Málkúsi 1 - Eka Eswhī

Jáaŋ nnoʼ‑epuɔ á ntshi a á ega ntswīi ŋke Ndém

¹ Nzií ŋke mbɔŋ Yɛɛ́so Klísto, Méŋ Ndém, e ejʉɔ páʼa.

² Éfhó ánɛ páʼ Ndém a le lé á ntē aŋwaʼne ntswi‑ŋke yi Izayi ŋ́gɛ: «Zhɛ́ á légɛ, meŋ a shʉʼ etó á ntswi‑ŋke ga, a epīk á mvhɔ wu, ńcūŋte á mɛnzhɛ, tɛ́ o ezīŋ éwú eshʉ̄ʼ.

³ Ŋgaŋ a á ega á késáatswɛt, ndʉ́ɛ́ mé ŋghi teté ŋ́gɛ: «Pɛ ecūŋte á mɛnzhɛ Atsyapuɔ, ésēŋte meliɛ́‑nzhɛ mí, e etshí ndeŋ ndeŋ. »

⁴ Púp, tɛ́ mmɔʼ ŋiŋ á lɛ ntó á késáatswɛt, lezēŋ tsí é gɔ́ lɛ Jáaŋ nnoʼ‑epuɔ á ntshi. Á nɔŋ esáʼa eshúŋɔ ŋ́gɛ, epuɔ menɔŋ e ewáʼ atswhī tepɔŋ zɔ́p, a enōʼ á wɔ́p á ntshi. Ndém a epiŋ ndēkne mefa mɔ́p.

⁵ Epuɔ apak ŋgɔŋ Yudéa metsem, tɛ mbɔɔ epuɔ Yelósalɛm, é lɛ si ntúɔ́ eshʉʼɛ njʉ́ɔ á yí, ḿvéŋɛ mefa mɔ́p á ntentā, á noʼo á wɔ́p á ntē ntshi Juldɛŋ.

⁶ Jáaŋ mɛ́t a le māʼ mmɔʼ ntií nzhó, mbɔ mɛ́ le lɔ̄k menɔŋ shamo tɛ́ mbáʼ. Ńzwík ekɔp ŋgup na á mbembéŋ yí. Etsí etsō lejhʉ̄, é gɔ́ ŋgím, ŋ́ghʉ̄ ŋŋwāʼ atswɛt.

⁷ A le nɔ̄ŋ esáʼa ndʉ́ɛ́ á mbū alāʼ ŋ́gɛ: «Mmɔʼ ndʉɛ a á nzem meŋ eshʉ̄ʼɛ, ḿbú ntsyā á gá, tɛ meŋ zi te kūʼ yīi, meŋ gɔ eŋɔ́ʼne á esī, ŋ́kɛ́ʼɛ ŋkhʉ meláŋ mí í.

⁸ Meŋ á si nnōʼo á wɛ́ á ntē ntshi ndaʼ. Ḿbiŋ ŋgɔ́ mé yí, mbɔ a a shʉʼ enéŋ Azwakne Ndém ánɛ pɛ. »

Mɛ́ é ega nnōʼo á Yɛɛ́so á ntē ntshi

⁹ Á lɛ ánɛ meleʼé mɛ́t, Yɛɛ́so á lɛ efhó á Naázalɛt, á ntē apak ŋgɔŋ Ŋgaliléa, éshʉʼ njʉ́ɔ á Jáaŋ. Á noʼ á yí á ntē Ntshi Juldɛŋ.

¹⁰ Yɛɛ́so á ghʉ nnɔ̄ŋ efhɔ́ɔ á ntshi ntúɔ́, ńdɛ njʉ́ɔ, lephū é tsɔ́ʼɔ ntshí, á jʉ́ɔ Azwakne Ndém á fhó éwú esóʼo nnáŋ ánɛ yí, ŋ́gɔ́ páʼ akepēŋ lā.

¹¹ Á zéŋ njúʼ mmɔʼ ŋghi é fhó éwú ndé ŋ́gɛ: «O ó Méŋ ga, meŋ kɔ̄ɔŋ á wú tɛʼ, o ghʉʉ̄, ntē gá é gáŋte. »

¹² Azwakne Ndém á shʉʼ ánɛ yí épúp, ńdɛ ntshóne á yí, á gʉɔ mé késáatswɛt,

¹³ ájʉʼ zīi, mena mbaʼ mé gɛ ŋgɔ́ɔ éwú. Ńnáŋ eleʼé alāʼ megēm lekua. Sɛ́ta á nɔŋ eshʉ̄ʼɛ ntátɛ á yí, mecɔʼ Ndém é nɔŋ ntswítɛ á yí.

Yɛɛ́so a á ega ntɔ́ŋɔ epuɔ, ńdɔkɔ ŋghʉ̄ɛ megaŋ nnɔ pí

¹⁴ Mɛ́ le gɔ̄ á Jáaŋ nnéŋ á ŋgyā atʉɛ́. Afʉʼ mɛ́t, Yɛɛ́so á gʉɔ mé Ŋgaliléa. Ŋ́kó éwú, ńnɔŋ ntswīi ŋke mbɔŋ Ndém, ésáʼa eshúŋɔ ŋ́gɛ:

¹⁵ «Afʉʼ á páʼa mbɔ á kuʼ. Afʉʼ zīi, Ndém a gɔ á esáʼ lefɔ tsí, á lɔkɔ ntshónɛ tɛ mbátɛ. Pɛ egɔ̄ nnɛ̄t zɛ, ŋgwáʼ atswhī tepɔŋ zɛ́, ḿbīŋ nzem á mbū Ndém, ḿvéŋ ŋke mbɔŋ wuɔ mɛ́t. »

¹⁶ Yɛɛ́so á shʉʼ ŋgē etsia á akʉŋɛ́ mía ntshi Ŋgaliléa, ńjʉ́ɔ emɔ̄ʼ epuɔ mémpīa, á Simɔŋ pɔ́ ntsiʼnzem yi Aŋdlɛya. Pɔ́ gɔ́ wɔ maʼ‑mesōh, ńnɔŋ mmāʼa lekhʉ tsɔ́p á ntshi.

¹⁷ Á lé á mbū pɔ́p ŋ́gɛ: «Pɛ eshʉʼ ŋgɔ́ á nzem meŋ, meŋ eghʉ̄ pɛ ecʉ́ʼɛ ncúʼtɛ áa epuɔ menɔŋ. »

¹⁸ Pɔ́ lɛ ntshī lekhʉ tsɔ́p nnéŋ, ńtsé á nzem yí.

¹⁹ Á náʼ ŋgʉ̄ɔ tɛ ŋkó mé mvhɔ, ńzéŋ njʉ́ɔ emɔ̄ʼ epuɔ mémpīa, á Jáak pɔ́ ntsiʼnzem yi Jáaŋ, épɔ̄ Zebedé. Pɔ́ náŋ á ntē akɛnūʼ, ńnɔŋ ncūŋtɛ mekhʉ mɔ́p.

²⁰ Á lɛ ntɔ́ŋ á wɔ́p, pɔ́ tshi á mɔʼɔ́ wɔp Zebedé pɔ́ a megaŋ afaʼ á ntē akɛnūʼ nnéŋ, ńtsé á nzem yí.

Yɛɛ́so a á ega njūŋɔ esī zīi, e é si ŋgēnɛ á ŋiŋ

²¹ Yɛɛ́so pɔ́ a epuɔ pí mɛ́t, é gʉɔ mé tésɔŋ Kafaanawum. Aleʼé aswite á lɛ ŋkūʼ, á gʉɔ á ŋgyā aswiŋte, ńzī á lezīʼne epuɔ.

²² Ńzíʼne páʼ ŋiŋ yīi, Ndém mé tó á yí, ejʉɔ ntií lezīʼne mɛ́t, é tswhi ánɛ ezi wɔ kɛ́ʼte‑mbé Ndém. Epuɔ é nɔŋ njúʼɔ, á pú ŋkʉ̄ʼnɛ á wɔ́p.

²³ A le nɔ̄ŋ nzíʼnɛ épúp. Mmɔʼ ŋiŋ mbaŋa á lɛ ŋkó á ŋgyā mɛ́t, mbɔ esī e lē ŋgɔ á yí. Esī mɛ́t é ghʉ, ŋgaŋ á gaʼte mé nte, ńdé ŋ́gɛ:

²⁴ «Yɛɛ́so, ŋiŋ Naázalɛt, o tswíi akɔ̄ á mbū pek ē? O kɛɛ́ eshʉʼɛ áa mbík pek kɛ? Meŋ á zhɛ́ á ŋiŋ yīi, o ó ewiɛ́. O ó te alɔ́ʼ, éfhɔ́ɔ á mbū Ndém. »

²⁵ Yɛɛ́so á júʼ épúp, ńcɔ́k esī mɛ́t, ńdé ŋ́gɛ: «Láŋtɛ́. Fhó ánɛ ŋiŋ wuɔ ntó. »

²⁶ Esī é tswíʼ á ŋiŋ mɛ́t, ńtém á esī, ŋ́gē efhó ánɛ yí etó, ńnɔŋ ŋgāʼtɛ mé nte.

²⁷ Á pú ntsyā epuɔ metsem tsyaa, tɛ pɔ́ zɛ́tte á tsetsɛlɛ pɔ́p ŋ́gɛ: «Ajʉɔ á páʼa ŋgɔ́ akɔ̄? Anu eswhī azi á tó la. Nziʼnɛ wuɔ a á si ndɔ̄kɔ mete tɛ́ nzíʼnɛ, ńcɔ́kɔ mbɔɔ mesī, pɔ́ júʼɔ nchu yí. »

²⁸ Mɛ́ pú ndɛ̄ ndɔ̄k lezēŋ Yɛɛ́so, ésāŋ apak ŋgɔŋ Ŋgaliléa ntsem.

Yɛɛ́so a á ega ŋghʉ̄ɛ megaŋ agɔ tɛ záa é tʉɛ

²⁹ Yɛɛ́so pɔ́ a epuɔ pí pwɔ̄, á Simɔŋ pɔ́ Aŋdlɛya, ŋ́ghʉ̄ á Jáak pɔ́ Jáaŋ, é pú efhó á ŋgyā aswiŋte ntó, ńdɛ mbú ŋgɔ́ nnɔ, ŋgʉ̄ɔ mé mba Simɔŋ pɔ́ Aŋdlɛya.

³⁰ Ŋgém Simɔŋ a le nɔ̄ŋ á ŋgyā, nnɛ̄t é nɔŋ ŋkɔ́ʼɔ á yí, Yɛɛ́so á kó éwú, mɛ́ lɛ ŋkím eshúŋ á yí.

³¹ Á tshóte nnɛ̄t mé lezēŋ tsí, ŋ́kímne apū zí ndɔk mbʉ́ʼɛ á yí, nnɛ̄t é lɛ nzáʼa. Á gʉɔ efāʼ azō, ńdɔk ŋghī á wɔ́p.

³² Á kó ŋgɔ́ nchu nzém, tɛ mbɔ nu a á pí, epuɔ ajʉʼ mɛ́t, é lɔk megaŋ agɔ ntsem, mbɔɔ epuɔ pīi, mesī é lē ŋgɔ á wɔ́p, ńdɔk eshʉ̄ʼ ńjʉ́ɔ á Yɛɛ́so.

³³ Epuɔ tésɔŋ tɛ mī, é shʉʼ mbú ńcúʼte á nchu ŋgyā.

³⁴ Á ghʉ, megaŋ agɔ tɛ nzáne é te ánɛ ntií ntiī egɔ. Ńzéŋ njūŋ mesī tɛ nzáne ánɛ epuɔ. Ŋ́gē ejuŋ mesī mɛ́t, a te cʉ́ʼ tɛ pɔ́ lé anu ú, melaʼ mīi pɔ́ lɛ si nzhɛ́ɛ á ŋiŋ yīi, a á ewiɛ́.

Yɛɛ́so a á ega ŋkʉ́ʼnɛ á ŋgɔŋ Ŋgaliléa, ńtswī ŋke mbɔŋ

³⁵ Njhʉ̄ é lá etsōʼ etsōʼ, tɛ ejʉʼ é zɛ́t eséŋ seéŋ. Yɛɛ́so á ziɛ, éfhó á tésɔŋ ntó ŋgʉ̄ɔ mé ajʉʼ zīi, ŋiŋ a te éwú ú, ŋ́gɔ́ éwú eswíŋtɛ á Ndém.

³⁶ Simɔŋ pɔ́ a megaŋ akhu pí, é kʉ́ʼne efāʼ á yí.

³⁷ Efāʼ á yí tɛ njʉ́ɔ, ńdé á mbū yí ŋ́gɛ: «Epuɔ metsem é si efāʼa á wú. »

³⁸ Á pwɛt á mbū pɔ́p ŋ́gɛ: «Ḿpɛ efhó ega, ŋgʉ̄ɔ mé emɔ̄ʼ metésɔŋ pīi, é pateé ega. Meŋ etswī ŋke mbɔŋ á mbū pɔ́p azɔ́p. É si ŋgɔ́ ntoó‑ŋgyā gá. »

³⁹ Ńdɛ ŋgʉ̄ɔ ntɔ́kte ánɛ metésɔŋ Ŋgaliléa ntsem, ŋ́kʉ́ʼne ntswī ŋke mbɔŋ, á meŋgyā aswiŋte pɔ́p, ńnɔŋ njūŋɔ mesī ánɛ epuɔ.

Yɛɛ́so a á ega ŋghʉ̄ɛ ŋgaŋ kaʼpáp á tʉɛ

⁴⁰ Mmɔʼ ŋgaŋ kaʼpáp á shʉʼ ntswíʼte á esī á mvhɔ Yɛɛ́so, ḿbúʼ mbū á mbū yí ŋ́gɛ: «O kuūʼ á leghʉ meŋ etēe, éyi o ó kɔŋ. »

⁴¹ Á júʼ, mezeŋɛ mí é kú á yí, á lɛ nnā apū, ḿpfēŋ á yí, ńdé ŋ́gɛ: «Meŋ á kɔŋ, tʉɛ̄. »

⁴² Kaʼpáp á mi á mbe nnɛ̄t yí efʉʼ mɛ́t efʉʼ mɛ́t, á lɛ ntē.

⁴³ Yɛɛ́so á gē ejuŋ á yí á lezēŋ yí, ŋ́kāk á yí á mbɔŋɔ́, ńtsɛ̄ne á yí ŋ́gɛ:

⁴⁴ «Pá á wú á lekō ŋkím éshúŋ á ŋiŋ, wu méŋwɛ̄t e eké ŋgʉɔ ntswī nnɛ̄t ju á mbū nnɔŋ‑epɔʼ, ḿbiŋ nnɔ̄ŋ ntií epɔʼ zīi, lepé Mɔɔ́sɛ é si nzɛ́ttɛ ŋ́gɛ, ŋgaŋ kaʼpáp a tʉɛ, á nɔŋ. O eghʉ̄ épúp, ńdɔk ntswī á légɛ, o ó te. »

⁴⁵ Táʼ, ŋiŋ mɛ́t á gʉɔ, ńzī á lelɔk anu zīi, Yɛɛ́so a á ghʉ ánɛ yí, ḿbú esāŋ ejʉʼ, tɛ ŋgɔ́ yīi, Yɛɛ́so a le gɔ, a á le zīŋ esa saá ŋkó á tésɔŋ ɔ́. Ńcʉ́ʼɛ ŋgɔ́ɔ á nzem apɛ́, ánɛ mejʉʼ mīi, ŋiŋ a te éwú ú. Mɛ́ piŋɛ efhɔ́ɔ egʉ́ɛ egʉ́ɛ eshʉʼɛ njʉ́ɔ á yí.