Lúkási 17 - Eka Eswhī

Yɛɛ́so a á ega ntékɛ nnɔ yí páʼ pɔ́ gɔ enáŋ épúp

¹ Yɛɛ́so a le lé á mbū nnɔ yí ŋ́gɛ: «Tɛ mbɔɔ eséŋɛ́ lɛ́, ajū mīi á gɔ eghʉ̄ʉ, ŋiŋ á fa nzhɛ, á gɔ le púŋ. Táʼ, ndɔ e é athū ŋiŋ yīi, a á tshóne á ŋiŋ, ńnéŋ á ntē mefa.

² A ghʉɛ épúp, tɛ mbɔɔ á mbū taʼ, á nnɔ ewɔŋkhʉ̄ puɔ, mbɔŋ á gɔ́ mbū yí, á mɛ́ legaŋ á mía mía tɔ́ á ntɔ̄ŋ yí, ḿmāʼ á yí á ntē mía ntshi, ńtɔ́k á letshi á yí néŋ, á kʉɛ ndɔ á mbū Ndém.

³ Pɛ epá nnɛ̄t zɛ, ánɛ ntií menu muɔ mɛ́t. Méŋ mɔ́ wu a faa anu á mbū wu, o egʉɔ njʉ́ɔ á yí, ńték á yí. Ŋ́gɔ́ éyi a á gɔ nnɛ̄t zi, ḿvéŋ mefa, o elēkne ŋgyá á mbū yí.

⁴ A zi ŋgē ezók á taʼ aleʼé alāʼ, éfā á mbū wu ŋgʉɔ esambīa, ḿbīŋ nnɔ̄ŋ mbīŋɛ nzem etsiɛ́ legʉɔ lɛ́, ḿvéŋɛ mefa mí, o elēkne ŋgyá á mbū yí. »

Ntií zīi nnɔ Yɛɛ́so é gɔ elɔ̄ɔk efɛ́ nnɛ̄t

⁵ Meziŋ‑ntō Yɛɛ́so é shʉʼ ndé á mbū yí ŋ́gɛ: «Lɛɛ ŋghʉ̄, pek etswiʼne efɛ́ nnɛ̄t zek, ŋ́gyá á mbū Ndém. »

⁶ Yɛɛ́so á pwɛt ŋ́gɛ: «Lefɛ̄ nnɛ̄t wɛ ŋgyá á mbū Ndém, a á ŋgwíʼe efáŋ páʼ lesa sésōk, mbɔ pɛ lʉ́ɛ́ á mbū athʉ́ jʉɔ ŋ́gɛ: “Fhó ega ntsɔ́ʼɔ mé meŋgaŋ, ŋ́gʉɔ ntshí á ntē mía ntshi.” Mbɔ a tsɔ́ʼɔ páʼ pɛ é lé épúp. »

Megaŋ nnɔ Yɛɛ́so é pɔŋteé á lechʉ̄ nnɛ̄t ŋghʉ̄ afaʼ zɔ́p

⁷ Yɛɛ́so á zéŋ ndé ŋ́gɛ: «Ḿpɛ elé ŋ́gɛ, ŋiŋ wɛ a wiɛ á ŋgaŋ afaʼ yīi, a pípɛ mena pí, kɛɛ éyi a jʉ́ʼɛ ŋgɔ̄ŋ yí lɛ́ɛ, á lɛ ŋgē ekɔ́ʼ afaʼ, wu mɔʼɔ́ afaʼ yi, o elé á mbū yí ŋ́gɛ, a egákne eshʉʼ ḿpfɛ́t azō o?

⁸ Ŋgáŋ, mbɔ mɔʼɔ́ afaʼ a a lé á mbū yí é ghʉ áa lɛ: “Cuŋte nnɛ̄t, ńdá lekʉŋ, ńdɔ̄k etsō eshʉ̄ʼ, meŋ mpfɛ́t etsá tɛ e emī, tɛ́ o epfɛ́t ecú.”

⁹ A ghʉɛ páʼ mɔʼɔ́ yi a á tswi épúp, mɔʼɔ́ yi á piŋ nzóko esyákne syákne lɛ́?

¹⁰ Á zéŋ ŋgɔ́ ndeŋ ndeŋ épúp á mbū pɛ. Pɛ ghʉɛ afaʼ zīi, mɛ́ ntswī á mbū pɛ tɛ á mī, pɛ elé azɛ́ ŋghʉ̄ áa lɛ: “Pek lɛɛ̄ ŋgɔ́ áa megaŋ afaʼ, ŋ́ghʉ̄ azék áa ajū mīi mɛ́ tswi.”»

Yɛɛ́so a á ghʉ, megaŋ kaʼpáp legēm é te, taʼ mé syákne

¹¹ Yɛɛ́so a le shʉ̄ʼ nnɔŋ nzɛ́t ŋ́gʉ̄ɔ gʉɔ mé Yelósalɛm, ńnɔŋ ntɔ́kɔ á ndhʉ alāʼ epuɔ Samalía pɔ́ epuɔ Ŋgaliléa.

¹² Pɔ́ nnɔ yí é gʉɔ tɛ nnɔ̄ŋ ŋkúɔ́ ánɛ amɔ̄ʼ akap alāʼ, megaŋ kaʼpáp legēm é jʉ́ɔ á yí, ńnɔŋ eshʉ̄ʼɛ mé lezēŋ tsí, ńtshí tɛ éwú,

¹³ ńdé mé ŋghi teté á mbū yí ŋ́gɛ: «Ndi Yɛɛ́so, tsɔ́ʼɔtsɔ́ʼ, lɛ ntsá mezeŋɛ mék. »

¹⁴ Á júʼ, ńjʉ́ɔ á wɔ́p, ńdé á mbū pɔ́p ŋ́gɛ: «Pɛ egʉɔ ntswī nnɛ̄t zɛ á mbū wɔ nɔŋ‑epɔʼ, pɔ́ etsāʼ á wɛ́ njʉ́ɔ. » Pɔ́ júʼ épúp, ńnɔŋ ŋgʉ̄ɔ, ŋ́kó á mɛnzhɛ, ńdɛ ntē.

¹⁵ Taʼ ŋiŋ á nnɔ pɔ́p á jʉ́ɔ páʼ yí é te, ḿbīŋ nzem, ńziŋɛ nzɔ̄pɔ ŋgūʼtɛ á Ndém, mé ŋghi teté.

¹⁶ Éshʉʼ tɛ ŋkó á lezēŋ Yɛɛ́so, ńtswíʼte á mvhɔ á yí, ŋ́ŋɔ́ʼne tɛ athū zí á pfeŋ esī, ésyákne á yí. Ŋiŋ wuɔ mɛ́t, a lɛ ŋiŋ Samalía.

¹⁷ Yɛɛ́so á jʉ́ɔ tɛ mbwɛ̄t ŋ́gɛ: «Meŋ á zhɛ́ ŋ́gɛ, epuɔ legēm é mbú ntē, ewuɔ ŋiŋ a piīŋ ŋgɔ́ ega páʼa, epi emɔ̄ʼ epuɔ levuʼɔ́, é gɔ́ egɔ́?

¹⁸ Ŋiŋ yīi a á kwaŋte á leshʉʼ esyákne á Ndém, a ka á nnɔ pɔ́p túɔ́, tɛ ndaʼ á ŋge wuɔ lɛ́?»

¹⁹ Ńdɛ ndé á mbū ŋiŋ wuɔ mɛ́t ŋ́gɛ: «Lu á esī, ŋ́gʉ̄ɔ mé mba ju. O ó te páʼa, melaʼ mīi o ó fɛ́ nnɛ̄t ju, ŋ́gyá á mbū meŋ. »

Yɛɛ́so a á ega eshúŋɔ páʼ leshʉʼ Méŋ‑Ŋiŋnɔŋ a a láʼ egɔ́ épúp

²⁰ Afʉʼ á kuʼ, epuɔ Falísia é shʉʼ nzɛ́tte á Yɛɛ́so ŋ́gɛ: «Ndém a a láʼ ezi á lesāʼ lefɔ tsí á ndo esī atsetsáʼ ega eséŋɛ́?» Yɛɛ́so á pwɛt á mbú pɔ́p ŋ́gɛ: «Amɔ̄ʼ ayiŋne zīi, mɛ́ é si nzwíʼtɛ, ázi, a shʉʼ etswi á légɛ, Ndém a á si nnɔ̄ŋ ŋgɔ̄ ezi á lesāʼ lefɔ tsí, á té éwú ú.

²¹ Mɛ́ té shʉʼ eghíte ŋ́gɛ, Ndém a á zi á lesāʼ lefɔ tsí ega kɛ́ egʉ ʉ́. Pɛ ezhɛ́ á mbɔŋɔ́ á légɛ, Ndém a á ndáʼ ŋgɔ́ si esáʼa lefɔ tsí á nnɔ pɛ. »

²² Á zéŋ ndé á mbū nnɔ yí ŋ́gɛ: «Emɔ̄ʼ meleʼé e shʉʼ ekuʼe, pɛ esé á wɛ́ a Méŋ‑Ŋiŋnɔŋ wuɔ á lezēŋ nzók tsɔ taʼ aleʼé alāʼ, tɛ́ afʉʼ á yí á leshʉʼ, a ké nzɛ́t té kuʼ.

²³ Meleʼé mɛ́t, mɛ́ elé á mbū pɛ ŋ́gɛ, yí wuɔ ega, kɛ yí a ayi egʉ lɛ, ndɛ́ʼ pɛ egʉ̄ɔ éwú, ndɛ́ʼ pɛ ezhɛ̄ne á wɔ́p.

²⁴ Méŋ‑Ŋiŋnɔŋ a a láʼ egē eshʉʼe, éshʉʼ áa páʼ ŋŋí mbeŋ zīi, e ŋwaŋa, ḿbú ŋkɛ̄ʼɛ lephū ntsem lā.

²⁵ Táʼ, a a zi eké eláʼ ege eshʉʼ épúp, mbɔ a ke té njhʉ̄, ńjʉ́ɔ ŋgeŋge tɛʼ, epuɔ ŋguʼ puɔ é ŋkʉŋne á yí.

²⁶ «A a láʼ ege eshʉʼe, anu zīi á le láʼ ŋghʉ̄ epuɔ, ŋguʼ Noe, a ezéŋ ŋghʉ̄.

²⁷ Epuɔ menɔŋ é lɛɛ́ nnáŋa mpfɛ́tɛ, ńnúu, ńdáa‑ŋgyā, ńtsóʼo epɔ̄ pɔ́p, tɛ ŋkó aleʼé zīi, Noe pɔ́ atseŋ ŋgyā zí, é le kó á ntē mía mɛtúa ntshi, pík‑ŋgɔŋ mbeŋ á pú ndú, ntshi é pú ŋkɔ́ʼ ńdɔ̄k mvoʼ epuɔ.

²⁸ A láʼ ezéŋ egɔ́ páʼ anu zīi, á le láʼ ŋghʉ epuɔ, ŋguʼ Lɔ́ɔt: epuɔ menɔŋ é lɛɛ́ nnáŋa, ḿpfɛ́tɛ, ńnúu, ńtáŋa esaá, ńjʉ́ʼɛ ŋgɔ̄ŋ, ŋ́kwɛ́tɛ meŋgyā.

²⁹ Tɛ ŋkó aleʼé zīi, Lɔ́ɔt pɔ́ atseŋ ŋgyā zí, é le fhó á ntē tésɔŋ Sodɔm ntó, Ndém á piŋ ŋghʉ̄, mmók meka é fhó á athʉ́, ésóʼo páʼ mbeŋ lā, ḿbú nzwhíte epuɔ tésɔŋ Sodɔm mɛ́t.

³⁰ Ndeŋ ndeŋ épúp, emuɔ menu mɛ́t, e láʼ ezéŋ etɔ́ke, aleʼé zīi Méŋ‑Ŋiŋnɔŋ a tswii lefɔ tsí.

³¹ A láʼ ekuʼ aleʼé mɛ́t, ŋ́gɔ́ éyi ŋiŋ a á ŋgɔ́ á athʉ́ ŋgyā, ntsi zí é piŋ nzɛ́t á ŋgyā, ndɛ́ʼ á piŋ nzem á ŋgyā ŋ́gɛ, yí gʉɔ mé mbíɛ́, tɛ́ kʉʉ. Ndeŋ ndeŋ épúp, ŋiŋ yīi a á ŋgɔ́ á ŋkāʼ, ndɛ́ʼ á piŋ nzem á mba.

³² Pɛ ekímte ajū mīi á le ghʉ̄ á nzwí Lɔ́ɔt.

³³ Ŋiŋ a nɔŋ ŋŋíŋɛ efāʼa á lepīp athū nnɛ̄t zí, ŋ́gɛ yí té láʼ ekwhʉ́ ɛ́, mbɔ a a ké eláʼ ekwhʉ́, épíi. Ŋiŋ a piŋɛ ŋgwáʼ athū nnɛ̄t zí, melaʼ Ndém, mbɔ a a láʼ egɔ́ éwú.

³⁴ Meŋ echʉ́ nnɛ̄t eshúŋ á wɛ́, a láʼ egɔ́ etsōʼ aleʼé mɛ́t, epuɔ mémpīa pīi pɔ́ nnɔ̄ŋ á ndo ekó ndíi, mɛ́ elɔ̄k mmɔʼ ŋgʉ̄ɔ, ḿbiŋ ntshī mmɔʼ néŋ.

³⁵ Wɔnzwí mémpīa pīi pɔ́ nnɔŋ nzéŋnɛ ŋgɔ̄ʼɔ ŋgesáŋ, mɛ́ elɔ̄k mmɔʼ ŋgʉ̄ɔ, ḿbiŋ ntshī mmɔʼ néŋ. [

³⁶ Epuɔ mémpīa pīi, pɔ́ ŋgɔ́ á ŋkāʼ efāʼa, mɛ́ elɔ̄k á taʼ ŋgʉ̄ɔ, ḿbiŋ ntshī mmɔʼ néŋ. »]

³⁷ Nnɔ Yɛɛ́so é júʼ épúp, ńzɛ́tte á yí ŋ́gɛ: «Mɔʼɔ́ wek, emuɔ menu mɛ́t e láʼ etɔ́k egɔ́?» Yɛɛ́so á pwɛt ŋ́gɛ: «A láʼ elem, membhʉ̄ e ejúʼ. »