Lomɛŋ 3 - Eka Eswhī

¹ Tɛ á piŋɛ ŋgɔ́ épúp, mbɔ ŋiŋ a gɔ ezɛ́te ŋ́gɛ, ŋiŋ Yúda a jhʉʉ́ apɛ akɔ̄, ńtɔ́k á ŋiŋ yīi, a te ŋiŋ Yúda á? Ŋ́gɛ letēm ŋiŋ, á tswiteé ánɛ akɔ̄?

² Ŋiŋ Yúda, a jhʉʉ́ apɛ ntɔ́k á ŋiŋ yīi, a te ŋiŋ Yúda á, ánɛ meshhʉ̄ tɛ nzáne. Á zi ŋgē egɔ́, mbɔ Ndém a le ghʉ̄ melaʼne mí áa mbū pɔ́p.

³ A zi ŋgɔ́ éyi, emɔ̄ʼ epuɔ á nnɔ pɔ́p, é le sɛ̄t nzem Ndém, mbɔ wɔ́p á lesɛt nzem Ndém, á gɔ eghʉ̄ʉ, Ndém á sɛt nzem zɔp lɛ́?

⁴ Ŋgáŋ, á té épúp ɔ́, mɛ́ pɔŋteé á lezhɛ̄ á légɛ, Ndém a á si ŋgɔ́ á ŋgaŋ anuúnē, epuɔ menɔŋ tɛ mmī, é piŋ ŋgɔ́ megaŋ mela. Á zi ŋgē egɔ́, mbɔ mɛ́ le tí á ntē aŋwaʼne Ndém ŋ́gɛ: «Á pɔŋ ŋ́gɛ, mɛ́ etsīa ánɛ ashuŋne jú, wu Ndém, ńzhɛ́ á légɛ, o ó ŋiŋ ndeŋ ndeŋ, ŋ́gɔ́ yīi mɛ́ ŋak á wú, o ejhʉ́. »

⁵ A piŋɛ ŋgɔ́ yīi, yímpɛ á legɔ̄ le gɔ́ ndeŋ ndeŋ ɛ́, a ghʉʉ̄ mɛ́ zhɛ́ á légɛ, Ndém a á ŋiŋ ndeŋ ndeŋ, ḿpɛ ké nzéŋ ndé ŋ́gɛ akɔ̄? Á épúp páʼā, ŋ́gɔ́ yīi, ŋiŋ a gɔ elé ŋ́gɛ, Ndém a gē ezáŋ á lɔ́ŋ, étswá á yímpɛ ŋgʉɔ athʉ́ páʼā, ńdɔkɔ te ŋghʉ̄ɛ anu ndeŋ ndeŋ ɛ́. Meŋ shúŋnɛ páʼ epuɔ ŋgɔŋ puɔ lā.

⁶ Ŋgáŋ, á té épúp ɔ́. Á le wíʼe ŋgɔ́ épúp, mbɔ Ndém a a fú eghʉ páʼ lā, tɛ́ ezáʼ ntsaŋ zɔp a epuɔ menɔŋ ŋ̄?

⁷ Emɔ̄ʼ ŋiŋ a gɔ ezéŋ ndé ŋ́gɛ, a piŋɛ ŋgɔ́ éyi, mela mīi meŋ ghíɛ, é tswiī á légɛ, Ndém a á ŋgaŋ anuúnē, ŋ́ghʉ̄ mɛ́ jʉ́ɔ á shʉ́shɔ́k yi, mbɔ a piŋɛ ntswáa á gá ŋgʉɔ athʉ́ lepé, ŋ́gɛ meŋ á ŋgaŋ mefa melaʼ akɔ̄?

⁸ Emɔ̄ʼ megaŋ asɛʼɛ́ é si ndʉ́ɛ́ ŋ́gɛ, pek é si ndʉ́ɛ́ ŋ́gɛ, mɛ́ eghʉ̄ á anu tepɔŋ, a ekó ntó azi mbɔŋ. Mɛ́ pɔŋteé á letswā epuɔ puɔ mɛ́t, ŋgʉɔ athʉ́ lepé.

Epuɔ metsem é mvhɔ Ndém, ŋ́gɔ́ áa megaŋ mefa

⁹ Meŋ á páʼā ndɔkɔ ŋ́gɛ akɔ̄? Ŋ́gɛ pek epuɔ Yúda, é páʼā, ńtsyā emɔ̄ʼ epuɔ lɛ́? Ŋgáŋ, meŋ ndē ndáʼ ŋkɛ́ʼte éshúŋ ŋ́gɛ, ŋiŋ ntsem, épuɔ Yúda mbɔɔ epuɔ Glɛk, é puú ŋgɔ́ áa epuʼ mefa.

¹⁰ Mɛ́ le tí á ntē aŋwaʼne Ndém ŋ́gɛ: «Ŋiŋnɔŋ yīi a á ndeŋ ndeŋ, a te éwú ú, tɛ tsɔ taʼ.

¹¹ Ŋ́gɛ, ŋiŋ yīi, a wɛɛ̄ leghi a te éwú ú. Ŋiŋ yīi a kɔɔ̄ŋ ŋ́gɛ pɔ́ Ndém e egɔ́ nnɔ, á gɔ́ te éwú ú.

¹² Epuɔ menɔŋ metsem é lē mbú ntém nzem zi. Ńcʉ́ʼ megaŋ anu tepɔŋ metsem. Tsɔ ŋiŋ a te anu mbɔŋ ghʉ̄ʉ, tsɔ áa taʼ ŋiŋ.

¹³ Nchu wɔ́p é gɔ ezwhí á ŋiŋ. Ashuŋne zɔ́p á gɔ́ áa lelɔk mbɔ̄p epuɔ, Menu mīi é toó á nchu pɔ́p, é cɔɔ́k páʼ eseŋ nnū lā.

¹⁴ Eleém eshuŋne á lelɔk nnéŋ ndɔ á athū epuɔ, é nchu pɔ́p tɛ ndó.

¹⁵ Mekhu mɔ́p é zaŋneē, á lekʉte ŋgʉ̄ɔ ḿpfɛ̄t metshi epuɔ.

¹⁶ Pɔ́ tsiā á akɔ̄ ajʉʼ lɛ́, mbík epuɔ piké, ḿmāʼ áa ŋgʉɔ̄ʼ.

¹⁷ Pɔ́ té fāʼ á légɛ, pɔ́ a emɔ̄ʼ epuɔ, e enáŋ mé apwɛne ɛ́.

¹⁸ Pɔ́ gē eghʉ̄ azɔ́p anu, ḿbú te á Ndém pɔ́k. »

¹⁹ Ḿpɛ ké nzhɛ́ á légɛ, akʉ̄ɛ akʉ̄ɛ zīi mɛ́ le tí á ntē aŋwaʼne lepé Ndém, á cʉteē áa epuɔ pīi, pɔ́ le pɔŋté é lekūʼte lepé mɛ́t. Ndém a lɛɛ́ ŋgyáa lepé, ńdɔkɔ efāʼa ŋ́gɛ, epuɔ menɔŋ metsem, e eláŋte nchu wɔ́p, ńzhɛ́ á légɛ, yí pɔŋteé á letswā á ŋiŋ ntsem, á ndo esī atsetsáʼ, ŋgʉɔ athʉ́ lepé.

²⁰ É melaʼ épúp tɛ́, Ndém a te e láʼ efhó ánɛ páʼ, ŋiŋ a ghʉʉ̄ páʼ lepé ntsem é si nzɛ́ttɛ, tɛ́ etɔ́ŋ á ŋgaŋ lɛ, ŋiŋ ndeŋ ndeŋ ɛ́. Lepé é tswiteé áa lelɔk nzhɛ́ ajū mīi, mɛ́ é fa.

Lefɛ̄ nnɛ̄t mé yaá Ndém á letɔ̄ŋ ŋiŋ lɛ ŋiŋ ndeŋ ndeŋ

²¹ Á piīŋ ŋgɔ́ tsetsɔŋɔ, mbɔ Ndém a lē ntswi páʼ, yí ghʉʉ̄ épúp, tɛ́ ntɔ́ŋ á ŋiŋ lɛ, ŋiŋ ndeŋ ndeŋ. A te fhó ánɛ páʼ, ŋgaŋ a kuʼteé lepé ɛ́. Meŋwaʼne lepé mbɔɔ meŋwaʼne metswi‑ŋke Ndém, é le té njhʉ̄, ńtswī á yímpɛ ajʉʼ anu jʉɔ mɛ́t.

²² Á épúp, Ndém a lɔɔ̄k páʼ ŋiŋ á fɛɛ́ nnɛ̄t ŋgyá á mbū Yɛɛ́so Klísto, tɛ́ ntɔ́ŋ á ŋgaŋ lɛ ŋiŋ ndeŋ ndeŋ. Ŋ́ghʉ̄ épúp á mbū wɔ fɛ́‑nnɛ̄t metsem, melaʼ mīi, a te á ŋiŋ tɛ̄ʼte.

²³ Epuɔ metsem é lē mbú ŋgwhʉ̄ mefa, ésá lewūʼ tsīi, é lezēŋ Ndém.

²⁴ Táʼ, Ndém á ké efhó ánɛ apɔŋɔ́ ntē te ndhʉ zīi, a wɛɛ̄ ánɛ pɔ́p, ńtɔ́ŋ á wɔ́p lɛ epuɔ ndeŋ ndeŋ. Ŋ́ghʉ̄ épúp, ndémndēm, éfhó ánɛ páʼ Yɛɛ́so Klísto, a le záʼ ŋkhʉ apuʼ, á ntɔ̄ŋ pɔ́p.

²⁵ Ndém a le véŋ ŋ́gɛ, a ekwhʉ́ ndɔk ésōk mefa ŋiŋ ntsem yīi, a á fɛ́ nnɛ̄t ŋgyá á mbū yí. Ndém a le ghʉ̄ épúp, ńdɔkɔ ntswīi páʼ yí gē etɔ́ŋ á ŋiŋ lɛ ŋiŋ ndeŋ ndeŋ, á ziŋ épúp. A lɛ efʉʼ mvhɔ páʼā, ńnáʼ ŋkʉ̄ŋɛ lezēk tsí ánɛ mefa epuɔ menɔŋ.

²⁶ Éfhó ánɛ páʼ, a á ŋiŋ, a te gákne nzáŋ á lɔ́ŋ ɔ́. A piīŋ ŋgɔ́ tsetsɔŋɔ, ńnɔŋ ntswīi páʼ, yí gē etɔ́ŋ á ŋiŋ lɛ, ŋiŋ ndeŋ ndeŋ, á ziŋ épúp. A etsīa épúp, epuɔ menɔŋ e ezhɛ́ á légɛ, yí é ŋiŋ ndeŋ ndeŋ. Ŋiŋ yīi a á ge enáŋ, ńnɔŋ efíɛ́ nnɛ̄t ŋgyáa mé Yɛɛ́so, yí etɔ́ŋ á yí lɛ, ŋiŋ ndeŋ ndeŋ.

²⁷ Anu á ké ŋgɔ́ páʼa, mbɔ ŋiŋ a gɔ eké nzéŋ ŋ́kāʼte kɛ? Ŋgáŋ, melaʼ akɔ̄? Melaʼ mīi mía azō, a te á lekūʼte lepé ɛ́, a gɔ́ áa lefɛ̄ nnɛ̄t ŋgyá mé Klísto.

²⁸ Pek ké ŋgɔ́ si ŋkwāŋa azék ŋ́gɛ, Ndém a gē etɔ́ŋ á ŋiŋ lɛ ŋiŋ ndeŋ ndeŋ, éfhó ánɛ páʼ, ŋgaŋ a á fɛ́ nnɛ̄t ŋgyá mé Yɛɛ́so, a te fhó ánɛ páʼ, ŋgaŋ a kuʼteé lepé ɛ́.

²⁹ Á le wíʼe á té épúp ɔ́, mbɔ Ndém a gɔ áa Ndém epuɔ Yúda ndaʼ. Mbɔ a te á Ndém epuɔ pīi, é té epuɔ Yúda á. Ŋgáŋ, Ndém a zeéŋ ŋgɔ́ á Ndém epuɔ pīi, é té epuɔ Yúda á.

³⁰ Á épúp melaʼ mīi, taʼ Ndém mé éwú. Yí mé e láʼ ezápa ánɛ lefɛ̄ nnɛ̄t epuɔ pīi, mɛ́ lé tém á wɔ́p, mbɔɔ epi mɛ́ la á wɔ́p tém ɛ́, étɔ́ŋ á wɔ́p lɛ epuɔ ndeŋ ndeŋ.

³¹ Ḿpek é páʼā, ńdɔkɔ ndʉ́ɛ́ ŋ́gɛ, lepé é té zɛ́t á azō ɔ́, melaʼ mīi, pek fɛɛ́ nnɛ̄t ŋgyá á mbū Klísto lɛ́? Ŋgáŋ, a cʉ́ʼɛ épúp, mbɔ pek é si mvéŋɛ ŋ́gɛ, mɛ́ pɔŋteé é lekūʼte lepé tɛ é te.