Málkúsi 12 - Eka Eswhī

Ashuŋne lepúʼ ánɛ wɔ zwhí á ŋwɛ́t azō

¹ Yɛɛ́so á zi á lelɔk meshuŋne lepúʼ, éshúŋne á mbū epuɔ mɛ́t, ńdé ŋ́gɛ: «Mmɔʼ ŋiŋ a lɛ éwú, ŋ́kʉɔ́ʼ ŋkāʼ yí, ḿbhī methʉ́ lɛzɛŋ éwú, ḿbɔ́ akɛ ndɔ̄k ŋkɛ́ne, ńcūŋte ajʉʼ zīi, mɛ́ e náŋa ekíɛ́ ntá athʉ́ mɛ́t éwú. Ḿbɔ́ á sisia ajʉʼ yīi, mɛ́ e náŋa ekɔ́ʼɔ etshíɛ éwú, épípɛ ŋkāʼ. Ńtsékne ŋkāʼ á mbū wɔ kɛ́‑ntá athʉ́ mɛ́t ndɔk ncūŋte meluʼ, ńdɛ ŋgʉ̄ɔ mé atō.

² Afʉʼ á lekāp ntá athʉ́ á shʉʼ nnáŋ tɛ ŋkūʼ, á tó mmɔʼ ŋkwa zi á mbū wɔ cuŋte‑meluʼ pwɔ̄, ŋ́gɛ pɔ́ eyá azí akim ánɛ ajū mīi, á ke tó á ŋkāʼ.

³ Pɔ́ kó ŋgɔ̄ á yí, ńtswá á yí, ńjūŋ á yí, á gʉɔ mbū ŋŋiké.

⁴ Ŋgaŋ ŋkāʼ á kó nzéŋ ńtó mmɔʼ ŋgaŋ afaʼ ndɛʼɛ á mbū pɔ́p, pɔ́ kó ánɛ ewuɔ mɛ́t, ńtswá á yí á athū yí, ḿmāʼ esē á athū yí.

⁵ Ŋgaŋ ŋkāʼ á kó nzéŋ ńtó mmɔʼ ŋgaŋ afaʼ yi, éyi ndɛʼɛ, pɔ́ kó nzwhí. Ńzéŋ ŋghʉ̄ ndeŋ ndeŋ épúp, á mbū emɔ̄ʼ megaŋ afaʼ tɛ nzá, ŋ́gɔ̄ emɔ̄ʼ ntswá, ńzwhíte emɔ̄ʼ.

⁶ Ŋiŋ yīi a le zɛ́t ndaʼ á mbū ŋgaŋ ŋkāʼ, a lɛ á méŋ yi, á kɔŋ á yí tɛʼ, á gē emakne, ńtó á yí á mbū pɔ́p, ńnɔŋ ndʉ́ɛ́ ŋ́gɛ: “Pɔ́ e kó egaá lɛ́, éghʉ mekuʼ méŋ ga.”

⁷ Epuɔ mɛ́t é kó ndɛ̄ ŋgē ejʉ́ɔ á yí, ńdé á tsetsɛlɛ pɔ́p ŋ́gɛ: “Ŋiŋ yīi a a fú ejhʉ́ ŋgyā, a ayi a á ege eshʉ̄ʼɛ le, ḿpɛ egɔ́ á taʼ nchu, ńzwhí á yí, ŋkāʼ e ecʉ́ʼ eyímpɛ.”

⁸ Ńdɛ ŋgɔ̄ á yí nzwhí, éfhó á ŋkāʼ efók apfhō zí, ḿmāʼ á nzem apɛ́. »

⁹ Yɛɛ́so á pɛ́te páʼā, ḿbiŋ nzɛ́tte ŋ́gɛ: «Ŋgaŋ ŋkāʼ a á páʼa, éshʉʼ eghʉ páʼ lā, á mbū epuɔ mɛ́t é? A a shʉʼ egʉɔ egɔte epuɔ puɔ mɛ́t, ézwhíte á wɔ́p, étswí ŋkāʼ yí, étsékne á mbū epuɔ mendɛʼɛ.

¹⁰ Pɛ lé gaá lɛ́, ńtɔ́ŋ ajʉʼ aŋwaʼne Ndém zīi á leé ŋ́gɛ: “Tɔ́ yīi mepɔɔ‑ŋgyā é le kʉŋtē ŋgwáʼ, ewiɛ́ mé le shʉ̄ʼ ncʉ́ʼ á tɔ́ lezhō ŋgyā.

¹¹ Á gɔ́ páʼ Atsyapuɔ mé le ghʉ̄ épúp, ḿpɛ jʉ́ɔ, á gɔ́ á mɛgém anu.”»

¹² Epuɔ mɛ́t é júʼ ashuŋne lepúʼ jʉɔ, ńzhɛ́ á légɛ a lɔkɔ ŋkēknɛ á wɔ́p, ńcʉ́ʼɛ efāʼa eshhʉ̄ á legɔ á yí, tɛ́ mbɔ́k menēk alāʼ, ńtshī á yí néŋ, ŋ́gʉ̄ɔ.

Mɛ́ é ega ntátɛ á Yɛɛ́so ánɛ anu lemaʼ ncup alāʼ

¹³ Epuɔ mɛ́t é shʉʼ ntsɔ́ʼ emɔ̄ʼ epuɔ ánɛ wɔ gɔ́ á nzem Elōde, mbɔɔ emɔ̄ʼ ánɛ nnɔ epuɔ Falísia, ńtó á wɔ́p ŋ́gɛ pɔ́ egʉɔ ndɔ̄k ashuŋne ndʉ̄ʼ á Yɛɛ́so letā.

¹⁴ Pɔ́ gʉɔ, ndé á mbū yí ŋ́gɛ: «Ńziʼnɛ, pek é si nzhɛ́ɛ á légɛ, o gɛ mbúu eshúŋɔ áa anuúnē. O te gē eshúŋne, ḿbɔ́k lezēk ŋiŋ ɛ́, o te epuɔ tɛ̄ʼte. O ó si ntswīi epuɔ á kwaʼ mɛnzhɛ yīi, Ndém a á si ŋkɔ̄ŋɔ ŋ́gɛ, mɛ́ ezīŋ éwú. Lɛ eshúŋ á wék, lepé tsímpɛ é veéŋ ŋ́gɛ, mɛ́ emāʼ ncup á mbū ŋwɛ́t ŋgɔŋ Lóma, kɛ ŋgáŋ ŋ́? Pek pɔŋteé á lezēŋ mmāʼ kɛ pek etshi nnéŋ ŋ́?»

¹⁵ Yɛɛ́so á zhɛ́ ajū mīi pɔ́ é ntē pɔ́p mmótɛ, ńzɛ́tte á wɔ́p ŋ́gɛ: «Pɛ lʉʼɛ á gá letā melaʼ akɔ̄? Pɛ elɔ̄k á apak ŋkāp eshʉʼ ŋgyá mé meŋ, meŋ ejʉ́ɔ. »

¹⁶ Mɛ́ lɔk eshʉ̄ʼ ŋgyá á mbū yí, á zɛ́tte á wɔ́p ŋ́gɛ: «Athū ŋiŋ jʉɔ zīi á éwú la, á azi awɔ́? Lezēŋ é gɔ́ etsi awɔ́?» Pɔ́ pwɛt ŋ́gɛ: «É etsi ŋwɛ́t ŋgɔŋ Lóma, athū á zéŋ ŋgɔ́ azí. »

¹⁷ Yɛɛ́so á lɛ ndé á mbū pɔ́p ŋ́gɛ: «Á gɔ́ épúp, ajū mīi á azi ŋwɛ́t ŋgɔŋ Lóma, pɛ eyá á mbū yí, a zīi á azi Ndém, pɛ eyá á mbū Ndém. » Pɔ́ júʼ épúp, á pú ntsyā á wɔ́p tɛʼ.

Mɛ́ é ega ntátɛ á Yɛɛ́so ánɛ anu lezīm ánɛ lewhʉ̄

¹⁸ Emɔ̄ʼ epuɔ nnɔ Sadúsia é shʉʼ azɔ́p á lezēŋ Yɛɛ́so, ŋ́gɔ́ epuɔ pīi pɔ́ gɛ ndʉ́ɛ́ ŋ́gɛ, mɛ́ e té fú ezím ánɛ lewhʉ̄ ɛ́, ńzɛ́tte á yí ŋ́gɛ:

¹⁹ «Ńziʼnɛ, Mɔɔ́sɛ a le tí lepé ŋgyá á mbū pímpɛ ŋ́gɛ: “Ŋiŋ a wiɛ á nzwí yi, ŋ́kwhʉ́ té mɔ́, ntsiʼnzem yi á cʉ́ʼ esōk á mpfók, ńzhí ewɔŋkhʉ̄, ńdɔk mbwɛ̄t ŋgyā ŋiŋ yīi a ke kwhʉ́ʉ̄.”

²⁰ Á épúp tɛ́, epɔ̄ ŋiŋ epi mbaŋa, é lɛ éwú esambīa. Ŋgaŋ mvhɔ á lá ŋgyā, éshʉʼ ŋkwhʉ́ té mɔ́.

²¹ Páte á cʉ́ʼ esōk á mpfók, éshʉʼ nzéŋ ŋ́kwhʉ́ té mɔ́. Á shʉʼ nzéŋ ŋ́gɔ́ épúp, ánɛ mbáte tɛ́t.

²² Mbú ŋgɔ́ épúp mbɔɔ á mbū pɔ́p esambīa. Pɔ́ sok á taʼ mpfók, ŋ́kwhʉ́te metsem, té wɛ á mɔ́. Mpfók á shʉʼ ŋgē ezoko, ŋ́kwhʉ́ azí.

²³ Páʼ epuɔ puɔ esambīa é le pú ŋgɔ́ melō menzwí wuɔ lā, a láʼ aleʼé zīi mɛ́ zímɛ ánɛ lewhʉ̄, menzwí wuɔ mɛ́t, a egɔ́ eyi awɔ́ á nnɔ pɔ́p é?»

²⁴ Yɛɛ́so á pwɛt á mbū pɔ́p ŋ́gɛ: «Pɛ é zhɛ́ ajū mīi á ghʉɛ tɛ́ pɛ faa nzhɛ ɛ? É melaʼ mīi pɛ te si nzhɛ́ɛ anu zīi á ntē aŋwaʼne Ndém ɛ́, ńnɔŋ te nzhɛ́ɛ páʼ mete Ndém é épúp ɔ́.

²⁵ Á gɔ́ɔ lɛ, mɛ́ e láʼ ezím ánɛ lewhʉ̄ páʼā, mɛ́ le zéŋ ŋgyā ndá á. Epuɔ menɔŋ ecʉ́ʼɛ nnáŋa, áa páʼ mecɔʼ Ndém á athʉ́ lephū lā.

²⁶ Éshʉ̄ʼ ánɛ mepfhō á lezīm ánɛ lewhʉ̄, mbɔ pɛ laá ntɔ́ŋ ajʉʼ aŋwaʼne zīi, Mɔɔ́sɛ a le tí ánɛ anu athʉ́ zīi, alē mmók á lɛ éwú ú lɛ̄? Páʼ Ndém a le lé á mbū yí ŋ́gɛ: “Meŋ á si ŋgɔ́ á Ndém Ablaham, ŋ́gɔ́ á Ndém Izak, ńzéŋ ŋgɔ́ á Ndém Yakɔ́p.”

²⁷ A le tɔ́ŋ mepfhō puɔ mɛ́t, páʼ pɔ́ é epuɔ mete lā, melaʼ mīi, Ndém a te si ŋgɔ́ á Ndém mepfhō ɔ́, a gɔ́ áa Ndém epuɔ mete. Pɛ kwaŋa páʼā, pɛ elɔ̄kɔ mbúu ŋgɔ́ɔ á ntē mefa. »

Lepé Ndém tsīi, é tshií mvhɔ

²⁸ Mmɔʼ ŋkɛʼte‑mbé Ndém a le júʼ páʼ Yɛɛ́so pɔ́ a epuɔ nnɔ Sadúsia é ŋaka, ńjʉ́ɔ páʼ Yɛɛ́so a á tsɔ́ʼ á mbɔŋɔ́, ńtshóte nnɛ̄t mé lezēŋ tsí, ńzɛ́tte á yí ŋ́gɛ: «Mía lepé á nnɔ mbé ntsem, é etsiɛ́ ɛ́?»

²⁹ Yɛɛ́so á pwɛt ŋ́gɛ: «Mía lepé Ndém e ecuɔ páʼa: “Epuɔ Islaɛl, pɛ ejúʼ, Atsyapuɔ Ndém yímpɛ mé ndaʼ Atsyapuɔ.

³⁰ Kɔŋ á Atsyapuɔ Ndém wu mé ntē wú ntsem, mé athū nnɛ̄t jú ntsem, mé akwaŋte jú ntsem, mé mete mú ntsem.”

³¹ Páte é gɔ́ ecʉɔ páʼa: “Kɔŋ á ŋiŋ ntsem páʼ athū nnɛ̄t jú lā.” Mmɔʼ lepé tsīi é faáŋ ntsyā emuɔ mɛ́mbīa, é té éwú ú. »

³² Ŋkɛʼte‑mbé Ndém á lé á mbū Yɛɛ́so ŋ́gɛ: «Á épúp me nziʼnɛ, anu zīi o ó shúŋ, á anuúnē. Atsyapuɔ mé ndaʼ Ndém, mmɔʼ Ndém ndɛʼɛ a te éwú, té gɔ́ áa yí í.

³³ Ŋiŋnɔŋ á piŋ mbɔ́ŋte á lekɔŋ á yí mé ntē yí ntsem, mé akwaŋte zí ntsem, mé mete mí ntsem. Ńzéŋ ŋkɔ̄ŋ á ŋiŋ ntsem, páʼ athū nnɛ̄t zí méŋwɛ̄t lā. Ŋiŋ a ghʉɛ épúp, á gɔ́ mbɔŋ, ńtɔ́k á leyā azō ndɔk ŋgūʼte á Ndém, a tɔɔ ndɔ̄kɔ ŋgūʼtɛ á Ndém, ńtɔ́k ajūɔ tsem zīi a yáa, ḿbú ndɔkɔ ŋgūʼtɛ á Ndém. »

³⁴ Yɛɛ́so á jʉ́ɔ páʼ a á lɔk azhɛ̄‑anu ntsɔ́ʼ lā, ńdɛ ndé á mbū yí ŋ́gɛ: «Wú á lekō á ntē Lefɔ Ndém, a te zɛ́t esāk á. » Ŋiŋ á piŋ te zéŋ ŋkūʼ á lezɛ̄tte á Yɛɛ́so anu ú.

Anu Nzaʼ‑Ŋkhʉ pɔ́ Efɔ Ndavít

³⁵ Yɛɛ́so á ghʉ ŋgɔ́ á Mía Ŋgyā Ndém nzíʼnɛ epuɔ, ńzɛ́tte á wɔ́p ŋ́gɛ: «Wɔ kɛ́ʼte‑mbé Ndém é kʉʼneé ndé ŋ́gɛ, Nzaʼ‑Ŋkhʉ á ntɔ̄ŋ apuʼ a á méŋ Efɔ Ndavít péʼe, á ziŋ lɛ akɔ̄?

³⁶ Tɛ́ mbɔ Azwakne Ndém á le tshoné á Efɔ Ndavít yí méŋwɛ̄t, á lé ŋ́gɛ: “Atsyapuɔ Ndém a le lé á mbū mɔʼɔ́ ga ŋ́gɛ: «Shʉʼɛ nnáŋ á ŋkɔʼɔ́ apū ete meŋ, púp, meŋ eghʉ̄, megaŋ mbo pú e eshʉʼ nnɔ̄ŋte á mvhɔ wu, o etshíte mekhu mú ánɛ pɔ́p.”

³⁷ Efɔ Ndavít yí méŋwɛ̄t á tɔ́ŋ á Nzaʼ‑Ŋkhʉ lɛ mɔʼɔ́ yí péʼe, Nzaʼ‑Ŋkhʉ mɛ́t, a gɔ egaá nzéŋ ŋgɔ́ á méŋ yi ī?» Alāʼ zīi á lɛ á esī tɛ nzá, á nɔŋ njúʼɔ anu zīi, Yɛɛ́so a lʉ́ɛ́, á pɔŋɔ á wɔ́p.

³⁸ Á zíʼne á wɔ́p ndé ŋ́gɛ: «Pɛ epá wɔ kɛ́ʼte‑mbé Ndém, pɔ́ kɔɔ̄ŋ á wɔ́p á lemaʼ mesisia menzhó, ńdɔk ŋkʉ́ʼne á nnɔ alāʼ, ŋ́gɛ mɛ́ etsāʼte á wɔ́p mé mekuʼ.

³⁹ Ŋ́kɔ̄ŋ á wɔ́p á lekō á ntē ŋgyā aswiŋte, ŋ́kāŋ ajʉʼ zɔ́p á mvhɔ. Ŋ́gʉ̄ɔ lekāk, ŋ́kāŋ ajʉʼ mekuʼ.

⁴⁰ Pɔ́p mé zéŋ nnɔ̄ŋ ŋkʉ́ʼnɛ mbɔ̄pɔ mepfók wɔnzwí, ŋ́kúu etsō tsɔ́p, ḿbiŋɛ ŋghʉ̄ɛ mesisia meswiŋte, ńdɔkɔ mbɔ̄pɔ menēk epuɔ. Ndém a a ké eláʼ etswá á wɔ́p á mía ŋgʉɔ athʉ́ lepé.

Ncup Ndém zīi mpfók menzwí a maʼa

⁴¹ Yɛɛ́so á gɔ́ á Mía Ŋgyā Ndém, ńnáŋ ncʉ̄te á túŋ ncup Ndém, ńnɔ̄ŋ njʉ́ɔ páʼ alāʼ á si nnéŋɛ ŋkāp á ntē túŋ mɛ́t épúp. Megaŋ ajūɔ apa tɛ nzá, é nɔŋ nnéŋɛ memía meŋkāp.

⁴² Mmɔʼ ŋgaŋ ŋgʉɔ̄ʼ mpfók menzwí á shʉʼ azí, ńnéŋ mezízí ŋkāp epak pīa, é zi mbú te azō kuʼ.

⁴³ Yɛɛ́so á pfeŋte megaŋ nnɔ pí, ńdé á mbū pɔ́p ŋ́gɛ: «Meŋ a shúŋ á wɛ́ á kwaʼ anuúnē: azi ajūɔ ŋgaŋ ŋgʉɔ̄ʼ mpfók menzwí wuɔ zīi, a á maʼ á ntē túŋ ncup Ndém, á pú ntɔ́k azi epuɔ metsem.

⁴⁴ Epi emɔ̄ʼ epuɔ é maʼ áa methū ŋkāp mɔ́p. Ḿbiŋ ŋgɔ́ mé yí, mbɔ a á pú mmāʼ azí akʉ̄ɛ zīi a wɛɛ̄, á azí ajūɔ tsem zīi a lɔɔ̄k nnáŋ. »