

⁵² á swhine, ésákne apū nzhó á mbū pɔ́p, ŋ́kʉ̄ á atseŋ te nzhó.

Wɔ sáʼ‑ŋgɔŋ epuɔ Yúda á ega nzīi á leŋak Yɛɛ́so

⁵³ Pɔ́ lɔk á Yɛɛ́so ŋgʉ̄ɔ mé mba tɛŋgyā wɔ nɔŋ‑epɔʼ. Mbɔ wɔ nɔŋ‑epɔʼ epi melʉɛ metsem, pɔ́ mekém alāʼ mbɔɔ wɔ kɛ́ʼte‑mbé Ndém é mbú ncúʼte éwú.

⁵⁴ Piɛ á gɔ́ á tɛ nzem nzhɛ̄nɛ á Yɛɛ́so, tɛ ndáʼ ŋkó á atetá mba tɛŋgyā wɔ nɔŋ‑epɔʼ, ńnáŋ á nnɔ megaŋ afaʼ, ńnɔŋ nzóko mmók.

⁵⁵ Wɔ nɔŋ‑epɔʼ epi melʉɛ, pɔ́ a megaŋ asāʼ metsem, é nɔŋ efāʼa anu zīi, pɔ́ e tshí á athū Yɛɛ́so tɛ́ mɛ́ etsīa éwú, ńzwhí á yí, ḿbiŋ nnɔ̄ŋ te njʉ́ɔ ɔ́.

⁵⁶ Epuɔ tɛ nzáne é lɛ si ntshíɛ mela á athū Yɛɛ́so, menu mɛ́t é piŋ nnɔ̄ŋ te ntsóʼnɛ ɛ́.

⁵⁷ Emɔ̄ʼ epuɔ é lu a esī, ńtshí mela muɔ á athū yí, ńdé ŋ́gɛ:

⁵⁸ «Pek ke júʼē, á nɔŋ ndʉ́ɛ́ ŋ́gɛ, yí e shʉʼ eták á Mía Ŋgyā Ndém wuɔ yīi, epuɔ menɔŋ mé le pɔ́ɔ̄, épiŋ elɔk eleʼé tɛ́t, ékwɛ́t ezi ndɛʼɛ, e egɔ́ ezi ŋiŋnɔŋ mé ka kwɛ́t ɛ́. »

⁵⁹ Tɛ mbɔɔ ánɛ ajʉɔ anu mɛ́t, pɔ́ zéŋ te éwú njúʼnɛ ɛ́.

⁶⁰ Tɛŋgyā wɔ nɔŋ‑epɔʼ á lu á esī á nnɔ alāʼ, ŋ́ŋāk á Yɛɛ́so tɛʼ, ńzɛ́tte á yí ŋ́gɛ: «Epuɔ puɔ é swiŋ á wú ejʉɔ ntií páʼa, o pú te pwɛ̄ɛt lɛ́?»

⁶¹ Yɛɛ́so á pú te tsɔ́p, a te anu pwɛ̄ɛt. Tɛŋgyā wɔ nɔŋ‑epɔʼ, á zéŋ nzɛ́tte á yí leswhī leswhī ŋ́gɛ: «Wu mé Nzaʼ‑Ŋkhʉ ʉ? Á Méŋ Ndém yīi, pek wuʼtɛ á yí lā a?»

⁶² Yɛɛ́so á pwɛt ŋ́gɛ: «Ŋŋ, meŋ á ewiɛ́. Pɛ e shʉʼ ejʉ́ɔ páʼ Méŋ‑Ŋiŋnɔŋ wuɔ a naáŋ á ŋkɔʼɔ́ apū ete Atsyantsɔp Ndém. Pɛ e shʉʼ ezéŋ ejʉ́ɔ páʼ, a fhɔ́ɔ á lephū eshʉ̄ʼɛ, á ntē alɔ. »

⁶³ Tɛŋgyā wɔ nɔŋ‑epɔʼ á júʼ épúp, ésīate menzhó á mbe nnɛ̄t yí méŋwɛ̄t, ńdé ŋ́gɛ: «Anu á ké ŋgɔ́ páʼa, ḿpɛ zóko nzéŋɛ efāʼa wɔ njhʉɛ‑njʉ́ɔ kɛ?

⁶⁴ Pɛ é júʼ páʼ a á zɔte á Ndém, pɛ é jʉ́ɔ azɛ́ ŋ́gɛ akɔ̄?» Epuɔ metsem é pwɛt ŋ́gɛ: «Á pɔŋ ŋ́gɛ mɛ́ ezwhí á yí zwhí. »

⁶⁵ Emɔ̄ʼ epuɔ é zi á letsok mekī ánɛ yí, ŋ́kwɛ́t eshhʉ̄ yí, ńtswá á yí, ḿbiŋ ndé á mbū yí ŋ́gɛ, a etá á ŋiŋ yīi, a á tswá á yí. Wɔ píp‑ejʉʼ é gɔ á yí, ńtém mbū á metuúŋ yí.

Piɛ a á ega mbūŋnɛ á Yɛɛ́so

⁶⁶ Piɛ á zɛ́t á atetá eshhʉ̄ ntsēŋ, mmɔʼ mɔ́ menzwí, ŋ́gɔ́ á ŋgaŋ afaʼ tɛŋgyā wɔ nɔŋ‑epɔʼ á shʉʼ,

⁶⁷ ńjʉ́ɔ Piɛ á nɔŋ nzóko mmók, á yiŋ á yí, ńdé á mbū yí ŋ́gɛ: «O ó ajú mmɔʼ ŋiŋ yīi, pɔ́ a Yɛɛ́so ŋiŋ Naázalɛt é kɛɛ́ nziŋɛ. »

⁶⁸ Piɛ á lɛʼte, ńdé ŋ́gɛ: «Meŋ ka á yí zhɛ́ ɛ́, meŋ ka zhɛ́ anu zīi, o shúŋɔ lā á. » Ńdɛ efhó éwú ntó, ńnɔŋ ŋgʉ̄ɔ mé nchu atetá, [ŋkʉɔʼ á lɛ ntɔ́ŋ.]

⁶⁹ Menzwí mɛ́t á ghʉ nzéŋ njʉ́ɔ á yí, ńzī á lezēŋ eshúŋ epuɔ pīi, é ŋgɔ́ ajʉʼ mɛ́t ŋ́gɛ: «Ŋiŋ wuɔ a á páʼa, ŋ́gɔ́ á ŋiŋ nnɔ Yɛɛ́so. »

⁷⁰ Piɛ á zéŋ ndɛ̄ʼte leswhī leswhī. Méŋ afʉʼ á tɔ́k, epuɔ pīi é ŋgɔ́ ajʉʼ mɛ́t, é zéŋ ndé á mbū Piɛ ŋ́gɛ: «Á té anu efaʼ faʼ á, o ó ajú á ŋiŋ nnɔ yi, melaʼ mīi, o ó ŋiŋ Ŋgaliléa páʼ yí. »

⁷¹ Piɛ á zi á leka meka ndé ŋ́gɛ: «Ndém á lɛ nzwhí á gá. Meŋ ka zhɛ́ á ŋiŋ yīi, pɛ lʉ́ɛ́ lā a. »

⁷² Ŋkʉɔʼ á liɛ ntɔ́ŋɔ ánɛ mbáte pīa. Piɛ á lɛ ŋkímte páʼ Yɛɛ́so a ke lé á mbū yí ŋ́gɛ: «Ŋkʉɔʼ a a shʉʼ ege etɔ́ŋ ŋgʉɔ mbīa, mbɔ o ó lɛʼte ŋgʉɔ ntɛ́t ŋ́gɛ, o ka gá zhɛ́ ɛ́. » Á kímte épúp, ŋ́gákne efhó á atetá ntó, ḿbú nzī á lela.