Lúkási 12 - Eka Eswhī

Fɛ́ nnɛ̄t ŋgyá mbū Ndém, té pɔ́k epuɔ, té ŋkɔŋ menēk

¹ Yɛɛ́so a le nɔ̄ŋ nzɛ́t eshúŋne shúŋne, alāʼ á pú ŋkɔ́ʼ menɔ menɔ, ńzá, éswɛ́ne swɛ́ne, tɛ emɔ̄ʼ é gɔ́ mé leziŋ ánɛ emɔ̄ʼ. Afʉʼ á kuʼ, á tswhi ndé á mbū nnɔ yí ŋ́gɛ: «Pɛ epá á mɛt epuɔ Falísia, a á páʼ levwi lā, pɔ́ é megaŋ ŋkɔŋ menēk.

² Pɛ ezhɛ́ á légɛ, ajū mīi mɛ́ lē ndʉɔ, Ndém a gɔ le láʼ nnéŋ té ghʉ mɛ́ zhɛ́ ɛ̄. Ajū mīi mɛ́ le féŋ á ntsem, a á le láʼ nnéŋ té ghʉ mɛ́ jʉ́ɔ ɔ̄.

³ Melaʼ épúp tɛ́, pɛ lʉɔnɛ á ntē nzém, éshúŋ akɔ̄ lɛ́, mbɔ njhʉ̄ e shʉʼ elá, mɛ́ ejúʼ júʼe. Akʉ̄ɛ akʉ̄ɛ zīi, pɛ é piŋ ntsɛ́t nchu ŋgyā, ńdēmte á letuúŋ ŋiŋ, mɛ́ e shʉʼ ejúʼ tɛ mbɔɔ á ndo esaá.

⁴ «Mesoó pá, meŋ ndʉ́ɛ́ á mbū pɛ, ndɛ́ʼ pɛ epɔ́k epuɔ menɔŋ, pɔ́ zhɛɛ́ áa lezwhī ŋiŋnɔŋ, ḿbiŋ te zéŋ ŋkūʼ á leghʉ amɔ̄ʼ azō ɔ́.

⁵ Meŋ a shúŋ á wɛ́ á ŋiŋ yīi, pɛ pɔŋteé á lepɔ̄k á yí. Pɛ epɔ́k áa ndaʼ Ndém. A ghʉʉ̄ ŋiŋ a kwhʉ́, ḿbiŋ nzéŋ ŋ́kūʼ á leghʉ, ŋgaŋ á gʉɔ mé alāʼ mmók. Meŋ ndɔkɔ nchʉ́ɛ nnɛ̄t eshúŋɔ á wɛ́ ŋ́gɛ, pɛ epɔ́k áa ndaʼ Ndém.

⁶ «Pɛ é si nzhɛ́ɛ á mbɔŋɔ́ á légɛ, ŋiŋ a swiŋɛ epɔ̄ meséŋ métáa, é le azō kó. Táʼ, Ndém a te eyi wɔ́mɔʼɔ́ á nnɔ pɔ́p wáʼ.

⁷ Ḿbiŋ eshʉ̄ʼ ánɛ pɛ, mbɔ Ndém a zhɛɛ́ á wɛ́, tɛ mbú nzhɛ́ nzwiŋ menɔŋ ntsɔʼ mɛ́ ntsem. Ndɛ́ʼ pɛ ezéŋ mbɔ́k, nzwiŋ wɛ́ é teē á mbū Ndém, ńtɔ́k éyi meséŋ ntsem.

Ndɛ́ʼ ŋiŋ á lʉɔ á légɛ, yí é ŋiŋ Yɛɛ́so

⁸ «Meŋ shúŋɔ á wɛ́ ŋ́gɛ, ŋiŋ a tshíɛ á mvhɔ alāʼ, ḿvéŋ ŋ́gɛ yí é ŋiŋ ga, mbɔ a láʼ aleʼé zīi, Ndém a záʼa ntsaŋ, Méŋ‑Ŋiŋnɔŋ wuɔ, a etshí á mvhɔ mecɔʼ Ndém, ńzéŋ mvéŋ azí ŋ́gɛ, ŋgaŋ a á ŋiŋ yi.

⁹ Ḿbiŋ ŋgɔ́ mé ŋiŋ yīi, a á tshí á mvhɔ alāʼ, ḿbūŋne á gá, mbɔ meŋ a láʼ aleʼé zīi, Ndém a záʼa ntsaŋ, étshí á mvhɔ mecɔʼ Ndém, ézéŋ epuŋne á yí azá.

¹⁰ Á zéŋ ŋgɔ́ lɛ, ŋiŋ a ké nzɔ̄te á Méŋ‑Ŋiŋnɔŋ wuɔ, mbɔ Ndém á gɔ lekne emuɔ mefa mɛ́t. Táʼ, ŋiŋ a piŋɛ nzɔ̄te á Azwakne Ndém, mbɔ Ndém a gɔ le emuɔ mefa mɛ́t á mbū ŋgaŋ lēkne.

¹¹ «Pɛ ezhɛ́ á légɛ, afʉʼ a shʉʼ ekuʼe, mɛ́ egɔ̄ á wɛ́, ńdɔk ŋgʉ̄ɔ mé mvhɔ asāʼ á ntē meŋgyā aswiŋte, kɛ́ mé mvhɔ wɔ tshí‑mvhɔ ánɛ alāʼ, éswīŋ á wɛ́, pɔ́ eŋāk á wɛ́. Mɛ́ nɔŋ ndɔ̄kɔ á wɛ́ ŋgʉ̄ɔ, ndɛ́ʼ pɛ ezāp nnɛ̄t ŋ́gɛ, pɛ e kó elhʉ athū zɛ́ lɛ akɔ̄ lɛ́, kɛ́ ŋ́gɛ, pɛ e kó elé gɛ akɔ̄ lɛ́.

¹² Afʉʼ mɛ́t a shʉʼ ekuʼe, Azwakne Ndém mé etɔ́k nzem zɛ, ŋ́gyá á wɛ́ eshhʉ̄ á lelɔk mbwɛ̄t. »

Ashuŋne lepúʼ ánɛ ŋgaŋ lewūʼ yīi a á atsetseŋ

¹³ Yɛɛ́so á zɛ́t eshúŋne shúŋne, mmɔʼ ŋiŋ á tshí á nnɔ alāʼ, ńdé á mbū yí ŋ́gɛ: «Ńziʼnɛ, lɛ ntswī á mbū méŋ mɔ́ ga ŋ́gɛ, pek yí egāp atekɛ́ zīi, mɔʼɔ́ wek yí a le tsyāā. »

¹⁴ Yɛɛ́so á tsɔ́ʼ á mbū yí ŋ́gɛ: «Mbaŋa wɔ, awɔ́ a ke chʉ́ á gá, ŋ́gɛ meŋ eŋāk menu mɛ́ ɛ́? Ŋ́gɛ meŋ egāp etsō tsɛ́ ɛ́?»

¹⁵ Ḿbiŋ ndé á mbū epuɔ metsem ŋ́gɛ: «Ndɛ́ʼ pɛ etshí ntē wɛ́, áa ánɛ ntií ntiī memɛnzhɛ á lelɔk efāʼ lewūʼ. Ŋiŋ yí méŋwɛ̄t a te nnɛ̄t zi pɔ́ŋ, tɛ a zi mbú mbɔ́ŋ áa lewūʼ á ndo esī atsetsáʼ. »

¹⁶ Á lé épúp, ńdɛ ndɔ̄k ashuŋne lepúʼ jʉɔ, éshúŋ á wɔ́p ŋ́gɛ: «Mmɔʼ ŋgaŋ lewūʼ a lɛ éwú, mbɔ etsáʼ tsí é ke zém etsō á mbɔŋɔ́.

¹⁷ Á kwaŋ á ntɔ̄ŋ yí ŋ́gɛ: “Meŋ á páʼa, éghʉ páʼ lā? Meŋ te wɛ̄ ajʉʼ zīi, meŋ gɔ epú eféŋ etsō tsá éwú ú.”

¹⁸ Ŋ́kwāŋ kwaŋ tɛ ndé ŋ́gɛ: “Yééé, meŋ á zhɛ́ páʼ meŋ a ghʉ épúp. Meŋ a ták meŋkiŋ má, épuʼ emi é faŋteé, énéŋ etsō tsá cʉɔ mɛ́t éwú, tɛ epú mmī, mbɔɔ emɔ̄ʼ etsō ndɛʼɛ.

¹⁹ Afʉʼ zīi meŋ á ghʉ épúp lā, meŋ ndé mé mbe nnɛ̄t za ŋ́gɛ, náʼa nzwīte. O wɛɛ̄ etsō tɛ ŋgɔ́ yīi, o o náŋ naáŋ tɛ́ pfɛ́tɛ. Tsetsɔŋɔ wuɔ, meŋ á cʉ́ʼɛ ekák kaké, épfɛ́t azō, épiŋ ezéŋ enú.”

²⁰ A le kwaŋtē épúp, táʼ, Ndém á lé á mbū yí ŋ́gɛ: “Atsetseŋ, o te si njúʼɔ ajū mīi, o shúŋɔ ɔ́. Meŋ a kó ŋkɔʼɔ́‑atswɛt, élɔk ntē wú. Awɔ́ a epiŋ ncʉ́ʼ njhʉ́ ecū mīi, o féŋɛ lā á?”»

²¹ Yɛɛ́so á ge emakne, ńdé ŋ́gɛ: «A shʉʼ egɔ́ ndeŋ ndeŋ épúp, á mbū ŋiŋ yīi, a á si ncúʼtɛ etsō, ŋ́kɔ́ʼɔ nnɔ̄ŋɔ éwú, té ghʉ ajū mīi, Ndém á gɔ ejʉ́ɔ á yí, páʼ ŋgaŋ lewūʼ lā. »

Pɛ enéŋ ntē ánɛ Ndém, ndɛ́ʼ pɛ ezéŋ ndā nnɛ̄t

²² Yɛɛ́so á zéŋ nték nnɔ yí ŋ́gɛ: «Ndɛ́ʼ pɛ ezéŋ ndā nnɛ̄t ŋ́gɛ, pɛ e pfɛ́t akɔ̄ tɛ́ elɔk egɔ́ éwú lɛ́, ŋ́gɛ pɛ e lɔk menzhó egɔ́, tɛ́ emaʼ ánɛ pɛ lɛ́.

²³ Pɛ ezhɛ́ á mbɔŋɔ́ á légɛ, ŋiŋ á legɔ̄ éwú, mé ŋkwɛ, ńtsyā etsō lejhʉ̄. Mbe nnɛ̄t ŋiŋ, é piŋ ntshí mvhɔ, ánɛ nzhó zīi a gɔ emāaʼ.

²⁴ Pɛ epɛ́ efʉʼ ánɛ eŋiŋīá, pɔ́ té ŋgɔ̄ŋ jʉ́ʼ, pɔ́ té etsō faʼ, pɔ́ té ntaŋ wɛ̄ɛ, ńzéŋ te ŋkiŋ wɛ̄ɛ. Ndém mé piŋ nzék á wɔ́p. Nzwiŋ wɛ́ é teē á mbū Ndém, ńtɔ́k eyi meséŋ.

²⁵ Pɛ é si ndāa nnɛ̄t, ánɛ etsō ŋgɔŋ cʉɔ, tɛ́ mbiŋ ŋgɔ́ yīi, ŋiŋ a gɔ le lɔ̄k épúp, ŋ́kūʼ á yí á letswiʼne tsɔ méŋ leleŋ njhʉ̄, ánɛ lenāŋ yi, á esī atsetsáʼ á.

²⁶ Páʼ, o púu ŋgɔ́, o ó le ánɛ méŋ agáʼ ajū muɔ mɛ́t kuʼ lā, o piŋɛ nzóko nzāpa nnɛ̄t, ánɛ etsō esī atsetsáʼ, ŋ́gɛ akɔ̄?

²⁷ Pɛ ecʉ̄te páʼ mvēŋ e é ŋkāʼ, ésa mbɔ̄ŋ épúp, e te amɔ̄ʼ afaʼ ghʉ̄ʉ, e te mmɔʼ nzhó páʼ. Táʼ, meŋ shúŋɔ á wɛ́ ŋ́gɛ, mbɔɔ Efɔ Salomɔŋ a lɛ á ŋgaŋ lewūʼ ezi ntí, ḿbiŋ ndáʼ te māʼ nzhó, é pɔŋ páʼ mmɔʼ mvēŋ mɛ́t ɛ́.

²⁸ Pɛ é páʼā, ńnɔŋ te nnéŋɛ ntē ánɛ Ndém ɛ́. Ndém a tswiīŋ mvēŋ zīi e tswhií ayáʼa, njhʉ̄ lá, mɛ́ tsɔ́ʼ ntɔ̄ péʼe, tɛ ŋgʉɔ shɔ́ʼɔ́ ánɛ pɛ ɛ̄?

²⁹ Á gɔ́ áa lɛ, ndɛ́ʼ pɛ egɔ́ efʉʼ metsem, ńdā nnɛ̄t ŋ́gɛ, pɛ e pfɛ́t akɔ̄ lɛ́, ŋ́gɛ pɛ e nú akɔ̄ lɛ́.

³⁰ Wɔ te zhɛ́‑Ndém mé á esī atsetsáʼ ega, ńdā nnɛ̄t efʉʼ metsem ánɛ ntií etsō mɛ́t ntsem. Ḿbiŋ ŋgɔ́ mé pɛ, mbɔ mɔʼɔ́ wɛ Ndém a á ndáʼ nzhɛ́ ajū mīi, pɛ gɔ ewɛ̄ɛ, tɛ́ ndɔk ŋgɔ́ éwú.

³¹ Pɛ ké nnéŋ ntē wɛ́ ánɛ Lefɔ Ndém, a epiŋ eshʉ̄ʼ nnáŋa ŋgyáa ecʉɔ etsō mɛ́t ntsem, á mbū pɛ. »

Megaŋ nnɔ Yɛɛ́so, é pɔŋteé á letāŋa lewūʼ tsɔ́p á lezēŋ Ndém

³² Yɛɛ́so á zéŋ ndé ŋ́gɛ: «Ewɔŋkhʉ̄ pá, mbɔɔ páʼ nnɔ wɛ́ é kʉɔ́k páʼā lā, ndɛ́ʼ pɛ epɔ́k, Ndém a lē ŋkaŋ á wɛ́, ńnéŋ ánɛ lefɔ tsí, pɛ ecʉ́ʼ megaŋ afuʼ.

³³ Pɛ eswīŋ etsō tsɛ́, ŋ́gāpte ŋkāp á mbū mepūŋ. Pɛ evhō ntāʼ zɛ zīi, e gɔ le zōʼo, ńdɔkɔ ndʉ́ɛ́ ŋ́gɛ, pɛ eféŋ lewūʼ tsɛ́ á athʉ́ lephū, á lezēŋ Ndém, ntsɔ́ŋ a á le éwú tsia, ayíŋ á pīŋ le jhʉ́.

³⁴ Pɛ ezhɛ́ á légɛ, ajʉʼ zīi o feéŋ lewūʼ cú éwú, ntē wú é tshií áa ajʉʼ mɛ́t. »

Ŋiŋ a gɔ́ɔ ŋiŋ Yɛɛ́so, á ge enáŋ, ńnɔŋ mbípɛ

³⁵ Pɛ egē enáŋ, ŋ́yɛ̄tte nnɛ̄t zɛ ánɛ afaʼ, ŋ́kók ŋkaʼ wɛ́, tɛ e nɔŋ ŋkɛ̄ʼɛ.

³⁶ Pɛ egē enáŋ, ńnɔŋ mbípɛ, páʼ megaŋ afaʼ pīi, é naŋteé á ŋgyā, ńzwíʼtɛ á mɔʼɔ́ afaʼ wɔp yīi, a á ŋgʉ̄ɔ lekāk, ŋ́gɔ́ éyi a shʉʼɛ ŋkwáʼte nchu ŋgyā efʉʼ akɔ̄ lɛ́, mɛ́ tsɔ́ʼ, á kó éwú.

³⁷ Meshhʉ̄ mbɔŋ é megaŋ afaʼ puɔ mɛ́t, épi mɔʼɔ́ wɔp a á ge ekɔ́ʼe, mbɔ pɔ́ kaá ndí í. Kwaʼ anuúnē, meŋ shúŋɔ á wɛ́, mbɔ a ŋyɛtte nnɛ̄t zi á legʉɔ efāʼ etsō, étswi á mbū pɔ́p, pɔ́ enáŋte á esī, a elɔk shʉʼ, ŋ́gyá pɔ́ epfɛ́t.

³⁸ A gɔ́ mmɔʼ, á shʉʼ meté‑etsōʼ, ká melanjhʉ̄, meshhʉ̄ mbɔŋ é gɔ́ megaŋ afaʼ pīi, a á ge eshʉʼe, pɔ́ zɛ́t té lí.

³⁹ «Pɛ ecuŋte njúʼ á mbɔŋɔ́, ŋgaŋ mba a zhɛ́ɛ afʉʼ zīi, ntsɔ́ŋ a a kó eshʉʼ epwɔ́ʼ ŋgyā zi, mbɔ a a pípe, mbɔ a te ecʉ́ʼ metsɔ́ŋ e eshʉʼ nzōʼ ŋgyā zi í.

⁴⁰ Mbɔɔ pɛ azɛ́, pɛ egē enáŋ, ńnɔŋ mbípɛ, melaʼ mīi Méŋ‑Ŋiŋnɔŋ wuɔ, a a fú etɔ́kne á wɛ́ ánɛ njhʉ̄ zīi, pɛ kaá nnɔŋ nzwíʼtɛ ɛ́. »

⁴¹ Afʉʼ á kuʼ, Piɛ á zɛ́tte á Yɛɛ́so ŋ́gɛ: «Mɔʼɔ́ wek, o lɔkɔ ashuŋne lepúʼ jʉɔ, éshúŋɔ anu á mbū pek ndaʼ, kɛɛ o lɔkɔ eshúŋɔ á mbū epuɔ metsem m̄?»

⁴² Á pwɛt ŋ́gɛ: «Méŋkhʉ̄ yīi mɛ́ gɔ etém nzem ŋgyá á mbū yí, a á awɔ́? A á eyi mɔʼɔ́ afaʼ yi a gē egʉɔ, ńtsékne mba zi ntsem á mbū yí, ŋ́gɛ a ecʉ́ʼ nzɛ́t ncʉ̄tɛ, afʉʼ a a kūʼ, a egāp etsō á mbū emɔ̄ʼ megaŋ afaʼ.

⁴³ Méŋkhʉ̄ a nɔŋ ŋghʉ̄ɛ afaʼ ndeŋ ndeŋ, páʼ mɔʼɔ́ yí a á ntsékne épúp, tɛ á láʼ ŋkɔ́ʼ, mbɔ a á eshhʉ̄ mbɔŋ.

⁴⁴ Pɛ ezhɛ́ anuúnē ŋ́gɛ, ŋgaŋ mba wuɔ mɛ́t, a a shʉʼ epú etsékne menu mí ntsem, á mbū méŋkhʉ̄ wuɔ mɛ́t.

⁴⁵ Táʼ, méŋkhʉ̄ a kwaŋa á ntē yí ŋ́gɛ, mɔʼɔ́ afaʼ yi a á ŋgʉ̄ɔ ŋkó ńnáŋ, tɛ a te gákne eshʉʼ ɛ́, ńzī á letswā emɔ̄ʼ megaŋ afaʼ, ḿbaŋa pɔ́ wɔnzwí, ńzī á lepfɛ̄t etsō, ńnú meluʼ tɛ mbía,

⁴⁶ mbɔ mɔʼɔ́ afaʼ yi a a shʉʼ etɔ́kne á yí, ánɛ aleʼé zīi a kaá nnɔŋ nzwíʼtɛ ɛ́, ánɛ njhʉ̄ zīi, a kaá nnɔŋ nzhɛ́ ɛ́, éjʉ́ɔ épúp, égɔ á yí, éyá á yí, mɛ́ ezwhí, páʼ mɛ́ e fú eghʉ, á mbū wɔ te júʼ‑nchu Ndém épúp.

⁴⁷ «Méŋkhʉ̄ yīi a ka zwíʼte á mɔʼɔ́ afaʼ yi á lekɔ̄ʼ ɔ́, éyi a zhɛɛ́ ajū mīi mɔʼɔ́ afaʼ yi a á si ŋkɔ̄ŋɔ ŋ́gɛ a eghʉ̄, tɛ́ ndʉ̄ʼ á yí á leghʉ, mɔʼɔ́ afaʼ yi, a a shʉʼ etswi, mɛ́ egɔ̄ á yí, ńtswá á yí á mbɔŋɔ́.

⁴⁸ A piŋɛ ŋgɔ́ á méŋkhʉ̄ yīi, a kaá nnɔŋ nzhɛ́ɛ ajū mīi, mɔʼɔ́ afaʼ yi a á si ŋkɔ̄ŋɔ ŋ́gɛ a eghʉ̄ ɛ́, tɛ́ efā tɛ ŋgɔ́ yīi mɛ́ gɔ etswá á yí, mɛ́ cʉ́ʼɛ ntswáa á yí áa méŋ agáʼ. Pɛ ezhɛ́ á légɛ, ŋiŋ yīi mɛ́ yaá azō á mbū yí tɛ á zá, ŋgyaa, a á si nzéŋɛ nzwíʼtɛ etsō tɛ nzá á mbū ŋgaŋ. Ŋiŋ yīi mɛ́ piŋ ntsékne etsō á mbū yí tɛ é zá lā, mɛ́ e shʉʼ ezéŋ ezɛ́tte á yí tɛ etɔ́k épúp. »

Anu Yɛɛ́so, á maāʼ mefakne á nnɔ epuɔ menɔŋ

⁴⁹ Yɛɛ́so á zéŋ ndé ŋ́gɛ: «Meŋ ke shʉ̄ʼ á ndo esī atsetsáʼ ega, á mmaāʼ mmók. Mmók mɛ́t é ke wíʼe, ńzī, tɛ nnɔ̄ŋ ŋkhʉ́ɛ, mbɔ á pɔŋ á gá tɛʼ.

⁵⁰ Mɛ́ e shʉʼ elɔk ŋgʉɔ̄ʼ, épok á gá. Anu jʉɔ mɛ́t á láʼa nzɛ́t té tɔ́k, mbɔ ntē gá é té náŋ á mbɔŋɔ́ ɔ́.

⁵¹ «Pɛ é kwaŋ azɛ́ ŋ́gɛ, meŋ ndɛɛ́ eshʉʼɛ, éghʉ, epuɔ menɔŋ e enáŋ mé apwɛne á ndo esī atsetsáʼ lɛ́? Ŋgáŋ, pɛ ezhɛ́ á légɛ, meŋ ndɛɛ́ eshʉʼɛ á mmaāʼ atāk.

⁵² Tɛ efhó tsetsɔŋɔ, epuɔ métáa e shʉʼ egɔ́ ánɛ taʼ atseŋ ŋgyā, é fakne, epuɔ métɛ́t e etshí á nzem meŋ, epi mémpīa e epā á wɔ́p. Ŋ́ké te épúp ɔ́, epi mémpīa é tshí á taʼ nzem, ḿbā epi métɛ́t.

⁵³ Mɔʼɔ́ a shʉʼ epā á mɔ́, mɔ́, a epā á mɔʼɔ́ yi. Mía a epā á méŋ yi eyi menzwí, mɔ́ menzwí, a epā á mɛ́ wɔp. Nzwí ŋge a epā á mɛndō yi. Mɛndō, a epā á nzwí méŋ yi. »

Pɛ ezhɛ́ á leyiŋne menu Ndém

⁵⁴ Yɛɛ́so á zéŋ ndé á mbū alāʼ ŋ́gɛ: «Pɛ naáŋ tɛ njʉ́ɔ lephū é fhó mé eshhʉ̄ ntsēŋ éséŋ, pɛ elé ŋ́gɛ, mbeŋ e gʉɔ me nduú, é ghʉ ndú.

⁵⁵ Pɛ naáŋ tɛ njʉ́ɔ fefwɛt á cʉ́ʼɛ efhó áa meshhʉ̄ ntsēŋ, ńtúʼɔ ndɔkɔ mbʉ̄ɛ̄, pɛ elé ŋ́gɛ, alo á si ŋgɔ̄ á efóko, á shʉʼ ŋgɔ́ épúp.

⁵⁶ Wɔ afho nzem pīa, pɛ zhɛɛ́ á lecʉte lephū pɔ́ esī atsetsáʼ, ńzhɛ́ afʉʼ alāʼ zīi, á gʉɔ mé eshʉʼɛ̄. Melaʼ akɔ̄ pɛ pīŋ te yīŋne menu mīi, Ndém a á si ntswīi á wɛ́ tsetsɔŋɔ ɔ̄?»

⁵⁷ «Pɛ te kūʼ á wɛ́ á lezhɛ̄ ndeŋ ndeŋ anu yīi, ŋiŋ a pɔŋteé á leghʉ ɛ́ lɛ̄?

⁵⁸ Ŋiŋ wɛ pɔ́ ŋiŋ, é wiɛ njú, á swīŋ á wú tɛ pɛ yí é nɔ̄ŋ ŋgʉ̄ɔ mé mvhɔ asāʼ, o ekāak ete, pɛ yí é zho á mɛnzhɛ, o egɔ̄ɔ ekém. Ḿbɔ́k á yí á lekō á mvhɔ asāʼ, ntsaŋ é jhʉ́ á wú. Ŋgaŋ asāʼ, á yá á wú á mbū wɔ píp‑atʉɛ́, wɔ píp‑atʉɛ́ é maʼ á wú á ŋgyā atʉɛ́.

⁵⁹ Meŋ chʉ́ɛ nnɛ̄t eshúŋɔ á wú, o gɔ le láʼ ntó atʉɛ́ mɛ́t, té gɔ́ yīi, o ó pú ntɔ̄ŋ njú mɛ́t ntsem ntsem ɛ́. »