Lúkási 9 - Eka Eswhī

Yɛɛ́so a á ega ntúɔ́ nnɔ yí, epuɔ ntsɔp pīa mé legēm

¹ Á lɛ amɔ̄ʼ aleʼé, Yɛɛ́so á tɔ́ŋ megaŋ nnɔ pí epuɔ ntsɔp pīa mé legēm. Ńcúʼte á wɔ́p, ŋ́gyá á wɔ́p mete á lelɔk njūŋ mesī ánɛ epuɔ, mbɔɔ á lelɔk ŋghʉ̄, megaŋ agɔ é te.

² Ńtó á wɔ́p ŋ́gɛ, pɔ́ egʉɔ ŋkɛ́ʼte éshúŋ epuɔ páʼ Lefɔ Ndém é épúp. Ŋ́kó nnɔŋ ŋghʉ̄ɛ, megaŋ agɔ e etʉ̄ɛ̄.

³ Ńdé á mbū pɔ́p ŋ́gɛ: «Pɛ nɔŋ ŋgʉ̄ɔ, ndɛ́ʼ ŋiŋ á pɛ́ azō páʼ athʉ́ zīi, a gɔ etɛ́te lā, páʼ apa lā, páʼ etsō lejhʉ̄ lā, páʼ ŋkāp lā. Ndɛ́ʼ ŋiŋ á pɛ́ menzhó mɛ́mbīa.

⁴ Pɛ gʉɔ tɛ ŋkó á ajʉʼ, mɛ́ kókne á wɛ́ eziɛ́ ŋgyā lɛ́, pɛ enáŋ éwú tɛ ndáʼ efhó éwú ŋgʉ̄ɔ.

⁵ Pɛ gʉɔ tɛ ŋkó á aziɛ́ akap lɛ́, epuɔ akap mɛ́t é gɔ́ te á wɛ́ kókne, pɛ ge efhó éwú egʉɔ, ńjɔ̄kte avɔ́p á mekhu pɛ, ńtsyā éwú, ńdɔk ntswī á légɛ, pɛ a pɔ́p é té wɛ. »

⁶ Nnɔ yí mɛ́t é lɛ ŋgʉ̄ɔ, ńtɔ́kte ánɛ metésɔŋ pɔ́ mekap alāʼ, ńtswī ŋke mbɔŋ Ndém ejʉʼ tsem, ńzéŋ nnɔŋ ŋghʉ̄ɛ, megaŋ agɔ é tʉɛ.

Efɔ Elōde a á júʼ á leghīte á Yɛɛ́so, ŋ́gɔ́ si mmēktɛ

⁷ Á lɛ épúp, Elōde yīi a le nɔ̄ŋ esáʼa apak ŋgɔŋ Ŋgaliléa, á júʼ menu mīi nnɔ Yɛɛ́so é ghʉ, ḿbú mmēkte, ŋ́gɛ Yɛɛ́so mɛ́t a á páʼa ŋgɔ́ awɔ́? Emɔ̄ʼ epuɔ é lɛ si ndʉ́ɛ́ ŋ́gɛ, a á Jáaŋ nnoʼ‑epuɔ ntshi yīi, a á zím ánɛ lewhʉ̄.

⁸ Emɔ̄ʼ epuɔ é nɔŋ ndʉ́ɛ́ ŋ́gɛ, Eli yīi a á zéŋ eshʉ̄ʼ. Emɔ̄ʼ epuɔ é zéŋ nnɔ̄ŋ ndʉ́ɛ́ ŋ́gɛ, mmɔʼ ntswi‑ŋke Ndém yīi a lɛ efʉʼ mvhɔ, a á zéŋ efhó á nnɔ mepfhō ntó.

⁹ Elōde á kwaŋte á ntɔ̄ŋ yí ŋ́gɛ: «A gɔ́ mé Jáaŋ, mbɔ meŋ nde tswī mɛ́ gɔ á yí, ńzáʼ athū zí. Ewuɔ ŋiŋ yīi, meŋ mbiŋɛ njúʼɔ emuɔ menu ánɛ yí la, a á awɔ́?» Ḿbiŋ nnɔ̄ŋ efāʼa á yí méŋwɛ̄t á lejʉ̄ɔ á Yɛɛ́so.

Yɛɛ́so a á ega nzékɛ á ŋiŋnɔŋ ntsāʼ táa

¹⁰ Meziŋ‑ntō Yɛɛ́so puɔ mɛ́t é gʉɔ epúp, ḿbiŋ mbīŋ nzem, ḿbɛ́te eshúŋ á Yɛɛ́so mefaʼ mīi, pɔ́ ke kó ŋghʉ̄. Á júʼ, ńdɔ̄k á wɔ́p efhó á nnɔ ntó, éfāʼ á legɔ̄ pɔ́plépɔ̄p. Ŋ́kó ndɔ̄k eshhʉ̄ mmɔʼ tésɔŋ ŋgʉ̄ɔ, mɛ́ tɔ́ŋ lɛ Betsayída.

¹¹ Táʼ, nnɔ epuɔ é júʼ páʼ Yɛɛ́so á gʉɔ, ńzhɛ̄ne á yí. Yɛɛ́so á ké mvéŋ véŋ, ḿbiŋ nzī á leshūŋ á wɔ́p menu ánɛ Lefɔ Ndém. Ńzéŋ nnɔŋ ŋghʉ̄ɛ, megaŋ agɔ é tʉɛ.

¹² Nzém e le pīŋ nnɔŋ eséŋɛ, megaŋ nnɔ Yɛɛ́so é tshóte nnɛ̄t mé lezēŋ tsí, ńdé á mbū yí ŋ́gɛ: «Ḿpɛ e ega á ajʉʼ zīi, mba ŋiŋ e te éwú ú, tswiī, alāʼ zīi á esī la, a epīŋ mé memba pɔ́ mekap alāʼ mīi, é pateé ajʉʼ jʉɔ mɛ́t, éfāʼ etsō mpfɛ́t, ŋ́kó ndí. »

¹³ Yɛɛ́so á lé á mbū pɔ́p ŋ́gɛ: «Pɛ méŋwɛ̄t e eyá á wɔ́p etsō pɔ́ epfɛ́t. » Pɔ́ pwɛt á mbū yí ŋ́gɛ: «Pek lɛɛ̄ ŋgwɛ áa mblɛ ntāʼ táa, ŋ́ghʉ̄ mesōh ntāʼ pīa ndaʼ. Pek gɔ le kūʼ á lelɔk nzék alāʼ jʉɔ ɔ́, ńdaʼ éyi pek é gʉɔ nzéŋ ńzó emɔ̄ʼ etsō. »

¹⁴ Pɔ́ lɛɛ́ ndʉ́ɛ́ épúp, melaʼ mīi epuɔ menɔŋ é lɛ á ajʉʼ mɛ́t tɛ nzáne. Mbaŋa ndaʼ ndaʼ é nɔŋ ŋgʉ̄ɔ ajūɔ ntsāʼ táa. Yɛɛ́so á lé á mbū nnɔ yí ŋ́gɛ: «Pɛ etswī pɔ́ enáŋte á esī, epfhɔɔ́ epfhɔɔ́, megēm táa megēm táa. »

¹⁵ Pɔ́ lɛ ntswī pɔ́ metsem, é pú nnáŋte á esī.

¹⁶ Yɛɛ́so á tswí mblɛ jɔ̄ ntāʼ táa pɔ́ mesōh mwɔ̄ ntāʼ pīa, ḿbʉ́ʼɛ menēk mí ncʉ̄ lephū, ésyákne á Ndém ánɛ ecū muɔ mɛ́t, ḿbwɔ́ʼte ŋgyá á mbū megaŋ nnɔ pí, ŋ́gɛ pɔ́ egāpte á mbū alāʼ, pɔ́ epfɛ́t.

¹⁷ Pɔ́ gapte, epuɔ metsem é tswí mpfɛ́t tɛ nzwɛ́t. Mɛ́ lakte epwɔ̄ʼ tsīi é vuʼɔ, é ló metúŋ ntsɔp pīa mé legēm.

Piɛ a á ega esīa ŋ́gɛ, Yɛɛ́so mé Nzaʼ‑Ŋkhʉ

¹⁸ Á lɛ amɔ̄ʼ aleʼé, Yɛɛ́so á nɔŋ eswíŋtɛ á Ndém yíléyī, nnɔ yí é gɔ́ á ajʉʼ mɛ́t. Méŋ afʉʼ á kuʼ, á zɛ́tte á wɔ́p ŋ́gɛ: «Alāʼ á si ndʉ́ɛ́ ŋ́gɛ akɔ̄ ánɛ meŋ ŋ̄?»

¹⁹ Pɔ́ pwɛt á mbū yí ŋ́gɛ: «Emɔ̄ʼ epuɔ é si ndʉ́ɛ́ ŋ́gɛ, o ó si ŋgɔ́ á Jáaŋ nnoʼ‑epuɔ á ntshi. Emɔ̄ʼ é nɔŋ ndʉ́ɛ́ ŋ́gɛ, o ó Eli. Emɔ̄ʼ é piŋ nzéŋ nnɔŋ ndʉ́ɛ́ ŋ́gɛ, o ó taʼ ntswi‑ŋke Ndém efʉʼ mvhɔ yīi, a á zéŋ efhó á nnɔ mepfhō eshʉ̄ʼ. »

²⁰ Yɛɛ́so á zéŋ nzɛ́tte á wɔ́p ŋ́gɛ: «Ḿbiŋ ŋgɔ́ mé pɛ, pɛ nɔ̄ɔŋ ndʉ́ɛ́ azɛ́ ŋ́gɛ akɔ̄?» Piɛ á pwɛt ŋ́gɛ: «O ó páʼā, ŋ́gɔ́ á Nzaʼ‑Ŋkhʉ á ntɔ̄ŋ apuʼ yīi, Ndém a le laʼnēē. »

²¹ Yɛɛ́so á piŋ ntsɛ̄ne á wɔ́p ŋ́gɛ, ndɛ́ʼ pɔ́ shúŋ á ŋiŋ.

²² Ńzéŋ ndé ŋ́gɛ: «Méŋ‑Ŋiŋnɔŋ wuɔ, a pɔŋteé á yí á lejʉ̄ɔ ŋgʉɔ̄ʼ tɛʼ. Mekém alāʼ mbɔɔ wɔ nɔŋ‑epɔʼ epi melʉɛ, ŋ́ghʉ̄ wɔ kɛ́ʼte‑mbé Ndém, e shʉʼ epuŋne á yí, éghʉ mɛ́ ezwhí á yí, a epiŋ ŋgɔ́ eleʼé tɛ́t, Ndém a eghʉ̄, a ezím ánɛ lewhʉ̄. »

Ntií ŋiŋ zīi, é gɔ etsé á nzem Yɛɛ́so

²³ Yɛɛ́so á zéŋ ndé á mbū epuɔ metsem ŋ́gɛ: «Ŋiŋ a nɔŋ ŋkɔ̄ŋɔ á letsē á nzem meŋ, á tshi á yí á lelhʉ athū zí yí méŋwɛ̄t nnéŋ, ḿvéŋ á lekʉɛ á mbaŋne paŋné yi eleʼé metsem, ḿbīʼ, ńdɔk ŋgɔ́ á nzem meŋ.

²⁴ Ŋiŋ a nɔŋ ŋkɔ̄ŋɔ á lepīp athū nnɛ̄t zí, ḿbɔ́kɔ á lewhʉ̄, mbɔ a a láʼ ekwhʉ́, épíi. Ŋiŋ a piŋɛ ŋgwáʼ athū nnɛ̄t zí melaʼ má, mbɔ a a láʼ egɔ́ éwú.

²⁵ Ŋiŋ a púu ŋgwɛ̄ lewūʼ ŋgɔŋ ntsem, á ndo esī atsetsáʼ, ḿbīŋ ŋkwhʉ́ ḿbí ndaʼ, mbɔ a á jhʉ́ apɛ akɔ̄?

²⁶ Ŋiŋ a nɔŋ ŋkúu esē á legɔ̄ ŋiŋ nnɔ ga, ńnɔ̄ŋ ŋkúu esē á lekūʼte ashuŋne zá, mbɔ Méŋ‑Ŋiŋnɔŋ wuɔ, a a láʼ epuŋne á yí afʉʼ zīi, a láʼa mbīŋɛ nzem á ntē shʉ́shɔ́k yí, ŋ́gɔ́ eyi Mɔʼɔ́ yi pɔ́ a mecɔʼ pí.

²⁷ Meŋ echʉ́ nnɛ̄t eshúŋ á wɛ́ á kwaʼ anuúnē, emɔ̄ʼ epuɔ é nnɔ pɛ ega tsetsɔŋɔ pīi, pɔ́ té shʉʼ ekwhʉ́ té gɔ́ yīi, pɔ́ é jʉ́ɔ lewūʼ Lefɔ Ndém mé menēk mɔ́p ɔ́. »

Yɛɛ́so a á ega ntswīi páʼ yí é épúp á ntē shʉ́shɔ́k Ndém

²⁸ Á le nɔ̄ŋ ŋgʉɔ azō taʼ ŋgap, páʼ Yɛɛ́so a le shúŋ ajʉɔ anu, á tsɔ́ʼ á Piɛ pɔ́ Jáaŋ mbɔɔ Jáak. Pɔ́ a pɔ́p é pe mé lekwɛ̄t, á eswíŋte Ndém.

²⁹ Ŋ́kó éwú, á nɔŋ eswíŋtɛ á Ndém, mɛ́ jʉ́ɔ eshhʉ̄ yí é sɛt nnɛ̄t ncʉ́ʼ ntií ndɛʼɛ. Menzhó mí é zéŋ esɛ̄t nnɛ̄t efók lɛ púúú, ńcʉ́ʼɛ ŋwāŋne ŋwaŋne.

³⁰ Mɛ́ lɛ ŋgē ejʉ́ɔ, epuɔ mémpīa, é tshí ajʉʼ mɛ́t, pɔ́ a Yɛɛ́so é nɔŋ eshúŋnɛ, ŋ́gɔ́ á Mɔɔ́sɛ pɔ́ Eli,

³¹ épi pɔ́ é ŋwak azɔ́p á ntē shʉ́shɔ́k Ndém. Pɔ́ a Yɛɛ́so é le nɔ̄ŋ eshúŋnɛ ánɛ ntií zīi, Yɛɛ́so a gɔ elɔk eshʉʼ emakne mefaʼ mí á Yelósalɛm, tɛ́ ekwhʉ́.

³² Pɔ́ le gē eshúŋne épúp, Piɛ pɔ́ a mesoó pí é pú ŋgɔ́ si ndíi tɛʼ. Pɔ́ piŋ ndɛ̄ ŋgē eziɛ, ńjʉ́ɔ á Yɛɛ́so, á ntē shʉ́shɔ́k yí, epuɔ pwɔ̄ mémpīa é tshíte á lezēŋ yí.

³³ Afʉʼ zīi epuɔ puɔ mɛ́t é le nɔ̄ŋ ŋgɔ efhó á lezēŋ Yɛɛ́so, égʉɔ, Piɛ á lé á mbū Yɛɛ́so ŋ́gɛ: «Mɔʼɔ́ wek, á mbɔŋ ŋ́gɛ, ḿpɛ a pɔ́p e epú ŋgɔ́ ega, pek e kwɛ́t mentap mɛ́ntɛ́t, taʼ a egɔ́ eju, taʼ a egɔ́ ezi Mɔɔ́sɛ, mmɔʼ e egɔ́ ezi Eli. » Piɛ a le gē elé épúp, a te zhɛ́ ajū mīi a lʉ́ɛ́ ɛ́.

³⁴ Piɛ á zɛ́t nzhɛ á shúŋnɛ, amɔ̄ʼ alɔ á liɛ esóʼo, ḿbúu ŋkáptɛ á wɔ́p. Nnɔ Yɛɛ́so é jʉ́ɔ épúp, ḿbú ncɔ̄ʼ tɛʼ.

³⁵ Ŋghi Ndém é fhó á ntē alɔ mɛ́t, ńdé ŋ́gɛ: «Ŋiŋ wuɔ, a á Méŋ ga. Meŋ á tsɔ́ʼ á yí. Pɛ ejúʼ á yí. »

³⁶ Ŋghi mɛ́t é ge emak á leshūŋne, mɛ́ jʉ́ɔ, Yɛɛ́so á cʉ́ʼɛ ntshíɛ ajʉʼ, áa yíléyī. Nnɔ Yɛɛ́so é le jʉ́ɔ menu mīi, é pú ntɔ́k á ndo lekwɛ̄t, éféŋ á ntē pɔ́p, tɛ mbú te shʉ̄ʼ eshúŋ á ŋiŋ ɛ́, tɛ afʉʼ á láʼ ŋkūʼ.

Yɛɛ́so a á ega njūŋɔ esī zīi, e lē ŋgɔ mmɔʼ méŋkhʉ̄

³⁷ Njhʉ̄ é lá, Yɛɛ́so pɔ́ a nnɔ yí epuɔ métɛ́t pwɔ̄, é fhó á ndo lekwɛ̄t esóʼo. Atʉtʉ epuɔ á shʉʼ ntswɛ́tte á yí.

³⁸ Mmɔʼ ŋiŋ á náŋ tɛ ntshí á nnɔ epuɔ, ŋ́gaʼte ndé ŋ́gɛ: «Tsɔ́ʼɔtsɔ́ʼ mé Ndi, lɛ ncʉ̄te á méŋ ga wuɔ ŋgyá á gá. A á si ŋgɔ́ egá ndaʼ mɔ́, ŋ́gɔ́ á mɔ́ mbaŋa.

³⁹ Mmɔʼ esī e gɛ ŋgɔ̄ɔ á yí, ńcʉ̄ʼnɛ á yí tɛʼ. Étsɔ́ʼ á yí emaʼ á esī, a elɔ̄k nnɛ̄t zi, ńtúŋ atsáʼ, ŋ́gāʼte, éfūʼ mekī. E gɔɔ̄ á yí épúp, e te gákne ntshī á yí nnéŋ ɛ́. Afʉʼ zīi e é piŋ ntshī á yí nnéŋ, a pú mbwɛ́t.

⁴⁰ Meŋ á púʼ mbū á mbū nnɔ wú ŋ́gɛ, pɔ́ ejūŋ esī mɛ́t, tɛ́ pɔ́ té éwú kuʼ. »

⁴¹ Yɛɛ́so á júʼ épúp, ŋ́gyɛ́t ndé ŋ́gɛ: «Pɛ epuɔ ŋguʼ puɔ, pɛ é epuɔ tepɔŋ, pɛ te ntē ánɛ Ndém tshí. Meŋ a láʼ esek ánɛ ŋghʉʉ́‑menu mɛ́, tɛ eláʼ etshí eséŋɛ́ ɛ́? Pɛ é kwaŋ ŋ́gɛ, ḿpɛ mé náŋa náŋa lɛ́?» Ḿbiŋ ndé á mbū ŋiŋ mɛ́t ŋ́gɛ, a elɔ̄k á méŋ yi eshʉ̄ʼ.

⁴² Á nɔŋ ndɔ̄kɔ á yí eshʉ̄ʼɛ, esī mɛ́t é tsɔ́ʼ á yí ntém á esī, á zi á lelɔk nnɛ̄t zi, ńtúŋ atsáʼ. Yɛɛ́so á cɔ́k esī mɛ́t, é fhó ánɛ yí ntó, mɔ́ á lɛ ntē. Yɛɛ́so á yá á yí á mbū mɔʼɔ́ yi.

⁴³ Alāʼ á jʉ́ɔ ejʉɔ ntií ajū mīi, e tswii mete Ndém laa, á pú ntsyā á wɔ́p. Menu mīi Yɛɛ́so a le nɔ̄ŋ ŋghʉɛ, é le pú nnɔŋ ŋkʉ̄ʼnɛ epuɔ tɛʼ. Á náŋ tɛ mbēkne nnɛ̄t, ńdé á mbū nnɔ yí ŋ́gɛ:

Yɛɛ́so a á ega nzéŋɛ mbhʉ́ɛ á lewhʉ̄ yi

⁴⁴ «Pɛ etsɔ́ʼ metuúŋ mɛ́ á mbɔŋɔ́, ńjúʼ anu jʉɔ zīi, meŋ gʉɔ á ndʉ́ɛ́ la: mɛ́ e swiŋ á Méŋ‑Ŋiŋnɔŋ wuɔ, á mbū epuɔ, pɔ́ eghʉ̄ ánɛ yí páʼ pɔ́ é kɔŋ. »

⁴⁵ Yɛɛ́so á lé épúp, táʼ, azō á tsɛ́tte leghi tsɔ́p, tɛ pɔ́ té júʼ anu zīi a lɔkɔ ndʉ́ɛ́ ɛ́, ḿbiŋ ŋgɔ́ si mbɔ́kɔ á lezɛ̄tte á yí azō ánɛ anu jʉɔ mɛ́t.

Awɔ́ a á mía ŋiŋ ánɛ nnɔ Yɛɛ́so ō?

⁴⁶ Méŋ afʉʼ á kuʼ, nnɔ Yɛɛ́so é zi a letɔʼne á nnɔ pɔ́p, éfāʼa á ŋiŋ yīi a á mía ŋiŋ.

⁴⁷ Yɛɛ́so á zhɛ́ anu zīi, pɔ́ é ŋgɔ́ á nnɔ pɔ́p ntɔ̄ʼnɛ. Ńdɛ ntɔ́ŋ á méŋ agáʼ mɔ́, á shʉʼ ntshí á lezēŋ yí.

⁴⁸ Á lé á mbū pɔ́p ŋ́gɛ: «Ŋiŋ a ŋkóknɛ á méŋ agáʼ mɔ́ wuɔ melaʼ má, mbɔ a lɔkɔ ŋkóknɛ áa gá. Ŋiŋ a piŋɛ ŋkókne á gá, mbɔ a lɔkɔ ŋkóknɛ á ŋiŋ yīi, a le tó á gá. Ŋiŋ yīi a á nnɔ pɛ metsem, ńnɔ̄ŋ nnɛ̄t zi á esī, yí mé mía ŋiŋ. »

Ŋiŋ a nɔŋ te mvɛ́nɛ afaʼ zɛ́ ɛ́, mbɔ pɛ a pɔ́p é nnɔ

⁴⁹ Afʉʼ á kuʼ, Jáaŋ á tswí ashuŋne, ńdé á mbū Yɛɛ́so ŋ́gɛ: «Mɔʼɔ́ wek, pek é jʉ́ɔ mmɔʼ ŋiŋ, á nɔŋ ndɔ̄kɔ lezēŋ cú, ńjūŋɔ mesī ánɛ epuɔ. Pek nɔ̄ɔŋ efāʼa á letɔʼ á yí, melaʼ mīi a te ánɛ nnɔ yímpɛ ɛ́. »

⁵⁰ Yɛɛ́so á pwɛt á mbū yí ŋ́gɛ: «Ndɛ́ʼ pɛ ezéŋ á yí ntɔ̄ʼ. Ŋiŋ a nɔŋ te mvɛ́nɛ afaʼ zɛ́ ɛ́, mbɔ pɛ a pɔ́p mé nnɔ. »

Epuɔ Samalía é lʉʼ á letswī Yɛɛ́so

⁵¹ Afʉʼ zīi Ndém a le nɔ̄ŋ ŋgɔ̄ á ŋghʉɛ̄, Yɛɛ́so a efhó á ndo esī atsetsáʼ, ŋ́kɔ́ʼ ŋgʉ̄ɔ mé lephū, á le nɔ̄ŋ ŋkuʼɔ, Yɛɛ́so á ŋíŋ ŋiíŋ ŋ́gɛ, yí e gʉɔ á Yelósalɛm.

⁵² Ŋ́kó á mɛnzhɛ, ńtó emɔ̄ʼ epuɔ á mvhɔ, ŋ́gɛ pɔ́ egʉɔ ncūŋte ajʉʼ zīi, yí e shʉʼ eláʼ éwú. Pɔ́ gʉɔ tɛ ŋkó á alāʼ epuɔ Samalía, ńnɔŋ ncūŋtɛ,

⁵³ epuɔ alāʼ mɛ́t é júʼ á légɛ, Yɛɛ́so a á mɛnzhɛ ŋgʉ̄ɔ mé Yelósalɛm, ńdʉ̄ʼ á lekɔ̄kne á yí alāʼ pɔ́p

⁵⁴ Mɛ́ shʉʼ eshúŋ á Yɛɛ́so pɔ́ nnɔ yí. Jáak pɔ́ Jáaŋ é júʼ épúp, ńzɛ́tte á Yɛɛ́so ŋ́gɛ: «Mɔʼɔ́ wek, o ó véŋ ŋ́gɛ, pek etswī, mmók e efhó á athʉ́ ésóʼo, ḿbú mbík epuɔ puɔ mɛ́t e?»

⁵⁵ Yɛɛ́so á pekne nnɛ̄t, ńcʉ́ʼɛ ncɔ́kɔ á wɔ́p cɔ́ke.

⁵⁶ Pɔ́ a nnɔ yí, é lɛ ndɔ̄k amɔ̄ʼ alāʼ ndɛʼɛ ŋgʉ̄ɔ.

Wɔ zhɛnɛ‑Yɛɛ́so é pɔŋteé á letshi menu mɔ́p nnéŋ

⁵⁷ Pɔ́ a pɔ́p é kó á mɛnzhɛ nnɔ̄ŋ nzīŋɛ, mmɔʼ ŋiŋ á shʉʼ ndé á mbū yí ŋ́gɛ: «O púu ŋgʉ̄ɔ tɛ ŋkó egɔ́ lɛ́, meŋ gɔ́ áa nzem wu. »

⁵⁸ Yɛɛ́so á pwɛt á mbū yí ŋ́gɛ: «Membapndo é wɛɛ̄ membhʉ̄ mɔ́p. Meséŋ é wɛ meŋka mɔ́p. Táʼ, Méŋ‑Ŋiŋnɔŋ wuɔ á piŋ te wɛ̄ azí ajʉʼ zīi, a gɔ enáŋ éwú ú. »

⁵⁹ Á pwɛt epúp, ŋ́kó ndé á mbū mmɔʼ ŋiŋ ŋ́gɛ: «Shʉʼɛ̄, ŋ́gɔ́ á nzem meŋ. » Ŋgaŋ á pwɛt ŋ́gɛ: «Tsɔ́ʼɔtsɔ́ʼ me Ndi, lɛ nzwíʼte meŋ eshʉʼ nzīi mvhɔ, ńtúŋ á mɔʼɔ́ ga, tɛ́ eshʉʼ ŋgɔ́ á nzem wu. »

⁶⁰ Yɛɛ́so á pwɛt á mbū yí ŋ́gɛ: «Cʉ́ʼ ā, epuɔ pīi é nzi ŋgɔ́ mepfhō, e etúŋ mepfhō pɔ́p. Ŋ́gɔ́ mé wu, mbɔ o pɔŋteé á wú, á legʉɔ mbhʉ́ ŋ́gɛ, Lefɔ Ndém é si nnɔŋ nzīi. »

⁶¹ Mmɔʼ ŋiŋ á zéŋ ndé á mbū Yɛɛ́so ŋ́gɛ: «Meŋ a gɔ́ á nzem wu me Ndi. Táʼ, ké nzwíʼte, meŋ egʉɔ ndāʼne epuɔ mba pék tɛ́ eshʉ̄ʼ. »

⁶² Yɛɛ́so á pwɛt á mbū yí ŋ́gɛ: «Ŋiŋ a kʉɛ ashū, ńnɔŋ ŋgɔ̄ á ŋghʉɛ̄ afaʼ, ḿbiŋ te athū zí éwú nnéŋ, mbɔ a ka kūʼ á leghʉ afaʼ ánɛ Lefɔ Ndém ɛ́. »