Lomɛŋ 7 - Eka Eswhī

Lepé Mɔɔ́sɛ mé té zéŋ mbɔ́ŋte á lesāʼ epuɔ Yɛɛ́so ɔ́

¹ Epɔ̄ memía, anu zīi meŋ gɔ á eshúŋɔ la, meŋ á kwaŋ ŋ́gɛ, pɛ é si nzi nzhɛ́ɛ, pɛ zhɛɛ́ anu ánɛ lepé Mɔɔ́sɛ. Pɛ é si nzhɛ́ɛ á légɛ, lepé é saáʼ á ŋiŋ, áa afʉʼ zīi a zɛɛ́t á ŋgɔŋ.

² Ḿpɛ epɛ́ efʉʼ ánɛ menzwí yīi, a lé lá ŋgyā. Lepé é tswaāŋ á wɔ́p ndō yi, á afʉʼ zīi, ndō mɛ́t a zɛɛ́t á ŋgɔŋ. Ndō mɛ́t a piŋɛ ŋkwhʉ́, lepé mɛ́t é le zɛ́t ntswāŋ á wɔ́p yí í.

³ Ńdɔkɔ ŋ́gɛ, ndō menzwí á zɛ́tɛ á ŋgɔŋ, á pīŋ ŋgʉɔ ndá ŋgyā á mbū emɔ̄ʼ ŋiŋ mbaŋa, mbɔ mɛ́ e tɔ́ŋ á yí lɛ, ŋgaŋ agā. Táʼ, ndō yi a piŋɛ ŋkwhʉ́, mbɔ lepé é té zɛ́t ntswāŋ á yí ánɛ ndō yi, tɛ ŋgɔ́ yīi, a gʉɔ ndá ŋgyā á mbū mmɔʼ ŋiŋ mbaŋa, mɛ́ le tɔ́ŋ á yí lɛ ŋgaŋ agā á.

⁴ Á zeéŋ ŋgɔ́ ndeŋ ndeŋ épúp, á mbū pɛ me epɔ̄ memía pá. Lepé é té zɛ́t esáʼa á wɛ́ ɛ́, melaʼ mīi, Yɛɛ́so a le kwhʉ́ ánɛ mbaŋne paŋné páʼā, pɛ pīi pɛ lɛtneē ánɛ yí, é lɔkɔ ŋkwhʉ́tɛ ánɛ lepé. Á tsetsɔŋɔ, ŋiŋ ndɛʼɛ mé cʉ́ʼɛ mbɔ́ŋɔ á wɛ́, á ŋiŋ yīi, Ndém a le ghʉ̄ʉ̄, á zím ánɛ lewhʉ̄, ńdɔkɔ efāʼa ŋ́gɛ, ḿpɛ ezém ntá zīi, é pɔŋ á Ndém.

⁵ Ḿpɛ le zɛ́t nziŋɛ páʼ, mbe nnɛ̄t zímpɛ e é si ntshónɛ á yímpɛ ŋ́gɛ, ḿpɛ ezīŋ épúp, lepé é nɔŋ ntshónɛ á yímpɛ, á leghʉ mefa, páʼ ḿpɛ é si ŋkɔ̄ŋɔ páʼā, ejʉɔ ntií lenāŋ mɛ́t, é tshóne á yímpɛ nnéŋ áa ánɛ lewhʉ̄.

⁶ Á piīŋ ŋgɔ́ tsetsɔŋɔ, mbɔ Ndém a lē ŋghʉ, ḿpɛ kwhʉ́ ánɛ ajū mīi, á lɛ́ ndɔkɔ á yímpɛ ŋghʉ̄ɛ epuʼ. Lepé é té zɛ́t ŋkúʼte á yímpɛ ɛ́, tɛ ŋgɔ́ yīi, ḿpɛ gɔ eghʉ̄ʉ afaʼ á mbū Ndém, ánɛ ntií eswhī, Azwakne Ndém mé nɔŋ esáʼa á yímpɛ. Ḿpɛ é le zéŋ ŋghʉ̄ afaʼ, ánɛ ntií zīi, lepé Mɔɔ́sɛ é lɛɛ́ ntshónɛ á yímpɛ, ḿpɛ ghʉ̄ɛ ɛ́.

Anu ánɛ lepé Mɔɔ́sɛ mbɔɔ ánɛ mefa

⁷ Á páʼā, ńdɔkɔ ndʉ́ɛ́ ŋ́gɛ akɔ̄? Ńdɔkɔ ndʉ́ɛ́ ŋ́gɛ, lepé pɔ́ mefa é taʼ azō lɛ́? Ŋgáŋ, á té épúp ɔ́. Lepé mé le ghʉ̄ʉ̄, meŋ ezhɛ́ ajū mīi, mefa é si ŋgɔ́ aziɛ́. Púp, meŋ nde gɔ́ meŋ ńde zhɛ́ á légɛ, kegʉɔʼ a te pɔ̄ɔŋ, té gɔ́ yīi, lepé é lé ŋ́gɛ: «Te wɛ á kegʉɔʼ ɔ́. »

⁸ Páʼ lepé é le ghʉ̄ʉ̄, meŋ ezhɛ́ ajū mīi, mefa é aziɛ́ lā, mefa mɛ́t é le pīŋ ŋghʉ, meŋ ewɛ á kegʉɔʼ ntií ntiī. Lepé é gɔ́ te éwú ú, mɛ́ le mefa zhɛ́.

⁹ Á lɛ afʉʼ zīi meŋ nde zɛ́t te zhɛ́ lepé, meŋ nɔ̄ɔŋ nnáŋa té alɔ́ʼ. Meŋ nde pīŋ nzhɛ́ lepé, ńcʉ́ʼɛ ŋkhʉ́nɛ áa leghʉ mefa.

¹⁰ Tɛ ŋgɔ́ yīi meŋ gɔ elé ŋ́gɛ, meŋ ndē ŋkwhʉ́. Lepé tsīi, Ndém a le gē eyá, ńdɔkɔ efāʼa á leghʉ, meŋ gɔ́ éwú, é le pīŋ ncʉ́ʼɛ ntshónɛ á gá, ńnéŋɛ áa ánɛ lewhʉ̄.

¹¹ Páʼ lepé é le ghʉ̄ʉ̄, meŋ zhɛ́ ajū mīi mefa é aziɛ́ lā, mefa mɛ́t, é le pīŋ mbɔpte á gá, ńtshóne á gá ŋgyá á mbū lewhʉ̄.

¹² Púp, lepé é fhó á mbū Ndém, ajū mīi é lʉ́ɛ́, á gɔ́ té alɔ́ʼ, ŋ́gɔ́ ndeŋ ndeŋ, ŋ́gɔ́ mbɔŋ.

¹³ Á páʼā ndɔkɔ ŋ́gɛ, ajū mīi á mbɔŋ, á lē ntó á lewhʉ̄ ga lɛ́? Ŋgáŋ, á té épúp ɔ́. A gɔ́ áa lɛ, mefa é le lʉɔnē á nzem ajū mīi, á mbɔŋ, ńtshóne á gá ŋgyá á mbū lewhʉ̄. Púp, lepé é lɔkɔ ŋghʉ̄ɛ, mɛ́ zhɛ́ɛ á légɛ, mefa é si ŋgɔ́ á mɛntséŋ anu.

Mefa é lē mbú njhʉ́ epuɔ menɔŋ

¹⁴ Ḿpɛ é si ncuŋtɛ nzhɛ́ɛ á légɛ, lepé é fhoó á mbū Ndém. Ḿbiŋ ŋgɔ́ mé meŋ, mbɔ meŋ gɔ́ áa ŋiŋnɔŋ, ŋ́gɔ́ á apuʼ mefa.

¹⁵ Meŋ á páʼā, ńnɔŋ te njúʼɔ ajū mīi, meŋ ghʉɛ ɛ́. Ajū mīi, meŋ á si ŋkɔ̄ŋɔ á leghʉ, meŋ te aziɛ́ ghʉ. Azi meŋ te kɔ̄ɔŋ, meŋ mbiŋ ŋghʉ̄ áa aziɛ́.

¹⁶ Páʼ ajū mīi meŋ te kɔ̄ɔŋ, meŋ ghʉʉ̄ áa aziɛ́ lā, meŋ ndɔkɔ mvéŋɛ á légɛ, lepé é si ŋgɔ́ ajūɔ mbɔŋ.

¹⁷ Á gɔ́ épúp páʼā, meŋ mé té ŋkɔŋɔ ŋghʉ̄ɛ ɛ́. Mefa mīi é lē njhʉ́ á gá, mé tshónɛ á gá á leghʉ épúp.

¹⁸ Meŋ á si nzhɛ́ɛ á légɛ, leghʉ anu mbɔŋ, a puú te á ntē meŋ ɛ́, á ntē meŋ yīi, meŋ nzi ŋgɔ́ áa ŋiŋnɔŋ ɔ́. Meŋ tsaá á leghʉ anu mbɔŋ, ḿbiŋ te éwú kuʼ.

¹⁹ Anu mbɔŋ zīi, meŋ á si ŋkɔ̄ŋɔ á leghʉ, meŋ te ghʉ̄ʉ. Anu tepɔŋ zīi, meŋ te kɔ̄ŋ á leghʉ ɛ́, meŋ mbīiŋ ŋghʉ̄ áa aziɛ́.

²⁰ Páʼ ajū mīi meŋ te kɔ̄ɔŋ, meŋ ghʉʉ̄ áa aziɛ́ lā, meŋ mé lɔkɔ te ŋghʉ̄ɛ ɛ́, mefa mīi é lē njhʉ́ á gá, mé tshónɛ á gá á leghʉ épúp.

²¹ Meŋ yīi, meŋ á si ŋké ntsáa á leghʉ anu mbɔŋ, meŋ á si mbiŋɛ njʉ́ɔ, leghʉ anu tepɔŋ mé azaŋne á mbū meŋ.

²² Meŋ á páʼā ndɔkɔ ŋ́gɛ, lepé tsīi, é fhɔ́ɔ á mbū Ndém, é tɛ á ntē meŋ, ḿbɔ̄ŋ á gá tɛʼ.

²³ Táʼ, meŋ á si mbiŋɛ njúʼɔ, amɔ̄ʼ azō á gɔ́ á ntē meŋ, ńnɔŋ ndʉɔ́ʼɔ ajū mīi, emɔ̄ʼ ntē gá é si mvéŋɛ ŋ́gɛ, meŋ eghʉ̄. Azō mɛ́t, á si ŋghʉ̄ɛ, meŋ cʉ́ʼɛ apuʼ mefa, páʼ é lē mbú njhʉ́ á gá lā.

²⁴ Yeé emɔ̄ʼ eshhʉ̄ tepɔŋ yīi, meŋ á ewiɛ́ lée. Awɔ́ a a láʼ ekú á gá, á mbū mbe nnɛ̄t jʉɔ zīi, e é efʉʼ metsem, ńtshóne á gá, ŋ́gyá áa mbū lewhʉ̄ ʉ̄?

²⁵ Awuʼte a egɔ́ áa mbū Ndém, á yí yīi, a a láʼ etsia ánɛ Atsyapuɔ yímpɛ Yɛɛ́so Klísto, ékú á gá. Á páʼā, meŋ gɔ́ á ntē meŋ, ŋ́kúʼte lepé Ndém, ŋ́gɔ́ ánɛ emɔ̄ʼ ntē gá, ŋ́gɔ́ apuʼ mefa.