Lúkási 5 - Eka Eswhī

Yɛɛ́so a á ega ŋkāŋa mvhɔ megaŋ nnɔ pí

¹ Á lɛ amɔ̄ʼ aleʼé, Yɛɛ́so á tshí á akʉŋɛ́ mmɔʼ mía ntshi, mɛ́ tɔ́ŋ lɛ Jenezalɛt. Epuɔ tɛ nzáne é shʉʼ á lezēŋ yí, ńnɔŋ ŋŋyɛ̄nɛ nzwíʼtɛ anu Ndém.

² Á jʉ́ɔ ekɛnūʼ tsɛ́pīa mé nzhó, é tshíte á akʉŋɛ́ mía ntshi. Megaŋ ekɛnūʼ mɛ́t é gɔ́ wɔ maʼ‑mesōh, mbɔ pɔ́ efhó éwú esóʼo, ńnɔŋ ncūŋtɛ mekhʉ mɔ́p.

³ Yɛɛ́so á kɔ́ʼ ŋkó á ntē amɔ̄ʼ akɛnūʼ zīi, á lɛ azi Simɔŋ, éswíŋte á Simɔŋ ŋ́gɛ, a elɔ̄k á akɛnūʼ nnáʼ ntshóte nnɛ̄t mé ntē ntshi, á náʼ ntshóte, Yɛɛ́so á náŋ á ntē éwú, ńzī á leshūŋ anu Ndém á mbū alāʼ zīi á mbú nzɛ́t ńnáŋ á akʉŋɛ́ ntshi.

⁴ Ńzíʼne á wɔ́p tɛ á mi, á lɛ ndé á mbū Simɔŋ ŋ́gɛ: «Zéŋɛ́ ntshóte á akɛnūʼ, ńdɔ̄k mé ajʉʼ leteŋ, pɛ a epuɔ pú, e emāʼ mekhʉ mɛ́ á ntshi ndɔk ŋgɔ̄ mesōh. »

⁵ Simɔŋ á pwɛt á mbū yí ŋ́gɛ: «Mɔʼɔ́ wek, pek é ndáʼ alāʼ á lemaʼ mesōh, ḿbiŋ mbú te azō gɔ. Táʼ, páʼ wu mé ké ndé lā, meŋ a maʼ mekhʉ mɛ́t á ntshi. »

⁶ Pɔ́ a epuɔ pí é lɛ mmāʼ mekhʉ á ntshi, ḿbiŋ ŋgɔ̄ atʉtʉ mesōh tɛ nnɔ̄ŋ eshūŋɔ, mekhʉ é cʉ́ʼɛ efāʼa áa lezāʼte.

⁷ Pɔ́ mɛʼte apū, ńtɔ́ŋ mmɔ̄ʼ nnɔ afaʼ wɔ́p yīi, é ŋgɔ́ ánɛ amɔ̄ʼ akɛnūʼ, ŋ́gɛ pɔ́ eshʉ̄ʼ ntswíte á wɔ́p. Pɔ́ shʉʼ efók mesōh tɛ ekɛnūʼ tsɛ́pīa é pú ndó, tɛ ncʉ́ʼɛ efāʼa á legʉɔ á ntshi.

⁸ Simɔŋ Piɛ á jʉ́ɔ anu zīi á tɔ́k, ŋ́gʉɔ ntswíʼte á mvhɔ Yɛɛ́so ŋ́gɛ: «Ndi, lɛ efhó á lezēŋ meŋ esōʼte nnɛ̄t. Meŋ á páʼa, ŋ́gɔ́ á ŋgaŋ mefa. »

⁹ Á lé épúp melaʼ mīi, á fhó ánɛ atʉtʉ mesōh zīi, Yɛɛ́so a á ghʉ pɔ́ gɔ, ecɔʼ é pú ŋgɔ̄ á wɔ́p.

¹⁰ Ńzéŋ ŋgɔ̄ nnɔ afaʼ yīi, pɔ́ é shʉʼ á ntswíte pɔ́p, á Jáak pɔ́ Jáaŋ, epɔ̄ Zebedé. Yɛɛ́so á lé á mbū Simɔŋ ŋ́gɛ: «Te zéŋ mbɔ́k, tɛ efhó tsetsɔŋɔ páʼa, o o fú epú ecʉ́ʼɛ ecúʼtɛ áa epuɔ menɔŋ. »

¹¹ Pɔ́ júʼ épúp, ńdɛ ndɔ̄k ekɛnūʼ mbīŋ nzem mé akʉŋɛ́ ntshi, ńtshí éwú, ḿbiŋ mbú ntém nzem ánɛ etsō tsɔ́p ntsem, ńtsé á nzem Yɛɛ́so.

Yɛɛ́so a á ega mbɛ́tɛ á ŋgaŋ kaʼpáp

¹² Yɛɛ́so á shʉʼ ŋgɔ́ á ntē mmɔʼ tésɔŋ, mmɔʼ ŋiŋ á gɔ́ éwú, mbɔ kaʼpáp a lē njhʉ́ á yí, á lɛ ntɔ́kne á Yɛɛ́so, ḿbáne á mvhɔ yí, ńjɔ̄k mekhu mí, ḿbúʼ mbū ndé ŋ́gɛ: «Ndi, o kuūʼ á leghʉ meŋ etēe, éyi o ó kɔŋ. »

¹³ Yɛɛ́so á lɛ nnā apū, ḿpfēŋ á yí, ńdé ŋ́gɛ: «Meŋ á kɔŋ, tʉɛ̄. » Kaʼpáp ŋiŋ wuɔ mɛ́t á lɛ mmī efʉʼ mɛ́t efʉʼ mɛ́t.

¹⁴ Yɛɛ́so á piŋ ntɔ̄ʼ á yí ŋ́gɛ: «Te pú eshúŋ anu jʉɔ mɛ́t á mbū ŋiŋ. Cʉ́ʼɛ ŋgʉ̄ɔ ntswīi nnɛ̄t ju áa mbū nnɔŋ‑epɔʼ, ḿbiŋ nnɔ̄ŋ ntií epɔʼ zīi, lepé Mɔɔ́sɛ é si nzɛ́ttɛ ŋ́gɛ, ŋgaŋ kaʼpáp a tʉɛ, á nɔŋ. O eghʉ̄ épúp, ńdɔk ntswī á légɛ, o ó te. »

¹⁵ Mɛ́ le tswiʼnē ŋghíte á Yɛɛ́so ghité, tɛ mbɔɔ páʼ a le tɔ̄ʼ á ŋiŋ mɛ́t lā. Lezēŋ tsí é saŋ ejʉʼ. Nnɔ epuɔ tɛ nzáne é náŋ eshʉ̄ʼɛ ncúʼtɛ á lezēŋ yí, ŋ́gɔ̄ á njúʼ yí, a epīŋ ŋkó ŋ́ghʉ̄ megaŋ agɔ pɔ́p e etē.

¹⁶ Yɛɛ́so á ké nnáŋa ŋgʉ̄ɔ á késáatswɛt efʉʼ metsem, éswíŋtɛ á Ndém.

Yɛɛ́so a á ega mbɛ́tɛ ŋkeluʼ

¹⁷ Á lɛ amɔ̄ʼ aleʼé, Yɛɛ́so á nɔŋ nzíʼnɛ epuɔ. Ndém á nɔŋ ŋgyáa á yí mete, á leghʉ, megaŋ agɔ é te. Emɔ̄ʼ epuɔ ánɛ nnɔ epuɔ Falísia, pɔ́ wɔ kɛ́ʼte‑mbé Ndém, é gɔ́ azɔ́p éwú, mbɔ pɔ́ mbú efhó ánɛ memba á ŋgɔŋ Ŋgaliléa pɔ́ ŋgɔŋ Yudéa mbɔɔ Yelósalɛm, mía tésɔŋ.

¹⁸ Emɔ̄ʼ epuɔ é ge eshʉʼ azɔ́p, ńdéŋne mmɔʼ ŋkeluʼ ánɛ akō, éfāʼa lelɔk á yí ŋkó á ŋgyā ńtshí, á mvhɔ Yɛɛ́so.

¹⁹ Táʼ, ḿbiŋ mbúŋ ajʉʼ zīi, pɔ́ e lɔk á yí ezápa éwú, tɛ́ ekó á ŋgyā, mélaʼ alāʼ zīi á lɛ éwú. Pɔ́ lɔk á yí ŋkɔ́ʼ mé athʉ́ ŋgyā, ŋ́ŋɛ́ʼte metásíŋge, ńdɔ̄k meŋkhʉ esóʼne á yí ánɛ lephʉ̄, ńtshí á mvhɔ Yɛɛ́so á nnɔ epuɔ.

²⁰ Yɛɛ́so á jʉ́ɔ páʼ pɔ́ é fɛ́ nnɛ̄t ŋgyá á mbū yí, ńdé á mbū ŋgaŋ agɔ ŋ́gɛ: «Esoó ga, mefa mú é gɔ́ ndekne lekne. »

²¹ Wɔ kɛ́ʼte‑mbé Ndém pɔ́ epuɔ Falísia, é júʼ, ńzwɛ́tte á ntɔ̄ŋ pɔ́p ŋ́gɛ: «Ewuɔ ŋiŋ yīi a nekɛ ajʉʼ Ndém la, a á awɔ́? Awɔ́ a gɔ elēkne mefa epuɔ, té gɔ́ áa ndaʼ Ndém m̄?»

²² Yɛɛ́so á piŋ nzhɛ́ ajū mīi, pɔ́ é si nzwɛ́ttɛ, ńtsɔ́ʼ á mbū pɔ́p ŋ́gɛ: «Pɛ é gaá ŋgwɛ̄ ejʉɔ ntií akwaŋte páʼa, á ntē pɛ ɛ̄?

²³ Meŋ á gɛ, mefa ŋiŋ wuɔ é gɔ́ ndekne lekne, á tsya á wɛ́ páʼa, ńzhɛ́ ŋ́gɛ, meŋ gɔ le kūʼ á gá letswi á mbū yí ŋ́gɛ, a elū á esī nzīŋ ɛ́ lɛ̄?

²⁴ Táʼ, meŋ á kɔŋ ŋ́gɛ pɛ ezhɛ́ á légɛ, Méŋ‑Ŋiŋnɔŋ wuɔ, a pɔŋteé á yí á lelekne mefa ŋiŋ, á ndo esī atsetsáʼ ega. » Ńdé épúp, ńdɛ ntswī á mbū ŋkeluʼ ŋ́gɛ: «Meŋ ndʉ́ɛ́ mé wu. Lu á esī, ńtswíʼ á akō jú, éswáŋ nnɛ̄t mé mba ju. »

²⁵ Ŋiŋ wuɔ mɛ́t á lɛ ndū á esī á nnɔ epuɔ, ntswíʼ akō zí, éswáŋ nnɛ̄t mé mba zi, ńziŋɛ ŋgūʼtɛ á Ndém.

²⁶ Epuɔ menɔŋ é jʉ́ɔ ajʉɔ anu mɛ́t, ḿbɔ́k tɛ ntsɔʼ zɔp é ziŋte. Á kʉʼne á wɔ́p tɛʼ, méŋ afʉʼ á kuʼ, pɔ́ piŋ ŋgūʼte á Ndém ndé ŋ́gɛ: «Pek é jʉ́ɔ á nda jʉ́ɔ anu ayáʼa. »

Yɛɛ́so a á ega ntɔ́ŋɔ á Levi

²⁷ Anu jʉɔ mɛ́t á mi, Yɛɛ́so á tó, ńnɔŋ ŋgʉ̄ɔ, ńjʉ́ɔ mmɔʼ ŋiŋ á ajʉʼ afaʼ yí, ájʉʼ zīi mɛ́ maʼa ncup alāʼ éwú, lezēŋ tsí é gɔ́ lɛ Levi, á gɔ́ á ntswi‑ncup Lóma. Yɛɛ́so á lé á mbū yí ŋ́gɛ: «Shʉʼɛ̄, ŋ́gɔ́ á nzem meŋ. »

²⁸ Levi á lɛ ndū á esī, ńtshī akʉ̄ɛ akʉ̄ɛ nnéŋ, ńtsé á nzem Yɛɛ́so.

²⁹ Levi á lu ntɔ́ŋ á mía lekāk á mba yí, ánɛ lezēŋ Yɛɛ́so. Wɔ tswí‑ncup Lóma tɛ nzáne pɔ́ a emɔ̄ʼ epuɔ pīi, mɛ́ gɛ ntónɛ á wɔ́p azɔ́p ŋ́gɛ, epuɔ tepɔŋ, mbɔɔ Yɛɛ́so é nɔŋ mbútɛ etsō mpfɛ́tɛ.

³⁰ Epuɔ Falísia pɔ́ emɔ̄ʼ wɔ kɛ́ʼte‑mbé Ndém, é jʉ́ɔ épúp, á té wɔ́p pɔŋ, pɔ́ zɛ́tte nnɔ Yɛɛ́so ŋ́gɛ: «Melāʼ akɔ̄ pɛ a wɔ tswí‑ncup Lóma, mbɔɔ emɔ̄ʼ epuɔ tepɔŋ, é ega mbútɛ etsō mpfɛ́tɛ ɛ́?»

³¹ Yɛɛ́so á lɛ ndé á mbū pɔ́p ŋ́gɛ: «Ŋiŋ a gɔ le gɔ́ ntenté, ńtsɔ́ʼ akhu mbɛt‑megɔ ɔ́, megaŋ agɔ mé tsɔɔ́ʼ akhu zí.

³² Meŋ kɛɛ́ te eshʉ̄ʼɛ á ŋgɔŋ, á efaāʼ epuɔ pīi, pɔ́ méŋwɛ̄t é si ndʉ́ɛ́ ŋ́gɛ, pɔ́ gɛ te efāa ā. Meŋ kɛɛ́ eshʉʼɛ, á efaāʼ megaŋ mefa pīi, pɔ́ é si efāʼa á lesɛnne ntē wɔ́p. »

Yɛɛ́so a á ega eshúŋɔ anu ánɛ lekɔŋ nnáŋ nzi melaʼ Ndém

³³ Pɔ́ zéŋ nzɛ́tte á Yɛɛ́so ŋ́gɛ: «Nnɔ Jáaŋ nnoʼ‑epuɔ á ntshi pɔ́ eyi epuɔ Falísia, é si efʉʼ metsem ŋkɔ̄ŋɔ nnáŋa nzi melaʼ Ndém, ńzéŋɛ eswíŋtɛ á yí. Ewú nnɔ é piŋ nnɔ̄ŋ ŋkʉ́ʼnɛ efʉʼ metsem, ḿpfɛ́tɛ, ńzéŋɛ nnúu. »

³⁴ Yɛɛ́so á yá ashuŋne lepúʼ jʉɔ á mbū pɔ́p ŋ́gɛ: «Pɛ é kwaŋ ŋ́gɛ, tɛnzwí ŋge a gɔ etɔ́ŋ lekāk alaá‑ŋgyā tsí, ŋ́kó nzɛ́t á esī nnáŋ, ŋiŋ á ghʉ tɛ́ mege é kɔŋ nnáŋ nzi i? Pɛ gɔ le épúp ghʉ.

³⁵ Táʼ, afʉʼ á shʉʼ ekuʼe, mɛ́ eshʉʼ efók á tɛnzwí ŋge, ńdɔk ŋgʉ̄ɔ, mesoó pí e ecʉ́ʼ ndúŋ, ŋ́kɔŋ nnáŋ nzi. »

³⁶ Á zéŋ ŋgyá amɔ̄ʼ ashuŋne lepúʼ á mbū pɔ́p ŋ́gɛ: «Ŋiŋ a gɔ le záʼ nzhó eswhī, ńdɔk mvhō á nzwiŋ nzhó ɔ́. A ghʉɛ épúp, mbɔ nzhó eswhī e egɔ́ ntseŋte tseŋte, lepap nzhó eswhī pɔ́ nzwiŋ nzhó, e epīŋ le júʼne.

³⁷ Pɛ ezéŋ njúʼ, ŋiŋ a gɔ le néŋ meluʼ meswhī á ntē nzwiŋ ntūʼ zīi, mɛ́ le lɔ̄k ŋgup ncūŋte ɛ́, mbɔ meluʼ meswhī é fuʼe, éghʉ nzwiŋ ntūʼ e evɛ́t, meluʼ e egʉ̄ɔ á esī, mɛ́ epú mbí.

³⁸ Á pɔŋ ŋ́gɛ mɛ́ enéŋ meluʼ meswhī, áa ntē ntūʼ eswhī.

³⁹ Ndeŋ ndeŋ épúp, ŋiŋ a gɔ le gɔ́ yīi a gɛ nnúu á nzwiŋ meluʼ, ḿbiŋ nzéŋ ŋkɔ̄ŋ meluʼ meswhī ɛ́. Mbɔ a a lé ghʉ áa lɛ, nzwiŋ meluʼ mé mbɔŋ.