Lomɛŋ 5 - Eka Eswhī

Ndém a lē ndɔk á Yɛɛ́so, ńnéŋ ekém á tsetsɛlɛ pɔ́p a epuɔ menɔŋ

¹ Páʼ Ndém á lē ntɔ́ŋ á yímpɛ lɛ epuɔ ndeŋ ndeŋ, melaʼ mīi ḿpɛ fɛɛ́ nnɛ̄t ŋgyá á mbū yí lā, ḿpɛ zapaá ánɛ Atsyapuɔ yímpɛ Yɛɛ́so Klísto, ḿpɛ a pɔ́p é náŋ ńda nda.

² Yɛɛ́so Klísto mɛ́t mé le tsɔ́ʼ nzhɛ, Ndém á lɔk ntswī apɔŋɔ́ ntē te ndhʉ zí ánɛ pímpɛ, melaʼ mīi, ḿpɛ fɛɛ́ nnɛ̄t ŋgyá á mbū yí. Ḿpɛ kuʼteé páʼ, Ndém a le tswī apɔŋɔ́ ntē te ndhʉ zí mɛ́t tɛ á te, tɛ́ ndɔk nnáŋ. Ajū mīi á si ŋghʉ̄ɛ ḿpɛ ekāʼtɛ, á si ŋgɔ́ páʼ, ḿpɛ é si ntsáa, ńnɔŋ nzhɛ́ɛ á légɛ, a láʼ egɔ́ épúp, á légɛ, ḿpɛ e láʼ ekó á ntē lewūʼ Ndém.

³ Á té épúp ndaʼ á, ḿpɛ zeéŋ ŋkaʼte mbɔɔ ánɛ afʉʼ zīi, epuɔ é si mmāʼa ŋgʉɔ̄ʼ á athū pímpɛ, melaʼ mīi, ḿpɛ é si nzhɛ́ɛ á légɛ, ŋiŋ a á ntē ŋgʉɔ̄ʼ páʼā, tɛ́ nzíʼne á lekwɛ̄t ntē.

⁴ Ḿbiŋ nnɔ̄ŋ ŋkwɛ́tɛ ntē páʼā, ŋ́gɔ́ éyi, a gɔ le whʉ̄ ánɛ táté ɛ́. Páʼ a ka ánɛ táté whʉ̄ɛ lā, ńdɛ nnéŋ á ntē yí á légɛ, yí e láʼ ewɛ ajū mīi, Ndém a le laʼnē á leyā á mbū yí.

⁵ Ŋiŋ a piīk tɛ nnéŋ á ntē yí épúp páʼā, á té shʉʼ nnéŋ té tó áa épúp ɔ́, melaʼ mīi Ndém a le zapá ánɛ Azwakne zí zīi, a le néŋ á ntē pímpɛ, ńnéŋ ŋkɔŋne zi á ntē pímpɛ.

⁶ Meŋ á páʼā ndɔkɔ ŋ́gɛ, á lɛ amɔ̄ʼ afʉʼ, ḿpɛ zɛ́t té wɛ mete á lelɔk nzó athū zímpɛ. Afʉʼ zīi Ndém a le néēŋ, á piŋ eshʉ̄ʼ nnáŋ tɛ ŋkūʼ, Klísto á kwhʉ́ á athū pímpɛ megaŋ mefa.

⁷ Á teē tɛʼ, á mbū ŋiŋ á lekwhʉ̄ melaʼ emɔ̄ʼ ŋiŋ, tɛ ŋgaŋ a zi ŋgɔ́ áa ŋiŋ ndeŋ ndeŋ. A gɔ́ amɔ̄ʼ, mbɔ ŋiŋ a gɔ evéŋ á lekwhʉ̄, á athū ŋiŋ yīi, a gɛ ŋghʉ̄ɛ anu mbɔŋ.

⁸ Ḿpɛ eké njʉ́ɔ ntií zīi, Ndém a le lɔ̄k ntswi á légɛ, yí kɔɔ̄ŋ á yímpɛ: ḿpɛ le zɛ́t áa megaŋ mefa, Klísto á kwhʉ́ á athū pímpɛ.

⁹ A le kwhʉ́ épúp, tɛ́ Ndém á tsia épúp, ńtɔ́ŋ á yímpɛ lɛ epuɔ ndeŋ ndeŋ. Klísto mɛ́t, a gɔ epīiŋ ŋghʉ̄ páʼ lā, ńnéŋ té ghʉ, ḿpɛ etswɛ́t azāŋalɔ́ŋ Ndém ḿ?

¹⁰ Ḿpɛ le zɛ́t megaŋ mbo Ndém, Ndém mɛ́t, á ké ndɔ̄k á lewhʉ̄ Méŋ yi, ńnéŋ ekém á ŋgyā. Ḿpɛ a Ndém é lē ndáʼ ncʉ́ʼ á taʼ nchu. A gɔ le néŋ té lɔk páʼ Méŋ yi a á nte, ŋ́ghʉ̄ ḿpɛ etswɛ́t ɛ́.

¹¹ É té ndaʼ épúp ɔ́. Ḿpɛ é si ŋkāʼtɛ á mvhɔ Ndém, melaʼ Atsyapuɔ yímpɛ Yɛɛ́so Klísto, á yí yīi a á tsetsɔŋɔ, mbɔ a lē ŋghʉ, ekém yímpɛ a Ndém é kó á ŋgyā.

Anu ánɛ Ádam mbɔɔ ánɛ Yɛɛ́so Klísto

¹² Mefa é le gē ekó á ŋgɔŋ, ńzápa ánɛ taʼ ŋiŋ, lezēŋ ŋgaŋ é gɔ́ lɛ Ádam. Mefa é le gē ekó á ŋgɔŋ épúp, ńdɔ̄k á lewhʉ̄ eshʉ̄ʼ. Á shʉʼ épúp, ḿbú ŋkó ánɛ ŋiŋ ntsem, melaʼ mīi mmɔʼ ŋiŋ té fa, a te éwú ú.

¹³ Ndém a le zī ŋgē eyá lepé á mbū Mɔɔ́sɛ, mefa é gɔ́ áa ŋgɔŋ. Á piŋ ŋgɔ́ páʼ, lepé é le zɛ́t te gɔ́ éwú lā, á nɔŋ ŋkʉ̄ŋɛ lezēk ánɛ mefa epuɔ menɔŋ.

¹⁴ Táʼ, tɛ efhó ánɛ afʉʼ Ádam, ŋ́gʉɔ ŋkó ánɛ afʉʼ Mɔɔ́sɛ, lewhʉ̄ á nɔŋ ndɔ̄kɔ epuɔ lɔke, tɛ mbɔɔ epuɔ pīi, pɔ́ lɛ te gē efa á mbū Ndém, ńdʉ̄ʼ á lejūʼ nchu yí páʼ Ádam á. Á lɛ páʼā, Ádam á lɔk ŋgɔ́ ayiŋne ŋiŋ yīi, a a fú tɛ́ eshʉʼe.

¹⁵ Mɛ́ piŋɛ ŋgɔ́, mɛ́ le lɔ̄k mefa Ádam, ńdéŋte á ajū mīi, Ndém a yáa á mbū epuɔ menɔŋ ndémndēm ɛ́. Á anuúnē á légɛ, atʉtʉ epuɔ á le kwhʉtéē, melaʼ páʼ, taʼ ŋiŋ a le fā á mbū Ndém. Táʼ, apɔŋɔ́ ntē te ndhʉ zīi, Ndém a wɛɛ̄ ánɛ epuɔ menɔŋ, á faáŋ ntsyā mefa Ádam mɛ́t. Ajū mīi, a zapaá ánɛ taʼ ŋiŋ, á Yɛɛ́so Klísto, ŋ́gyá ndémndēm á mbū atʉtʉ epuɔ, á te nzwiŋ.

¹⁶ Ajū mīi Ndém a yaá á mbū epuɔ ndémndēm, pɔ́ mefa mīi taʼ ŋiŋ a le ghʉ̄ʉ̄, é pú te taʼ azō ɔ́. Taʼ ŋiŋ a le fā lepé, Ndém á ŋak á yí, ńtsīa épúp, ńtswá epuɔ menɔŋ ŋgʉɔ athʉ́ lepé. Ajū mīi Ndém a piŋɛ ŋgyáa á mbū epuɔ ndémndēm, á le ghʉ̄ʉ̄, á tɔ́ŋ á wɔ́p lɛ epuɔ ndeŋ ndeŋ, tɛ a te zóko esáŋa á tɛ nzá mefa wɔp ɔ́.

¹⁷ Á épúp, lewhʉ̄ a gɛ ndɔ̄kɔ epuɔ lɔke, melaʼ taʼ ŋiŋ, melaʼ mefa taʼ ŋiŋ. Azi afaʼ Yɛɛ́so Klísto, á le pīŋ ntswhi tswhi. Melaʼ mí, melaʼ mí ndaʼ, tɛ́ epuɔ menɔŋ e fú eta á lezēŋ Ndém, égɔ́ wɔ asaʼa‑ndʉɔ́ʼ. Épuɔ pīi, Ndém a wɛɛ̄ apɔŋɔ́ ntē te ndhʉ ánɛ pɔ́p, ńtɔ́ŋ á wɔ́p lɛ, epuɔ ndeŋ ndeŋ.

¹⁸ Púp, páʼ mefa mīi, taʼ ŋiŋ a le ghʉ̄ʉ̄, é le ghʉ̄ʉ̄, Ndém á tswá epuɔ menɔŋ metsem ŋgʉɔ athʉ́ lepé lā, ndeŋ ndeŋ épúp, mefaʼ ndeŋ ndeŋ mīi, taʼ ŋiŋ a le ghʉ̄ʉ̄, é le ghʉ̄ʉ̄, Ndém á tɔ́ŋ epuɔ menɔŋ metsem lɛ, epuɔ ndeŋ ndeŋ. A etsīa épúp, pɔ́ efú ntā á lezēŋ yí.

¹⁹ Taʼ ŋiŋ a lɛ te nchu Ndém júʼ, á tsia épúp, Ndém á pú ntɔ́ŋ epuɔ menɔŋ metsem lɛ, megaŋ mefa. Ndeŋ ndeŋ épúp, taʼ ŋiŋ a le júʼ nchu Ndém, á tsia épúp, Ndém á tɔ́ŋ atʉtʉ epuɔ lɛ, epuɔ ndeŋ ndeŋ.

²⁰ Ndém a le pīŋ ŋgyá lepé tsí, ńdɔkɔ efāʼa ŋ́gɛ, epuɔ menɔŋ e ecuŋte njʉ́ɔ páʼ, pɔ́ é megaŋ mefa é épúp. Táʼ, afʉʼ zīi mefa é zá, apɔŋɔ́ ntē te ndhʉ Ndém á zá ntɔ́k.

²¹ Púp, páʼ mefa é pɔɔ́ŋ mete á leghʉ, ŋiŋ á kwhʉ́ lā, ndeŋ ndeŋ épúp, Ndém á pɔɔ́ŋ mete á lelɔk apɔŋɔ́ ntē te ndhʉ zí, ńtɔ́ŋ epuɔ menɔŋ lɛ, epuɔ ndeŋ ndeŋ. Ŋ́ghʉ̄, pɔ́ zápa ánɛ Atsyapuɔ yímpɛ Yɛɛ́so Klísto, ńtā á lezēŋ yí.