Lúkási 7 - Eka Eswhī

Yɛɛ́so a á ega mbɛ́tɛ á méŋkhʉ̄ tɛŋgyā ncu epuɔ Lóma

¹ Yɛɛ́so á mak á leshūŋ menu muɔ mɛ́t á mbū alāʼ, ŋ́gʉ̄ɔ tɛ ŋkó á tésɔŋ Kafaanawum.

² Mmɔʼ ŋge á gɔ́ éwú, ŋ́gɔ́ á tɛŋgyā ncu epuɔ Lóma, ŋ́gwɛ̄ mmɔʼ méŋkhʉ̄ yi, ŋ́kɔ̄ŋ á yí tɛʼ. Mbɔ a á gɔ tɛ ndwɛ̄t.

³ Tɛŋgyā ncu mɛ́t á júʼ páʼ mɛ́ shúŋnɛ ánɛ Yɛɛ́so, ŋ́gó emɔ̄ʼ mekém epuɔ Yúda ŋ́gɛ, pɔ́ egʉɔ mbúʼ mbū á mbū Yɛɛ́so, a eshʉʼ ŋkú á méŋkhʉ̄ yi á mbū lewhʉ̄.

⁴ Pɔ́ gʉɔ njʉ́ɔ á Yɛɛ́so, ńchʉ́ nnɛ̄t mbúʼ mbū ndé ŋ́gɛ: «Tsétsɔ̄ʼ, lɛ ŋgʉ̄ɔ ntswíte á tɛŋgyā ncu yi. A á ŋiŋ yīi, o gɔ etswíte á yí.

⁵ A kɔɔ̄ŋ alāʼ zímpɛ, mbɔ yí mé le zéŋ ŋkwɛ́t ŋgyā aswiŋte zek. »

⁶ Yɛɛ́so á lɛ ndū á esī, pɔ́ a pɔ́p é gʉɔ. Ńziŋ tɛ ncʉ́ʼ á lekō á mba, tɛŋgyā ncu mɛ́t, á tó emɔ̄ʼ mesoó pí, pɔ́ gʉɔ nzáʼ á wɔ́p á mɛnzhɛ, ńdé ŋ́gɛ, tɛŋgyā ncu a á lé ŋ́gɛ, Ndi, te zóko ŋgēnɛ nnɛ̄t ju, éshʉ̄ʼɛ á mba yí. Yí te kūʼ yīi, o gɔ ezíʼ tɛ ŋkó á ŋgyā yí í.

⁷ Melaʼ épúp tɛ́ yí méŋwɛ̄t a ka kūʼ á leziŋ mé mekhu mí, éshʉ̄ʼ njʉ́ɔ á wú ú. Táʼ, o lɛ ŋ́gɛ, méŋkhʉ̄ yi a etē, mbɔ a a te.

⁸ A á gɛ yí lʉ́ɛ́ páʼa melaʼ mīi, yí é si njúʼɔ á mbū epuɔ pīi é mvhɔ yí, ńzéŋ ŋgwɛ̄ emɔ̄ʼ memaʼ‑ncu, pɔ́ nɔŋ njúʼɔ á mbū yí. A túɔ́ mmɔʼ ŋgaŋ, á gʉɔ lɛ glɛ. Ńtswī ŋ́gɛ mmɔʼ a eshʉ̄ʼ, á shʉʼ lɛ glɛ. Ńdé á mbū méŋkhʉ̄ yi ŋ́gɛ, a eghʉ̄ azō, á ghʉ lɛ glɛ. »

⁹ Yɛɛ́so á júʼ anu jʉɔ mɛ́t, á kʉʼne á yí tɛʼ, á pekne nnɛ̄t, ńdé á mbū alāʼ zīi á nɔŋ nzhɛ̄nɛ á yí ŋ́gɛ: «Pɛ ezhɛ́ ndeŋ ndeŋ ŋ́gɛ, meŋ nda jʉ́ɔ á ŋiŋ Islaɛl, á fɛ́ nnɛ̄t ŋgyá á mbū meŋ, páʼ ŋge wuɔ la á. »

¹⁰ Mesoó tɛŋgyā ncu pīi, a á ntó á wɔ́p lā, pɔ́ piŋ nzem, ŋ́gē eshʉʼ á mba, ńjʉ́ɔ mbɔ méŋkhʉ̄ yi wɔ̄, a á cʉ́ʼ ntē.

Yɛɛ́so a á ega nzímnɛ á méŋ mpfók menzwí

¹¹ Yɛɛ́so pɔ́ a nnɔ yí, é shʉʼ nnɔ̄ŋ ŋgʉ̄ɔ mé mmɔʼ tésɔŋ, mɛ́ tɔ́ŋ lɛ Nayíin. Epuɔ tɛ nzáne é pú nnɔ̄ŋ nzhɛ̄nɛ á yí.

¹² Á gʉɔ tɛ ŋkó á nchu tésɔŋ, ńjʉ́ɔ mɛ́ nɔŋ ndɔ̄kɔ apfhō ŋiŋ, éfhɔ́ɔ á tésɔŋ ntúɔ́ ŋgʉ̄ɔ mé ntúŋɔ. Ŋiŋ wuɔ mɛ́t á lɛ ndaʼ mɔ́, á mbū mmɔʼ mpfók menzwí, ŋ́gɔ́ á mɔ́ mbaŋa. Epuɔ tésɔŋ tɛ nzáne é le pú ŋgɔ́ á nzem mía mpfhō.

¹³ Ndi Yɛɛ́so á jʉ́ɔ á yí, mezeŋɛ mí é gɔ á yí. Á lé á mbū yí ŋ́gɛ: «Te zéŋ ndā. »

¹⁴ Ńdé épúp, ńtshóte nnɛ̄t, ḿpfēŋ á akō zīi mɛ́ ndɔk ntswíʼ apfhō mɔ́ mɛ́t, epuɔ pīi, pɔ́ ŋgwɛ̄, pɔ́ tshíte á ajʉʼ. Á lé á mbū apfhō mɛ́t ŋ́gɛ: «Mɔ́ ŋgwɛso, lu á esī, meŋ ndʉ́ɛ́ mé wu. »

¹⁵ Á lɛ ndū á esī, ńzī á leshūŋne. Yɛɛ́so á tséŋne apū zí, ŋ́gyá á yí á mbū mɛ́ wɔp.

¹⁶ Epuɔ metsem é jʉ́ɔ épúp, ecɔʼ é pú ŋgɔ́ á wɔ́p. Pɔ́ pú ŋgūʼte á Ndém, ńdé ŋ́gɛ: «Mmɔʼ mía ntswi‑ŋke Ndém a á sáʼ á nnɔ pek. Ndém a á shʉʼ ntswíte alāʼ zí. »

¹⁷ Epuɔ menɔŋ é lɛ mbú ndɔ̄k anu jʉɔ mɛ́t, ésāŋ ŋgɔŋ epuɔ Yúda ntsem, tɛ mbɔɔ elāʼ tsīi, é plɛ éwú.

Meziŋ‑ntō Jáaŋ Mbaptísi

¹⁸ Nnɔ Jáaŋ é júʼ azɔ́p menu muɔ mɛ́t, ŋ́gʉɔ mbɛ́te eshúŋ á mɔʼɔ́ wɔp Jáaŋ. Á tɔ́ŋ epuɔ mémpīa á nnɔ pɔ́p.

¹⁹ Ńtó á wɔ́p ŋ́gɛ, pɔ́ egʉɔ nzɛ́tte á Yɛɛ́so ŋ́gɛ, yí mé Nzaʼ‑Ŋkhʉ yīi, a á si eshʉ̄ʼɛ lā, kɛɛ mɛ́ zɛɛ́t nzwíʼtɛ á ŋiŋ ndɛʼɛ lɛ́?

²⁰ Pɔ́ gʉɔ njʉ́ɔ á Yɛɛ́so, ńdé á mbū yí ŋ́gɛ: «Jáaŋ, nnoʼ‑epuɔ á ntshi mé tó á wék, ŋ́gɛ pek eshʉʼ nzɛ́tte ŋ́gɛ, wu mé Nzaʼ‑Ŋkhʉ yīi, a á si eshʉ̄ʼɛ lā, kɛɛ mɛ́ zɛɛ́t nzwíʼtɛ eyi ndɛʼɛ lɛ́?»

²¹ Pɔ́ tswi ŋke mɛ́t tɛ é mi, Yɛɛ́so á nɔŋ ŋghʉ̄ɛ, megaŋ agɔ mbɔɔ megaŋ alɔʼ, é tʉɛ. Ńnɔŋ njūŋɔ mesī ánɛ epuɔ, ńnɔŋ ŋghʉ̄ɛ wɔ efʉʉ́‑menēk tɛ nzáa, é jʉ́ɔ ejʉʼ.

²² Afʉʼ á kuʼ, Yɛɛ́so á pwɛt á mbū epuɔ pīi, Jáaŋ a á ntó á wɔ́p ŋ́gɛ: «Pɛ epīŋ nzem, ḿbɛ́te eshúŋ á Jáaŋ ajū mīi, pɛ é lɔk menēk mɛ́ njʉ́ɔ, ńzéŋ eshúŋ á yí, ajū mīi pɛ é lɔk metuúŋ mɛ́ njúʼ. Wɔ efʉʉ́‑menēk é si njʉ́ɔ ejʉʼ, meŋkeluʼ é nɔŋ ndūu á esī nzīŋɛ, megaŋ kaʼpáp é nɔŋ ntʉ̄ɛ̄, ḿbīŋɛ á nnɔ, wɔ etsɛɛ́t‑metuúŋ é nɔŋ njúʼɔ ejʉʼ, mepfhō epuɔ é nɔŋ nzímɛ. Mɛ́ nɔŋ ntswīi ŋke mbɔŋ, á mbū wɔ te kuʼ ánɛ azō.

²³ Eshhʉ̄ mbɔŋ a á si ŋgɔ́ á ŋiŋ yīi, a á véŋ á gá té miʼte. »

²⁴ Epuɔ pīi Jáaŋ a á ntó á wɔ́p, é le pīŋ nzem, Yɛɛ́so á cʉ́ʼ eshúŋne ánɛ Jáaŋ á mbū alāʼ ŋ́gɛ: «Pɛ ekímte páʼ pɛ lɛɛ́ te ŋgʉ̄ɔ á késáatswɛt, á njʉ́ɔ ŋiŋ yīi, a á páʼ taʼ akekaʼa yīi, fefwɛt a á si ncʉ̄ʼnɛ ɛ́. Ŋgáŋ, pɛ lɛɛ́ ŋgʉɔ á njʉ́ɔ á kwaʼ Jáaŋ yí méŋwɛ̄t.

²⁵ Pɛ le jʉ́ɔ á gɔ́ páʼ lā? Pɛ le jʉ́ɔ á maʼ menzhó ŋkāp lɛ́? Epuɔ pīi pɔ́ maāʼ menzhó ŋkāp, é nɔɔ̄ŋ te mbúŋɔ amɔ̄ʼ azō ɔ́. Mɛ́ gɛ njʉ́ɔ á wɔ́p áa ánɛ meŋgyā mefɔ.

²⁶ Pɛ lɛɛ́ ŋgʉɔ éwú, á njʉ́ɔ Jáaŋ, á taʼ ntswi‑ŋke Ndém. Á épúp, meŋ chʉ́ɛ nnɛ̄t eshúŋɔ á wɛ́, a zeéŋ efáŋ ntɔ́k mbɔɔ ntswi‑ŋke Ndém mɛ́t.

²⁷ Mɛ́ é si nzhɛ́ɛ épúp, melaʼ mīi, a á ŋiŋ wɔ̄ yīi, Ndém a le lé ánɛ lezēŋ tsí, á ntē aŋwaʼne yí ŋ́gɛ: “Meŋ a shʉʼ etó á ntswi‑ŋke ga, a epīk á mvhɔ wu, ńcūŋte á mɛnzhɛ, tɛ́ o ezīŋ éwú eshʉ̄ʼ.”

²⁸ «Pɛ ezhɛ́ á mbɔŋɔ́ ŋ́gɛ, á shʉʉ̄ʼ ánɛ epuɔ metsem pīi, é ndo esī atsetsáʼ tɛ ntshí ayáʼa, mmɔʼ ŋiŋ yīi, anu zí á faáŋ ntɔ́k azi Jáaŋ, a te éwú ú. Táʼ, méŋ agáʼ ŋiŋ yīi, a á ndáʼ nzī á lejūʼ á mbɔŋɔ́ ánɛ Lefɔ Ndém tsīi, é zii tsetsɔŋɔ lā, a tɔɔ́k á Jáaŋ.

²⁹ Epuɔ é le zwiʼté anu Jáaŋ, epuɔ tɛ nzáne é júʼ á mbɔŋɔ́ ŋ́gɛ, ashuŋne Ndém, ḿvéŋ ŋ́gɛ a enōʼ á wɔ́p á ntshi, tɛ mbɔɔ wɔ tswí‑ncup.

³⁰ Táʼ, epuɔ Falísia pɔ́ wɔ kɛ́ʼte‑mbé Ndém, pɔ́ le pú ndʉʼ azɔ́p anu Ndém lʉʼe, ḿbiŋ te véŋ ŋ́gɛ Jáaŋ a enōʼ á wɔ́p á ntshi ɛ́. »

³¹ Yɛɛ́so á zéŋ ndé ŋ́gɛ: «Meŋ gɔ elɔ̄ɔk akɔ̄, ḿbɛ́ efʉʼ ánɛ epuɔ ŋguʼ puɔ ɔ̄? Pɔ́ é páʼa, éswhí akɔ̄ azō ó?

³² Pɔ́ swhií ewɔŋkhʉ̄ pīi pɔ́ naŋteé á azá, emɔ̄ʼ é nɔŋ ntɔ́ŋɔ emɔ̄ʼ mé ŋghi teté, ńdʉ́ɛ́ ŋ́gɛ, pek é tɔ́ŋ ndendɔ̄ŋ ŋ́gɛ pɛ ezéŋ, pɛ te zéŋ, ḿbwɛ̄t lewhʉ̄ ŋ́gɛ pɛ elā, pɛ te lāa.

³³ Á zeéŋ ŋgɔ́ páʼ, pɛ le ghʉ̄ épúp ánɛ Jáaŋ, a le shʉ̄ʼē, ńnɔŋ te mpfɛ́tɛ azō ɔ́, ńnɔŋ te nnúu meluʼ ɔ́, pɛ ezɔ̄te á yí ŋ́gɛ, esī e lē ŋgɔ á yí.

³⁴ Méŋ‑Ŋiŋnɔŋ wuɔ a á piŋ eshʉ̄ʼ azí, ńnɔŋ mpfɛ́tɛ azō, ńnɔŋ nnúu meluʼ, pɛ ezɔ̄te á yí ŋ́gɛ: “Jʉ́ɔ á ŋiŋ wɔ̄, a á si ŋkʉ́ʼnɛ nzáa apʉp, ńzéŋɛ mbía meluʼ. Ńzéŋ ŋgɔ́ á esoó wɔ tswí‑ncup, mbɔɔ eyi emɔ̄ʼ epuɔ tepɔŋ.”

³⁵ Táʼ, mɛ́ jʉɔ́ epuɔ metsem pīi é lɔɔ̄k azhɛ̄‑anu nnáŋ, ńzhɛ́ á légɛ Ndém a á ŋgaŋ anuúnē. »

Yɛɛ́so pɔ́ ŋgaŋ mefa menzwí mbɔɔ Simɔŋ, ŋiŋ Falísia

³⁶ Amɔ̄ʼ aleʼé á kuʼ, taʼ ŋiŋ Falísia á tɔ́ŋ á Yɛɛ́so á mba yí, ŋ́gɛ a eshʉʼ mpfɛ́t azō. Yɛɛ́so á véŋ, ŋ́gʉɔ ŋkó wú, pɔ́ a pɔ́p é kɛ́tte á esī, ŋ́gyá mekhu á nzem, tɛ́ mpfɛ́t azō ánɛ mɛt alāʼ wɔp.

³⁷ Mmɔʼ menzwí a lɛ á tésɔŋ ega mɛ́t, mɛ́ nɔŋ ŋyāŋnɛ á yí ŋ́gɛ, a ziīŋ tɛʼ. Á lɛ njúʼ á leghʉ lɛ, Yɛɛ́so á mba ŋiŋ Falísia mpfɛ́tɛ azō, éfhó á mba, ŋ́gwɛ̄ mmɔʼ ntií atūʼ, mɛ́ lɔk albaatle tɛ́ ncūŋte, alamńda á gɔ́ á ntē éwú.

³⁸ Éshʉʼ ŋkó á ŋgyā, ńtshí á nzem Yɛɛ́so, ńdā, ntshi nnēk zí é nɔŋ ntsétɛ á mekhu Yɛɛ́so, á tsóʼne á esī, ńnɔŋ ndɔ̄kɔ sisia ntsɔʼ yi, ńtsíʼnɛ, ńnɔŋ ŋgɔ̄tɛ, ńdɔ̄kɔ alamńda jɔ̄, ńtswɛ́tɛ.

³⁹ Ŋiŋ Falísia yīi a á ntɔ́ŋ á Yɛɛ́so lā, á jʉ́ɔ épúp, ńdé á ntē yí ŋ́gɛ: «Ŋiŋ wuɔ a á ŋgwíʼi ŋgɔ́ á kwaʼ ntswi‑ŋke Ndém, mbɔ a á zhɛ́ ntií menzwí jʉɔ zīi, a pfeŋɛ á yí la, á ŋgaŋ atswhī tepɔŋ. »

⁴⁰ Yɛɛ́so á lɛ ntɔ́ŋ á ŋiŋ Falísia wuɔ mɛ́t ŋ́gɛ: «Simɔŋ, ḿpɔkɔ pɔɔ́ŋ ashuŋne. » Simɔŋ á pwɛt á mbū yí ŋ́gɛ: «Meŋ á si nzwíʼtɛ me Ndi. »

⁴¹ Yɛɛ́so á lɛ ndé ŋ́gɛ: «Taʼ ŋiŋ a le fū epuɔ mémpīa ŋkāp, éfū mmɔʼ ŋgaŋ ndenía ŋkhʉ táa, ḿbiŋ efū mmɔʼ ndenía megēm táa.

⁴² Ńdáʼ ŋkía kía tɛ ŋgā lɛ́, pɔ́ té kuʼ á letɔ̄ŋ njú mɛ́t ɛ́. Á pú ntsák. Á shʉʉ̄ʼ ánɛ pɔ́p mémpīa, o ó jʉ́ɔ ŋ́gɛ, awɔ́ a a tswhi ekɔŋ á yí tɛʼ ē?

⁴³ Simɔŋ á pwɛt á mbū yí ŋ́gɛ: «Meŋ á kwaŋ ŋ́gɛ a gɔ egɔ́ ŋiŋ yīi, ezi ŋkāp e é nzá lā. » Yɛɛ́so á lé á mbū yí ŋ́gɛ: «O ó shúŋ á mbɔŋɔ́. »

⁴⁴ Ńdɛ mbēkne nnɛ̄t, ńcʉ̄te á menzwí wɔ̄, ńdé á mbū Simɔŋ ŋ́gɛ: «O ó jʉ́ɔ á menzwí wuɔ ɔ? Meŋ á ndáʼ ŋkó á mba á ega, o kaá ŋgyá á gá ntshi, meŋ ndɔk esōk mekhu má á. A á piŋ ndɔ̄k ntshi nnēk zí, ésōk mekhu má, ńdɔ̄k ntsɔʼ zí, ńtsíʼne.

⁴⁵ Meŋ á shʉʼ, o te tsāʼte á gá tɛ esēŋte á gá á. A ka pīŋ nnéŋ á leseŋte mekhu má páʼ, meŋ á ndáʼ ŋkó ega á.

⁴⁶ O kaá ndɔ̄k tsɔ mevɛ̄t ntswɛ́t athū zá á, a á piŋ ndɔ̄k alamńda, ńtswɛ́t mekhu má.

⁴⁷ Melaʼ épúp tɛ́, meŋ ndʉ́ɛ́ á mbū wu ŋ́gɛ: mía mía ŋkɔŋ yīi, a á tswi ánɛ meŋ lāa, á si nnɔŋɔ ntswīi á légɛ, Ndém a á lekne tɛ nzá mefa mí. Táʼ, ŋiŋ a kwaŋa ŋ́gɛ, mefa mí mīi, Ndém a gɔ elēkne, é méŋ agáʼ, á zéŋ ŋkɔ̄ŋ á Ndém á méŋ agáʼ. »

⁴⁸ Yɛɛ́so á piŋ ndé á mbū menzwí wuɔ ŋ́gɛ: «Mefa mú é gɔ́ ndekne lekne. »

⁴⁹ Epuɔ pīi pɔ́ a pɔ́p é nnɔŋ mpfɛ́tɛ azō, pɔ́ lɛ nzwɛ́tte á tsetsɛlɛ pɔ́p, ńdé ŋ́gɛ: «Ewuɔ ŋiŋ a á páʼa, ŋ́gɔ́ azí awɔ́, tɛ ndʉ́ɛ́ ŋ́gɛ, mefa ŋiŋ é mi ī?»

⁵⁰ Yɛɛ́so á zéŋ ndé á mbū menzwí mɛ́t ŋ́gɛ: «Ziŋ nda nda, Ndém a á fók á wú ánɛ mefa mú, melaʼ mīi o ó pú efɛ́ nnɛ̄t ju, ŋ́gyá á mbū meŋ. »