Lomɛŋ 4 - Eka Eswhī

Ajū mīi á le ghʉ̄ʉ̄, Ndém á tɔ́ŋ Ablaham lɛ ŋiŋ ndeŋ ndeŋ

¹ Tsetsɔŋɔ meŋ gɔ á eshúŋ anu ánɛ Ablaham maŋgānjʉʼ epuɔ Yúda. A le lɔ̄k mete mí méŋwɛ̄t ŋgwɛ̄ akɔ̄?

² Ndém a le wíʼe, ŋ́gē etɔ́ŋ á Ablaham lɛ ŋiŋ ndeŋ ndeŋ, éfhó ánɛ mefaʼ mí, mbɔ Ablaham a le gɔ́, á lɔk épúp ŋŋīa. A le pīŋ ŋgɔ́ a á le kūʼ á leŋia á mvhɔ Ndém ɛ́.

³ Aŋwaʼne Ndém á zi ndé ŋ́gɛ akɔ̄? Á leé ŋ́gɛ: «Ablaham a le fɛ́ nnɛ̄t ŋgyá á mbū Ndém, Ndém á tsia épúp, ńtɔ́ŋ á yí lɛ, ŋiŋ ndeŋ ndeŋ. »

⁴ Ŋiŋ a ghʉʉ̄ afaʼ páʼā, mɛ́ pɔ́ŋte á leyā ntsɔʼɔ́ afaʼ yí. Ntsɔʼɔ́ afaʼ mɛ́t, é té ntaŋá yīi, mɛ́ é yá á yí ndémndēm ɛ́, é si ŋgɔ́ ajū mīi, mɛ́ pɔŋteé á leyā á mbū yí.

⁵ Ḿbiŋ ŋgɔ́ mé ŋiŋ yīi, a ka amɔ̄ʼ afaʼ ghʉ̄ɛ, ḿbiŋ nnɔ̄ŋ efíɛ́ nnɛ̄t ŋgyáa á mbū Ndém, páʼ a gɔ eghʉ̄ʉ, ŋgaŋ mefa, á cʉ́ʼ á ŋiŋ ndeŋ ndeŋ, mbɔ Ndém mɛ́t a gɔ efhó ánɛ lefɛ̄ nnɛ̄t ŋgaŋ, ńtɔ́ŋ á yí lɛ ŋiŋ ndeŋ ndeŋ.

⁶ Ndavít a le láʼ ndé anu, ńdɔk eshúŋ páʼ, ŋiŋ yīi Ndém a á tɔ́ŋ á yí lɛ, ŋiŋ ndeŋ ndeŋ, té cʉte mefaʼ ŋgaŋ, a á eshhʉ̄ mbɔŋ. A le lé ŋ́gɛ:

⁷ «Eshhʉ̄ mbɔŋ a á si ŋgɔ́ á ŋiŋ yīi, Ndém a á lekne mefa mí, á ŋiŋ yīi, Ndém a á fók menu tepɔŋ mí.

⁸ Eshhʉ̄ mbɔŋ a á si ŋgɔ́ á ŋiŋ yīi, Atsyapuɔ a te zɛ́t ndɔ̄kɔ mefa mí ntɔ́ŋɔ azō ɔ́. »

⁹ Anu jʉɔ mɛ́t, ánɛ legɔ̄ eshhʉ̄ mbɔŋ, á páʼā, ńdɛ ncʉ̄te áa epuɔ pīi, mɛ́ le tém á wɔ́p lɛ́? Ŋgáŋ, á zéŋ ncʉte mbɔɔ epuɔ pīi, mɛ́ la á wɔ́p tém ɛ́. Pek é zi ndé ŋ́gɛ: «Ablaham a le fɛ́ nnɛ̄t ŋgyá á mbū Ndém, Ndém á tsia épúp, ńtɔ́ŋ á yí lɛ, ŋiŋ ndeŋ ndeŋ. »

¹⁰ Ndém a le gē etɔ́ŋ á Ablaham lɛ ŋiŋ ndeŋ ndeŋ, á ziŋ lɛ akɔ̄? A le gē etɔ́ŋ á yí lɛ ŋiŋ ndeŋ ndeŋ, mbɔ mɛ́ é tém á yí, kɛ mɛ́ zɛ́t té tém á yí í? A le gē etɔ́ŋ á yí lɛ, ŋiŋ ndeŋ ndeŋ, mɛ́ zɛ́t té tém á yí. Á le gē egɔ́, mbɔ mɛ́ la á yí tém ɛ́.

¹¹ Ndém a le tɔ́ŋ á Ablaham lɛ ŋiŋ ndeŋ ndeŋ, tɛ́ mɛ́ shʉʼ ntém á yí, á gɔ́ ayiŋne. Ayiŋne jʉɔ mɛ́t á lɔkɔ ntswīi á légɛ, Ndém a á zápa ánɛ lefɛ̄ nnɛ̄t Ablaham, tɛ́ ntɔ́ŋ á yí lɛ, ŋiŋ ndeŋ ndeŋ, tɛ mɛ́ zɛ́t té tém á yí. Á fhó épúp, Ndém á lɔk á yí ŋghʉ̄ á mɔʼɔ́ epuɔ pīi, pɔ́ fɛɛ́ nnɛ̄t ŋgyá á mbū yí Ndém, té gɔ̄ yīi, mɛ́ é tém á wɔ́p, tɛ́ a etsīa épúp, a etɔ́ŋ á wɔ́p lɛ epuɔ ndeŋ ndeŋ.

¹² Ndém a le zéŋ ndɔk á yí ŋghʉ̄ á mɔʼɔ́ epuɔ pīi, mɛ́ lē ntém á wɔ́p, ńdaʼ ŋ́gɛ, pɔ́ ezīŋ ánɛ mekhu Ablaham mɛ́t, éfɛ́ nnɛ̄t ŋgyá á mbū Ndém, páʼ mɔʼɔ́ yímpɛ Ablaham mɛ́t, a le fɛ́ nnɛ̄t ŋgyá á mbū Ndém, tɛ mɛ́ zɛ́t áa te tém á yí.

Ajū mīi Ndém a le laʼnēē, á mbū wɔ fɛ́‑nnɛ̄t metsem

¹³ Ndém a le ghʉ̄ alaʼne á mbū Ablaham pɔ́ ndhu zi, ŋ́gɛ yí e láʼ eyá ŋgɔŋ ntsem á mbū pɔ́p. Ndém a lɛ te gē eghʉ alaʼne mɛ́t, éfhó ánɛ páʼ, Ablaham a kuʼteé lepé Mɔɔ́sɛ ɛ́. A le gē eghʉ, éfhó ánɛ páʼ, a á tsia ánɛ Ablaham á lefɛ̄ nnɛ̄t ŋgyá á mbū yí, yí tɔ́ŋ á yí lɛ, ŋiŋ ndeŋ ndeŋ.

¹⁴ Á ŋgwíʼe ŋgɔ́ éyi, epuɔ pīi é ziīŋ páʼ lepé Mɔɔ́sɛ é si nzɛ́ttɛ, mé láʼ egɔ́ ndaʼ epuɔ pīi, pɔ́ wɛɛ̄ ajū mīi, Ndém a le phʉ́ʉ̄, mbɔ lefɛ̄ nnɛ̄t ŋgyá á mbū Ndém, a puú te zɛ́t azō ɔ́. Ajū mīi Ndém a le laʼnēē, á lɔkɔ te nzɛ́tɛ ɛ́.

¹⁵ Ŋiŋ a te zīŋ páʼ lepé Mɔɔ́sɛ é si nzɛ́ttɛ ɛ́ páʼā, Ndém á záŋ á lɔ́ŋ. Lepé é piīŋ te á esī í páʼā, ŋ́gɔ́ yīi mɛ́ gɔ le lé ŋ́gɛ, ŋiŋ a á fa lepé ɛ́.

¹⁶ Púp, Ndém a le gē eghʉ alaʼne, á cʉte áa epuɔ pīi, e láʼ efɛ́ nnɛ̄t eyá mé yí, tɛ́ a etsīa épúp, alaʼne a egɔ́ ajū mīi, Ndém a yáa ndémndēm á mbū ndhu Ablaham ntsem. A á le lɛ̄ ŋgyá áa mbū epuɔ pīi, pɔ́ ziīŋ páʼ lepé é si nzɛ́ttɛ ɛ́, a eyá mbɔɔ á mbū epuɔ pīi, é fɛɛ́ nnɛ̄t ŋgyá á mbū yí, páʼ Ablaham mɔʼɔ́ yímpɛ metsem, a le fɛ́ azí épúp.

¹⁷ Á gɔ́ páʼ á ntí ntí á ntē aŋwaʼne Ndém ŋ́gɛ, Ndém a le lé á mbū Ablaham ŋ́gɛ: «Meŋ á lɔk á wú, ŋ́ghʉ̄ á mɔʼɔ́ atʉtʉ melāʼ. » Ablaham a á si ŋgɔ́ á mɔʼɔ́ yímpɛ, á mvhɔ Ndém, á ŋiŋ yīi a le fɛ́ nnɛ̄t ŋgyá á mbū yí. Ndém mɛ́t mé ghʉ̄ʉ, epuɔ pīi é lē ŋkwhʉ́te, é zím ánɛ lewhʉ̄. Ńzéŋ ndɔ̄k nchu yí ndé anu, ajū mīi á kaá nzi ŋgɔ́ éwú ú, á gɔ́.

¹⁸ Ablaham a le nɔ̄ŋ ntsáa azō, ńnɔŋ nzhɛ́ɛ á légɛ, a láʼ egɔ́ épúp. Tɛ mbɔɔ páʼ ajūɔ tsem, á le nɔ̄ŋ ntswii á légɛ, á gɔ le épúp gɔ́, á ké efɛ́ áa nnɛ̄t zi ŋgyá á mbū Ndém, «Ndém á lɔk á yí ŋghʉ̄ á mɔʼɔ́ atʉtʉ melaʼ. » Á gɔ́ páʼ Ndém a le lé á mbū yí ŋ́gɛ: «Jʉ́ɔ́ páʼ nzwɛt ju, e láʼ ezá épúp. »

¹⁹ Ndém a le gē elé anu jʉɔ mɛ́t, Ablaham á wɛ ajūɔ ŋguʼ ŋkhʉ, ńjʉ́ɔ mbɔ, nnɛ̄t zi e é pú ncúte tɛʼ, lefɛ̄ nnɛ̄t yi ŋgyá á mbū Ndém, á ké nzɛ́t ntēte tete. Á zéŋ ŋgē egɔ́, Saála nzwí yi, á gɔ́ á ŋkíŋ.

²⁰ Ablaham a lɛ te náʼ mmīʼte ánɛ alaʼne zīi, Ndém a le ghʉ̄ á mbū yí í. A cʉ́ʼɛ épúp mbɔ, yí lefɛ̄ nnɛ̄t ŋgyá á mbū Ndém, a le nɔ̄ŋ ŋghʉɛ, á kaka ete, ńzéŋ nnɔŋ ŋgūʼtɛ á Ndém.

²¹ Ńnɔŋ ncūŋtɛ nzhɛ́ɛ á ntē yí á légɛ, Ndém a kuūʼ á yí á leghʉ, ajū mīi yí é ndāʼne, á po.

²² Á ajū mīi á le ghʉ̄ʉ̄, Ndém á tɔ́ŋ á Ablaham lɛ, ŋiŋ ndeŋ ndeŋ.

²³ Mɛ́ leé á ntē aŋwaʼne Ndém ŋ́gɛ, Ndém a le tɔ́ŋ á Ablaham lɛ, ŋiŋ ndeŋ ndeŋ páʼā, mɛ́ té ndɛ ndʉ́ɛ́ áa yí ndaʼ á.

²⁴ Mɛ́ lɛɛ́ nzéŋɛ ndʉ́ɛ́ tɛ mbɔɔ yímpɛ. Ndém a a láʼ etɔ́ŋ á yímpɛ lɛ epuɔ ndeŋ ndeŋ, melaʼ mīi ḿpɛ fɛɛ́ nnɛ̄t ŋgyá mé yí yīi, a le ghʉ̄ʉ̄, Atsyapuɔ yímpɛ Yɛɛ́so, á zím ánɛ lewhʉ̄.

²⁵ Yɛɛ́so mɛ́t, Ndém a le véŋ á kwhʉ́, melaʼ mefa mímpɛ, á piŋ ŋghʉ̄ á zím ánɛ lewhʉ̄, á lɔk épúp, ńtɔ́ŋ á yímpɛ lɛ, epuɔ ndeŋ ndeŋ.