Lomɛŋ 6 - Eka Eswhī

Lekwhʉ̄ ánɛ mefa, ḿbiŋ ndɔ̄k á Klísto ŋgɔ́ éwú

¹ Tɛ á páʼa, ḿpɛ lɔkɔ ndʉ́ɛ́ ŋ́gɛ akɔ̄? Ŋ́gɛ ḿpɛ etswiʼne nnáŋ á ntē mefa, ńdɔkɔ efāʼa ŋ́gɛ, Ndém a etswiʼne ŋgwɛ̄ apɔŋɔ́ ntē te ndhʉ ánɛ pímpɛ lɛ́?

² Ŋgáŋ, á té épúp ɔ́. Páʼ ḿpɛ lē ŋkwhʉ́te ánɛ mefa lā, ḿpɛ gɔ́ eghʉ̄ʉ páʼ lā, ńzéŋ nnáŋ á ntē mefa ā?

³ Pɛ é si ncuŋtɛ nzhɛ́ɛ á légɛ, ḿpɛ metsem pīi, mɛ́ le nōʼ á yímpɛ á ntshi, ŋ́gɛ ḿpɛ a Yɛɛ́so Klísto, e etemte ncʉ́ʼ á taʼ lā, á lɛ páʼā, ḿpɛ a pɔ́p é lɔkɔ mbútɛ ŋkwhʉ́ɛ.

⁴ Mɛ́ le nōʼ á yímpɛ á ntshi páʼā, ḿpɛ a pɔ́p é lɔkɔ mbútɛ ŋkwhʉ́ɛ, mɛ́ lɔkɔ nnéŋɛ á yímpɛ a pɔ́p á ntē lesi, tɛ́ a etsīa páʼ, Ndém Mɔʼɔ́ a á lɔk á mía mía mete mí, ŋ́ghʉ̄ á zím ánɛ lewhʉ̄ lā, ḿpɛ ewɛ̄ azímpɛ lenāŋ leswhī.

⁵ Páʼ ḿpɛ le lɔ̄k á lekwhʉ̄ ánɛ mefa páʼ Yɛɛ́so, ńdɛ̄tne ánɛ yí lā, ḿpɛ e láʼ ezɛ́t elɛtne áa ánɛ yí, Ndém a eghʉ̄, ḿpɛ ezím ánɛ lewhʉ̄, páʼ, a le ghʉ̄ á zím azí lā.

⁶ Ḿpɛ ecuŋte nzhɛ́ á mbɔŋɔ́ á légɛ: Yɛɛ́so a le lɔ̄k á yí á lekwhʉ̄ ánɛ mbaŋne paŋné, ḿpɛ a pɔ́p é lɔk mbú ŋ́kwʉ́, ánɛ nzwiŋ atswhī yīi, ḿpɛ é lɛ efʉʼ mvhɔ ŋgwɛ̄, tɛ́ a etsīa épúp, Ndém a epú mbík akwaŋte zīi, á tshónɛ á yímpɛ á leghʉ mefa. Púp, ḿpɛ é le zɛ́t epuʼ mefa á,

⁷ melaʼ mīi, ŋiŋ a piīk tɛ ŋkwhʉ́ páʼā, ŋkhʉ anu tepɔŋ é fhó ánɛ yí ŋkɛ́ʼɛ.

⁸ Páʼ ḿpɛ a Yɛɛ́so é lē ŋkwhʉ́ lā, ḿpɛ é si ncuŋtɛ nzhɛ́ɛ á légɛ, ḿpɛ a pɔ́p e láʼ ezéŋ egɔ́ éwú.

⁹ Ḿpɛ é si ŋké nzhɛ́ɛ á légɛ, páʼ Ndém a le ghʉ̄ʉ̄, Klísto á zím ánɛ lewhʉ̄ lā, a te ndáʼa nzéŋɛ ŋkwhʉ́ ɛ́. Lewhʉ̄ a te zɛ́t mbɔ́ŋ mete ánɛ yí í.

¹⁰ A le kwhʉ́ melaʼ mefa, á taʼ legʉɔ, á pú ŋkūʼ épúp. A piīŋ ŋgɔ́ tsetsɔŋɔ, ŋ́gɔ́ nte, á lezēŋ Ndém.

¹¹ Ndeŋ ndeŋ épúp, pɛ ezhɛ́ á légɛ, pɛ le kwhʉ́ ánɛ mefa, ḿbiŋ efhó ánɛ páʼ, pɛ lɛtneē ánɛ Yɛɛ́so Klísto, ŋ́gɔ́ nte, pɛ a Ndém é gɔ́ nnɔ.

¹² Púp, ndɛ́ʼ mefa é zéŋ mbɔ́ŋ mete, ánɛ mbe nnɛ̄t zɛ zīi, e zi ŋgɔ́ áa akwhʉɛ́‑azō, ńtshóne á wɛ́ á leghʉ ajū mīi, mbe nnɛ̄t mɛ́t mé si ŋkɔ̄ŋɔ.

¹³ Ndɛ́ʼ pɛ ezéŋ ndɔ̄k ejʉʼ nnɛ̄t tsɛ́ ŋghʉ̄ mefa, tɛ á gɔ́ páʼ, ejʉʼ nnɛ̄t tsɛ́, é si ŋgɔ́ á tsitsi á lelɔk ŋghʉ̄ anu tepɔŋ lā. A cʉ́ʼɛ épúp, pɛ elɔ̄ɔk ŋghʉ̄ mefaʼ ndeŋ ndeŋ, páʼ epuɔ pīi é nte, mbɔ Ndém a lē ŋghʉ, pɔ́ zím ánɛ lewhʉ̄ lā. Pɛ elɔ̄k mbe nnɛ̄t ntsem, ŋ́ghʉ̄ afaʼ Ndém.

¹⁴ Púp, mefa é le zéŋ mbɔ́ŋ mete ánɛ pɛ ɛ́, melaʼ mīi, pɛ te zɛ́t nzīŋɛ ánɛ mɛnzhɛ lepé Mɔɔ́sɛ ɛ́, pɛ cʉ́ʼɛ nziŋɛ áa ánɛ mɛnzhɛ yīi, Ndém a a tsia éwú, étswi apɔŋɔ́ ntē te ndhʉ zí ánɛ pɛ.

Ḿpɛ é si ŋgɔ́ meŋkwa Ndém, á leghʉ anu mbɔŋ

¹⁵ Tɛ á páʼa ndɔkɔ ndʉ́ɛ́ ŋ́gɛ akɔ̄? Ŋ́gɛ ḿpɛ eghʉ̄ mefa, melaʼ mīi ḿpɛ te zɛ́t nzīŋɛ ánɛ mɛnzhɛ lepé Mɔɔ́sɛ ɛ́ lɛ́? Melaʼ mīi ḿpɛ é si nzīŋɛ ánɛ mɛnzhɛ yīi, Ndém a a tsia éwú, étswi apɔŋɔ́ ntē te ndhʉ zí ánɛ pímpɛ lɛ́? Ŋgáŋ, á té épúp ɔ́.

¹⁶ Pɛ ka zhɛ́ á légɛ, ŋiŋ a nɔɔ̄ŋ ŋghʉɛ afaʼ á mbū ŋiŋ, ńnɔŋ njúʼu nchu yí páʼ ŋkwa lā, ńcʉ́ʼ ŋkwa ŋiŋ mɛ́t yīi, a júʼu nchu yí lā lɛ́? O gɔ egɔ́ ŋkwa mefa, páʼ o gɔ egɔ́ ŋkwa á leghʉ ajū mīi, Ndém a á si ŋkɔ̄ŋɔ. Mefa é ké ntshóne á ŋiŋ, ŋ́gyá á mbū lewhʉ̄. Leghʉ ajū mīi, Ndém a á si ŋkɔ̄ŋɔ, á tshóne á ŋiŋ, á lelɔk á ndeŋ ndeŋ tɛ́ nnáŋ.

¹⁷ Ḿpɛ eké ŋgūʼte á Ndém. Pɛ lɛ amɔ̄ʼ afʉʼ, ŋgɔ́ apuʼ mefa. Á piīŋ ŋgɔ́ tsetsɔŋɔ, anu zīi epuɔ é le ziʼnéē, pɛ júʼ mvéŋ, pɛ ekúʼte mé ntē wɛ́ ntsem.

¹⁸ Ndém a lē ŋkɛ́ʼɛ ŋkhʉ mefa á ntɔ̄ŋ pɛ, pɛ cʉ́ʼ ŋkwa zi ánɛ leghʉ anu ndeŋ ndeŋ.

¹⁹ Tsetsɔŋɔ, meŋ a shúŋne á mbū pɛ, ánɛ ntií leshūŋne epuɔ ŋgɔŋ puɔ, melaʼ mīi pɛ é epuɔ, ŋ́ká á lejūʼ anu. Á lɛ amɔ̄ʼ afʉʼ, pɛ pú ndɔ̄k mbe nnɛ̄t zɛ ntsem, ńcʉ́ʼ meŋkwa, á leghʉ menu epe, mbɔɔ menu tepɔŋ ntií ntiī, é tshóne á wɛ́ á lete athū á mbū Ndém. Tsetsɔŋɔ, pɛ eké ndɔ̄k mbe nnɛ̄t mɛ́t ntsem, ńcʉ́ʼ meŋkwa, á leghʉ afaʼ ndeŋ ndeŋ. Afaʼ ndeŋ ndeŋ á tshoneé á ŋiŋ á legɔ̄ ŋiŋ Ndém.

²⁰ Á lɛ afʉʼ zīi pɛ lɛ apuʼ mefa, leghʉ ajū mīi á ndeŋ ndeŋ, á pú nnɔ̄ŋ te eshúŋɔ á wɛ́ azō ɔ́.

²¹ A lɛ afʉʼ mɛ́t, pɛ ghʉ̄ʉ menu mīi, esē é ayáʼa ŋkúu á wɛ́ melaʼ épúp. Pɛ le ghʉ̄ épúp páʼā, tɛ njhʉ́ á apɛ akɔ̄? Menu muɔ mɛ́t, é tshoneé á ŋiŋ, ŋ́gyá áa mbū lewhʉ̄.

²² Á piīŋ ŋgɔ́ tsetsɔŋɔ, mbɔ Ndém a kʉʉ̄ŋ ŋkɛ́ʼɛ ŋkhʉ mefa, á ntɔ̄ŋ pɛ, pɛ cʉ́ʼ meŋkwa mí. Púp, pɛ ecʉ́ʼɛ ŋghʉ̄ɛ áa ajū mīi, á ghʉ, pɛ ecʉ́ʼ epuɔ Ndém, apɛ a piŋ ŋgɔ́ á wɛ́ á lefū ntā á lezēŋ Ndém.

²³ Á épúp, ntsɔʼɔ́‑afaʼ mefa, é si ŋgɔ́ á lewhʉ̄. Ajū mīi Ndém a piŋɛ ŋgyáa á mbū epuɔ menɔŋ ndémndēm, á gɔ́ á lezāpa ánɛ Yɛɛ́so Klísto Atsyapuɔ yímpɛ, ńtā á lezēŋ yí.