Lomɛŋ 16 - Eka Eswhī

Pɔ́ɔl a á ega ntswhīɛ ntsāʼtɛ emɔ̄ʼ epuɔ

¹ Meŋ á si ŋkɔ̄ŋɔ ŋ́gɛ, pɛ ezhɛ́ á légɛ, Febe, méŋ mɔ́ yímpɛ eyi menzwí, a á ŋiŋ yīi mɛ́ gɔ etém nzem ŋgyá mé yí, a ghʉʉ̄ afaʼ ánɛ alúŋ epuɔ Yɛɛ́so zīi, á Saŋklɛ

² Pɛ ekókne á yí á tsetsɛlɛ pɛ, ánɛ lezēŋ Atsyapuɔ, páʼ epuɔ Ndém é pɔŋteé á lekōkne mennɛ̄t mɔ́p épúp. Ńtswíte á yí ánɛ ajūɔ tsem zīi, a gɔ etsá á mbū pɛ. A lé zii ntswíte epuɔ tɛ nzáne, tɛ mbɔɔ meŋ azá.

³ Pɛ etsāʼte á Plisil pɔ́ Akilas, mésoó afaʼ pá pīi, pek a pɔ́p é pútɛ ŋghʉ̄ɛ afaʼ, á mbū Yɛɛ́so Klísto.

⁴ Pɔ́ le té á ndhʉɛ̄ athū zá, ńnɔŋ ŋgɔ̄ á ŋkwʉ́tɛ. Meŋɛmeŋ ndaʼ mé té si ŋgūʼu anu mbɔŋ zīi pɔ́ le ghʉ̄ ɛ́, elúŋ epuɔ Yɛɛ́so ntsem á ntē elāʼ tsīi, é té alāʼ epuɔ Yúda á, é zeéŋ nnɔŋ ŋgūʼu azɔ́p.

⁵ Pɛ etsāʼte alúŋ epuɔ Yɛɛ́so zīi, á gɛ ncúʼtɛ á ŋgyā pɔ́p, ńtsāʼte á mbɔŋ esoó ga Epenɛt, a á si ŋgɔ́ mvhɔ ŋiŋ yīi, a le fɛ́ nnɛ̄t ŋgyá mé Klísto, á ntē apak ŋgɔŋ Azíi.

⁶ Pɛ etsāʼte á Malía, a ke tséŋ aziʼne tɛʼ melaʼ mɛ́.

⁷ Ńtsāʼte á Aŋdlonikus pɔ́ Junias, pɔ́ é si ŋgɔ́ epuɔ alāʼ pék. Pek a pɔ́p mé lɛ á ŋgyā atʉɛ́. Pɔ́ é si ŋgɔ́ memía meziŋ‑ntō Klísto, mbɔ pɔ́ le zī nzi á lefɛ̄ nnɛ̄t ŋgyá á mbū Klísto, tɛ́ meŋ ndáʼ efɛ́ azá.

⁸ Pɛ etsāʼte á Ampliyatus, a á si ŋgɔ́ á mbɔŋ esoó gá, á nzem Atsyapuɔ.

⁹ Ńtsāʼte á Ulbɛŋ, ḿpɛ a pɔ́p é si mbútɛ ŋghʉ̄ɛ afaʼ á mbū Klísto. Pɛ ezéŋ ntsāʼte á mbɔŋ esoó ga Stakis.

¹⁰ Ńtsāʼte á Apɛlɛs, a le tswī á légɛ, yí chʉʉ́ nnɛ̄t ndɛ̄tne ánɛ Klísto. Pɛ etsāʼte epuɔ mba Alistobul.

¹¹ Ńtsāʼte á Elodiɔŋ, ŋiŋ alāʼ wek. Ńtsāʼte epuɔ mba Naasis pīi é lɛtneē ánɛ Atsyapuɔ.

¹² Pɛ etsāʼte á Tlifɛ́ne pɔ́ Tlifóze. Pɔ́ ke tséŋ aziʼne á leghʉ afaʼ á mbū Atsyapuɔ. Pɛ etsāʼte á Pɛɛsida, á mbɔŋ esoó ga eyi menzwí, a ke tséŋ aziʼne tɛʼ, á leghʉ afaʼ á mbū Atsyapuɔ.

¹³ Pɛ etsāʼte á Lufus, á mbɔŋ mía ŋgaŋ afaʼ Atsyapuɔ, ńtsāʼte á mɛ́ wɔp, a á mbū meŋ, ńzéŋ ŋgɔ́ páʼ mɛ́ ga lā.

¹⁴ Pɛ etsāʼte á Asinklit, mbɔɔ Flegɔŋ, mbɔɔ Ɛɛmɛs, mbɔɔ Patlobas, ŋ́ghʉ̄ á Ɛɛmas pɔ́ a epɔ̄ memía pīi, pɔ́ a pɔ́p é gɛ ncúʼtɛ.

¹⁵ Pɛ etsāʼte á Filologe pɔ́ Juli, mbɔɔ Nele pɔ́ méŋ mɔ́ yi éyi menzwí. Ńtsāʼte á Olɛmpas pɔ́ a epuɔ Ndém metsem pīi, pɔ́ a pɔ́p é gɛ ncúʼtɛ.

¹⁶ Pɛ etsāʼte mennɛ̄t mɛ́ nzeŋne zeŋné, ésēŋte awɔ́ ŋiŋ lɛ́ á nnɔ pɛ á mbɔŋɔ́. Elúŋ epuɔ Klísto ntsem, é tsaʼte á wɛ́.

Pɔ́ɔl á ega ŋgyáa á nzoknzem ntekné

¹⁷ Epɔ̄ memía, meŋ á si ntswɛ̄tɛ á wɛ́ ŋ́gɛ, pɛ epá megaŋ aŋwaŋ, pɔ́ gɔ elɔ̄ɔk á lelʉɔ̄ʼ anu zīi, mɛ́ le ziʼné á wɛ́, ŋ́ghʉ̄ tɛ pɛ efāa nzhɛ. Pɛ ekʉ̄ á wɔ́p.

¹⁸ Ntií epuɔ jʉɔ mɛ́t, é páʼā, pɔ́ té ŋghʉ̄ɛ afaʼ á mbū Klísto Atsyapuɔ yímpɛ ɛ́, pɔ́ lɔkɔ áa levem tsɔ́p nzīŋɛ. Pɔ́ lɔɔ̄k meleté eshuŋne, pɔ́ meshuŋne á lelɔk ndʉ̄te epuɔ, ḿbɔ̄pte wɔ véŋ véŋ.

¹⁹ Epuɔ metsem é si nzhɛ́ɛ páʼ, pɛ juúʼ nchu Atsyapuɔ. A épúp tɛ́, ntē gá é si ŋgáŋtɛ melaʼ mɛ́. Meŋ á si ŋké ntsáa ŋ́gɛ, pɛ ewɛ̄ azhɛ̄‑anu, á lelɔk ŋghʉ̄ anu mbɔŋ, ŋ́gɔ́ efʉʼ metsem, ŋ́kʉ̄ anu tepɔŋ.

²⁰ Á cʉʉ́ʼ á méŋ afʉʼ, Ndém, á ŋwɛ́t apwɛne, a eghʉ̄, Sɛ́ta a epú ndákne, pɛ ezīŋte ánɛ yí. Ŋ́gɛ Atsyapuɔ yímpɛ Yɛɛ́so, a elɛ̄ ŋghʉ̄ anu mbɔŋ té ndhʉ ánɛ pɛ.

²¹ Timotɛ esoó afaʼ ga, a á tsaʼte á wɛ́, mbɔɔ Lusius, ŋ́ghʉ̄ á Jazɔŋ pɔ́ Sosioatlos, épuɔ alāʼ pék.

²² Meŋ Tɛɛtius, meŋ á tsaʼte á wɛ́ ánɛ lezēŋ Atsyapuɔ, á gá yīi, meŋ tswítɛ á Pɔ́ɔl, á letī akɛtte jʉɔ.

²³ Ŋgayus, á ŋiŋ yīi a kóknɛ á gá á mba yí, mbɔ alúŋ epuɔ Yɛɛ́so á gɛ ncúʼtɛ á mba yí, a á tsaʼte á wɛ́. Elaste, á efeŋ‑ŋkāp tésɔŋ, a á tsaʼte á wɛ́, mbɔɔ Kaatus á méŋ mɔ́ yímpɛ. [

²⁴ Ŋ́gɛ Atsyapuɔ yímpɛ Yɛɛ́so Klísto, a elɛ ŋghʉ̄ á anu mbɔŋ té ndhʉ ánɛ pɛ metsem. Á épúp.]

Pɔ́ɔl á ega ŋgūʼtɛ á Ndém, ńdɔkɔ nzōko

²⁵ Awuʼte a egɔ́ á mbū Ndém. Yí mé kuūʼ á leghʉ, lefɛ̄ nnɛ̄t wɛ á tswhí ŋgʉ̄ɔ mé mvhɔ, páʼ ŋke mbɔŋ yīi, meŋ tswii, é si ndʉ́ɛ́ épúp. Ŋ́ke yīi meŋ sáʼa eshúŋɔ epuɔ ánɛ Yɛɛ́so Klísto. Ńzéŋ ŋkūʼ á leghʉ, lefɛ̄ nnɛ̄t wɛ á tswhí ŋgʉ̄ɔ mé mvhɔ, páʼ ntsem zīi, Ndém a le sīā, ŋ́ghʉ̄ ḿpɛ zhɛ́, e leé épúp. Ntsem mɛ́t, Ndém a le lʉɔ̄ tɛ efhó tɛ meŋguʼ meŋguʼ.

²⁶ Á ké ŋgɔ́ tsetsɔŋɔ, mbɔ meŋwaʼne metswi‑ŋke Ndém, é lē ŋghʉ, ntsem mɛ́t é tó á ntentā. Ndém yīi a naáŋ lemiʼɛ, a lē ntswi ŋ́gɛ, mɛ́ eghʉ̄, epuɔ elāʼ tsem, é ezhɛ́ ntsem mɛ́t. Ńzhɛ́ épúp, éfɛ́ nnɛ̄t ŋgyá mé yí, ńjúʼ nchu yí.

²⁷ Ḿpɛ etsīa á nzem Yɛɛ́so Klísto, ŋ́gyá á awuʼte á mbū Ndém, á kwaʼ ŋgaŋ azhɛ̄‑anu, ŋ́ghʉ̄ épúp á meŋguʼ meŋguʼ. Á páʼa.