Málkúsi 13 - Eka Eswhī

Yɛɛ́so a á ega eshúŋɔ páʼ Mía Ŋgyā Ndém a a shʉʼ egɔ́ ntak také

¹ Yɛɛ́so á kó nnɔ̄ŋ efhɔ́ɔ á Mía Ŋgyā Ndém ntúɔ́, mmɔʼ ŋiŋ nnɔ yi á lé á mbū yí ŋ́gɛ: «Mɔʼɔ́ wek, cʉ nzāʼ meŋgyā ega njʉ́ɔ. Jʉ́ɔ emɔ̄ʼ mepɔŋ metɔ́ pīi mɛ́ le lɔ̄k mbɔ́. »

² Yɛɛ́so á pwɛt á mbū yí ŋ́gɛ: «O ó si njʉ́ɔ mepɔŋ meŋgyā muɔ ɔ? Ké nzhɛ́ á légɛ, mɛ́ e shʉʼ epú ekem, tɛ tɔ́ a á le zɛ́t ánɛ mmɔʼ nzápne ɛ́. »

³ Yɛɛ́so á ghʉ nnáŋ á ndo lekwɛ̄t Methʉ́ Olive, tɛ nnɔ̄ŋ njʉ́ɔ á Mía Ŋgyā Ndém á nzéŋ mmɔʼ. Piɛ pɔ́ Jáak mbɔɔ Jáaŋ ŋghʉ̄ Aŋdlɛya, é fak nnɛ̄t nzɛ́tte á yí ŋ́gɛ:

⁴ «Lɛ eshúŋ á wék afʉʼ zīi, anu zīi o ó lé lā, a láʼa ŋgɔ̄ á ntɔ́kɔ. Akɔ̄ ayiŋne á láʼ etswi á légɛ, menu mɛ́t ntsem é si ŋgɔ̄ á eshʉʼɛ ɛ́?»

Yɛɛ́so a á ega eshúŋɔ anu ŋgʉɔ̄ʼ zīi, e é si eshʉ̄ʼɛ

⁵ Yɛɛ́so á lɛ nzī á leshūŋ á wɔ́p ŋ́gɛ: «Pɛ epá, ndɛ́ʼ pɛ ecʉ́ʼ, ŋiŋ á ghʉ pɛ efāa nzhɛ.

⁶ Epuɔ tɛ nzáne é shʉʼ elɔk lezēŋ tsá, éshʉʼ á mvhɔ pɛ, awíɛ awíɛ a enɔŋ ndʉ́ɛ́ ŋ́gɛ, yí mé Nzaʼ‑Ŋkhʉ. Élé épúp, élɔk eghʉ, atʉtʉ epuɔ a efhó ánɛ mɛnzhɛ mbɔŋ ntó.

⁷ Pɛ shʉʼɛ nnáŋ tɛ njúʼ mɛ́ nɔ̄ŋ ŋghítɛ ncu á ntē alāʼ, ńnɔ̄ŋ ŋghítɛ ncu yīi é si eshʉ̄ʼɛ, ndɛ́ʼ pɛ epɔ́k. Ecʉɔ etsō mɛ́t é pɔŋteé á lezi mvhɔ ntɔ́k, tɛ́ ŋké le ndɔ̄kɔ ŋ́gɛ, ŋgɔŋ e gɔ ezho emi í.

⁸ Epuɔ taʼ alāʼ e shʉʼ enáŋ tɛ epʉ́ʼɛ nnɛ̄t, égʉɔ elʉɔ́ʼ amɔ̄ʼ. Mmɔʼ efɔ a elū á esī, ńdʉɔ́ʼ mmɔʼ. Atsáʼ a ecʉ̄ʼne ejʉʼ ejʉʼ, afʉɔne a ewhʉ̄. Menu muɔ mɛ́t e gɔ́ páʼā, ŋ́gɔ́ nzií ŋgʉɔ̄ʼ, ŋ́gʉɔ̄ʼ menzwí yīi, mɔ́ a á si nzīi á lezāŋ á yí.

⁹ Pɛ egē enáŋ, ńnɔŋ mbípɛ ntií ŋgʉɔ̄ʼ zīi, é gɔ eshʉʼe ánɛ pɛ. Mɛ́ e shʉʼ eshuŋne á wɛ́, élɔk egʉɔ mé mvhɔ asāʼ, égɔ á wɛ́ á ntē meŋgyā aswiŋte, étswá. Éshuŋne á wɛ́, élɔk egʉɔ á mvhɔ wɔ sáʼ‑ŋgɔŋ pɔ́ a mefɔ, pɔ́ eŋāk á wɛ́, melaʼ mīi pɛ é epuɔ pá. A egɔ́ épúp, pɛ elɔk eshúŋ á wɔ́p á ajū mīi, pɛ é si nzhɛ́ɛ ánɛ meŋ.

¹⁰ Á gɔ́ɔ lɛ, mɛ́ eké nté njhʉ̄ ntswī ŋke mbɔŋ á mbū ŋgɔŋ ŋgɔŋ, tɛ́ menu muɔ mɛ́t e etɔ́k.

¹¹ Mɛ́ shʉʼɛ ŋgɔ̄ á wɛ́, ńnɔ̄ŋ eshūŋnɛ á wɛ́ ndɔkɔ ŋgʉ̄ɔ mé mvhɔ asāʼ, ndɛ́ʼ pɛ eté njhʉ̄ nzāp nnɛ̄t ŋ́gɛ, pɛ e kó elé egɛ akɔ̄ lɛ́. Afʉʼ mɛ́t á shʉʼɛ ŋkūʼ, Ndém á ghʉ̄ lɛ pɛ elé lɛ akɔ̄ lɛ́, pɛ elé épúp, melaʼ mīi aziɛ́ afʉʼ, pɛ mé le zɛ́t eshúŋnɛ ɛ́, Azwakne zí mé ecʉ́ʼɛ eshúŋnɛ ajʉʼ pɛ.

¹² A láʼ ekuʼ afʉʼ mɛ́t, méŋ mɔ́ a eswīŋ mmɔʼ, ŋ́gɛ mɛ́ ezwhí. Mɔʼɔ́ mɔ́ a ezéŋ ŋghʉ̄ azí épúp ánɛ méŋ yi. Ewɔŋkhʉ̄ e esɛnne ndʉɔ́ʼ memɔʼɔ́ pɔ́ a memía pɔ́p, ŋ́ghʉ̄ mɛ́ ezwhíte á wɔ́p.

¹³ Epuɔ metsem e shʉʼ epú epa á wɛ́ melaʼ mīi, pɛ é epuɔ pá. Táʼ, ŋiŋ yīi a á ŋíŋ ánɛ meŋ tɛ ndáʼ nzōko, Ndém a eghʉ̄, a etswɛ́t. »

Yɛɛ́so a á ega ŋkɛ́ʼtɛ ayiŋne zīi, á tswii á mía ŋgeŋge

¹⁴ Yɛɛ́so á zéŋ ndé ŋ́gɛ: «Pɛ shʉʼɛ njʉ́ɔ á Píkɛ́ Píkɛ́, á tɛ‑avhō, á náŋ ánɛ ajʉʼ zīi, á kaá mbɔ̄ŋ ŋ́gɛ, a enáŋ éwú ú. Epuɔ pīi é ntē apak ŋgɔŋ Yudéa, é kʉ mbē mé mekwɛ̄t. Ntɔŋɔ ajʉʼ aŋwaʼne jʉɔ, a echʉ́ nnɛ̄t njúʼ.

¹⁵ Menu muɔ mɛ́t é ge etɔ́ke, ŋiŋ á gɔ́ á athʉ́ ŋgyā yí, ndɛ́ʼ á sóʼo tɛ ŋ́gɛ, yí e kó á ŋgyā, épɛ́ azō elɔk ekʉʉ.

¹⁶ Ndɛ́ʼ ŋiŋ yīi a á ŋgɔ́ á ŋkāʼ, á piŋ nzem á mba tɛ ŋ́gɛ, yí gɔ á mbɛ́ nzhó efwɔ̄k zi.

¹⁷ Yɛɛ́ ŋgʉɔ̄ʼ zīi wɔnzwí pīi é ŋgɔ Ndém, pɔ́ a wɔ mévho, é láʼa ŋgɔ̄ á njʉ́ɔ ánɛ meleʼé mɛ́t lée.

¹⁸ Pɛ eswíŋte á Ndém ŋ́gɛ, ndɛ́ʼ menu mɛ́t é tó afʉʼ mbeŋ.

¹⁹ Pɛ eswíŋte melaʼ mīi, a láʼ ekuʼ ánɛ meleʼé mɛ́t, epuɔ menɔŋ epú njʉ́ɔ ŋgʉɔ̄ʼ tɛ mbɔ pɔ́ la mmɔʼ épúp jʉ́ɔ ɔ́, tɛ efhó páʼ Ndém a le nɔ̄ŋ ŋgɔŋ, éshʉʼ ntshí tsetsɔŋɔ, épīŋ le láʼ nzéŋ mmɔʼ épúp njʉ́ɔ ɔ́.

²⁰ Ŋ́gɔ́ éyi Atsyapuɔ a kɛ te wíʼe mvéŋ ŋ́gɛ, yí e shʉʼ etswɛ́tte nzwiŋ eleʼé alāʼ mɛ́t ɛ́, mbɔ tsɔ taʼ ŋiŋ a te shʉʼ evuʼu ú. Táʼ, a le ké ntswɛ́tte, melaʼ epuɔ pí pīi, a le tsɔ́ʼē.

²¹ Afʉʼ mɛ́t á shʉʼɛ ŋkūʼ, ŋiŋ á lé á mbū pɛ ŋ́gɛ, ayi Nzaʼ‑Ŋkhʉ a á ega lāa, kɛ́ ŋ́gɛ, a ayi a á ege lée, ndɛ́ʼ pɛ evéŋ ajū mīi, ŋgaŋ a lʉ́ɛ́.

²² Emɔ̄ʼ epuɔ e shʉʼ elu á esī, étáŋ mela gɛ, pɔ́ é wɔ Nzaʼ‑Ŋkhʉ, emɔ̄ʼ e etáŋ mela ŋ́gɛ, pɔ́ é metswi‑ŋke Ndém, énɔŋ eghʉɛ meyiŋne anu pɔ́ meŋkʉʼne anu, élɔkɔ epɔptɛ epuɔ, tɛ ŋgɔ́ yīi, pɔ́ gɔ ezéŋ ḿbɔ̄pte epuɔ pīi, Ndém a le tsɔ́ʼ á wɔ́p, ŋ́gɛ pɔ́ egɔ́ epuɔ pí.

²³ Pɛ eké mbá, meŋ á té njhʉ̄ eshúŋ á wɛ́ ajūɔ tsem zīi, a fú etɔ́ke.

²⁴ A láʼ ekuʼ ánɛ meleʼé mɛ́t, afʉʼ ŋgʉɔ̄ʼ a etɔ́k tɛ mmī, lezēk nu e epí, lezēk saŋ é le zéŋ ejʉʼ ŋkɛ̄ʼɛ ɛ́.

²⁵ Mecɔʼ saŋ e efhó á lephū esóʼo mbwɛ̄t á esī, ecū mīi, é pɔɔ́ŋ mbʉʼ á lephū, e ecʉ́ʼɛ ncʉ̄ʼne cʉʼne.

²⁶ Mɛ́ elɛ njʉ́ɔ Méŋ‑Ŋiŋnɔŋ a elɔ̄k á mía mía mete pɔ́ shʉ́shɔ́k, éshʉ̄ʼ á ntē alɔ.

²⁷ Ńtó mecɔʼ Ndém á ntē ŋgɔŋ meshhʉ̄ lekua, tɛ efhó mmɔʼ eshhʉ̄ esī atsetsáʼ, ŋ́gʉɔ ŋkó mmɔʼ. Pɔ́ egʉ̄ɔ, ńcúʼte epuɔ pīi, Ndém a le tsɔ́ʼ á wɔ́p, ŋ́gɛ pɔ́ egɔ́ epuɔ pí, ńdɔk eshʉ̄ʼ mé lezēŋ tsí.

Athʉ́ zīi mefho mí é gɛ ŋkwhūnɛ

²⁸ «Pɛ epɛ́ efʉʼ ánɛ athʉ́ zīi, mefho mí é gɛ ŋkwhūnɛ. Mefho mí é kwhuneē tɛ á piŋ ŋghʉ̄ nzī á letɔ̄p, pɛ zhɛ́ ŋ́gɛ, mbeŋ e é si ŋgɔ̄ á mbiŋɛ́.

²⁹ Ndeŋ ndeŋ épúp, pɛ shʉʼɛ njʉ́ɔ emuɔ menu mɛ́t é nɔ̄ŋ ntɔ́kɔ, pɛ zhɛ́ ŋ́gɛ, Méŋ‑Ŋiŋnɔŋ a á si eshʉ̄ʼɛ. Ŋ́gɛ a á shʉʼ tɛ ŋgɔ́ á nchu ŋgyā.

³⁰ Meŋ a shúŋ á wɛ́ á kwaʼ anuúnē: epuɔ ŋguʼ puɔ é té shʉʼ ekwhʉ́te metsem, té gɔ́ yīi, emuɔ menu mɛ́t ntsem é shʉʼ ɛ́.

³¹ Lephū pɔ́ esī atsetsáʼ e fú epú emii, táʼ, ashuŋne zá a epú nzɛ́t áa épúp.

Ndém yí méŋwɛ̄t mé zhɛɛ́ á nzoknzem aleʼé

³² «Táʼ, ŋiŋ a gɔ le zhɛ́ aleʼé zīi, menu muɔ mɛ́t é gʉɔ mé ntɔ́kɔ ɔ́, ḿbīŋ le njhʉ̄ zhɛ́. Mecɔʼ Ndém á athʉ́ lephū é té si nzhɛ́ɛ azɔ́p ɔ́, tɛ mbɔɔ Méŋ Ndém. Ndém Mɔʼɔ́ yíléyī mé si nzhɛ́ɛ.

³³ Páʼ pɛ ka zhɛ́ afʉʼ zīi, menu mɛ́t e shʉʼ egɔ́ɔ lā, pɛ elāk athū zɛ́, ndɛ́ʼ ŋiŋ á lí.

³⁴ Anu aleʼé mɛ́t, á swhií anu ŋiŋ yīi, a á si ŋgʉ̄ɔ mé leziŋ. Ŋ́gē etó á mba, ńtsékne megaŋ afaʼ éwú, ŋ́gyá azi afaʼ awíɛ awíɛ, ńdé á mbū mbio‑mba ŋ́gɛ, ndɛ́ʼ á cʉ́ʼ ndí.

³⁵ Púp, ndɛ́ʼ ŋiŋ á lí, melaʼ mīi pɛ ka zhɛ́ afʉʼ zīi, ŋgaŋ mba a gɔ á ŋkɔ́ʼ ɔ́. Kɛ a a kɔ́ʼ eseéŋ‑njhʉ̄ lɛ́, kɛ tée‑etsōʼ lɛ́ɛ, kɛ ŋkʉɔʼ a ge etɔ́ŋ, tɛ́ a ekɔ́ʼ lɛ́ɛ, kɛ a a kɔ́ʼ nzemɛ́nzēm lɛ́ɛ.

³⁶ Ndɛ́ʼ á ge etɔ́kne á wɛ́, pɛ enɔ̄ɔŋ ndíi.

³⁷ Anu zīi meŋ ndʉ́ɛ́ á mbū pɛ lā, meŋ mbúu ndʉ́ɛ́ á mbū epuɔ metsem, ŋ́gɛ: ndɛ́ʼ ŋiŋ á lí. »