Lomɛŋ 9 - Eka Eswhī

Ndém pɔ́ a epuɔ Islaɛl, álāʼ zīi a le kāŋŋ̄

¹ Páʼ meŋ á ŋiŋ Klísto lā, anu zīi meŋ gɔ́ á eshúŋɔ la, á anuúnē. Meŋ te ntáŋa mela á. Azwakne Ndém á nɔŋ ntswíi ntāŋ gá, ŋ́ghʉ̄ɛ, ntē gá é té ŋāka á gá á.

² Ntē gá é si mbúu mmēkɛ tɛʼ, ńnáŋ efʉʼ metsem, ńzáŋ páʼ mɛ́ é pɛ́ apuʼ, ésɔ̄p éwú lā.

³ Á ŋgwíʼe ŋgɔ́ yīi, Ndém á letēm nzem za, mbɔɔ wék Klísto, á legɔ̄ le gɔ́ nnɔ ɔ́, á gɔ etswíte epɔ̄ memía pá, épuɔ alāʼ pék, mbɔ a ke gɔ́, meŋ etsá épúp.

⁴ Pɔ́ é si ŋgɔ́ epuɔ Islaɛl, mbɔ Ndém a le kāŋ á wɔ́p ndɔk ŋghʉ̄ epɔ̄ pí. Pɔ́ a pɔ́p é gɔ́ nnɔ, á nɔŋ ntswīi á wɔ́p á shʉ́shɔ́k yi. Pɔ́ a pɔ́p é kʉɔ́ʼ á ntií ntiī eka, á yá mbé á mbū pɔ́p, éshúŋ á wɔ́p páʼ, mɛ́ gɔ ewūʼte á yí épúp, ḿbhʉ́ á wɔ́p metsō tɛ záne.

⁵ Pɔ́ é si ŋgɔ́ ndhu memíá memaŋgānjʉʼ, mbɔ Klísto a le tó áa ánɛ ndhu jʉɔ mɛ́t, ḿbú ntshí mvhɔ ánɛ ajūɔ tsem, ŋ́gɔ́ á Ndém, mɛ́ yá mekuʼ á mbū yí, á lemiʼɛ. Á épúp.

⁶ Á té páʼā ndɔkɔ ndʉ́ɛ́ ŋ́gɛ, alaʼne zīi Ndém a le ghʉ̄ʉ̄, á le tó ndémndēm ɛ́, á gɔ́ áa légɛ, epuɔ pīi é ndhu Islaɛl, mé té si ŋgɔ́ á kwaʼ epɔ̄ Islaɛl metsem ɛ́.

⁷ Epuɔ pīi é ndhu Ablaham, mé te si ŋgɔ́ á kwaʼ epɔ̄ pí metsem ɛ́, melaʼ mīi Ndém a le lé á mbū yí ŋ́gɛ: «Epɔ̄ pīi meŋ nde phʉ́ á wú lā, o o láʼ ezápa ánɛ Izak tɛ́ ewɛ. »

⁸ Á páʼā ndɔkɔ ndʉ́ɛ́ ŋ́gɛ, ewɔŋkhʉ̄ pīi, a le zhí ánɛ lekɔŋ yi, é té si ŋgɔ́ á kwaʼ epɔ̄ Ndém ɛ́. Ndaʼ ewɔŋkhʉ̄ pīi, a le gē ezhí, mbɔ Ndém a á ŋghʉ̄ alaʼne á mbū yí, mé si ŋgɔ́ á kwaʼ epɔ̄ pí.

⁹ Ndém a le ghʉ̄ alaʼne á mbū Ablaham, ndé ŋ́gɛ: «Meŋ a láʼ egē epiŋ nzem ŋguʼ afʉʼa, mbɔ Saála nzwí wu, a á zhí á taʼ mɔ́ mbaŋa. »

¹⁰ Á té épúp ndaʼá, ḿpɛ gɔ́ ezéŋ ndɔ̄k á Lebéka mbɛ́ efʉʼ. Pɔ́ Izak mɔʼɔ́ yímpɛ, é le zhí mefāk.

¹¹ Mɛ́ le zɛ́t te zhí ewɔŋkhʉ̄ mɛ́t, pɔ́ zɛ́t á levem, tɛ nzɛ́t áa te zhɛ́ á leghʉ anu mbɔŋ ká azi tepɔŋ. Ndém páʼ, á gē eghʉ azō, yí méŋwɛ̄t mé sáŋ, ŋ́ghʉ̄ páʼ, a á kɔŋ épúp,

¹² a te fhó ánɛ mefaʼ ŋiŋ tɛ́ ŋghʉ̄ ɛ́, éfhó áa ánɛ lekɔŋ yi yí méŋwɛ̄t yīi, a tɔ́ŋɔ á ŋiŋ lā. Á lé á mbū Lebéka ŋ́gɛ: «Ŋgaŋ mvhɔ, a a shʉʼ ejúʼ á mbū ŋgaŋ nzem. »

¹³ A gɔ́ páʼ, aŋwaʼne Ndém á leé ŋ́gɛ: «Meŋ nde kɔ̄ŋ á Yakɔ́p, ńtɔ́k á Izawu. »

¹⁴ Á páʼā ndɔkɔ ndʉ́ɛ́ ŋ́gɛ akɔ̄? Ŋ́gɛ Ndém a te á ŋiŋ ndeŋ ndeŋ ɛ́ lɛ̄? Ŋgáŋ, á té épúp ɔ́.

¹⁵ A le lé á mbū Mɔɔ́sɛ ŋ́gɛ: «Meŋ a shʉʼɛ etsáa mezeŋɛ ŋiŋ yīi, meŋ á kɔŋ á letsā mezeŋɛ mí. Égɔ́ á ŋkʉɛ‑anɔŋɔ́‑mɛnzhɛ á mbū ŋiŋ yīi, meŋ á kɔŋ á gá á legɔ̄ ŋkʉɛ‑anɔŋɔ́‑mɛnzhɛ, á mbū yí. »

¹⁶ Á lɔkɔ ntswī á légɛ, Ndém a te gē ekaŋ á ŋiŋ, éfhó ánɛ páʼ, ŋiŋnɔŋ mé kɔŋ ɔ́, a te fhó ánɛ mefaʼ ŋiŋnɔŋ ɔ́. A fhoó áa ánɛ atsāmezeŋɛ zīi, a wɛɛ̄ ánɛ ŋiŋnɔŋ.

¹⁷ Á ntē aŋwaʼne Ndém, Ndém á lé á mbū efɔ Ejīpto ŋ́gɛ: «Meŋ mé le lɔ̄k á wú ŋghʉ̄ á efɔ, ńdɔkɔ efāʼa á lezāpa ánɛ wu, ńtswī mete má, ŋ́ghʉ̄, epuɔ menɔŋ metsem, á ndo esī atsetsáʼ é sáʼ eshúŋ á ŋiŋ yīi, meŋ á ewiɛ́. »

¹⁸ Púp, Ndém a tsaá mezeŋɛ ŋiŋ yīi a á kɔŋ, ŋghʉ̄, ŋiŋ yīi a á kɔŋ, á te athū.

Ndém a ghʉʉ̄ páʼ yí mé kɔŋ

¹⁹ Ŋiŋ a gɔ epīŋ nzɛ́tte á gá ŋ́gɛ: «Á gɔ́ épúp, mbɔ melaʼ akɔ̄ Ndém a gɔ ezéŋ ndāʼ á ŋiŋ ŋ́? Awɔ́ a gɔ elʉ̄ʼ ajū mīi, Ndém mé kɔŋ ŋ̄?»

²⁰ Wu ŋiŋnɔŋ, o ké mbiŋ ŋgɔ́ páʼā ŋgɔ́ awɔ́, tɛ ŋgɔ̄ á ndʉʼɛ́ ajū mīi, Ndém mé kɔŋ ŋ̄? Ŋgwʉ́ŋ é gɔ eghʉ̄ʉ páʼ lā, ńzɛ́tte á mbɔɔ‑meŋgwʉ́ŋ ŋ́gɛ: «Melaʼ akɔ̄ o le pɔ́ á gá ánɛ ejʉɔ ntií í?»

²¹ Mbɔɔ‑meŋgwʉ́ŋ a gɔ elɔ̄ɔk atsáʼ meŋgwʉ́ŋ, ŋ́ghʉ̄ ajū mīi a á kɔŋ. A gɔ elɔ̄ɔk mbɔ́ ŋgwʉ́ŋ yīi, é teē nzwiŋ, ŋ́kɔ̄ŋ, á lɔk mbɔ́ eyi, é lɛɛ̄ emɛ emɛ ŋgɔ́.

²² Ndém a le nɔ̄ŋ ŋkɔŋɔ á letswi azāŋalɔ́ŋ zí, ńnɔŋ ŋkɔ̄ŋɔ á leghʉ mɛ́ zhɛ́ mete mí, ŋ́ké esēk, ŋ́kwɛ́t ntē ánɛ epuɔ pīi, pɔ́ é páʼ meŋgwʉ́ŋ mīi, a ke gɔ́ á záŋ á lɔ́ŋ ánɛ pɔ́p, tɛ ŋghʉ̄ pɔ́ láʼ ndákne.

²³ A le gē eghʉ épúp, ńzéŋ nnɔŋ ŋkɔ̄ŋɔ ŋ́gɛ, mɛ́ ezhɛ́ páʼ lewūʼ tsí é faáŋ épúp, ánɛ epuɔ pīi, é páʼ meŋgwʉ́ŋ mīi, a wɛɛ̄ atsāmezeŋɛ ánɛ pɔ́p lā. A le té njhʉ̄ ŋyɛ̄tte meŋgwʉ́ŋ mɛ́t, ŋ́gɛ pɔ́ eláʼ ŋkó á ntē lewūʼ tsí.

²⁴ Ḿpɛ mé si ŋgɔ́ epuɔ pīi, a le wɛ̄ atsāmezeŋɛ ánɛ pɔ́p, á yímpɛ pīi, a le fhó á nnɔ epuɔ Yúda, mbɔɔ á nnɔ epuɔ pīi, é té epuɔ Yúda á, ńtɔ́ŋ á wɔ́p.

²⁵ Á gɔ́ kwaʼ anu zīi, a le lé á ntē aŋwaʼne ntswi‑ŋke yi Oze ŋ́gɛ: «Epuɔ pīi é lɛ te epuɔ alāʼ pá á, meŋ a shʉʼ etɔ́ŋ á wɔ́p lɛ, epuɔ alāʼ pá. Epuɔ pīi meŋ ndɛ te nɔ̄ŋ ntswhiɛ ŋkɔ̄ŋɔ á wɔ́p ɔ́, meŋ etɔ́ŋ á wɔ́p lɛ, megaŋ ŋkɔŋ pá.

²⁶ Ajʉʼ zīi mɛ́ le kó éwú, ńdé á mbū pɔ́p ŋ́gɛ, pɔ́ té epuɔ alāʼ pá á, mɛ́ e shʉʼ etɔ́ŋ á wɔ́p éwú lɛ, epɔ̄ Ndém yīi, a naáŋ nte. »

²⁷ Izayi ntswi‑ŋke Ndém a zeéŋ ndé azí ánɛ Islaɛl ŋ́gɛ: «Epuɔ Islaɛl é tsyaā nzá tɛ ŋgɔ́ páʼ, memvem asaŋasáŋá á legʉ̄ŋ ntshi lā, avuʼ mé ké eshʉʼ etswɛ́te,

²⁸ melaʼ mīi anu zīi, Atsyapuɔ Ndém a le léē, a te e láʼ enéŋ té gákne ŋghʉ̄ tɛ nzōko, á ndo esī atsetsáʼ á.

²⁹ Izayi a le zéŋ ntē njhʉ̄ ndé ŋ́gɛ: «Atsyantsɔp Ndém a lɛ te wíʼe, ŋ́kápte nzwɛt zek ɛ́, mbɔ pek lē ndákne páʼ, epuɔ tésɔŋ Sodɔm lā. Mbɔ pek lē ndákne páʼ, epuɔ tésɔŋ Gomɔɔ lā. »

Epuɔ Yúda é lɛ te kwaʼ mɛnzhɛ zhɛ́ ɛ́

³⁰ Ḿpɛ gɔ efhó ánɛ ajʉɔ anu, ńdé ŋ́gɛ akɔ̄? Ḿpɛ gɔ elé ŋ́gɛ, epuɔ pīi é té epuɔ Yúda á, épuɔ pīi é lɛ te nɔ̄ŋ efāʼa á wɔ́p á legɔ̄ epuɔ ndeŋ ndeŋ, á mvhɔ Ndém ɛ́, Ndém a le fhó ánɛ wɔ́p á lefɛ̄ nnɛ̄t ŋgyá mé Yɛɛ́so, ńtɔ́ŋ á wɔ́p lɛ, epuɔ ndeŋ ndeŋ.

³¹ Mbiŋ ŋgɔ́ mé epuɔ Islaɛl, mbɔ pɔ́ le nɔ̄ŋ efaʼa á wɔ́p á lefhō ánɛ lekūʼte lepé, tɛ́ ŋgɔ́ epuɔ ndeŋ ndeŋ á mvhɔ Ndém, ḿbiŋ ndáʼ te lɔ̄k ewuɔ mɛnzhɛ mɛ́t, ŋ́gʉɔ tɛ ŋkó ɔ́.

³² Pɔ́ lɛ te lɔ̄k ewuɔ mɛnzhɛ mɛ́t, ŋ́gʉɔ tɛ ŋkó ɔ́ melaʼ akɔ̄? Melaʼ mīi, pɔ́ lɛ te fāʼ á wɔ́p á lefhō ánɛ lefɛ̄ nnɛ̄t ŋgyá á mbū Yɛɛ́so, tɛ́ ŋgɔ́ epuɔ ndeŋ ndeŋ á mvhɔ Ndém ɛ́. Pɔ́ le fāʼ á wɔ́p áa lefhō ánɛ mefaʼ mɔ́p. Pɔ́ le ghʉ̄ épúp, ŋ́kwɛ̄ eshhʉ̄ wɔ́p ánɛ «tɔ́ yīi, mɛ́ kwatɛ éwú ŋgwhʉ̄ɛ á esī. »

³³ Á gɔ́ páʼ mɛ́ le tí á ntē aŋwaʼne Ndém ŋ́gɛ: «Awuɔ yīi meŋ á si nnɔ̄ŋɔ á tɔ́ yīi, a ghʉʉ̄ mɛ́ kwate, á tésɔŋ Siɔŋ la. Á mía mía tɔ́ yīi, a ghʉʉ̄, ŋiŋ á whʉ á esī. Táʼ, ŋiŋ a ké efɛ́ nnɛ̄t ŋgyá á mbū tɔ́ wuɔ mɛ́t, mbɔ a te e láʼ etapne ɛ́. »