Lomɛŋ 2 - Eka Eswhī

Ntií zīi Ndém a a láʼ elɔk ezáʼ ntsaŋ zɔp a epuɔ menɔŋ

¹ A zi mbú ŋgɔ́ áa awɔ́ lɛ́, ńnɔŋ nthúɔ alɔ́ʼ ŋiŋ, mbɔ mɛ́ gɔ le á yí tsá, melaʼ mīi, wu yīi o ó si nthúɔ alɔ́ʼ epuɔ, ḿbiŋ nnɔ̄ŋ ŋghʉ̄ɛ ajú páʼ pɔ́p, á páʼā, o lɔkɔ ntshíɛ athʉ́ á akhu wu mbīi.

² Ḿpɛ metsem, é si ŋké nzhɛ́ɛ á légɛ, Ndém a lɔɔ̄k á ndeŋ ndeŋ, tɛ́ nzáʼ ntsaŋ epuɔ pīi, pɔ́ fʉʼteē ejʉɔ ntií menu.

³ Wu yīi, o thúɔ alɔ́ʼ epuɔ pīi, pɔ́ fʉʼtɛ ejʉɔ ntií menu, ḿbiŋɛ nnɔ̄ŋɔ ŋghʉ̄ɛ ajú páʼ pɔ́p, o ó jʉ́ɔ ŋ́gɛ, o gɔ ekʉ̄ʉ azāŋalɔ́ŋ Ndém, tɛ ntswɛ́t lɛ́?

⁴ O ghʉɛ épúp, á gɔ́ yīi, o lɔkɔ ŋgwáka á Ndém, tɛ́ á ké ŋgɔ́ á kwaʼ ŋiŋ mbɔŋ, ŋ́gɔ́ á ŋiŋ yīi a kwɛɛ́t ntē, a te gákne ntswá á ŋiŋ ŋgʉɔ athʉ́ lepé ɛ́. O ka zhɛ́ á légɛ, Ndém a á épúp páʼā, ńdɔkɔ ŋgyáa á wú meshhʉ̄ á legɔ nnɛ̄t ju, ŋ́gwáʼ á atswhī tepɔŋ jú lɛ̄?

⁵ O ké mbiŋ ŋgɔ́ si ntʉ̄ɛ̄ athū, ńnɔŋ te mvéŋɛ á lekūmne ntē wú ú. Ŋ́ghʉ̄ɛ épúp páʼā, ńdɔkɔ ntɔ́ŋɔ á mía mía azāŋalɔ́ŋ Ndém ánɛ wu, ánɛ aleʼé zīi, a lɔkɔ á kwaʼ ndeŋ ndeŋ, ńzáʼa ntsaŋ zɔp a epuɔ menɔŋ, ńtswīi azāŋalɔ́ŋ zí.

⁶ A láʼ egɔ́ aleʼé mɛ́t, «a efhó ánɛ ŋghʉʉ́‑anu awíɛ awíɛ, ńzápa azí anu, á alá apū yí. »

⁷ A a láʼ eghʉ, epuɔ pīi pɔ́ kaāk ete, ŋ́ghʉ̄ menu mbɔŋ, ńdɔkɔ efāʼa ŋ́gɛ, a ekím lezēŋ tsɔ́p á mbɔŋɔ́, ńdɔkɔ efāʼa ŋ́gɛ, a ekɔ̄ŋte á wɔ́p, ńdɔkɔ efāʼa á legɔ̄ le fú ŋkwhʉ́, ŋ́kó ŋkwhʉ́ ɛ́, e etā á lezēŋ yí.

⁸ Ḿbiŋ ŋgɔ́ mé epuɔ pīi, pɔ́ teē athū á mbū yí, pɔ́ té kɔ̄ŋ á leziŋ páʼ anuúnē á si ndʉ́ɛ́ épúp ɔ́, ŋ́kɔ̄ŋ á leziŋ áa ánɛ mɛnzhɛ ŋgɛ́tté, a ezáŋ á alɔŋ ánɛ pɔ́p, ńtswá á wɔ́p á tepɔŋ ŋgʉɔ athʉ́ lepé.

⁹ Ndém a a láʼ enéŋ ŋgʉɔ̄ʼ pɔ́ atapne, ánɛ awíɛ awíɛ yīi, a á si ŋghʉ̄ɛ anu tepɔŋ. Ézi ánɛ epuɔ Yúda, épáte epuɔ Glɛk.

¹⁰ Ŋ́ké mbiŋ ŋgɔ́ mé awíɛ yīi, a á si ŋghʉ̄ɛ á mbɔŋɔ́, á kɔŋte á yí, ŋ́kím lezēŋ tsí á mbɔŋɔ́, ŋ́ghʉ̄ á náŋ mé apwɛne. Nzī ánɛ epuɔ Yúda, ḿbáte epuɔ Glɛk.

¹¹ Ndém a te epuɔ tɛ̄ʼte.

¹² Epuɔ metsem pīi, pɔ́ é si ŋgē eghʉɛ mefa, ńnɔŋ te nzhɛ́ɛ lepé Mɔɔ́sɛ ɛ́, pɔ́ e láʼ elákne áa te zhɛ́ lepé mɛ́t. Táʼ, epuɔ metsem pīi pɔ́ ge eghʉ mefa, ńnɔŋ nzhɛ́ɛ lepé, Ndém a eláʼ ntsīa ánɛ lepé mɛ́t, tɛ́ nzáʼ ntsaŋ zɔp.

¹³ Á páʼā, epuɔ pīi, é juúʼ lepé Mɔɔ́sɛ juúʼ ndaʼ, Ndém a te e láʼ etɔ́ŋ á wɔ́p lɛ, epuɔ ndeŋ ndeŋ ɛ́. Epuɔ pīi é ké mbiŋ njúʼ lepé mɛ́t, ŋ́kúʼte, a etɔ́ŋ á wɔ́p lɛ, epuɔ ndeŋ ndeŋ.

¹⁴ Á amɔ̄ʼ afʉʼ, epuɔ pīi é té epuɔ Yúda á, ńzi nnɔ̄ŋ te nzhɛ́ lepé Mɔɔ́sɛ ɛ́, é ké njúʼ á mbe nnɛ̄t pɔ́p, ŋ́ghʉ̄ páʼ é si nzɛ́ttɛ. Pɔ́ naáŋ páʼ lepé mɛ́t, é nti tií á ntē pɔ́p lā, tɛ́ ŋké mbiŋ ńnɔ̄ŋ te nzhɛ́ɛ lepé mɛ́t ɛ́.

¹⁵ Pɔ́ é páʼā, ńdɔkɔ ntswīi á légɛ, mɛnzhɛ yīi, lepé é si ŋkɔ̄ŋɔ ŋ́gɛ mɛ́ ezīŋ éwú, a á ŋkia kia á ntē pɔ́p. Ntē wɔ́p é zéŋ nnɔ̄ŋ eshúŋɔ á wɔ́p épúp. Akwaŋte zɔ́p á lɔk á legɔ̄ amɔ̄ʼ afʉʼ, ŋ́ŋāk á wɔ́p, mbɔɔ á legɔ̄ mmɔʼ afʉʼ, ńtɔ́k nzem zɔp, ńzéŋ ŋghʉ̄ pɔ́ zhɛ́ épúp.

¹⁶ Á páʼa, ŋ́gɔ́ ajū mīi, a láʼ etɔ́ke, á aleʼé zīi Ndém a zápa ánɛ Yɛɛ́so Klísto, ŋ́ŋāka epuɔ menɔŋ, ánɛ menu mīi, pɔ́ lʉɔ ánɛ lenāŋ tsɔ́p. Á lɔk ŋgɔ́ páʼ ŋke mbɔŋ yīi, meŋ tswii, é si ndʉ́ɛ́ épúp.

Epuɔ Yúda é lɛ te lepé Mɔɔ́sɛ kúʼte

¹⁷ Wu yīi o ó si ndʉ́ɛ́ ŋ́gɛ, o ó ŋiŋ Yúda, ńnɔŋ ntsēŋnɛ ánɛ lepé Mɔɔ́sɛ, ńnɔŋ ndɔ̄kɔ á Ndém ŋkāʼtɛ.

¹⁸ Wu yīi o ó si nzhɛ́ɛ ajū mīi Ndém a á si ŋkɔ̄ŋɔ, mbɔ lepé Mɔɔ́sɛ é lē nzíʼne á wú, á lesāŋ tɛ ŋkāŋ ajū mīi, á mbɔŋ.

¹⁹ Wu yīi o ó si nzhɛ́ɛ ŋ́gɛ, o ó si ntsāŋa wɔ apií‑menēk, ŋ́gɔ́ ŋkaʼ á mbū wɔ ziŋ á ntē nzém,

²⁰ ŋ́gɔ á nziʼnɛ epuɔ pīi, é zɛɛ́t te wɛ leghi, ŋ́gɔ á nziʼnɛ wɔ te tswhi nzhɛ́ azō. O ó si njʉ́ɔ ŋ́gɛ, o ó épúp melaʼ mīi, o ó si njʉ́ɔ lepé Mɔɔ́sɛ, páʼ mɛgém anu á lelɔk nzhɛ́ azō, mbɔɔ lelɔk ŋgwɛ̄ anuúnē.

²¹ Wu yīi o tékɛ emɔ̄ʼ epuɔ, melaʼ akɔ̄ o piŋɛ te ntékɛ athū nnɛ̄t jú méŋwɛ̄t ɛ́? O ó si nzíʼnɛ ŋ́gɛ, ndɛ́ʼ mɛ́ zéŋ njʉ̄, ḿbiŋ nnɔ̄ŋ njʉ̄ʉ melaʼ akɔ̄?

²² O ó si mbʉ́ɛ́ agā, ḿbiŋ nnɔ̄ŋ ŋghʉ̄ɛ agā melaʼ akɔ̄? O ó si mbāa mesī, ḿbiŋɛ njʉ̄ʉ á tsitsi yīi, a tshiteé á meŋgyā pɔ́p melaʼ akɔ̄?

²³ O ó si ndɔ̄kɔ lepé Mɔɔ́sɛ ŋkāʼtɛ, ḿbiŋɛ ndɔ̄kɔ á wú á legɔ̄ le zīŋ páʼ lepé mɛ́t é si ndʉ́ɛ́, ńtsēŋtɛ lezēŋ Ndém.

²⁴ Á lɔkɔ ŋgɔ́ɔ ndeŋ ndeŋ, páʼ mɛ́ tií á ntē aŋwaʼne Ndém ŋ́gɛ: «Pɛ é si ŋghʉ̄ɛ, epuɔ pīi é té epuɔ Yúda á, é zɔtɛ á Ndém. »

²⁵ O kúʼtɛ lepé Mɔɔ́sɛ, mbɔ legɔ̄ yīi mɛ́ le tém á wú, a a tswíte á wú. Ḿbiŋ te lepé mɛ́t kúʼte, á cʉ́ʼɛ ŋgɔ́ɔ áa páʼ, mɛ́ zi la á wú tém ɛ́ lā.

²⁶ A piŋɛ ŋgɔ́ éyi, ŋiŋ yīi mɛ́ la á yí tém ɛ́, a á si nzīŋɛ páʼ lepé Mɔɔ́sɛ é zɛteé épúp, mbɔ Ndém a te e tɔ́ŋ á yí lɛ, ŋiŋ yīi mɛ́ lē ntém á yí lɛ̄?

²⁷ Púp, ŋiŋ yīi mɛ́ é si ndɔ̄kɔ menēk njʉ́ɔ, mbɔ mɛ́ la á yí tém ɛ́, á piŋ nnɔ̄ŋ ŋkúʼtɛ lepé Mɔɔ́sɛ, a a shʉʼ mmaʼ esē á athū wu yīi, mɛ́ lē ntém á wú, o nɔŋ nzhɛ́ɛ lepé, ḿbiŋ nnɔ̄ŋ te nzīŋɛ páʼ lepé mɛ́t, é si nzɛ́tɛ ɛ́.

²⁸ Á páʼā ndɔkɔ ŋ́gɛ, mɛ́ gē ezhɛ́ á ŋiŋ Yúda, mɛ́ té fhó ánɛ ajū mīi, mɛ́ é si njʉ́ɔ ɔ́. Ŋ́gē ezhɛ́ á ŋiŋ yīi mɛ́ lē ntém á yí, mɛ́ té fhó ánɛ ayiŋne zīi, ánɛ mbe nnɛ̄t zi í,

²⁹ mɛ́ fhoó áa ánɛ ajū mīi, mɛ́ té si ndɔ̄kɔ menēk njʉ́ɔ ɔ́, tɛ́ nzhɛ́ á kwaʼ ŋiŋ Yúda. Kwaʼ letēm ŋiŋ, á gɔ áa ntē yí, ŋ́gɔ eyi Azwakne Ndém mé ghʉ̄ʉ. A te fhó ánɛ páʼ ŋgaŋ á kuʼteé lepé ɛ́. Kwaʼ ŋiŋ Yúda mɛ́t, ŋiŋnɔŋ mé té á yí kɔŋte, Ndém mé kɔŋteé á yí.