Lúkási 19 - Eka Eswhī

Yɛɛ́so a á ega ŋgúa á Zakio

¹ Yɛɛ́so á shʉʼ ŋkó á tésɔŋ Jeliko, ńnɔŋ ntɔ́kɔ,

² mmɔʼ ŋiŋ á gɔ́ éwú, mɛ́ tɔ́ŋ á yí é lɛ Zakio, ŋ́gɔ́ á tɛŋgyā wɔ tswí‑ncup, ŋ́gwɛ̄ ŋkāp tɛʼ.

³ Ńnɔŋ ŋkɔ̄ŋɔ á lejʉ̄ɔ ntií ŋiŋ zīi Yɛɛ́so a á eziɛ́, tɛ́ ŋké te kūʼ, melaʼ mīi, a lɛ tútúʼ ŋiŋ, alāʼ a gɔ́ si mvɛ́nɛ á yí.

⁴ Á záʼte ŋgʉ̄ɔ mé mvhɔ, ŋ́kɔ́ʼ ánɛ athʉ́, ńnáŋ éwú ŋ́gɛ Yɛɛ́so a a ge etɔ́ke, a echʉ́ nnɛ̄t njʉ́ɔ á yí.

⁵ Yɛɛ́so á ziŋ tɛ ŋkó á letseŋ athʉ́ mɛ́t, ḿbʉ́ʼɛ menēk njʉ́ɔ á yí, ńtɔ́ŋ á yí ndé ŋ́gɛ: «Zakio, gáknɛ́ esóʼo, á gɔ́ lɛ akɔ̄ lɛ́, meŋ ndáʼ á mba wu ayáʼa. »

⁶ Á lɛ ŋgákne efhó athʉ́ esóʼo, ńtswí á Yɛɛ́so mé lekāk, ńdɔ̄k mé mba zi.

⁷ Epuɔ é jʉ́ɔ páʼ Yɛɛ́so pɔ́ Zakio é si ŋgʉ̄ɔ, ńzwɛ́tte ndé ŋ́gɛ: «Ŋiŋ wɔ̄, a yi, á gʉɔ mé mba ŋiŋ tepɔŋ á ndáʼa le. »

⁸ Pɔ́ yí é gʉɔ, Zakio á kó ntshóte nnɛ̄t mé lezēŋ Yɛɛ́so, ńdé ŋ́gɛ: «Ḿba Ndi, meŋ a sáne etsō tsá ntsem nzhɛ pīa, égapte á taʼ nzhɛ á mbū wɔ te kuʼ ánɛ azō. Ŋ́gɔ́ éyi, meŋ ndé pɔpte á ŋiŋ, ńtswí ajūɔ zí, mbɔ meŋ a tsɔ́ʼ azō mɛ́t nzhɛ lekua. »

⁹ Yɛɛ́so á júʼ épúp, ńdé ŋ́gɛ: «Ndém a á ghʉ, megaŋ ŋgyā puɔ, é tswɛ́t azɔ́p ayáʼa. Anuúnē, ŋiŋ wuɔ mɛ́t, a á azí ndhu Ablaham.

¹⁰ Méŋ‑Ŋiŋnɔŋ wuɔ a lɛɛ́ eshʉʼɛ á ndo esī atsetsáʼ, ŋ́gɔ̄ á efaāʼ epuɔ pīi pɔ́ le mbí, éghʉ pɔ́ epīŋ nzem á mbū Ndém. »

Yɛɛ́so a á ega mbɛ́tɛ ashuŋne lepúʼ ánɛ efɔ pɔ́ megaŋ afaʼ pí

¹¹ Epuɔ é le zɛ́t nzwíʼtɛ anu mɛ́t, mbɔ Yɛɛ́so a á tshóte nnɛ̄t tɛ mbáte á Yelósalɛm páʼā, mɛ́ zi á lekwaŋ ŋ́gɛ, Lefɔ Ndém é si ŋgɔ̄ á nzií á ndo esī atsetsáʼ, á lɛ mbɛ́te ashuŋne lepúʼ jʉɔ,

¹² ńdé á mbū pɔ́p ŋ́gɛ: «Mmɔʼ ŋkém a lɛ éwú, éshʉʼ ŋŋāʼ nnɛ̄t nnɔŋ ŋgʉ̄ɔ mé atō, mɛ́ ekó éwú, ńchʉ́ á yí ndɔk ŋghʉ̄ á efɔ, tɛ́ a epīŋ nzem, ésáʼ alāʼ zí.

¹³ Ŋ́gē egʉɔ, ńtɔ́ŋ emɔ̄ʼ megaŋ afaʼ pí legēm, éfāʼ ŋkāp memína legēm, ŋ́gāpte á taʼ á taʼ á mbū awíɛ awíɛ ŋ́gɛ, pɔ́ ecʉ́ʼ nnɔ̄ŋ ndɔ̄kɔ ntáŋa esaá, tɛ yí eláʼ ŋkɔ́ʼ.

¹⁴ Ŋ́gʉ̄ɔ, mbɔ epuɔ alāʼ pí é nnɔŋ mbāa á yí páʼa, ńtó epuɔ á mbū efɔ atō mɛ́t. Pɔ́ gʉɔ ntswī á mbū yí ŋ́gɛ, alāʼ á ka kɔ̄ŋ ŋ́gɛ, ŋiŋ wuɔ a esáʼ á wɔ́p ɔ́.

¹⁵ Á gʉɔ épúp, mɛ́ ké ŋkó nchʉ́ á yí chʉ̄, ńdɔk ŋghʉ̄ á efɔ. Á piŋ nzem á alāʼ, ńdɛ ntɔ́ŋ megaŋ afaʼ pí pīi, a ke yá ŋkāp á mbū pɔ́p lā, ŋ́gɛ pɔ́ elɔ̄k apɛ eshʉ̄ʼ, yí ejʉ́ɔ páʼ e ke cʉ́ʼ ntó épúp.

¹⁶ Mvhɔ ŋiŋ á shʉʼ, ńdé á mbū yí ŋ́gɛ: “Mɛkwáŋ, meŋ ke cʉ́ʼ njhʉ́ memína legēm, ánɛ eyi o ke yá me meŋ lā.”

¹⁷ Á lé á mbū yí ŋ́gɛ: “Meŋ á kɔŋte á wú, o ó mbɔŋ ŋgaŋ afaʼ. Páʼ o ke wɛ̄ anuúnē á lelɔk ŋghʉ̄ mezízí menu lā, meŋ a yá mekap alāʼ legēm á mbū wu, o esáʼ.”

¹⁸ Páte á shʉʼ ndé ŋ́gɛ: “Ŋkɔbé, meŋ ke cʉ́ʼ njhʉ́ memína métáa, ánɛ eyi o ke yá me meŋ lā.”

¹⁹ Á lé á mbū ewuɔ ŋgaŋ mɛ́t ŋ́gɛ: “Meŋ a yá mekap alāʼ é tsɛ́táa á mbū wu, o esáʼ.”

²⁰ Mmɔʼ ŋgaŋ á shʉʼ ndé azí ŋ́gɛ: “Mɛnʉ́ʼ, ŋkāp ju ejʉɔ, meŋ ke lɔ̄k azō nzhó ŋkwɛ́t, éféŋ.

²¹ Meŋ ndɛɛ́ eféŋɛ páʼā, melaʼ mīi, o ó ŋgaŋ leŋīŋ tɛʼ, meŋ mbīŋ nnɔ̄ŋ mbɔ́kɔ á wú. O te gē epɛ́ azō, mbɔ o le nɔ̄ŋ ɔ́. O te gē efāʼ etsō á ŋkāʼ, mbɔ o ke jʉ́ʼ ɛ̄.”

²² Á lé á mbū yí ŋ́gɛ: “Tepɔŋ ŋgaŋ afaʼ, meŋ a lɔk ashuŋne zīi, á tó á nchu wu, tɛ́ lɔk eŋak á wú. O ke nɔ̄ŋ nzhɛ́ɛ á légɛ, meŋ á ŋgaŋ leŋīŋ tɛʼ, ŋ́gē epɛ́ azō, mbɔ meŋ ndɛ te nɔ̄ɔŋ, ŋ́gē efaʼ etsō á ŋkāʼ, mbɔ meŋ kɛ te jʉ́ʼ.

²³ O ke nɔ̄ŋ nzhɛ́ɛ épúp, o te néŋ ŋkāp za á báaŋ, meŋ ndáʼ ŋkɔ́ʼ ŋgē etswí, apɛ á zápne éwú ú, melaʼ akɔ̄?”

²⁴ Ńdɛ ndé á mbū epuɔ pīi, é ŋgɔ́ ajʉʼ mɛ́t ŋ́gɛ: “Pɛ efhó á mbū yí, ŋ́kú ŋkāp za, ŋ́gyá á mbū ŋiŋ yīi, a á njhʉ́ memína legēm.”

²⁵ Pɔ́ lʉʼ, ndé á mbū yí ŋ́gɛ: “Ndi, a á ndáʼ njhʉ́ memína legēm.”

²⁶ Á pwɛt ŋ́gɛ: “Pɛ ezhɛ́ á mbɔŋɔ́ á légɛ, mɛ́ e shʉʼ etswiʼne azō áa mbū ŋiŋ yīi, a á njhʉ́ apɛ. Ŋiŋ yīi a kaá njhʉ́ ɛ́, mɛ́ ekú mbɔɔ méŋ agáʼ yīi, a á nzi ŋgwɛ̄.

²⁷ Ḿbiŋ eshʉ̄ʼ ánɛ megaŋ mbo pá pīi, pɔ́ té si ŋkɔ̄ŋɔ ŋ́gɛ meŋ esáʼ á wɔ́p ɔ́, pɛ egɔ̄ á wɔ́p ndɔk eshʉ̄ʼ mé ega, ńzwhíte á wɔ́p á mvhɔ meŋ.”»

Yɛɛ́so a á ega ŋkúɔ́ á Yelósalɛm páʼ efɔ lā

²⁸ Yɛɛ́so á mak á leshūŋne, ńtsia ŋgɔ́ á mvhɔ, ŋ́gʉ̄ɔ mé Yelósalɛm.

²⁹ Ŋ́gʉɔ tɛ nnɔ̄ŋ mbátɛ mekap alāʼ Bɛtfajé pɔ́ Betani, émi é pateé lekwɛ̄t Methʉ́ Olive, éshʉ̄ʼ ánɛ nnɔ yí, ńtó epuɔ mémpīa.

³⁰ Ńdé á mbū pɔ́p ŋ́gɛ: «Pɛ egʉ̄ɔ ánɛ akap alāʼ zīi, á mvhɔ pɛ lēe, pɛ e gʉɔ tɛ lɛ ge ekó éwú, éjʉ́ɔ á mɔ́ njakási, a etsēŋne á esī, mbɔ ŋiŋ a laa á ndo éwú kɔ́ʼ ɔ́. Pɛ elɛ ŋkɛ́ʼɛ á yí, ńdɔk eshʉ̄ʼ.

³¹ Ŋiŋ a piŋɛ ŋkó ńzɛ́tte á wɛ́ ŋ́gɛ, pɛ kɛ́ʼɛ á yí melaʼ akɔ̄ lɛ́, pɛ etsɔ́ʼ á mbū yí ŋ́gɛ, Ndi a á si ŋkɔ̄ŋɔ á lelɔk ŋghʉ̄ azō. »

³² Megaŋ nnɔ pí mɛ́t é gʉɔ, ŋ́kó njʉ́ɔ, akʉ̄ɛ akʉ̄ɛ á gɔ́ áa páʼ Yɛɛ́so, a á ŋghíte á wɔ́p épúp.

³³ Ńdɛ nnɔ̄ŋ ŋkɛ́ʼɛ á mɔ́ njakási mɛ́t, megaŋ é zɛ́tte á wɔ́p ŋ́gɛ: «Pɛ kɛ́ʼɛ njakási jɔ̄ melaʼ akɔ̄?»

³⁴ Pɔ́ pwɛt ŋ́gɛ: «Ndi a á si ŋkɔ̄ŋɔ á lelɔk ŋghʉ̄ azō. »

³⁵ Ńdé épúp, ńdɛ ndɔ̄k á na mɛ́t, éshʉʼ ŋgyá á mbū Yɛɛ́so. Ńdɔ̄k menzhó mɔ́p nzyākne ŋkaʼte yí, ŋ́ghʉ̄ á kɔ́ʼ nnáŋ éwú,

³⁶ ńnɔŋ ndɔ̄kɔ á yí nzīŋɛ, epuɔ é nɔŋ ndɔ̄kɔ menzhó mɔ́p, ńzyāknɛ á mɛnzhɛ yīi, a gɔ etsia éwú.

³⁷ Á gʉɔ tɛ nnɔ̄ŋ mbátɛ á Yelósalɛm, ŋ́gɔ́ á ajʉʼ zīi, mɛnzhɛ a fhɔ́ɔ á ndo lekwɛ̄t Methʉ́ Olive esóʼo éwú, nnɔ yí yīi, é ŋgɔ́ tɛ nzá á nzem yí ŋŋyɛ̄nɛ, é zi á lekāk, ŋ́gyá á lepɛ mé ŋghi teté, ńdɔkɔ ŋgūʼtɛ á Ndém, melaʼ meŋkʉʼne anu mīi, pɔ́ ke jʉ́ɔ̄.

³⁸ Ŋ́gyá á lepɛ ŋ́gɛ: «Mbwɛ́né e egɔ́ á mbū efɔ yīi, a shʉʼɛ, mbɔ Ndém mé chʉ́ á yí, ńtó á mbū pek la. Á Ndém yīi a á lephū, ŋ́gɔ́ á ŋgaŋ mbwɛ́né, alāʼ a epú ŋgūʼte á yí. »

³⁹ Emɔ̄ʼ epuɔ Falísia pīi pɔ́ ŋgɔ́ azɔ́p á nnɔ alāʼ mɛ́t, é lé á mbū Yɛɛ́so ŋ́gɛ: «Ńziʼnɛ, cɔ́k epuɔ nnɔ pú, pɔ́ eláŋte. »

⁴⁰ Yɛɛ́so á pwɛt á mbū pɔ́p ŋ́gɛ: «Cʉ́ʼ meŋ ndɛ eshúŋ á wɛ́, pɔ́ zi ndáŋte, mbɔ metɔ́ e yá á lepɛ. »

Yɛɛ́so a á ega ndāa melaʼ Yelósalɛm

⁴¹ Yɛɛ́so á gʉɔ tɛ nnɔ̄ŋ ntshíɛ njʉ́ɔɔ á Yelósalɛm, mezeŋɛ tésɔŋ wuɔ mɛ́t é kó á yí, á zi á lela.

⁴² Ńdé ŋ́gɛ: «Pɛ epuɔ Yelósalɛm, a láʼa ŋgɔ́ yīi, pɛ le zhɛ́ azɛ́ ajū mīi, á gɔ eyá á wɛ́ apwɛne ayáʼa ā? Ajʉɔ anu mɛ́t á piteé á wɛ́, pɛ gɔ le jʉ́ɔ.

⁴³ Púp, amɔ̄ʼ afʉʼ á si eshʉ̄ʼɛ, ázi megaŋ mbo pɛ́ e shʉʼ epɔ́ akɛ, élɔk ekɛ́nne á wɛ́, ékyɛ́t á wɛ́ á ŋkāʼ.

⁴⁴ Ékó á tésɔŋ, épú eshʉ́ʼne á wɛ́ a epɔ̄ pɛ́. Épú ekem á tésɔŋ wɛ, tɛ tɔ́ a á le zɛ́t ánɛ mmɔʼ nzápne ɛ́. Ajʉɔ anu a etɔ́kɔ páʼa, melaʼ mīi, á le kūʼ aleʼé zīi, Ndém a shʉʼɛ mé ntswíte pɛ, pɛ ekʉ̄ŋne á yí. »

Yɛɛ́so a á ega njūŋɔ wɔ lɔk á Mía Ŋgyā Ndém ŋghʉ̄ ajʉʼ esaá

⁴⁵ Yɛɛ́so á gʉɔ, ŋ́gɔ nzíʼ ŋ́kó á Mía Ŋgyā Ndém, ńzī á lejuŋ epuɔ pīi, é ŋgɔ́ á ntē éwú ntáŋa esaá.

⁴⁶ Ŋ́gē ejuŋ á wɔ́p, ńdé ŋ́gɛ: «Ndém a le lé á ntē aŋwaʼne yí ŋ́gɛ: “Ŋgyā za e efú nnáŋa ŋgɔ́ɔ ŋgyā aswiŋte.” Pɛ pwɔ̄ é kʉʉ̄ŋ esɛt, ńdɔk ŋghʉ̄ ŋka metsɔ́ŋ. »

⁴⁷ Á fhó épúp, Yɛɛ́so á nɔŋ ntékɛ epuɔ eleʼé etsem á ntē Mía Ŋgyā Ndém. Wɔ nɔŋ‑epɔʼ epi melʉɛ, ŋ́ghʉ̄ wɔ kɛ́ʼte‑mbé Ndém, mbɔɔ epɔ̄ melʉɛ epuɔ Yúda, é nɔŋ efāʼa eshhʉ̄ yīi, pɔ́ gɔ elɔk ezwhí á yí,

⁴⁸ tɛ́ ŋké te zhɛ́ páʼ, pɔ́ gɔ eghʉ̄ʉ épúp ɔ́, melaʼ mīi, alāʼ ntsem á lɛ á lezēŋ yí efʉʼ metsem, ńchʉ́ɛ nnɛ̄t njúʼɔ anu zīi, a á si eshúŋɔ.