Málkúsi 11 - Eka Eswhī

Yɛɛ́so a á ega ŋkúɔ́ á Yelósalɛm

¹ Yɛɛ́so pɔ́ a nnɔ yí, é gʉɔ tɛ nnɔŋ mbátɛ á Yelósalɛm, ŋ́gɔ́ á eshhʉ̄ Bɛtfajé pɔ́ Betani, ájʉʼ lekwɛ̄t Methʉ́ Olive. Á shʉʼ ánɛ nnɔ yí, ńtó epuɔ mémpīa.

² Ńdé á mbū pɔ́p ŋ́gɛ: «Pɛ egʉ̄ɔ ánɛ akap alāʼ zīi, á mvhɔ pɛ lēe. Pɛ elɛ ege ekó éwú, éjʉ́ɔ mbɔ mɛ́ ntsēŋɛ á mɔ́ njakási éwú. Mɔ́ njakási mɛ́t, mbɔ ŋiŋ a laá nzi mbú ńnáŋ éwú ú, pɛ elɛ ŋkɛ́ʼɛ á yí, ńdɔk eshʉ̄ʼ.

³ Ŋ́gɔ́ éyi ŋiŋ a kó nzɛ́tte á wɛ́ ŋ́gɛ, pɛ kɛ́ʼɛ ndɔkɔ ŋ́gʉ̄ɔ mé egɔ lɛ́, pɛ epwɛ̄ɛt ŋ́gɛ: “Ndi a á si ŋkɔ̄ŋɔ á lelɔk ŋghʉ̄ azō, élɛ ezéŋ epiŋne eyá mé pɛ tsetsɔŋɔ.” »

⁴ Pɔ́ gʉɔ, ŋ́kó njʉ́ɔ mɔ́ njakási á tseŋne á nchu mbuʼ mmɔʼ mba, á legʉ̄ŋ mɛnzhɛ, pɔ́ lɛ ŋkɛ́ʼɛ.

⁵ Emɔ̄ʼ epuɔ á nnɔ epuɔ pīi, é ŋgɔ́ á ajʉʼ mɛ́t, é zɛ́tte á wɔ́p ŋ́gɛ: «Pɛ kɛ́ʼɛ á mɔ́ njakási wɔ̄ ndɔ̄kɔ mé egɔ́?»

⁶ Pɔ́ pwɛt á mbū pɔ́p, páʼ Yɛɛ́so a á ntswī épúp. Mɛ́ tshi á wɔ́p nnéŋ pɔ́ lɔk ŋgʉ̄ɔ.

⁷ Pɔ́ lɔk á mɔ́ njakási mɛ́t eshʉ̄ʼ, ŋ́gē eyá mé Yɛɛ́so, ńdɔ̄k menzhó mɔ́p nzyākne ŋkaʼte yí. Yɛɛ́so á kɔ́ʼ nnáŋ éwú.

⁸ É nɔŋ nzīŋɛ, epuɔ tɛ nzáne é nɔŋ esāŋtɛ menzhó mɔ́p á ndo mɛnzhɛ, emɔ̄ʼ epuɔ é nɔŋ esāŋtɛ azɔ́p mbū methʉ́ meswī mīi, pɔ́ é fakte á ŋkāʼ.

⁹ Epuɔ pīi, é ŋgɔ́ á mvhɔ, mbɔɔ pīi é ŋgɔ́ á nzem Yɛɛ́so, é nɔŋ nzīŋɛ ŋgyáa á lepɛ ndʉ́ɛ́ ŋ́gɛ: «Ozána, mbwɛ́né e egɔ́ á mbū ŋiŋ yīi, a shʉʼɛ, mbɔ Ndém mé chʉ́ á yí, ńtó á mbū pek.

¹⁰ Mbwɛ́né e egɔ́ ánɛ ŋiŋ yīi, a shʉʼɛ á njhʉ́ lefɔ Mɔʼɔ́ wek Efɔ Ndavít. Ozána á mbū Ndém tɛ athʉ́ lephū. »

¹¹ Yɛɛ́so á kó á Yelósalɛm, ńzíʼ ŋkó á Mía Ŋgyā Ndém, ńcʉ̄te akʉ̄ɛ akʉ̄ɛ zīi, mɛ́ éwú ŋghʉ̄ɛ tɛ á mi. Ḿbiŋ ŋgʉ̄ɔ mé Betani pɔ́ a meziŋ‑ntō ntsɔp pīa, melaʼ mīi njhʉ̄ e le gɔ́ mbɔ e é tɔ́k.

Yɛɛ́so a á ega nnéŋɛ ndɔ ánɛ amɔ̄ʼ athʉ́ zīi, á ka zém ɛ́

¹² Njhʉ̄ é lá, Yɛɛ́so pɔ́ a nnɔ yí é fhó á Betani ntó, ŋ́gʉɔ tɛ ŋkó á mɛnzhɛ, nzi é záŋ á yí.

¹³ Á tshí tɛ éwú, ńjʉ́ɔ amɔ̄ʼ athʉ́ fiŋge á jʉɔne, á gʉɔ á ncʉtɛ̄ ŋ́gɛ, kɛ yí gɔ ejʉ́ɔ emɔ̄ʼ ntá athʉ́ mɛ́t, ŋ́káp njhʉ́ lɛ́, ŋ́kó éwú, ńjʉ́ɔ áa ndaʼ mefho, melaʼ mīi á lɛ te afʉʼ zīi, methʉ́ mɛ́t é gɛ nzémɛ ɛ́.

¹⁴ Yɛɛ́so á lé mé athʉ́ mɛ́t ŋ́gɛ: «Tɛ lɛ́ʼ ŋiŋ á láʼ nzéŋ ŋ́káp atá ánɛ wu tɛ njhʉ́. » Ŋ́gē elé épúp, megaŋ nnɔ pí é nɔŋ njúʼu.

Yɛɛ́so a á ega njūŋɔ megaŋ esaá á Mía Ŋgyā Ndém

¹⁵ Yɛɛ́so pɔ́ a pɔ́p é gʉɔ tɛ ŋkó á Yelósalɛm, á kó á ntē Mía Ŋgyā Ndém, ńjūŋ epuɔ pīi, é ŋgɔ́ éwú eswīŋɛ azō, mbɔɔ wɔ júɔ́. Ḿbwɛ̄t metɛ́blɛ wɔ kúmne‑ŋkāp, ŋ́kápa á esī, mbɔɔ eleŋ wɔ táŋ‑ekepēŋ.

¹⁶ A te cʉ́ʼ tɛ ŋiŋ á zéŋ ŋkʉ̄lɛ azō, ńdɔk nzápa á Mía Ŋgyā Ndém ɛ́.

¹⁷ Ńzī á lezīʼne epuɔ ndé ŋ́gɛ: «Á ntē aŋwaʼne Ndém, Ndém á lé ŋ́gɛ: “Ŋgyā za e efú nnáŋa ŋgɔ́ɔ ŋgyā aswiŋte, á mbū ŋgɔŋ ntsem.” A té ayi pɛ pwɔ̄ é kʉʉ̄ŋ esɛt, ńdɔk ŋghʉ̄ ŋka metsɔ́ŋ laá kɛ?»

¹⁸ Wɔ nɔŋ‑epɔʼ epi melʉɛ pɔ́ a wɔ kɛ́ʼte‑mbé Ndém, é kó njúʼ anu zīi, Yɛɛ́so a á ndé, ńnɔŋ efāʼa eshhʉ̄ yīi, pɔ́ e tsia éwú tɛ́ ezwhí á yí. Pɔ́ le nɔ̄ŋ mbɔ́kɔ á Yɛɛ́so, melaʼ mīi alāʼ á lɛ si njúʼu anu zīi, a zíʼnɛ á wɔ́p, á kúɔ́ ánɛ pɔ́p.

¹⁹ Á ghʉ ŋgɔ́ mbwɛɛ́t‑njhʉ̄, Yɛɛ́so pɔ́ a megaŋ nnɔ pí é fhó á Yelósalɛm ntó.

Apɛ zīi á gɔ etó ánɛ lefɛ̄ nnɛ̄t ŋgyá á mbū Ndém

²⁰ Njhʉ̄ é lá nzemɛ́nzēm, Yɛɛ́so pɔ́ a megaŋ nnɔ pí é zéŋ ŋgē etsia á mɛnzhɛ, ńjʉ́ɔ mbɔ athʉ́ fiŋge aziɛ́, á nzó tɛ ŋkó ánɛ meŋgaŋ.

²¹ Piɛ á kímte anu zīi á ke tɔ́kē, ńdé á mbū Yɛɛ́so ŋ́gɛ: «Mɔʼɔ́ wek, jʉ́ɔ páʼ athʉ́ zīi, o ke néŋ ndɔ éwú lā, á nzó tɛ mmī. »

²² Yɛɛ́so á pwɛt á mbū nnɔ yí ŋ́gɛ: «Pɛ efɛ́ nnɛ̄t ŋgyá á mbū Ndém.

²³ Meŋ a shúŋ á wɛ́ á kwaʼ anuúnē, ŋiŋ a lʉ́ɛ́ á mbū lekwɛ̄t cʉɔ ŋ́gɛ, fhó ega ntsɔ́ʼɔ, ŋ́gʉɔ ŋgwhʉ̄ á ntē mía ntshi, ŋ́gē elé, ńnéŋ á ntē yí ŋ́gɛ á gɔ́ épúp, tɛ nnɔ̄ŋ te mmīʼtɛ ɛ́, mbɔ Ndém a a ghʉ, a etó épúp.

²⁴ Melaʼ épúp tɛ́ meŋ shúŋɔ á wɛ́ ŋ́gɛ: pɛ nɔŋɔ eswíŋtɛ á Ndém, ńdɔ́ɔ tɛ mbɔ akɔ̄ lɛ́, pɛ enéŋ á ntē pɛ ŋ́gɛ, pɛ é ndáʼ ŋgwɛ̄ azō mɛ́t, Ndém á yá á mbū pɛ.

²⁵ Efʉʼ akɔ̄ lɛ́ yīi, o gɔ̄ á eswíŋte Ndém, ḿbīŋ ŋkwāŋte ńjʉ́ɔ ŋgɔ́ eyi, ŋiŋ a á fa anu á mbū wu, o elēkne mefa ŋgaŋ, tɛ́ Mɔʼɔ́ wɛ yīi, a á athʉ́ lephū, á zéŋ ndēkne mefa mú azí.

²⁶ [Pɛ nɔŋɔ te ndēknɛ mefa emɔ̄ʼ epuɔ ɔ́, mbɔ Mɔʼɔ́ wɛ yīi, a á athʉ́ lephū, a te shʉʼ elekne mefa mɛ́ azí í.]

Mekém alāʼ é ega é té mvéŋɛ mete Yɛɛ́so ó

²⁷ Yɛɛ́so pɔ́ a nnɔ yí é zéŋ mbīŋ nzem mé Yelósalɛm, á kó ŋgɔ́ á Mía Ŋgyā Ndém nnɔŋ nzīŋtɛ, wɔ nɔŋ‑epɔʼ epi melʉɛ, pɔ́ a wɔ kɛ́ʼte‑mbé Ndém, mbɔɔ mekém alāʼ, é shʉʼ njʉ́ɔ á yí.

²⁸ Ńzɛ́tte á yí ŋ́gɛ: «O ghʉɛ ejʉɔ ntií menu páʼa, awɔ́ á tswi ī? Awɔ́ a yáa á wú mete, tɛ́ o lɔ̄kɔ ŋghʉ̄ɛ ɛ́?»

²⁹ Yɛɛ́so á pwɛt á mbū pɔ́p ŋ́gɛ: «Meŋ a zɛ́tte á wɛ́ azá á taʼ anu ndaʼ, ŋ́gɔ́ éyi pɛ tsɔ́ʼɔ á mbū meŋ, mbɔ meŋ a shúŋ á wɛ́, á ŋiŋ yīi, a yáa mete, tɛ́ meŋ ndɔ̄kɔ ŋghʉ̄ɛ ecʉɔ etsō mɛ́t.

³⁰ Jáaŋ a le ziʼné alāʼ, ńnōʼ epuɔ á ntshi péʼe, mbɔ Ndém mé ntswī kɛɛ epuɔ menɔŋ ē? Pɛ eshúŋ á gá.

³¹ Pɔ́ sap á tsetsɛlɛ pɔ́p ŋ́gɛ: «Ḿpɛ pwɛtɛ ŋ́gɛ Ndém mé le tswīī, mbɔ a a túŋte á yímpɛ gɛ, tɛ pɛ pīiŋ te ŋke Jáaŋ véŋ melaʼ akɔ̄?

³² Ḿbīŋ mbwɛ̄t ŋ́gɛ, epuɔ menɔŋ mé le tswīī, mbɔ á ziŋ ŋ?» Ḿmīʼte épúp, ḿbɔ́kɔ menēk alāʼ, melaʼ mīi alāʼ ntsem á lɛ si nzhɛ́ɛ á légɛ, Jáaŋ a lɛ á kwaʼ ntswi‑ŋke Ndém.

³³ Pɔ́ lɛ mbwɛ̄t á mbū Yɛɛ́so ŋ́gɛ: «Pek ka zhɛ́ ɛ́. » Yɛɛ́so á lé á mbū pɔ́p ŋ́gɛ: «Mbɔɔ meŋ azá, meŋ te e shúŋ á wɛ́ ajʉʼ zīi, mete é fhɔ́ɔ éwú, tɛ́ meŋ ndɔ̄kɔ ŋghʉ̄ɛ emuɔ menu ú. »