Málkúsi 10 - Eka Eswhī

Ntekné Yɛɛ́so ánɛ alaá‑ŋgyā

¹ Yɛɛ́so á fhó á ajʉʼ mɛ́t ŋgʉ̄ɔ mé apak alāʼ Yudéa, á nzéŋ ntshi Juldɛŋ, ŋ́kó éwú, atʉtʉ epuɔ á zéŋ eshʉ̄ʼ ńcúʼte á lezēŋ yí, á nɔŋ nzíʼnɛ á wɔ́p páʼ a gɛ nzī ŋghʉ̄ɛ épúp.

² Epuɔ Falísia é tshóte nnɛ̄t mé lezēŋ tsí, ńdɔ̄k ashuŋne ndʉ̄ʼ á yí letā, ńzɛ́tte á yí ŋ́gɛ: «Tɛ á péʼe, lepé tsímpɛ é véŋ ŋ́gɛ, ŋiŋ a ejūŋ á nzwí yi i?»

³ Á zɛ́tte á wɔ́p ŋ́gɛ: «Mɔɔ́sɛ a le néŋ lepé á mbū pɛ ŋ́gɛ akɔ̄?»

⁴ Pɔ́ gɛ: «Mɔɔ́sɛ a le lé ŋ́gɛ, ŋiŋ a gɔ etí akɛtte ŋgyá á mbū nzwí yi, ŋ́gɛ pɔ́ yí e efākne, ńjūŋ á yí. »

⁵ Yɛɛ́so á gɛ: «Mɔɔ́sɛ a lɛɛ́ nnéŋɛ lepé cʉɔ á mbū pɛ páʼā, melaʼ mīi pɛ é wɔ athū te júʼ á mbū Ndém.

⁶ Ndém a le ké ŋgē enɔŋ ŋgɔŋ, ḿbɔ́ á ŋiŋ mbaŋa pɔ́ menzwí.

⁷ “Melaʼ épúp tɛ́ ŋiŋ mbaŋa a a fú enáŋ tɛ efak nnɛ̄t ánɛ mɔʼɔ́ yi pɔ́ mɛ́ wɔp, égʉɔ ekwɛ́t nnɛ̄t ánɛ nzwí yi.

⁸ Pɔ́p mémpīa e ekwɛ́tɛ ncʉ́ʼɛ á taʼ ŋiŋ.” Púp, pɔ́ le zéŋ nzɛ́t epuɔ mémpīa á, pɔ́ ecʉ́ʼ á taʼ ŋiŋ.

⁹ Á épúp tɛ́, ndɛ́ʼ ŋiŋnɔŋ á fakne ajū mīi, Ndém mé temte. »

¹⁰ Yɛɛ́so pɔ́ a megaŋ nnɔ pí é ghʉ ŋgʉ̄ɔ tɛ ŋkó á mba, megaŋ nnɔ pí é zéŋ nzɛ́tte á yí azō ánɛ anu jʉɔ mɛ́t.

¹¹ Á pwɛt á mbū pɔ́p ŋ́gɛ: «Ŋiŋ a juŋɔ á nzwí yi, ḿbīŋ nnéŋ mmɔʼ á ŋgyā, mbɔ ŋgaŋ a á ghʉ agā, ńdɔkɔ esɛ̄tɛ nzem ŋgaŋ mvhɔ.

¹² Menzwí a piŋɛ ntó á mbū ndō yi, ŋ́gʉɔ nzɔ́ʼ mmɔʼ ndō ndɛʼɛ, á gɔ́ agā. »

Yɛɛ́so pɔ́ a ewɔŋkhʉ̄

¹³ Epuɔ é ghʉ nnɔ̄ŋ ndɔ̄kɔ ewɔŋkhʉ̄ eshʉ̄ʼɛ njʉ́ɔ á Yɛɛ́so ŋ́gɛ, a ezápa mbū mí á athū pɔ́p, nnɔ yí é piŋ nnɔ̄ŋ ntɔ̄ʼɔ á wɔ́p.

¹⁴ Á jʉ́ɔ épúp, á pú te yí pɔŋ, á lé á mbū nnɔ yí ŋ́gɛ: «Pɛ etshī ewɔŋkhʉ̄ nnéŋ, pɔ́ eshʉ̄ʼ á mbū meŋ, ndɛ́ʼ pɛ ezéŋ á wɔ́p ntɔ̄ʼ, melaʼ mīi lepɔŋ ánɛ Lefɔ Ndém, é mbū epuɔ pīi, é páʼ pɔ́p lā.

¹⁵ Meŋ a shúŋ á wɛ́ á kwaʼ anuúnē, ŋiŋ a gɔ te véŋ páʼ méŋ agáʼ mɔ́ lā, ŋ́gɛ Ndém mé ecʉ́ʼɛ esáʼa á yí í, mbɔ a te e láʼ ekó á ntē Lefɔ Ndém ɛ́. »

¹⁶ Á lé épúp, ńtswíʼ ewɔŋkhʉ̄, ŋ́gwɛ̄ á mbū yí, ńzápa mbū á athū pɔ́p, ńdɔkɔ ntséknɛ á wɔ́p á mbū Ndém.

Yɛɛ́so pɔ́ ŋgaŋ lewūʼ

¹⁷ Yɛɛ́so á gʉɔ tɛ ŋkó á mɛnzhɛ, mmɔʼ ŋiŋ á kʉte eshʉ̄ʼ, ńtswíʼte á mvhɔ yí, ńzɛ́tte á yí ŋ́gɛ: «Ńziʼnɛ, wu ŋiŋ mbɔŋ, meŋ gɔ eghʉ̄ʉ lɛ akɔ̄, tɛ́ Ndém á fú ŋghʉ̄, pek yí mé cʉ́ʼɛ mbúu nnáŋa á?»

¹⁸ Yɛɛ́so á zɛ́tte á yí ŋ́gɛ: «O tɔ́ŋɔ á gá lɛ ŋiŋ mbɔŋ melaʼ akɔ̄? Ŋiŋ mbɔŋ a te éwú ú, ńdaʼ Ndém yíléyī.

¹⁹ O ó si nzhɛ́ɛ á légɛ mbé Ndém é leé ŋ́gɛ: “Ndɛ́ʼ ŋiŋ á gɔ́ aleʼé nzwhí á ŋiŋ. Ndɛ́ʼ ŋiŋ á ghʉ agā. Ndɛ́ʼ ŋiŋ á jʉ. Ndɛ́ʼ ŋiŋ á tɔ́k ekém ŋkɔŋ. Ndɛ́ʼ ŋiŋ á pɔpte á ŋiŋ ntswí ajūɔ zí. Awíɛ a eghʉ̄ mekuʼ mɔʼɔ́ yi pɔ́ mɛ́ wɔp.”»

²⁰ Ŋiŋ mɛ́t á pwɛt ŋ́gɛ: «Ńziʼnɛ, meŋ gɛ ŋkúʼtɛ mbé muɔ mɛ́t ntsem, tɛ efhó aluú‑esī zá. »

²¹ Yɛɛ́so á cʉ á yí, anu zí á pɔŋ á yí, á lé á mbū yí ŋ́gɛ: «Taʼ azō a zɛɛ́t ŋkíŋɛ yīi, o o ghʉ. Gʉɔ eswīŋ ŋgɔŋ etsō cú ntsem, ńdɔ̄k ŋkāp ntswíte wɔ te kuʼ ánɛ azō, éshʉʼ ntsé á nzem meŋ. O ghʉɛ épúp, mbɔ o o shʉʼ ewɛ á kwaʼ lewūʼ á lezēŋ Ndém, á athʉ́ lephū. »

²² Á júʼ épúp, eshhʉ̄ yí é gɛ swɛt, ŋ́gē egʉɔ, anu mɛ́t á ziŋɛ nzɛ̄tɛ á yí, melaʼ mīi a le wɛ̄ etsō tɛ é zá tɛʼ.

²³ Yɛɛ́so á cʉ megaŋ nnɔ pí, páʼ pɔ́ nnáŋ ŋkɛ́ne á yí, ńdé á mbū pɔ́p ŋ́gɛ: «Á teē tɛʼ á mbū ŋgaŋ lewūʼ á levēŋ ŋ́gɛ, Ndém mé ecʉ́ʼɛ esáʼa á yí, tɛ a eláʼ ŋgwɛ̄ lepɔŋ ánɛ Lefɔ Ndém. »

²⁴ Megaŋ nnɔ pí é júʼ ashuŋne jʉɔ mɛ́t, á kʉʼne á wɔ́p tɛʼ, tɛ́ Yɛɛ́so á zéŋ ndé á mbū pɔ́p ŋ́gɛ: «Mesoó pá, á teē tɛʼ á mbū ŋiŋ á levēŋ ŋ́gɛ, Ndém mé ecʉ́ʼɛ esáʼa á yí, tɛ a eláʼ ŋgwɛ̄ lepɔŋ ánɛ Lefɔ Ndém.

²⁵ Á zaŋneē tɛʼ á mbū shamo á letɔ̄k ánɛ lephʉ̄ leswáʼ, ńtsyā á ŋgaŋ lewūʼ á levēŋ ŋ́gɛ, Ndém mé ecʉ́ʼɛ esáʼa á yí, tɛ a eláʼ ŋgwɛ̄ lepɔŋ ánɛ Lefɔ Ndém. »

²⁶ Megaŋ nnɔ pí é júʼ épúp, á zɛ́t ntswīʼnɛ ŋkʉ̄ʼnɛ á wɔ́p kʉʼne, pɔ́ zɛ́tte á tsetsɛlɛ pɔ́p ŋ́gɛ: «Á gɔ́ páʼa, mbɔ awɔ́ mé gɔ eláʼ ntswɛ́t é?»

²⁷ Yɛɛ́so á pʉ́ʼɛ menēk ntshí ánɛ pɔ́p, ńdé ŋ́gɛ: «Ajʉɔ anu mɛ́t á gɔ etsyāa áa epuɔ menɔŋ, ŋ́ké le á Ndém tsya. Amɔ̄ʼ ajū mīi á gɔ etsyāa á Ndém á té éwú ú. »

²⁸ Piɛ á lɛ ndé á mbū yí ŋ́gɛ: «Jʉ́ɔ́ páʼ pek lē mbū esákne azék akʉ̄ɛ akʉ̄ɛ, éshʉʼ ntsé á nzem wu. »

²⁹ Yɛɛ́so á gɛ: «Meŋ shúŋɔ á wɛ́ á kwaʼ anuúnē ŋ́gɛ, ŋiŋ a gɔ le wáʼ mba zi, ŋ́gwáʼ á mɔʼɔ́ yi pɔ́ mɛ́ wɔp, ŋ́gwáʼ epɔ̄ memía pí epi mbaŋa mbɔɔ epi wɔnzwí, ŋ́gwáʼ ewɔŋkhʉ̄ pí mbɔɔ meŋkāʼ mí melaʼ má, mbɔɔ melaʼ letswi ŋke mbɔŋ,

³⁰ ńnéŋ té wɛ etsō mɛ́t nzhɛ ŋkhʉ, á ntē ŋgɔŋ ega yīi, ḿpɛ é éwú tsetsɔŋɔ la á. Méŋgyā, épɔ̄ memía epi mbaŋa pɔ́ a epi wɔnzwí, mémía, éwɔŋkhʉ̄ mbɔɔ meŋkāʼ, mɛ́ piŋ nzéŋ nnɔŋ ndʉɔ́ʼɔ á yí. Ndém á shʉʼ nnéŋ té ghʉ, pɔ́ yí mé cʉ́ʼɛ mbúu nnáŋa á ntē ŋgɔŋ zīi, e e fú tɛ́ shʉʼ ɛ́.

³¹ Epuɔ tɛ nzáne pīi pɔ́ é tsetseŋɔ ŋgɔ́ megaŋ mvhɔ, pɔ́ e shʉʼ ecʉ́ʼ mezoknzem. Epi pɔ́ é mezoknzem, e ecʉ́ʼ megaŋ mvhɔ. »

Yɛɛ́so a á ega nzéŋɛ eshúŋɔ anu lewhʉ̄ zí

³² Yɛɛ́so pɔ́ a nnɔ yí é nɔŋ mbʉ̄ɛ̄ ŋgʉ̄ɔ mé Yelósalɛm, á gɔ́ á mvhɔ pɔ́p nzīŋɛ. Nnɔ yí é nɔŋ mmēkɛ, alāʼ zīi, á si nzhɛ̄nɛ á wɔ́p, á nɔŋ mbɔ́kɔ. Yɛɛ́so á tswhi efāk eyi mmɔʼ nnɔ yí, ntsɔp pīa mé legēm leswhī leswhī, pɔ́ a pɔ́p é tshí, á zi á leshūŋ á wɔ́p ajū mīi, á gɔ á ŋghʉʉ̄ á yí.

³³ Ńdé ŋ́gɛ: «Ḿpɛ é ega mbʉ̄ɛ̄ mé Yelósalɛm páʼa, ékó éwú, mɛ́ eswīŋ á Méŋ‑Ŋiŋnɔŋ wuɔ, á mbū wɔ nɔŋ‑epɔʼ epi melʉɛ, pɔ́ a wɔ kɛ́ʼte‑mbé Ndém. Pɔ́ ezápa á légɛ mɛ́ ezwhí á yí, púp, ŋ́gyá á yí á mbū mege pīi, é sáʼa alāʼ.

³⁴ Pɔ́ ezwī á yí, ńtsōk mekī ánɛ yí, ńdɔ̄k ntɛ̄ ntswá á yí, ńzwhí á yí. A epiŋ ŋgɔ́ eleʼé tɛ́t, a ezím ánɛ lewhʉ̄. »

Ajū mīi Jáaŋ pɔ́ Jáak é le lɔ́ á Yɛɛ́so

³⁵ Jáaŋ pɔ́ Jáak, épɔ̄ Zebedé, é ghʉ ntshóte nnɛ̄t mé lezēŋ Yɛɛ́so, ńdé á mbū yí ŋ́gɛ: «Mɔʼɔ́ wek, amɔ̄ʼ anu á esī zīi, pek é si ntsáa ŋ́gɛ, o lɛ ŋghʉ̄ á mbū pek. »

³⁶ Á lé á mbū pɔ́p ŋ́gɛ: «Pɛ kɔŋɔ ŋ́gɛ, meŋ eghʉ̄ akɔ̄ á mbū pɛ ɛ̄?»

³⁷ Pɔ́ pwɛt á mbū yí ŋ́gɛ: «Afʉʼ zīi o ó shʉʼ ŋkó á ntē lewūʼ cú, o elɛ̄ mvéŋ, pek etʉɔ́ʼte á wú, mmɔʼ ŋiŋ á náŋ á ŋkɔʼɔ́ apū ete, mmɔʼ á náŋ á ŋkɔʼɔ́ apū tswioɛ. »

³⁸ Yɛɛ́so á pwɛt á mbū pɔ́p ŋ́gɛ: «Pɛ te si nzhɛ́ɛ ajū mīi pɛ lɔ́ɔ ɔ́. Pɛ gɔ ekūuʼ á lenū ntūʼ ŋgʉɔ̄ʼ jʉɔ zīi, meŋ gʉɔ mé nnuú la a? Kɛ pɛ gɔ evéŋ mɛ́ noʼ á wɛ́ á ntē ŋgʉɔ̄ʼ zīi, mɛ́ gʉɔ mé nnoōʼ meŋ éwú la ā?»

³⁹ Pɔ́ gɛ: «Pek gɔ ekūuʼ. » Yɛɛ́so á gɛ: «Á anuúnē ŋ́gɛ, pɛ e shʉʼ enú ntūʼ ŋgʉɔ̄ʼ zīi, meŋ gʉɔ mé nnuú, mɛ́ epiŋ nnōʼ á wɛ́ á ntē ŋgʉɔ̄ʼ zīi, mɛ́ gʉɔ mé nnoōʼ meŋ éwú.

⁴⁰ Táʼ, ŋ́ké ŋgɔ́ mé lenāŋ ánɛ ŋkɔʼɔ́ apū ete gá, kɛ́ eyi tswioɛ, meŋ mé té pɔŋté á levēŋ ɛ́. Ejʉʼ cʉɔ mɛ́t, Ndém a lē ncuŋte, ńdɔk mbyɛ́t epuɔ pīi, a le láʼ ntsɔ́ʼ á wɔ́p. »

⁴¹ Epi emɔ̄ʼ epuɔ legēm, é júʼ anu jʉɔ mɛ́t, ńzī á leŋɔ̄ʼɔ Jáak pɔ́ Jáaŋ.

⁴² Yɛɛ́so á tɔ́ŋ á wɔ́p metsem, ńdé á mbū pɔ́p ŋ́gɛ: «Pɛ zhɛɛ́ ŋ́gɛ, wɔ sáʼ‑ŋgɔŋ, ŋ́gɔ́ wɔ te zhɛ́‑Ndém, é gē esáʼ epuɔ, éswɛ́t á wɔ́p swɛ́te. Memía epuɔ é ziŋte ánɛ epuɔ ziŋte.

⁴³ Á ka pɔ̄ŋ ŋ́gɛ, a egɔ́ épúp á tsetsɛlɛ pɛ ɛ́. Á gɔ́ áa lɛ, ŋiŋ a nɔŋ ŋkɔ̄ŋɔ á yí á legɔ̄ á mía ŋiŋ á nnɔ pɛ, á cʉ́ʼ ŋgaŋ afaʼ wɛ.

⁴⁴ Ŋiŋ á nɔŋ ŋkɔ̄ŋɔ á yí á legɔ̄ á ŋgaŋ mvhɔ á nnɔ pɛ, á cʉ́ʼ páʼ ŋkwa zɛ metsem lā.

⁴⁵ Ŋ́gɔ́ mé Méŋ‑Ŋiŋnɔŋ wuɔ, mbɔ a lɛɛ́ te eshʉ̄ʼɛ á ŋgɔŋ ega páʼā ŋ́gɛ, mɛ́ efāʼ á mbū yí í. A lɛɛ́ eshʉʼɛ, égɔ́ á ŋgaŋ afaʼ epuɔ menɔŋ, éfaʼ faʼe, tɛ eyá athū nnɛ̄t zí, élɔk ecuʼ atʉtʉ epuɔ.

Yɛɛ́so a á ega ŋghʉ̄ɛ Baatimé á jʉɔ ejʉʼ

⁴⁶ Yɛɛ́so pɔ́ á megaŋ nnɔ pí mbɔɔ alāʼ, é gʉɔ tɛ ŋkó á tésɔŋ Jeliko, ńnáŋ tɛ nnɔ̄ŋ efhɔ́ɔ á tésɔŋ mɛ́t ntúɔ́, ńjʉ́ɔ amɔ̄ʼ afʉʉ́‑menēk á náŋ á legʉ̄ŋ mɛnzhɛ, ńdɔ́ɔ ndɔ̄, lezēŋ tsí é gɔ́ lɛ Baatimé, ŋ́gɔ́ á méŋ Timɛ.

⁴⁷ Á júʼ á légɛ Yɛɛ́so ŋiŋ Naázalɛt mé tsia, ńzī á legaʼte mé ŋghi teté, ńdé ŋ́gɛ: «Yɛɛ́so méŋ Efɔ Ndavít, lɛ ntsá mezeŋɛ má. »

⁴⁸ Epuɔ tɛ nzá é nɔŋ ntsɛ̄nɛ á yí ŋ́gɛ, a eláŋte, tɛ́ á tswiʼne ŋkɔ́ʼne ŋghi zi mé athʉ́ ŋ́gɛ: «Méŋ Efɔ Ndavít, lɛ ntsá mezeŋɛ má. »

⁴⁹ Yɛɛ́so á júʼ, ńtshí ajʉʼ, ńtswī ŋ́gɛ mɛ́ etɔ́ŋ á yí, mɛ́ tɔ́ŋ á yí, ńdé á mbū yí ŋ́gɛ: «Kak ete ndū á esī, a á si ntɔ́ŋɔ á wú. »

⁵⁰ Á lɛ eswáŋ nzhó efwɔ̄k zi mmāʼ á esī, ńdū á esī lɛ glɛ, éshʉ̄ʼ mé lezēŋ Yɛɛ́so.

⁵¹ Yɛɛ́so á zɛ́tte á yí ŋ́gɛ: «O kɔŋɔ ŋ́gɛ, meŋ eghʉ̄ páʼ lā á mbū wu ū?» Á gɛ: «Ndi, lɛ ŋghʉ̄ meŋ ezéŋ njʉ́ɔ ejʉʼ. »

⁵² Yɛɛ́so á lé á mbū yí ŋ́gɛ: «Páʼ o ó fɛ́ nnɛ̄t ju ŋgyá mé meŋ lā, menēk mú e ezɛ́ʼɛ. Gʉɔ á legʉɔ wu. » Menēk ŋiŋ mɛ́t é lɛ ŋŋáʼa efʉʼ mɛ́t efʉʼ mɛ́t, á tsé á nzem Yɛɛ́so, ńzhɛ̄ne á yí.