Lúkási 21 - Eka Eswhī

Yɛɛ́so a á ega ŋgūʼtɛ ajū mīi mpfók menzwí a á lɔk nnéŋ á túŋ Ndém

¹ Yɛɛ́so a lɛ zɛ́t á Mía Ŋgyā Ndém, ńnáŋ tɛ ncʉ̄te, ńjʉ́ɔ páʼ megaŋ azō, é néŋɛ ŋkāp á ntē túŋ Ndém.

² Ńjʉ́ɔ mmɔʼ ŋgaŋ ŋgʉɔ̄ʼ mpfók menzwí, á néŋ azí mezízí ŋkāp epak pīa.

³ Á lé ŋ́gɛ: «Pɛ ecʉ́ʼ meŋ eshúŋ á wɛ́, pɛ ezhɛ́ á mbɔŋɔ́ á légɛ, ŋgaŋ ŋgʉɔ̄ʼ mpfók menzwí wuɔ mé pú nnéŋ, ńtɔ́k epuɔ metsem.

⁴ Pɔ́ é zíp áa methū ŋkāp mɔ́p. Ḿbiŋ ŋgɔ́ mé mpfók wuɔ, mbɔ a á pú nnéŋ azí ajūɔ ntsem zīi, a lɔɔ̄k nnáŋ. »

Yɛɛ́so a á ega eshúŋɔ anu ánɛ ŋgʉɔ̄ʼ pɔ́ ŋgeŋge zīi, é si eshʉ̄ʼɛ

⁵ Emɔ̄ʼ epuɔ é náŋ tɛ nnɔ̄ŋ ŋgūʼɔ á Mía Ŋgyā Ndém páʼ mɛ́ le lɔ̄k mepɔŋ metɔ́ ndɔk mbɔ́, ḿbiŋ ndɔ̄k etsō levho tsīi, mɛ́ ŋgyá á mbū Ndém, tɛ́ ntswīŋ. Yɛɛ́so á lé ŋ́gɛ:

⁶ «Ecū mīi pɛ jʉ́ɔ lāa, emɔ̄ʼ meleʼé é shʉʼ ekuʼe, mɛ́ eghʉ̄, e epú ŋkēmne, tɛ tɔ́ a á le zɛ́t ánɛ mmɔʼ nzápne ɛ́. »

⁷ Pɔ́ zɛ́tte á yí ŋ́gɛ: «Mɛkwáŋ, ajʉɔ anu mɛ́t á páʼā, e láʼa etɔ́kɔ eséŋɛ́? Akɔ̄ ayiŋne a láʼ etswi á légɛ, anu jʉɔ mɛ́t á si ŋgɔ̄ á eshʉʼɛ̄ ɛ́?»

⁸ Yɛɛ́so á pwɛt ndé ŋ́gɛ: «Pɛ epá, ndɛ́ʼ pɛ ecʉ́ʼ, ŋiŋ á ghʉ, pɛ efāa nzhɛ. Epuɔ tɛ nzáne é shʉʼ elɔk lezēŋ tsá, éshʉʼ á mvhɔ pɛ, awíɛ awíɛ a enɔŋ ndʉ́ɛ́ ŋ́gɛ, yí mé Nzaʼ‑Ŋkhʉ, ŋ́gɛ, njhʉ̄ Nzaʼ‑Ŋkhʉ e é páʼa, mbɔ e é kuʼ. Ndɛ́ʼ pɛ eshʉ̄ʉʼ njúʼ nchu wɔ́p.

⁹ Pɛ shʉʼɛ nnáŋ tɛ njúʼ mɛ́ nɔ̄ŋ ŋghítɛ ncu á ntē alāʼ, ńnɔ̄ŋ ŋghítɛ ncu á tsetsɛlɛ melāʼ, ndɛ́ʼ pɛ epɔ́k. Á gɔ́ áa lɛ, ecʉɔ etsō mɛ́t, é ké eshʉʼ ezi á letɔ̄k, tɛ́ ké le ndɔ̄kɔ ŋ́gɛ, ŋgɔŋ e gɔ ezho emi í. »

¹⁰ Yɛɛ́so á zéŋ ndé á mbū pɔ́p ŋ́gɛ: «Epuɔ taʼ alāʼ e shʉʼ enáŋ tɛ epʉ́ʼɛ nnɛ̄t, égʉɔ elʉɔ́ʼ amɔ̄ʼ. Mmɔʼ efɔ a elū á esī, ńdʉɔ́ʼ mmɔʼ.

¹¹ Etsō tɛ nzáne e shʉʼ etó á ejʉʼ ejʉʼ. Atsáʼ a shʉʼ ecʉʼne mé nte mé nte, afʉɔne a ewhʉ̄ á alāʼ, megɔ ndɛte lɛte e epík epuɔ. Meŋkʉʼne anu mīi é faŋne epuɔ, pɔ́ memía meyiŋne anu, e esáʼ á lephū.

¹² Menu mɛ́t e shʉʼ ezi ge eshʉʼe, mbɔ mɛ́ é gɔ á wɛ́, ŋ́gēne á wɛ́, melaʼ mīi, pɛ é epuɔ pá, ńdɔ̄k á wɛ́ ŋgʉ̄ɔ mé ŋgyā aswiŋte, ŋ́ŋāk ntsaŋ zɛ, ḿbiŋ nnéŋ á wɛ́ á ŋgyā atʉɛ́. Éshuŋne á wɛ́, élɔk egʉɔ á mvhɔ mefɔ pɔ́ wɔ sáʼ‑ŋgɔŋ, pɔ́ eŋāk á wɛ́.

¹³ A gɔ́ épúp, ńdɔkɔ ŋkūʼɔ afʉʼ zīi, pɛ gɔ eshúŋ á wɔ́p ajū mīi, pɛ é si nzhɛ́ɛ ánɛ meŋ.

¹⁴ Pɛ enéŋ á athū pɛ, ndɛ́ʼ pɛ eté njhʉ̄ ŋkwāŋ ntií zīi, pɛ e shʉʼ ekó á ŋgyā asāʼ, élɔk elhʉ athū zɛ́.

¹⁵ Meŋ méŋwɛ̄t e shʉʼ enéŋ ashuŋne á nchu pɛ, épiŋ eyá á wɛ́ leghi, tɛ ŋgɔ́ yīi tsɔ taʼ ŋgaŋ mbo wɛ, a gɔ le zéŋ nzhɛ́ anu zīi, a gɔ elʉʼ ɛ́. A á le zéŋ nzhɛ́ azi a gɔ epwɛ̄ɛt á nchu pɛ́ ɛ́.

¹⁶ Epuɔ pɛ́ mé shʉʼ eswiŋ á wɛ́, mémɔʼɔ́ pɛ́, mémía pɛ́ pɔ́ epɔ̄ memía pɛ́ mbɔɔ mesoó pɛ́, mɛ́ eŋāk ntsaŋ zɛ, ńzwhíte emɔ̄ʼ epuɔ á nnɔ pɛ.

¹⁷ Epuɔ metsem e shʉʼ epú epa á wɛ́ melaʼ mīi, pɛ é epuɔ pá.

¹⁸ Táʼ, taʼ lenɔŋ ntsɔʼ a ké ŋgɔ́, a á le tsɔ́ʼɔ á athū pɛ, tɛ mbí í.

¹⁹ Pɛ ekāk ete, tɛ́ ndáʼ ŋgɔ́ éwú. »

Yɛɛ́so a á ega ntʉ́ɛ́ njhʉ̄ eshúŋɔ páʼ mɛ́ e shʉʼ eták á Yelósalɛm

²⁰ Yɛɛ́so á zéŋ ndé ŋ́gɛ: «Pɛ shʉʼɛ nnáŋ tɛ njʉ́ɔ wɔ lʉɔ́ʼ‑ncu, é kɛ́nne á tésɔŋ Yelósalɛm, ŋ́kyɛ́t, pɛ elɛ nzhɛ́ á légɛ, afʉʼ zīi mɛ́ gɔ á nták tésɔŋ mɛ́t, á si ŋkūʼɔ.

²¹ Afʉʼ mɛ́t a shʉʼɛ ŋkūʼ, epuɔ pīi é ŋgɔ́ á Yudéa, e kʉ mbē mé mekwɛ̄t, epuɔ pīi é ŋgɔ́ á ntē tésɔŋ, pɔ́ tó ŋkʉ̄. Epuɔ pīi pɔ́ ŋgɔ́ á atswɛt, pɔ́ le kʉ̄ mbīŋ mé tésɔŋ ɔ́.

²² Pɛ ezhɛ́ á légɛ, meleʼé mɛ́t e láʼ egɔ́ afʉʼ zīi, Ndém a á záŋ á lɔ́ŋ, ḿmāʼ ŋgʉɔ̄ʼ á Yelósalɛm, tɛ́ anu zīi mɛ́ le láʼ ntí á ntē aŋwaʼne Ndém, a elɔk mbō.

²³ Yeé ŋgʉɔ̄ʼ zīi wɔnzwí pīi, pɔ́ ŋgɔ Ndém, pɔ́ wɔ mévho é láʼa ŋgɔ̄ á njʉ́ɔ ánɛ meleʼé mɛ́t lée. Ndém a a láʼ epék enu, á mbū epuɔ alāʼ puɔ mɛ́t, émaʼ á mía ŋgʉɔ̄ʼ ánɛ pɔ́p.

²⁴ Mɛ́ e shʉʼ elɔk meŋŋí ncu, éwɛt á wɔ́p, égɔte emɔ̄ʼ elɔk eghʉ epuʼ, egapte á wɔ́p, éyá ánɛ melāʼ ntsem. Elāʼ tsīi é té á Ndém zhɛ́, e eshʉ́ʼne á Yelósalɛm, ńzīŋte ánɛ yí, tɛ azɔ́p afʉʼ a eláʼ ŋkūʼ. »

Méŋ‑Ŋiŋnɔŋ a á ega ntswīi meyiŋne mīi, e fú etó afʉʼ zīi a shʉʼɛ

²⁵ Yɛɛ́so á zéŋ ndé ŋ́gɛ: «A láʼ egɔ́ afʉʼ mɛ́t, meyiŋne e esáʼ ánɛ lezēk nu, ésáʼ ánɛ lezēk saŋ, mbɔɔ ánɛ mecɔʼ saŋ. Éshʉ̄ʼ á ndo esī atsetsáʼ, mía ntshi a epú nzwɛ̄t, ŋ́kɔ́ʼ menē menē, ńcʉ̄ʼne ejʉʼ, tɛ melāʼ e ecʉ́ʼɛ mbɔ́k pɔké.

²⁶ Epuɔ menɔŋ e shʉʼ ekwhʉ́ ecɔʼ, melaʼ mīi, pɔ́ é zhɛ́ á légɛ, lemaŋ anu e shʉʼ etó á ndo esī atsetsáʼ. Ecū mīi é pɔɔ́ŋ mbʉʼ á lephū, e ecʉ́ʼɛ ncʉ̄ʼne cʉʼne.

²⁷ Mɛ́ lɛ njʉ́ɔ, Méŋ‑Ŋiŋnɔŋ a epú ndɔ̄k á mía mía mete pɔ́ shʉ́shɔ́k, éshʉ̄ʼ á ntē alɔ.

²⁸ Afʉʼ zīi, ecʉɔ etsō mɛ́t é zi á leshʉʼ, pɛ ŋímne nnáŋ, ḿbʉ́ʼɛ menēk mɛ́, ńdɔk ncʉ̄ mvhɔ, ńzhɛ́ á légɛ, afʉʼ zīi Ndém a gɔ eshʉʼ éfók á wɛ́ á ntē ŋgʉɔ̄ʼ, á páte. »

Pɛ efhó ánɛ athʉ́ fíŋge, ńzhɛ́ afʉʼ zīi Ndém a sáʼa lefɔ

²⁹ Yɛɛ́so á zéŋ mbɛ́te ashuŋne lepúʼ jʉɔ, á mbū pɔ́p, ńdé ŋ́gɛ: «Pɛ epɛ́ efʉʼ ánɛ athʉ́ fiŋge pɔ́ emɔ̄ʼ methʉ́ mīi, mefho é gɛ ŋkhūnɛ.

³⁰ Pɛ jʉɔ́ tɛ á nɔŋ ntɔ́pɔ, pɛ lɛ nzhɛ́ á légɛ, mbeŋ é si ŋgɔ̄ á mbiŋɛ́.

³¹ Ndeŋ ndeŋ épúp, pɛ shʉʼɛ nnáŋ tɛ njʉ́ɔ menu muɔ mɛ́t, é nɔ̄ŋ ntɔ́kɔ, pɛ́ zhɛ́ á légɛ, afʉʼ á kuʼ zīi, Ndém a gɔ ezi á lesāʼ lefɔ tsí.

³² Kwaʼ anuúnē, meŋ shúŋɔ á wɛ́ ŋ́gɛ, epuɔ ŋguʼ puɔ, é té shʉʼ ekwhʉ́te metsem, té gɔ́ yīi, emuɔ menu mɛ́t é shʉʼ ɛ́.

³³ Lephū pɔ́ esī atsetsáʼ e fú epú emii, táʼ, ashuŋne zá a epú nzɛ́t áa épúp. »

Á mbɔŋ á lege enáŋ, ńnɔŋ mbípɛ

³⁴ Yɛɛ́so á zéŋ ndé ŋ́gɛ: «Pɛ epá athū zɛ́, ḿbɔ́k á wɛ́ á lekʉ̄ʼne mpfɛ́t etsō, ḿbía meluʼ, ńnéŋ ntē wɛ́ ánɛ etsō esī atsetsáʼ, ntē wɛ́ é shʉʼ nté á nzɛttɛ̄, aleʼé alāʼ mɛ́t á tɔ́kne á wɛ́, ŋ́kyɛ́t á wɛ́.

³⁵ Aleʼé mɛ́t, a ké eláʼ egɔ epuɔ menɔŋ ntsem, á ndo esī atsetsáʼ ntsem, páʼ letā tsīi, é gɔɔ azō lā.

³⁶ Ndɛ́ʼ pɛ eká, á leswīŋte Ndém efʉʼ metsem ŋ́gɛ, a eyá á wɛ́ mbʉʼ, tɛ ŋgɔ́ yīi ŋgʉɔ̄ʼ jʉɔ mɛ́t e shʉʼɛ, pɛ efhó éwú ntó, á ghʉ pɛ etshí á mvhɔ Méŋ‑Ŋiŋnɔŋ té alɔ́ʼ. »

³⁷ Á páʼa, tɛ́ Yɛɛ́so a lɛɛ́ nzíʼnɛ epuɔ á ntē Mía Ŋgyā Ndém, á táŋ‑azokó, nzém é piŋɛ eséŋɛ, á gʉɔ mé lekwɛ̄t Methʉ́ Olive, ńdáʼa.

³⁸ Njhʉ̄ é piŋɛ ndáa etsōʼ etsōʼ nzemɛ́nzēm, alāʼ ntsem á shʉʼɛ njúʼɔ ashuŋne zí, á Mía Ŋgyā Ndém.