Lúkási 2 - Eka Eswhī

Lezhī á Yɛɛ́so

¹ Á le gē egɔ́ afʉʼ mɛ́t, Ágúsi á gɔ́ ŋwɛ́t ŋgɔŋ Lóma. Á shʉʼ nnáŋ tɛ nnéŋ lepé ŋ́gɛ, mɛ́ epú esáŋ epuɔ metsem á ntē melāʼ mīi a pɔ́ŋŋ.

² Ejʉɔ mvhɔ asaŋa alāʼ, e lɛ á esī, afʉʼ zīi, a le chʉ́ á Kilinus ŋ́gɛ, a enɔ̄ŋ esáʼa á Sília.

³ Awíɛ awíɛ a le ké nnɔŋ mbīŋɛ nzem á ajʉʼ zīi, nzwɛt zɔp e le fhó éwú, tɛ́ ŋghʉ̄ɛ mɛ́ sáŋa á yí.

⁴ Páʼ Yosɛ́p a á ndhu Efɔ Ndavít lā, á lɛ ndū azí á esī á tésɔŋ Naázalɛt, á ntē Ŋgaliléa. Ŋ́gʉ̄ɔ mé Bétlehɛm, á ntē Yudéa, melaʼ mīi, á lɛ ajʉʼ zīi mɛ́ le zhí á mɔʼɔ́ wɔp Ndavít éwú.

⁵ Pɔ́ Malía amaʼ‑ephʉ zí mé le gʉ̄ɔ̄, mɛ́ ekó esáŋ á wɔ́p azɔ́p. Ŋ́gē egʉɔ épúp, á gɔ́ ŋgɔ Ndém.

^6-7 Ŋ́kó á Bétlehɛm, pɔ́ té ajʉʼ á ŋgyā mege wɛ̄ ɛ. Ŋ́gʉɔ nnáŋ á ŋgyā mena. Aleʼé zīi Malía a gʉɔ mé nzhíɛ á kuʼ. Á zhí á mɔ́ lethū yi, á gɔ́ á mɔ́ mbaŋa. Ńzémte á yí mé etsō nzhó, ńnɔ̄ŋ á yí á ntē ŋgwʉ́ŋ etsō lejhʉ̄ mena.

Cɔʼ Ndém a á phʉ́ á mɔ́ á mbū mepfɛnne‑memvhō

⁸ Á lɛ á eshhʉ̄ ajʉʼ mɛ́t, emɔ̄ʼ mepfɛnne‑memvhō é náŋ á atswɛt, ńnɔŋ ndáʼa alāʼ, ḿbípɛ memvhō mɔ́p.

⁹ Pɔ́ lɛ ŋgē ejʉ́ɔ, cɔʼ Ndém á tɔ́kne á wɔ́p. Shʉ́shɔ́k Atsyapuɔ Ndém á pú ŋkɛ̄ʼɛ á wɔ́p. Além zɔ́p á tsɔ́ʼɔ tɛʼ.

¹⁰ Tɛ́ cɔʼ Ndém á lé á mbū pɔ́p ŋ́gɛ: «Ndɛ́ʼ pɛ ezéŋ mbɔ́k, meŋ gɔ á ntswiī ŋke mbɔŋ á mbū pɛ, éyi e yá á mía lekāk á mbū alāʼ ntsem:

¹¹ á gɔ́ ŋkɔʼɔ́‑atswɛt wuɔ, á ntē tésɔŋ Efɔ Ndavít, mɛ́ zhí á Nzaʼ‑Ŋkhʉ wɛ, éyi Ndém a le laʼnēē, á gɔ́ Klísto Atsyapuɔ.

¹² Pɛ ekó egē eyiŋ á mɔ́ mɛ́t, éjʉ́ɔ á enɔ̄ŋ á ntē ŋgwʉ́ŋ etsō lejhʉ̄ mena, mbɔ mɛ́ ndɔ̄k etsō nzhó nzémte á yí. »

¹³ Cɔʼ Ndém wuɔ mɛ́t á lɛ ŋgē emake, atʉtʉ emɔ̄ʼ mecɔʼ Ndém á sóʼo ntswɛ́tte á yí. Pɔ́ a pɔ́p é yá lepɛ á mbū Ndém, ńzɔ̄p ŋ́gɛ:

¹⁴ «Awuʼte á mbū Ndém tɛ‑athʉ́‑lephū. Apwɛne zí á gɔ́ á ndo esī atsetsáʼ, á mbū epuɔ pīi, a kɔɔ̄ŋ á wɔ́p. »

Mepfɛnne‑memvhō é ega ŋgʉ̄ɔ mé Bétlehɛm

¹⁵ Mecɔ̄ʼ Ndém é náŋ tɛ ŋgē piŋ nzem mé lephū, mepfɛnne‑memvhō é cʉ́ʼ esāp tɛ ndé ŋ́gɛ: «Ḿpɛ egʉ̄ɔ á Bétlehɛm, ńjʉ́ɔ ajʉɔ anu zīi, á ntó éwú tɛ Atsyapuɔ á tswi, mɛ́ shʉʼ mbhʉ́ á yímpɛ lāa. »

¹⁶ Ńdɛ ŋŋāʼ nnɛ̄t á esī, ŋ́gákne ŋgʉ̄ɔ ŋ́kó éwú, ńjʉ́ɔ á Malía, ńjʉ́ɔ á Yosɛ́p, ńzéŋ njʉ́ɔ á mɔ́ eswī, á nɔŋ á ntē ŋgwʉ́ŋ mena.

¹⁷ Pɔ́ le jʉ́ɔ á yí épúp, ńzī á lepɛ̄te menu mīi, cɔʼ Ndém á eshúŋ á wɔ́p, ánɛ athū ewuɔ mɔ́ mɛ́t.

¹⁸ Epuɔ metsem pīi, é lɛ si mbúu njúʼɔ emuɔ menu mɛ́t, á lɛ si mbúu ntsyāa á wɔ́p tɛʼ.

¹⁹ Malía á piŋ njúʼ azí anu jʉɔ mɛ́t páʼā, éféŋ á ntē yí á mbɔŋɔ́, ńnáŋa efhʉ̄tɛ.

²⁰ Afʉʼ á kuʼ, mepfɛnne‑memvhō é ge epiŋ nzem, ńziŋɛ ŋgūʼtɛ á Ndém, ŋ́gyáa á lepɛ á mbū yí, ánɛ anu zīi pɔ́ njúʼ, pɔ́ zéŋ njʉ́ɔ, á gɔ́ ndeŋ ndeŋ páʼ, cɔʼ Ndém a á ŋghíte á wɔ́p épúp.

Mɛ́ gɔ á ntswhiī lezēŋ mɔ́ é lɛ Yɛɛ́so

²¹ Mɔ́ á kuʼ eleʼé lefaá, ŋ́gɔ́ aleʼé zīi mɛ́ gɔ̄ á ntém á yí, mɛ́ lɛ ntswhī á yí é lɛ, Yɛɛ́so, é gɔ́ lezēŋ tsīi cɔʼ Ndém a le tswīī, tɛ mɛ́ zi nzɛ́t áa te gɔ́ ŋgɔ Ndém ánɛ yí.

Mɛ́ é ega ŋgɔ̄ á ntswiī Yɛɛ́so á ntē Mía Ŋgyā Ndém

²² Afʉʼ á le náŋ tɛ ŋkūʼ, ázi mɔʼɔ́ mɔ́ pɔ́ mía mɔ́, é gɔ̄ á ŋghʉ̄ɛ anu á athū pɔ́p, páʼ lepé Mɔɔ́sɛ é zɛtteé épúp, mélaʼ mɔ́ yīi pɔ́ ke zhíī. Pɔ́ tswíʼ á mɔ́ ndɔk ŋgʉ̄ɔ mé Mía Ŋgyā Ndém á Yelósalɛm, ékó etswi á yí á mbū Ndém.

²³ Éghʉ épúp, a fhó ánɛ páʼ lepé é leé á ntē aŋwaʼne Ndém ŋ́gɛ: «Ŋiŋ a zhíɛ á mɔ́ lethū yi, á gɔ́ á mɔ́ mbaŋa, mɛ́ yá á yí á mbū Ndém. »

²⁴ Ḿbiŋ ŋgɔ́ mé leghʉ anu mɛ́t athū pɔ́p, lepé é nɔŋ ndʉ́ɛ́ ŋ́gɛ, mɛ́ eyá ekepēŋ tsɛ́pīa, ŋ́ké te epúp ɔ́, mɛ́ yá meŋgāp mɛnzhɛ mɛ́mbīa.

²⁵ Á lɛ ánɛ afʉʼ alāʼ mɛ́t, mmɔʼ ŋiŋ á gɔ́ á Yelósalɛm, lezēŋ tsí é gɔ́ e lɛ Simeɔŋ. Á gɔ́ ŋiŋ, ńjúʼ nchu Ndém, ŋ́kúʼte lepé tsí, ḿbiŋ nnɔ̄ŋ nzwíʼtɛ afʉʼ zīi, Ndém a a shʉʼ etsá mezeŋɛ epuɔ Islaɛl. Azwakne Ndém á gɔ́ á ntē yí,

²⁶ mbɔ á le lé á mbū yí ŋ́gɛ, a a láʼ ejʉ́ɔ á Nzaʼ‑Ŋkhʉ yīi, Ndém a le laʼnēē, tɛ́ ekwhʉ́.

²⁷ Aleʼé á le kūʼē, ázi Yosɛ́p pɔ́ Malía é lɔk á mɔ́ épe mé Yelósalɛm, tɛ́ ekó eghʉ ajʉɔ anu mɛ́t athū mɔ́, páʼ lepé é si nzɛ́ttɛ. Azwakne Ndém á tshóne Simeɔŋ, á gʉɔ azí mé Mía Ŋgyā Ndém.

²⁸ Ŋ́kó éwú, ńdɛ ŋgē ejʉ́ɔ á mɔ́, ńtswí á yí ŋgwɛ̄ á ntē mbū yí, ésyákne á Ndém ndé ŋ́gɛ:

²⁹ «Atsyapuɔ, á tsetsɔŋɔ páʼa, mbɔ anu zīi o le laʼnēē, á po. O kɔŋɔ, o eké ndɔ̄k á gá, meŋ méŋkhʉ̄ wu, ŋ́gʉ̄ɔ mé apwɛne,

³⁰ melaʼ mīi, menēk má é chʉ́ nnɛ̄t, ńjʉ́ɔ páʼ, o o shʉʼ eghʉ, epuɔ e etswɛ́t.

³¹ O ke tó á Nzaʼ‑Ŋkhʉ ŋ́gɛ, elāʼ ntsem e ejʉ́ɔ á yí.

³² A shʉʼɛ, ŋ́gɔ́ ŋkaʼ á mbū ŋgɔŋ ŋgɔŋ zīi, é té epuɔ Islaɛl ɛ́, pɔ́ elɔk nzhɛ́ á wú. Mɛ́ e shʉʼ ekɔ́ʼne nzwiŋ Islaɛl alāʼ jú, mélaʼ mí. »

Ŋke Simeɔŋ

³³ Mɔʼɔ́ mɔ́ pɔ́ mía mɔ́, é le júʼ menu mīi, mɛ́ shúŋɔ á athū mɔ́ wuɔ, é pú ntsyā á wɔ́p.

³⁴ Simeɔŋ á lɔ́ mbwɛ́né ánɛ pɔ́p metsem, ḿbiŋ ndé á mbū Malía mía mɔ́ mɛ́t ŋ́gɛ: «Júʼɔ́, Ndém a ke tsɔ́ʼ á mɔ́ wuɔ, tɛ́ lɔk eghʉ, epuɔ tɛ nzáne á ntē Islaɛl, e epú mbí, epi emɔ̄ʼ epuɔ tɛ nzáne, e epiŋ ntswɛ́t. A a shʉʼ egɔ́ ayiŋne zīi, á si ntswīi mefaʼ mīi, Ndém a á si ŋghʉ̄ɛ. Táʼ, epuɔ menɔŋ e eké le yí véŋ.

³⁵ Pɔ́ enɔŋ ŋghʉ̄ɛ épúp, a elɔk ŋghʉ̄, ekwaŋte tsīi, pɔ́ le féŋ á ntē pɔ́p, e etóte. Ḿbiŋ ŋgɔ́ mé wu, mía mɔ́, atsāmezeŋɛ zīi, o wɛɛ̄ ánɛ mɔ́ wuɔ, a shʉʼ eghʉ, ntē wú e ezáŋ páʼ mɛ́ é pɛ́ á puʼ esɔ̄p éwú lā. »

Ána, ntswi‑ŋke Ndém

³⁶ Á lɛ ánɛ afʉʼ alāʼ mɛ́t, mmɔʼ menzwí á gɔ́ Yelósalɛm, lezēŋ tsí é gɔ́ é lɛ Ána. Á gɔ́ azí á ntswi‑ŋke Ndém. Ńtó ánɛ ndhu Asɛ́ɛ, ŋ́gɔ́ á méŋ Fanuɛl, ḿbiŋ ŋgɔ́ mbɔ a á tswhí tɛʼ. A le lá ŋgyā, pɔ́ ndō yi é náŋ ŋguʼ esambīa, ndō yi á kwhʉ́.

³⁷ Á cʉ́ʼ nnáŋ épúp, ḿbiŋ ŋgɔ́ efʉʼ metsem, ŋ́gɔ́ á Mía Ŋgyā Ndém, ŋ́gūʼtɛ á yí. Ńnɔŋ nnáŋa nzi ánɛ lekɔŋ yi, á ntē aswiŋte, é ezokó pɔ́ etsōʼ. A le gɔ́ mbɔ a á ndáʼ ŋgwɛ̄ ŋguʼ ntsɔp lekua megēm lefaá.

³⁸ Malía pɔ́ Yosɛ́p é gɔ́ á ŋgyā Ndém épúp, á shʉʼ ntswɛ́ttɛ á wɔ́p azí afʉʼ mɛ́t, ńzī á lesyākne á Ndém, ńzéŋ eshúŋne ánɛ athū mɔ́, á mbū epuɔ metsem pīi, é le nɔ̄ŋ nzwíʼtɛ ŋ́gɛ, Ndém a eshʉʼ efók á Yelósalɛm á ntē ŋgʉɔ̄ʼ.

Mɛ́ é lɔk á Yɛɛ́so eswáŋ nnɛ̄t mé Naázalɛt

³⁹ Yosɛ́p pɔ́ Malía, é cʉ́ʼ mmāk á leghʉ menu ntsem, páʼ lepé Ndém é si nzɛ́ttɛ, ḿbīŋ nzem mé tésɔŋ wɔp á Naázalɛt, á ntē Ŋgaliléa, ńnáŋ éwú.

⁴⁰ Mɔ́ á ge etswhí, ńnɔŋ ntētɛ, ŋ́gwɛ̄ azhɛ̄‑anu tɛʼ, mɛ́ nɔŋ njʉ́ɔ páʼ apū Ndém ánɛ yí.

Yɛɛ́so a á wɛ ŋguʼ ntsɔp pīa mé legēm, ŋ́gɔ́ á Mía Ŋgyā Ndém

⁴¹ Mɔʼɔ́ Yɛɛ́so pɔ́ mɛ́ wɔp, é le wɛ̄ á mɛt á legʉɔ á Yelósalɛm ŋguʼ tsem, ńjhʉ́ lekāk Páska.

⁴² Yɛɛ́so á kuʼ ŋguʼ ntsɔp pīa mé legēm, pɔ́ fhó ánɛ mɛt mɛ́t, ńdɔ̄k á yí ŋgʉ̄ɔ azí lekāk cʉɔ mɛ́t.

⁴³ Pɔ́ kó éwú, ŋ́ghʉ̄ lekāk tɛ é mi, mɔʼɔ́ Yɛɛ́so pɔ́ mɛ́ wɔp, é ge epiŋ nzem, á cʉ́ʼ nzɛ́t á Yelósalɛm, pɔ́ piŋ nnɔ̄ŋ te nzhɛ́ɛ ɛ́.

⁴⁴ Ńnɔŋ ŋkwāŋa ŋ́gɛ, a á amɔ̄ʼ ajʉʼ, á ntē nnɔ epuɔ pīi, pɔ́ piŋɛ nzem. Ńzīŋ á taʼ aleʼé alāʼ, té jʉ́ɔ á yí, ńdɛ nzī á lefaʼ á yí á nnɔ epɔ̄ memía pɔ́p, mbɔɔ mesoó pɔ́p.

⁴⁵ Ḿbiŋ ké te yí jʉ́ɔ. Ḿbīŋ nzem mé Yelósalɛm, ńnɔŋ efāʼa á yí éwú.

⁴⁶ Njhʉ̄ é lá, á lɔk ŋgɔ́ eleʼé tɛ́t, páʼ mɛ́ ka á yí jʉ́ɔ ɔ́, pɔ́ ge eshʉʼ á Mía Ŋgyā Ndém, á náŋ éwú á nnɔ wɔ kɛ́ʼte‑mbé Ndém, ńnɔŋ njúʼɔ á wɔ́p, ḿbiŋ nzéŋ ńnɔ̄ŋ nzɛ́ttɛ á wɔ́p menu.

⁴⁷ Epuɔ pīi é lɛ si njúʼɔ á yí, á lɛ si mbúu ŋkʉ̄ʼnɛ á wɔ́p ntií leghi tsīi, mɔ́ wuɔ a á si ndɔ̄kɔ eshúŋnɛ, ḿbiŋɛ nzhɛ́ azō épúp.

⁴⁸ Mɔʼɔ́ yi pɔ́ mɛ́ wɔp, é jʉ́ɔ á yí épúp, á pú ntsyā á wɔ́p. Mɛ́ wɔp á lé á mbū yí ŋ́gɛ: «Yaāa mé méŋ ga, o ó ŋgā ŋghʉ̄ pek pú njʉ́ɔ ŋgʉɔ̄ʼ páʼa ā? Pek mɔʼɔ́ wu é efāʼ á wú tɛ ŋká, ńcʉ́ʼɛ ŋghʉ̄ áa lɛ, kɛ amɔ̄ʼ azō á ŋgɔ̄ ŋghʉ̄ á wú lɛ́ɛ?»

⁴⁹ Á tsɔ́ʼ á mbū pɔ́p ŋ́gɛ: «Melaʼ akɔ̄ pɛ faʼa á gá épúp é? Pɛ ka zhɛ́ á légɛ, meŋ mbɔŋteé á legɔ̄ ega páʼa, á ŋgyā mɔʼɔ́ ga á lɛ̄?»

⁵⁰ Á tsɔ́ʼ épúp, pɔ́ té júʼ ajū mīi a lɔkɔ ndʉ́ɛ́ ɛ́.

⁵¹ Éswáŋ nnɛ̄t mé Naázalɛt, pɔ́ a pɔ́p. Ŋ́kó éwú, ńtswiʼne njúʼ nchu mɔʼɔ́ yi pɔ́ mɛ́ wɔp, ŋ́ghʉ̄ ajū mīi mɛ́ é si nzɛ́ttɛ á yí. Menu mīi, é ke tɔ́k ánɛ mɔ́ wuɔ lā, mɛ́ wɔp á féŋ á ntē yí, ŋ́ge enáŋa efhʉ̄tɛ.

⁵² Yɛɛ́so á nɔŋ ntswīʼnɛ ntswhíɛ ánɛ mbe nnɛ̄t, mbɔɔ ánɛ azhɛ̄‑anu zí. Mɛ́ nɔŋ njʉ́ɔ páʼ, apū Ndém ánɛ yí, epuɔ metsem é zéŋ ŋgɔ́ si ŋkɔ̄ŋɔ á yí.