Lomɛŋ 8 - Eka Eswhī

Lenāŋ tsīi Azwakne Ndém á yáa

¹ Púp, tsetsɔŋɔ, epuɔ pīi pɔ́ lɛtneē ánɛ Yɛɛ́so Klísto, Ndém a gɔ le zéŋ ntswá á wɔ́p ŋgʉɔ athʉ́ lepé ɛ́

² melaʼ mīi, mete mīi Azwakne Ndém á zapaá ánɛ Yɛɛ́so Klísto, ńdɔk ŋghʉ̄ mɛ́ gɔ́ éwú, é lē ŋkú á wú á mbū mete mīi, é tshónɛ epuɔ nnéŋɛ ánɛ mefa, mbɔɔ á mbū lewhʉ̄.

³ Ndém a le ghʉ̄ épúp, á gɔ́ ajū mīi, lepé Mɔɔ́sɛ é lɛ te kūʼ á leghʉ ɛ́, melaʼ mīi, lepwɛ̄t ŋiŋnɔŋ, a le ghʉ̄ʉ̄, ŋiŋ a te kūʼ á lekūʼte lepé ɛ́. Ndém a le gē efók mefa epuɔ menɔŋ, ńtó á kwaʼ Méŋ yi, á wɛ mbe nnɛ̄t, páʼ ezi epuɔ menɔŋ, mégaŋ mefa. A le zapá ánɛ mbe nnɛ̄t zi mɛ́t, tɛ́ mbík mefa epuɔ menɔŋ.

⁴ A lɛɛ́ ŋghʉɛ épúp, ńdɔkɔ ŋ́gɛ, ḿpɛ ekūʼ á leziŋ páʼ lepé é si nzɛ́ttɛ. Á yímpɛ pīi, ḿpɛ te zɛ́t nnáŋa páʼ mbe nnɛ̄t zímpɛ é si ntshónɛ á yímpɛ ŋ́gɛ, ḿpɛ enáŋ épúp ɔ́, ńcʉ́ʼɛ ńnáŋa áa páʼ, Azwakne Ndém á kɔɔ̄ŋ épúp.

⁵ Epuɔ pīi pɔ́ ziīŋ páʼ mbe nnɛ̄t zɔp mé si ntshónɛ á wɔ́p ŋ́gɛ, pɔ́ ezīŋ épúp, pɔ́ ghʉʉ̄ áa ajū mīi, mbe nnɛ̄t zɔp é si nzɛ́ttɛ. Epuɔ pīi é pīiŋ nnɔ̄ŋ nziŋɛ páʼ Azwakne Ndém á si nzɛ́ttɛ, pɔ́ ghʉ áa ajū mīi, Azwakne Ndém á si ntshónɛ á wɔ́p ŋ́gɛ, pɔ́ eghʉ̄.

⁶ Ŋiŋ a ziīŋ páʼ, mbe nnɛ̄t zi mé si ntshónɛ á yí ŋ́gɛ, a ezīŋ épúp páʼā, ńdɔkɔ nzīŋɛ ánɛ mɛnzhɛ lewhʉ̄. Ŋiŋ á piŋ nzīŋ páʼ Azwakne Ndém mé si nzɛ́ttɛ épúp páʼā, ńdɔkɔ nzīŋɛ ánɛ mɛnzhɛ yīi, Ndém a a ghʉ, a egɔ́ éwú, ŋ́gwɛ̄ apwɛne.

⁷ Epuɔ pīi pɔ́ ziīŋ páʼ, mbe nnɛ̄t zɔp mé si ntshónɛ á wɔ́p, pɔ́ é si ŋgɔ́ megaŋ mbo Ndém. Pɔ́ té lepé Ndém kúʼte, ńzi ŋgɔ́ yīi, pɔ́ gɔ le éwú kuʼ.

⁸ Epuɔ pīi pɔ́ ziīŋ páʼ, mbe nnɛ̄t zɔp mé si ntshónɛ á wɔ́p, pɔ́ gɔ le ghʉ̄ á ajū mīi, á pɔŋ á Ndém ɛ́.

⁹ Ŋ́ké ŋgɔ́ mé pɛ, mbɔ pɛ te si nzīŋɛ páʼ mbe nnɛ̄t zɛ mé si ntshónɛ á wɛ́ ɛ́, pɛ é si nzīŋɛ áa páʼ, Azwakne Ndém á si nzɛ́ttɛ. Á lɔk ŋgɔ́ páʼ, Azwakne mɛ́t á ntē pɛ. Azwakne Klísto á gɔ́ te á ntē ŋiŋ ɛ́, mbɔ ŋgaŋ a te ŋiŋ yi í.

¹⁰ Klísto a gɔ́ á ntē pɛ, mbɔ á anuúnē á légɛ, mbe nnɛ̄t zɛ e láʼ ekwhʉ́ kwhʉ́, melaʼ mefa, táʼ, Azwakne Ndém a eké ŋghʉ̄, pɛ egɔ́ éwú, melaʼ mīi, Ndém a lē ntɔ́ŋ á wɛ́ lɛ, epuɔ ndeŋ ndeŋ.

¹¹ Azwakne ŋiŋ yīi, a le ghʉ̄ Yɛɛ́so á zím ánɛ lewhʉ̄, á gɔ́ á ntē pɛ, mbɔ ŋiŋ mɛ́t yīi, a le ghʉ̄ Yɛɛ́so Klísto mɛ́t, á zím ánɛ lewhʉ̄, a shʉʼ ezéŋ eghʉ, mbe nnɛ̄t zɛ zīi, é gɔ́ áa akwhʉɛ́‑azō, e egɔ́ nte, éfhó ánɛ Azwakne zí zīi, á ntē pɛ.

¹² Púp me epɔ̄ memía, ḿpɛ wɛɛ̄ njú. Njú mɛ́t e gɔ́ te á mbū mbe nnɛ̄t, tɛ ŋgɔ́ yīi, ḿpɛ gɔ ezīŋ páʼ, e é si ntshónɛ á yímpɛ ŋ́gɛ, ḿpɛ ezīŋ épúp ɔ́.

¹³ Á páʼā ŋgɔ́ éyi, pɛ ziŋɛ páʼ mbe nnɛ̄t zɛ mé tshónɛ á wɛ́, mbɔ pɛ e kwhʉ́. Táʼ, a piŋɛ ŋgɔ́ éyi, pɛ é si nzīŋɛ páʼ, Azwakne Ndém á si ŋkɔ̄ŋɔ, mbɔ á páʼā, pɛ elɔ̄kɔ nzwhíɛ anu tepɔŋ zīi, á ntē pɛ, Ndém a eláʼ ŋghʉ̄, pɛ egɔ́ éwú.

¹⁴ Epuɔ metsem pīi, Azwakne Ndém mé tsaāŋ á wɔ́p, é si ŋgɔ́ epɔ̄ Ndém.

¹⁵ Azwakne Ndém zīi á le kó á ntē pɛ, á lɛ te ŋgɔ̄ eghʉ, pɛ ecʉ́ʼ epuʼ, tɛ ŋgɔ́ yīi, pɛ gɔ ezéŋ ncɔ̄ʼ ɔ́, á si ŋgɔ́ Azwakne zīi, á ghʉʉ̄, pɛ cʉ́ʼ epɔ̄ Ndém. Azwakne mɛ́t mé tshóne á yímpɛ, ḿpɛ elāa ntɔ́ŋ á Ndém lɛ Abba, ńdɔkɔ ŋ́gɛ, Mɔ́ʼɔ.

¹⁶ Azwakne Ndém mɛ́t yí méŋwɛ̄t mé si ŋghʉ̄ɛ, ḿpɛ ecuŋtɛ nzhɛ́ɛ á ntē pímpɛ á légɛ, ḿpɛ é si ŋgɔ́ epɔ̄ Ndém.

¹⁷ Páʼ ḿpɛ é si ŋgɔ́ epɔ̄ Ndém lā, ḿpɛ e shʉʼ ewɛ etsō mbɔŋ tsīi, a le féŋ á mbū pímpɛ. Étsō tsīi é fhɔ́ɔ á mbū Ndém. Ḿpɛ a Klísto mé shʉʼ ewɛ. Páʼ ḿpɛ é si njʉ́ɔ ŋgʉɔ̄ʼ páʼ, a le jʉ́ɔ épúp, tɛ́ ŋkó á ntē lewūʼ Ndém lā, ḿpɛ e láʼ ezéŋ ekó azímpɛ éwú.

Lewūʼ tsīi ḿpɛ é si nzwíʼtɛ

¹⁸ Meŋ á si nzhɛ́ɛ á légɛ, ŋgʉɔ̄ʼ zīi, ḿpɛ é tsetsɔŋɔ njʉ́ɔ, e puú te azō ɔ́. Mɛ́ gɔ le lɔ̄k ŋgʉɔ̄ʼ mɛ́t, ḿbɛ́ efʉʼ ánɛ lewūʼ tsīi, Ndém a a shʉʼ eyá á mbū pímpɛ ɛ́.

¹⁹ Ajūɔ tsem zīi, Ndém a le ghʉ̄ʉ̄, á si nzwíʼtɛ té kapa, á légɛ, Ndém a elɔ̄k epɔ̄ pí, ńtó á ntentā.

²⁰ Ajūɔ tsem zīi Ndém a le ghʉ̄ʉ̄, a le zéŋ ŋghʉ̄, á cʉ́ʼ ŋŋiké. Ajūɔ tsem mɛ́t, á lɛ te kɔ̄ŋ kɔŋ tɛ́ ncʉ́ʼ épúp ɔ́. Á le cʉ́ʼ épúp, melaʼ ŋiŋ yīi, a le kɔ̄ŋ ŋ́gɛ, a egɔ́ épúp. Ajūɔ tsem mɛ́t á si ŋké ntsáa ŋ́gɛ, emɔ̄ʼ njhʉ̄ e elá, Ŋgaŋ a ezéŋ ŋkúmne.

²¹ Ndém a fú aleʼé, ézáʼ ŋkhʉ apuʼ á ntɔ̄ŋ ajūɔ tsem zīi, a le ghʉ̄ʉ̄, éghʉ, á le zéŋ ndákne ɛ́. Éghʉ, a ecʉ́ʼɛ nnáŋa áa ŋga athū yí, ŋ́gwɛ̄ lewūʼ tsīi, é etsi epɔ̄ Ndém.

²² Pek é si ŋké nzhɛ́ɛ á légɛ, ajūɔ tsem zīi, Ndém a le ghʉ̄ʉ̄, á tsetsɔŋɔ ntswīɛ̄, ńjʉ́ɔ ŋgʉɔ̄ʼ páʼ menzwí yīi, a á si ŋgɔ̄ á nzhíɛ, mɔ́ á nɔŋ nzáŋa á yí lā.

²³ Ŋgʉɔ̄ʼ mɛ́t, e te lɛ̄ ŋgɔ́ áa ezi ajūɔ tsem ɛ́, ḿpɛ pīi Ndém a le yá Azwakne zí á mbū pímpɛ, é gɔ́ mvhɔ ecū mīi, a le phʉ́ á yímpɛ, é si nzéŋɛ ntswīɛ̄ azímpɛ á ntē, ŋ́ké mbiŋ ŋgɔ́ tsetsɔŋɔ, ńzwíʼtɛ ŋ́gɛ, Ndém a elɔ̄k á yímpɛ ŋghʉ̄ epɔ̄ pí, ŋ́ghʉ̄, ḿpɛ epú ntswɛ́t ŋgʉɔ̄ʼ.

²⁴ Ndém á lē ŋghʉ, ḿpɛ tswɛ́t, ŋ́ké nzɛ́t té wɛ ajūɔ tsem, melaʼ mīi, ŋiŋ a wɛɛ̄ ajū mīi, a á si ntsáa páʼā, ńdɔkɔ te nzɛ́t ntsáa azō ɔ́. Ŋiŋ a gɔ ewɛ̄ azō, ḿbiŋ ŋghʉ̄ páʼ lā, ńzéŋ ntsá azō mɛ́t é?

²⁵ Ḿpɛ veéŋ ŋ́gɛ, ḿpɛ é wɛ ajū mīi, ḿpɛ zɛɛ́t te jʉ́ɔ páʼā, ńdɔkɔ nzwíʼtɛ azō mɛ́t té ká.

²⁶ Ndeŋ ndeŋ épúp, ḿpɛ nɔɔ̄ŋ ŋkáa páʼā, Azwakne Ndém mé tɔ́te á yímpɛ. Á gɔ́ páʼ, ḿpɛ te zhɛ́ á leswīŋte á Ndém páʼ, á zi nzɛ́tte épúp ɔ́. Azwakne Ndém méŋwɛ̄t, mé laā eswíŋte á Ndém á athū pímpɛ, mé meshuŋne mīi, ŋiŋnɔŋ a gɔ le zhɛ́ á leshūŋ ɔ́.

²⁷ Páʼ Ndém a ké njʉ́ɔ á ajūɔ tsem zīi, á ntē ŋiŋnɔŋ lā, á zhɛɛ́ ajū mīi, Azwakne Ndém á si ndɔ́ɔ, melaʼ mīi Azwakne Ndém, á si eswíŋtɛ á athū epuɔ Ndém, ánɛ ntií zīi, Ndém á si ŋkɔ̄ŋɔ épúp.

²⁸ Ḿpɛ é si ŋké nzhɛ́ɛ á légɛ, Ndém a ghʉʉ̄, ajūɔ tsem a láʼ mmakne áa mbɔŋɔ́, á mbū epuɔ pīi é kɔɔ̄ŋ á yí, épuɔ pīi, a le kɔ̄ŋ ntɔ́ŋ á wɔ́p, ńdɔk ŋghʉ̄ epuɔ pí.

²⁹ A le té njhʉ̄, ŋ́kāŋ á wɔ́p, ńzéŋ nté njhʉ̄, ńzápa ŋ́gɛ, pɔ́ e láʼ eswhí á Méŋ yi. Ŋ́ghʉ̄ɛ épúp páʼā ŋ́gɛ, Méŋ yi a egɔ́ mvhɔ mɔ́, ánɛ atʉtʉ epɔ̄ pí.

³⁰ Epuɔ pīi a le zapá ŋ́gɛ, pɔ́ e láʼ eswhí á Méŋ yi, a le zéŋ ntɔ́ŋ á wɔ́p ndɔk ŋghʉ̄ epuɔ pí. Epuɔ mɛ́t pīi a le tɔ́ŋ á wɔ́p, a le zéŋ ntɔ́ŋ á wɔ́p lɛ epuɔ ndeŋ ndeŋ. Epuɔ pīi a le tɔ́ŋ á wɔ́p lɛ epuɔ ndeŋ ndeŋ lā, a le zéŋ ŋgyá á wɔ́p lewūʼ tsí.

Amɔ̄ʼ azō á gɔ le vɛ́ne á Ndém á lekɔŋ epuɔ menɔŋ ɔ́

³¹ Páʼ á ké mbiŋ ŋgɔ́ páʼa lā, meŋ gɔ eké nzéŋ ńdé ŋ́gɛ akɔ̄? Páʼ Ndém a á nzem pímpɛ lā, awɔ́ a gɔ epīŋ nzéŋ ŋ́kūʼ ánɛ pímpɛ ɛ̄?

³² Yí yīi, a lɛ te kwaʼ Méŋ yi gʉɔ̄ʼ, ḿvéŋ mɛ́ zwhí á yí, á kwhʉ́, ńdɔk nzó á athū zímpɛ metsem. A gɔ epīiŋ ŋghʉ̄ páʼ lā, a á le zápa ajūɔ tsem ánɛ Méŋ yi mɛ́t, ŋ́gyá mé pímpɛ ɛ̄?

³³ Awɔ́ a gɔ eswīiŋ epuɔ pīi, Ndém mé kaŋ á wɔ́p é? Ŋgaŋ a te éwú ú. Ndém mé tɔɔ́ŋ á ŋiŋ é lɛ ŋiŋ ndeŋ ndeŋ.

³⁴ Awɔ́ a gɔ etswá á wɔ́p ŋgʉɔ athʉ́ lepé é? Ŋgaŋ a te éwú ú. Yɛɛ́so Klísto a le kwhʉ́ʉ̄, Ndém á ké ŋghʉ̄ á zím ánɛ lewhʉ̄, a naáŋ á ŋkɔʼɔ́ apū ete Ndém, ńtɔ́kɔ nzem zímpɛ.

³⁵ Akēzō á gɔ efāak á yímpɛ, ánɛ ŋkɔŋ zīi, Klísto a lɔɔ̄k ŋkɔŋ á yímpɛ ɛ̄? Ŋgʉɔ̄ʼ lɛ́? Atapne lɛ́? Lelʉɔ̄ʼ á yímpɛ lɛ́? Nzi lɛ́? Mbūŋ lɛ́? Ecū mīi, é faŋnɛ á yímpɛ lɛ́? Kɛ lewhʉ̄ ʉ́?

³⁶ Ḿpɛ jʉɔ́ ŋgʉɔ̄ʼ páʼā, á gɔ́ páʼ, mɛ́ le tí á ntē aŋwaʼne Ndém ŋ́gɛ: «Pek é efʉʼ metsem, ńzápne áa nchu lewhʉ̄, melaʼ mú, mɛ́ cʉ́ʼɛ njʉ́ɔ á wék, áa páʼ mena pīi, mɛ́ gʉɔ mé nzwhítɛ lā. »

³⁷ Táʼ, á ké eshʉʼ ánɛ ecū muɔ mɛ́t ntsem, ḿpɛ gɔ́ wɔ asaʼa‑ndʉɔ́ʼ, melaʼ ŋiŋ yīi, a le kɔ̄ŋ á yímpɛ.

³⁸ Meŋ á si ncuŋtɛ nzhɛ́ɛ á légɛ, amɔ̄ʼ azō á gɔ le fāk á yímpɛ ánɛ ŋkɔŋ zīi, Ndém a lɔɔ̄k ŋkɔŋ á yímpɛ ɛ́, tɛ a láʼa ŋgɔ́ á lewhʉ̄ ká á legɔ̄ éwú. Tɛ é láʼa ŋgɔ́ mecɔʼ Ndém ká emɔ̄ʼ ecū mīi, é sáʼa ndo esī atsetsáʼ. Tɛ é láʼa ŋgɔ́ menu mīi, é tsetseŋɔ ntɔ́kɔ, ká emi é shʉʼ tɛ́ shʉʼe. Tɛ é láʼa ŋgɔ́ emɔ̄ʼ mete ndɛʼɛ.

³⁹ Tɛ é láʼa ŋgɔ́ mete mīi, é lephū ká emi, é nzem esī. Tɛ á láʼa ŋgɔ́ ajūɔ ndɛʼɛ zīi, Ndém a le pɔ́ɔ̄, mbɔ amɔ̄ʼ azō á gɔ le fāk á yímpɛ ánɛ ŋkɔŋ zīi, Ndém a lɔɔ̄k ŋkɔŋ á yímpɛ ɛ́. A le zapá ánɛ Atsyapuɔ Yɛɛ́so Klísto, tɛ́ ntswī ŋkɔŋ mɛ́t.