Lúkási 13 - Eka Eswhī

Ŋiŋ a gɔ́ te atswhī zí kúmne, mbɔ a a láʼ epíi

¹ Á lɛ a efʉʼ mɛ́t, emɔ̄ʼ epuɔ é shʉʼ eshúŋ á Yɛɛ́so anu, ánɛ lewhʉ̄ emɔ̄ʼ epuɔ Ŋgaliléa. Epuɔ Ŋgaliléa mɛ́t é lɛ á ntē Mía Ŋgyā Ndém, ńnɔŋ nzwhítɛ mena, ńdɔkɔ ŋgɔ̄ á nnɔɔ̄ŋ epɔʼ á mbū Ndém. Pilat á tó mɛ́ shʉʼ éwú, ńzwhíte á wɔ́p, metshi mɔ́p é tó mbú nnūʼ emi mena pɔ́p.

² Yɛɛ́so á júʼ, ńzɛ́tte á wɔ́p ŋ́gɛ: «Pɛ é kwaŋ ŋ́gɛ, epuɔ Ŋgaliléa puɔ, é lɛɛ́ ŋkwhʉ́ɛ ejʉɔ ntií lewhʉ̄ páʼa, ńdɔkɔ ŋgɔ́ɔ memía megaŋ mefa, ńtɔ́kɔ emɔ̄ʼ epuɔ Ŋgaliléa lɛ́?

³ Ŋgáŋ, á té épúp ɔ́, á gɔ́ áa lɛ, pɛ gɔ́ te gɔ̄ nnɛ̄t zɛ, ŋ́gwáʼ atswhī tepɔŋ zɛ́ ɛ́, mbɔ pɛ e shʉʼ ezéŋ elákne azɛ́ metsem.

⁴ Pɛ ekímte anu zīi á le ghʉ̄ á ntē lepfhō Silowɛ, sisia apaʼa, a le kemnē eswɛ́t epuɔ ntsɔp lefaá mé legēm, pɛ é kwaŋ ŋ́gɛ epuɔ puɔ mɛ́t, é lɛɛ́ ŋkwhʉ́tɛ páʼā, ńdɔkɔ ŋgɔ́ɔ memía megaŋ mefa, ńtɔ́kɔ epuɔ metsem á Yelósalɛm lɛ́?

⁵ Ŋgáŋ, á té épúp ɔ́, á gɔ́ áa lɛ, pɛ gɔ te gɔ̄ nnɛ̄t zɛ, ŋ́gwáʼ atswhī tepɔŋ zɛ́ ɛ́, mbɔ pɛ e shʉʼ ezéŋ elákne azɛ́ metsem. »

Ashuŋne lepúʼ ánɛ athʉ́ fiŋge zīi, á ŋkíŋ

⁶ Yɛɛ́so á lɛ ndɔ̄k ashuŋne lepúʼ jʉɔ, ńdé á mbū pɔ́p ŋ́gɛ: «Mmɔʼ ŋiŋ a le phī athʉ́ fiŋge á ŋkāʼ methʉ́ lɛzɛŋ yí, éfú nnáŋ tɛ ŋgʉ̄ɔ éwú, ŋ́gɛ yí gʉɔ á ŋkápa, ŋ́kó te tsɔ áa atá jʉ́ɔ.

⁷ Ńdɛ ndé á mbū ŋgaŋ afaʼ ŋ́gɛ: “Á ayáʼa ŋguʼ tɛ́t, páʼ meŋ á si nzīŋɛ á ŋkāʼ ega, ńtsāʼa ntá ánɛ athʉ́ jʉɔ, meŋ nda jʉ́ɔ ɔ́. Kʉɔ́ʼɔ́, á si njhʉ́ɛ ajʉʼ atsáʼ ndémndēm.”

⁸ Á pwɛt á mbū yí ŋ́gɛ: “Ndi, tsɔ́ʼɔtsɔ́ʼ, zéŋɛ esákne ŋguʼ jʉɔ, meŋ etāʼ letseŋ, ńnéŋ ekaŋne éwú.

⁹ Ŋ́gɔ́ amɔ̄ʼ, á láʼ efʉʼ páʼa, ńzém ntá. Ŋ́gɔ́ te zém, ajɔ̄ afʉʼ, o ké ntswī meŋ ekʉɔ́ʼ.”»

Yɛɛ́so a á ega ŋghʉ̄ɛ menzwí á tʉɛ, á aleʼé aswite

¹⁰ Á lɛ amɔ̄ʼ aleʼé aswite, Yɛɛ́so á gɔ́ á ŋgyā aswiŋte nzíʼnɛ epuɔ.

¹¹ Mmɔʼ menzwí á gɔ́ éwú, mbɔ mmɔʼ esī e lē mbwɔ́ʼ ŋkaʼte yí, tɛ á ghʉ ŋguʼ ntsɔp lefaá mé legēm, páʼ a gɛ ncʉ́ʼɛ nzīŋɛ áa ŋŋɔʼne ŋɔʼné, tɛ ŋgɔ́ yīi a gɔ le pʉ́ʼɛ nnɛ̄t ntshí á ajʉʼ nzīŋ ɛ́.

¹² Yɛɛ́so á jʉ́ɔ menzwí wuɔ mɛ́t, ńtɔ́ŋ á yí, á shʉʼ, á lé á mbū yí ŋ́gɛ: «Maá, o ó ndáʼ ntē agɔ jú. »

¹³ Ŋ́gē elé épúp, ńnɔŋ nzápa mbū mí ánɛ yí. Á lɛ mbʉ́ʼɛ nnɛ̄t ntshí ajʉʼ efʉʼ mɛ́t efʉʼ mɛ́t, ńzī á lewuʼte á Ndém.

¹⁴ Ŋiŋ yīi a cʉtɛ menu á ŋgyā aswiŋte, á jʉ́ɔ páʼ Yɛɛ́so a á pɛ́t á ŋiŋ aleʼé aswite, ntɔ̄ŋ yí é fuʼ. Á cɔ́k alāʼ zīi á ŋgɔ́ á esī, ńdé ŋ́gɛ: «Meleʼé alāʼ é esī ntokó, émi mɛ́ gɔ elɔk ŋghʉ̄ afaʼ, pɛ eshʉ̄ʼ ánɛ meleʼé muɔ mɛ́t, mɛ́ epɛ́t á wɛ́. Ndɛ́ʼ ŋiŋ á zéŋ eshʉ̄ʼ ega aleʼé aswite. »

¹⁵ Ndi Yɛɛ́so á pwɛt á mbū yí, pɔ́ epuɔ pí ŋ́gɛ: «Pɛ é páʼā, ŋ́gɔ́ megaŋ ŋkɔŋ menēk. Á té kūʼ aleʼé aswite pɛ kɛ́ʼɛ mefɔŋ mɛ́ pɔ́ menjakási mɛ́, ŋ́gʉɔ ŋghʉ̄ pɔ́ nú ntshi ɛ́ kɛ?

¹⁶ Menzwí wuɔ á si ŋgɔ́ ndhu Ablaham, mbɔ Sɛ́ta a lē ŋkwɛ́t á yí mé agɔ, á jʉ́ɔ ŋgʉɔ̄ʼ ŋguʼ ntsɔp lefaá mé legēm, á ka lɛ̄ mbɔ̄ŋ ŋ́gɛ mɛ́ ekɛ́ʼɛ á yí, ánɛ agɔ mɛ́t aleʼé aswite ɛ́ lɛ̄?»

¹⁷ Yɛɛ́so á lé épúp, esē é ge ekú megaŋ mbo pí, epuɔ tɛ nzáne é piŋ nnɔ̄ŋ ŋkáka ánɛ meŋkʉʼne anu mīi, a á si ŋghʉ̄ɛ.

Yɛɛ́so a á ega ntswīi páʼ Lefɔ Ndém e ziīŋ épúp á tsetsɛlɛ epuɔ

¹⁸ Afʉʼ á kuʼ, Yɛɛ́so á zéŋ ndé ŋ́gɛ: «Lefɔ Ndém é péʼe, é swhí akɔ̄? Meŋ gɔ elɔk akɔ̄, ŋ́ghíte ajū mīi é swhí aziɛ́ ɛ́?

¹⁹ É swhií mmɔʼ ntií lesa sésōk tsīi, mmɔʼ ŋiŋ a le māʼ á ŋkāʼ yí, é shʉʼ esáʼ, ńtswhí, mbū é tó, tɛ á cʉ́ʼ páʼ athʉ́ lā, tɛ meséŋ é shʉʼ éwú mbáʼ meŋka mɔ́p. »

²⁰ Yɛɛ́so á zéŋ ndé ŋ́gɛ: «Meŋ gɔ elɔ̄ɔk akɔ̄ ŋghíte ajū mīi Lefɔ Ndém é swhí aziɛ́ ɛ́?»

²¹ Ézéŋ ŋgɔ́ páʼ levwi yīi, mmɔʼ menzwí a le kʉɔ́ʼ afalíin memía ekāŋ tsɛ́ tɛ́t, ńnéŋ éwú ndɔk esɛ̄t, ńtshí, ńzwíʼte tɛ levwi á ghʉ á kɔ́ʼ. »

Nchu ŋgyā á lelɔk ŋkó á ntē Lefɔ Ndém é swɛ́nne swɛnné

²² Yɛɛ́so a le nɔ̄ŋ ŋgʉɔ mé swɛ́t alāʼ, á Yelósalɛm, ńziŋɛ ntɔ́ktɛ ánɛ metésɔŋ pɔ́ mekap elāʼ, ŋ́gyáa ntekné á mbū epuɔ.

²³ Mmɔʼ ŋiŋ á ghʉ nzɛ́tte á yí ŋ́gɛ: «Ndi, epuɔ pīi pɔ́ e láʼ etswɛ́te, é té záne lɛ́?» Yɛɛ́so á fhó épúp, ńzī á lelē á mbū alāʼ ŋ́gɛ:

²⁴ «Pɛ ekāk ete, á letɔ̄k ánɛ nchu ajʉʼ yīi é swɛ́nne swɛnné tɛ́ ntswɛ́t. Pɛ ezhɛ́ á légɛ, epuɔ tɛ nzáne e shʉʼ enɔŋ efaʼa á letɔ̄k éwú, tɛ́ pɔ́ le mɛnzhɛ jʉ́ɔ.

²⁵ Afʉʼ a fú ekuʼe, ŋgaŋ ŋgyā á elū á esī, éfē ŋgyā. A piŋɛ ŋgē efe ŋgyā, pɛ zɛ́t á apɛ́, mbɔ pɛ e tshí éwú, énɔŋ ekwáʼtɛ nchu ŋgyā elʉ́ɛ́ gɛ: “Ndi, tsɔ́ʼ nchu ŋgyā pek ekó éwú.” A epwɛ̄t á mbū pɛ ŋ́gɛ: “Meŋ ka zhɛ́ ajʉʼ zīi, pɛ kɔ́ʼɔ éwú ú.”

²⁶ Ajɔ̄ afʉʼ, pɛ epiŋ nzī á lelhʉ athū zɛ́, ńdé ŋ́gɛ: “Ḿpɛ mé kɛ te si mbútɛ etsō mpfɛ́tɛ, ḿbiŋɛ nnúu kɛ? Wu mé kɛ té si ntɔ́ktɛ ánɛ mekap alāʼ mék, ńtékɛ epuɔ ɔ́ kɛ?”

²⁷ A ezéŋ ndé leswhī leswhī ŋ́gɛ: “Meŋ ka zhɛ́ ajʉʼ zīi, pɛ kɔ́ʼɔ éwú ú. Pɛ efhó á nchu ŋgyā meŋ ŋgʉ̄ɔ, pɛ pīi, pɛ kʉ́ʼnɛ efʉ̄ʼtɛ menu tepɔŋ.”

²⁸ Pɛ efú mbīŋ njʉ́ɔ wɔ maŋgānjʉʼ pɛ́, á Ablaham, á Izak, á Yakɔ́p, mbɔɔ emɔ̄ʼ metswi‑ŋke Ndém, pɔ́ a Ndém e enáŋ á ntē ŋgɔŋ eswhī, pɛ epiŋ ŋgɔ́ á nzem apɛ́, ńdaa mpfɛ́tɛ mesɔŋ.

²⁹ Afʉʼ mɛ́t, emɔ̄ʼ epuɔ e efhó á mbuʼ esaáʼ‑nu pɔ́ mbuʼ mbií‑nu, éfhó á mbuʼ ŋkɔŋ pɔ́ mbuʼ ntsēŋ, éshʉʼ mbú ncúʼte ńnáŋ á lezēŋ Ndém, ńjhʉ́ á mía lekāk.

³⁰ Pɛ ezhɛ́ á légɛ emɔ̄ʼ epuɔ pīi, pɔ́ é tsetsɔŋɔ, ŋ́gɔ́ mezoknzem, pɔ́ e shʉʼ ecʉ́ʼ megaŋ mvhɔ. Emɔ̄ʼ epuɔ pīi pɔ́ é megaŋ mvhɔ, e ecʉ́ʼ mezoknzem. »

Epuɔ Yelósalɛm e epá epuɔ pīi Ndém a á tó á wɔ́p

³¹ Á lɛ afʉʼ mɛ́t, emɔ̄ʼ epuɔ Falísia é shʉʼ ndé á mbū Yɛɛ́so ŋ́gɛ: «Fhó ega ŋkʉ̄ ŋgʉ̄ɔ mé ajʉʼ ndɛʼɛ, efɔ Elōde a á si efāʼa á lezwhī á wú. »

³² Á pwɛt ndé ŋ́gɛ: «Pɛ ekó ntswī á mbū ŋgaŋ mekɛ̄t wuɔ mɛ́t ŋ́gɛ, a ejúʼ á mbɔŋɔ́, meŋ á ayáʼa, ńjūŋɔ mesī ánɛ epuɔ, ŋ́ghʉ̄ɛ, megaŋ agɔ é tʉɛ, njhʉ̄ e elá, meŋ ezéŋ nzɛ́t ŋghʉ̄ɛ épúp. Ńdáʼ á páte ezɔ́, ḿmākne mefaʼ má.

³³ Táʼ, meŋ a ké egʉɔ ayáʼa, éshʉʼ ezók ezɔ́ eziŋɛ, élu á páte ezɔ́, élɔk á leziŋ ga egʉɔ mé mvhɔ, mé Yelósalɛm. Á ka pɔ̄ŋ ŋ́gɛ, mɛ́ ezwhí á ntswi‑ŋke Ndém ajʉʼ á ndɛʼɛ, té gɔ́ áa Yelósalɛm ɛ́. »

³⁴ Ḿbiŋ ndé ŋ́gɛ: «Yaāa me pɛ, epuɔ Yelósalɛm, yaāa me pɛ pīi, pɛ zwhítɛ metswi‑ŋke Ndém, ńdɔ̄kɔ metɔ́ ntémtɛ epuɔ metsem pīi, Ndém a á tó á mbū pɛ, ńzwhítɛ. Meŋ á faʼ lɛ akɔ̄ lɛ́, á lecūʼte á wɛ́ á lezēŋ meŋ, páʼ mía ŋgāp yīi, a júptɛ epɔ̄ pí á ntē mbap yí lā. Pɛ epīiŋ te véŋ.

³⁵ Pɛ eké nzhɛ́ á légɛ, Ndém a a shʉʼ ewáʼ alāʼ zɛ́ mɛ́t, tɛ a etshí efemm. Meŋ shúŋɔ á wɛ́ ŋ́gɛ, pɛ cʉʉ́ʼ á gá jʉ́ɔ ɔ́, tɛ eláʼ etshí afʉʼ zīi, pɛ é yá lepɛ ndé ŋ́gɛ: “Mbwɛ́né e egɔ́ á mbū ŋiŋ yīi, a shʉʼɛ, mbɔ Ndém mé chʉ́ á yí, ńtó á mbū pek.”»