Lúkási 3 - Eka Eswhī

Jáaŋ Mbaptísi á ega ntswīi ŋke Ndém

^1-2 Éshʉ̄ʼ ánɛ Jáaŋ méŋ Sakalía, á zɛ́t á késáatswɛt, Ndém á shʉʼ nnáŋ tɛ ntó á yí ŋ́gɛ, a egʉɔ ntswī ŋke. Ŋguʼ mɛ́t, mbɔ Tibɛ́ɛ ŋwɛ́t ŋgɔŋ Lóma, a á sáʼ ŋgɔŋ ŋguʼ ntsɔp táa mé legēm. Pɔ́ŋse Pilat á gɔ́ efɔ ntʉɔʼ yi, ńnɔŋ esáʼa apak ŋgɔŋ Yudéa. Elōde á nɔŋ esáʼa azí á apak ŋgɔŋ Ŋgaliléa, méŋ mɔ́ yi Fílíio á nɔŋ esáʼa epak ŋgɔŋ Itwilé pɔ́ Tlakonitíde. Lizanias á kó nnɔ̄ŋ esáʼa Abilɛne. Á zéŋ ŋgē egɔ́ afʉʼ mɛ́t, Hána pɔ́ Kayif é gɔ́ wɔ tɛŋgyā wɔ nɔŋ‑epɔʼ epuɔ Islaɛl.

³ Páʼ Ndém a á ntó á Jáaŋ lā, á gʉɔ ŋkʉ́ʼne ánɛ mekap alāʼ mīi, é eshhʉ̄ akʉŋɛ́ ntshi Juldɛŋ, ńziŋɛ ntswīi á mbū alāʼ ŋ́gɛ: «Pɛ ewáʼ atswhī tepɔŋ zɛ́, ńcʉ́ʼ meŋ enōʼ á wɛ́ á ntshi, Ndém a epiŋ ndēkne mefa mɛ́. »

⁴ Ńtswī épúp, á lɔk mbō páʼ, mɛ́ le tí á ntē aŋwaʼne Izayi ntswi‑ŋke Ndém ŋ́gɛ: «Ŋiŋ a á késáatswɛt, ńdʉ́ɛ́ mé ŋghi teté ŋ́gɛ: “Pɛ ecūŋte á mɛnzhɛ Atsyapuɔ, ésēŋte meliɛ́‑nzhɛ mí, e etshí ndeŋ ndeŋ.

⁵ Pɛ eták memía mekwɛ̄t pɔ́ mezízí, ŋ́gíŋne efūʼ, ḿbʉ́ʼte meŋɔʼɔ́‑nzhɛ, e etshí ndeŋ ndeŋ. Ŋ́gíŋne ephʉ̄, mɛnzhɛ a enɔ̄ŋ ndeŋ ndeŋ.

⁶ Púp, epuɔ metsem e eshʉʼ njʉ́ɔ páʼ, Ndém a ghʉɛ, epuɔ menɔŋ é tswɛ́tɛ.” »

⁷ Jáaŋ á tswi ŋke mɛ́t épúp, atʉtʉ epuɔ á nɔŋ eshʉ̄ʼɛ, ŋ́gɛ á enōʼ á wɔ́p á ntshi. Á lé á mbū pɔ́p ŋ́gɛ: «Pɛ pīi pɛ yikɛ, ńzīŋɛ ŋŋɛ́tte ŋɛtté páʼ menū, awɔ́ a á shúŋ á wɛ́ ŋ́gɛ, pɛ gɔ ekʉ̄ʉ ŋgʉɔ̄ʼ zīi, Ndém a gɔ̄ emaʼ á athū epuɔ, tɛ ntswɛ́t é?

⁸ Pɛ eghʉ̄ menu membɔŋ mīi é si ntswīi á légɛ, pɛ é wáʼ atswhī tepɔŋ zɛ́. Ndɛ́ʼ pɛ elɔ̄ɔk áa nchu ndaʼ, ńdé ŋ́gɛ: “Pek é ndhu Ablaham.” Meŋ shúŋɔ á wɛ́ ŋ́gɛ, Ndém a kuūʼ á lesɛt metɔ́ puɔ, ńdɔk ŋghʉ̄ nzwɛt Ablaham.

⁹ Mɛ́ ndáʼ ŋkāʼ nza, ńdɔ̄kɔ ŋgɔ̄ á ŋkʉɔ́ʼ tɛ mbɔɔ aziɛ́ athʉ́ lɛ́ zīi, á ka ntá mbɔŋ zém ɛ́. Éfhó á esī, ékʉɔ́ʼ ánɛ meŋgaŋ, étɔ á mmók. »

¹⁰ Alāʼ á júʼ épúp, ńzɛ́tte á yí ŋ́gɛ: «Tɛ pek é páʼa, épiŋ eghʉ páʼ lā?»

¹¹ Á pwɛt á mbū pɔ́p ŋ́gɛ: «Ŋiŋ yīi a wɛɛ̄ menzhó mɛ́mbīa, a eyá á taʼ á mbū ŋiŋ yīi, a te wɛ̄. Ŋiŋ yīi a wɛɛ̄ etsō lejhʉ̄, a eyá etsi ŋiŋ yīi, a naáŋ nzi. »

¹² Emɔ̄ʼ epuɔ é shʉʼ azɔ́p, ŋ́gɔ́ é wɔ tswí‑ncup, ŋ́gɛ Jáaŋ a enōʼ á wɔ́p á ntshi. Ńzɛ́tte á yí ŋ́gɛ: «Ŋkɔbé, pek ekó ŋghʉ̄ azék é lɛ akɔ̄?»

¹³ Á pwɛt ŋ́gɛ: «Pɛ etswí áa ndaʼ ajū mīi, lepé é si nzɛ́ttɛ, ńdɛ́ʼ pɛ etswīʼne. »

¹⁴ Emɔ̄ʼ wɔ lʉɔ́ʼ‑ncu, é shʉʼ azɔ́p, ńzɛ́tte á yí ŋ́gɛ: «Pek ekó ŋghʉ̄ páʼ lā azék é?» Á pwɛt ŋ́gɛ: «Ndɛ́ʼ pɛ eswɛ́t á ŋiŋ, ńtswí ajūɔ zí. Ndɛ́ʼ pɛ etshí esɔ̄ ánɛ ŋiŋ. Pɛ ezwíʼte áa ndaʼ ŋkāp afaʼ zɛ. »

¹⁵ Á le gē egɔ́ épúp, alāʼ á nɔŋ nzwíʼtɛ á Nzaʼ‑Ŋkhʉ yīi, Ndém a le laʼnēē. Awíɛ awíɛ á nɔŋ ŋkwāŋtɛ á ntē yí ŋ́gɛ, a gɔ́ amɔ̄ʼ, mbɔ Jáaŋ mé Nzaʼ‑Ŋkhʉ mɛ́t.

¹⁶ Jáaŋ á zhɛ́, ńdé á mbū epuɔ metsem ŋ́gɛ: «Meŋ wɛɛ̄ á lenoʼ pɛ á ntshi, ŋ́ké nnéŋ áa ntshi ndaʼ ánɛ pɛ. Mmɔʼ ndʉɛ á piŋ nnɔ̄ŋ eshʉ̄ʼɛ, ḿbú ntsyā á gá, tɛ meŋ mbú te kūʼ yīi, meŋ gɔ ekɛ́ʼɛ ŋkhʉ meláŋ mí í. A a shʉʼ azí páʼā, énéŋ Azwakne Ndém ánɛ epuɔ, ézéŋ enéŋ mmók ánɛ epuɔ.

¹⁷ A wɛɛ̄ á túŋ á mbū yí, ńdɔkɔ efwɔ́kɔ etsō tsí. Éfwɔ́k épúp, énéŋ etsi mbɔŋ á ŋkiŋ, épiŋ etɔ ekaŋne á ntē mmók yīi, é té láʼ epí í. »

¹⁸ Á le lé épúp, ḿbiŋ nzéŋ ŋ́gyá emɔ̄ʼ ntekné tɛ nzáne á mbū alāʼ. Á páʼa, tɛ́ Jáaŋ a le tswī ŋke mbɔŋ Ndém.

¹⁹ Ńzéŋ ŋkāk á Ŋgɔpna Elōde, melaʼ mīi a le kʉ̄ɛ Elodiade nzwí méŋ mɔ́ yi. Ńzéŋ ŋkāk á yí melaʼ emɔ̄ʼ menu tepɔŋ tɛ nzáne mīi, a le ghʉ̄ʉ̄.

²⁰ Elōde á lɛ mbú ŋgē etswiŋ, ńtswī mɛ́ gɔ á Jáaŋ, ńnéŋ á ŋgyā atʉɛ́.

Jáaŋ a á ega nnōʼo á Yɛɛ́so á ntshi

²¹ Á lɛ amɔ̄ʼ aleʼé, tɛ mɛ́ zɛ́t té néŋ á Jáaŋ á ŋgyā atʉɛ́, á noʼ alāʼ á ntshi tɛ á mi, Yɛɛ́so á shʉʼ azí, á noʼ á yí á ntshi. Yɛɛ́so á nɔŋ eswíŋtɛ á Ndém, lephū é lɛ ntsɔ́ʼɔ ntshí.

²² Azwakne Ndém á fhó éwú esóʼo, ŋ́gɔ́ páʼ akepēŋ lā, ńnáŋ ánɛ yí. Mmɔʼ ŋghi é fhó éwú ndé ŋ́gɛ: «O ó Méŋ ga, meŋ kɔ̄ɔŋ á wú tɛʼ, o ghʉʉ̄ ntē gá é gáŋte. »

Elhu ŋgyā wɔ Yɛɛ́so

²³ Yɛɛ́so a le gē ezi afaʼ zí, ŋ́gwɛ̄ ajūɔ ŋguʼ megēm ńtɛ́t. Mɛ́ kwaŋ ŋ́gɛ, a á méŋ Yosɛ́p. Yosɛ́p mɛ́t a lɛ á méŋ Eli.

²⁴ Eli á kó ŋgɔ́ á méŋ Matat, Matat á kó ŋgɔ́ á méŋ Levi, Levi á kó ŋgɔ́ méŋ Mɛlki, Mɛlki mɛ́t a lɛ á méŋ Janayi, Janayi á kó ŋgɔ́ á méŋ Yosɛ́p,

²⁵ Yosɛ́p á kó ŋgɔ́ á méŋ Matátias, Matátias á kó ŋgɔ́ á méŋ Amɔs, Amɔs á kó ŋgɔ́ azí á méŋ Nahum, Nahum á kó ŋgɔ́ á méŋ Ɛsli, Ɛsli á kó ŋgɔ́ á méŋ Nagaye.

²⁶ Nagaye á kó ŋgɔ́ á méŋ Máat, Máat á kó ŋgɔ́ á méŋ Matatias, Matatias á kó ŋgɔ́ á méŋ Semɛin, Semɛin a lɛ á méŋ Yosɛ́k, Yosɛ́k á kó ŋgɔ́ á méŋ Íóda,

²⁷ Íóda á kó ŋgɔ́ á méŋ Yohánan, Yohánan á kó ŋgɔ́ á méŋ Léza, Léza á kó ŋgɔ́ á méŋ Zolobabɛl, Zolobabɛl á kó ŋgɔ́ á méŋ Salatiɛl, Salatiɛl á kó ŋgɔ́ azí á méŋ Neli,

²⁸ Neli á kó ŋgɔ́ á méŋ Mɛlki, Mɛlki á kó ŋgɔ́ á méŋ Adi, Adi á kó ŋgɔ́ á méŋ Kozam, Kozam á kó ŋgɔ́ á méŋ Ɛlmadam, Ɛlmadam á kó ŋgɔ́ á méŋ Ɛɛ,

²⁹ Ɛɛ a lɛ á méŋ Yɛɛ́so, Yɛɛ́so á kó ŋgɔ́ á méŋ Eliɛzɛɛ, Eliɛzɛɛ á kó ŋgɔ́ á méŋ Jolim, Jolim á kó ŋgɔ́ á méŋ Matat, Matat á kó ŋgɔ́ á méŋ Levi,

³⁰ Levi á kó ŋgɔ́ á méŋ Simeɔŋ, Simeɔŋ á kó ŋgɔ́ azí á méŋ Yúda, Yúda á kó ŋgɔ́ á méŋ Yosɛ́p, Yosɛ́p á kó ŋgɔ́ á méŋ Jonam, Jonam á kó ŋgɔ́ á méŋ Eliakim,

³¹ Eliakim á kó ŋgɔ́ á méŋ Mɛlea, Mɛlea á kó ŋgɔ́ á méŋ Ména, Ména á kó ŋgɔ́ á méŋ Matáta, Matáta a lɛ á méŋ Nataŋ, Nataŋ á kó ŋgɔ́ á méŋ Ndavít,

³² Ndavít á kó ŋgɔ́ á méŋ Jɛsɛ, Jɛsɛ á kó ŋgɔ́ á méŋ Jobɛd, Jobɛd á kó ŋgɔ́ á méŋ Booz, Booz á kó ŋgɔ́ á méŋ Sála, Sála á kó ŋgɔ́ á méŋ Nashɔŋ,

³³ Nashɔŋ á kó ŋgɔ́ azí á méŋ Aminadab, Aminadab á kó ŋgɔ́ á méŋ Admin, Admin á kó ŋgɔ́ á méŋ Alni, Alni á kó ŋgɔ́ á méŋ Ɛslɔm, Ɛslɔm á kó ŋgɔ́ á méŋ Pɛlɛs, Pɛlɛs á kó ŋgɔ́ á méŋ Yúda,

³⁴ Yúda á kó ŋgɔ́ á méŋ Yakɔ́p, Yakɔ́p a lɛ á méŋ Izak, Izak á kó ŋgɔ́ á méŋ Ablaham, Ablaham á kó ŋgɔ́ á méŋ Táala, Táala á kó ŋgɔ́ á méŋ Nakɔ̄ɔ,

³⁵ Nakɔ̄ɔ á kó ŋgɔ́ á méŋ Seluk, Seluk á kó ŋgɔ́ á méŋ Lago, Lago á kó ŋgɔ́ á méŋ Falɛk, Falɛk á kó ŋgɔ́ azí á méŋ Ebɛɛ, Ebɛɛ á kó ŋgɔ́ á méŋ Sála,

³⁶ Sála á kó ŋgɔ́ á méŋ Kayínam, Kayínam á kó ŋgɔ́ á méŋ Alfasad, Alfasad á kó ŋgɔ́ á méŋ Sɛ́ɛm, Sɛ́ɛm á kó ŋgɔ́ á méŋ Noe, Noe á kó ŋgɔ́ azí á méŋ Lamɛk,

³⁷ Lamɛk á kó ŋgɔ́ á méŋ Mɛtúzala, Mɛtúzala á kó ŋgɔ́ á méŋ Enɔk, Enɔk á kó ŋgɔ́ á méŋ Yɛlɛd, Yɛlɛd á kó ŋgɔ́ á méŋ Maleliɛl, Maleliɛl á kó ŋgɔ́ á méŋ Kayínam,

³⁸ Kayínam a lɛ á méŋ Enɔs, Enɔs á kó ŋgɔ́ á méŋ Sɛ́ɛt, Sɛ́ɛt á kó ŋgɔ́ á méŋ Ádam, Ádam á kó ŋgɔ́ á méŋ Ndém.