Lomɛŋ 15 - Eka Eswhī

Ntií zīi epuɔ Yɛɛ́so é pɔŋteé á lelɔk nnáŋ

¹ Pek pīi pek teteē ánɛ lefɛ̄ nnɛ̄t ŋgyá á mbū Yɛɛ́so, pek pɔŋteé á lepʉ̄ʼte epuɔ pīi, pɔ́ é si ŋkáa ánɛ lefɛ̄ nnɛ̄t, ŋ́gē eghʉ épúp, pek é le ghʉ̄ ajū mīi, á pɔŋ áa wék ɛ́.

² Awɔ́ ŋiŋ nnɔ yímpɛ lɛ́, a pɔŋteé á leghʉ ajū mīi á pɔŋ emɔ̄ʼ epuɔ, ájū mīi á mbɔŋ á mbū pɔ́p, étswíte á wɔ́p á lelɔk lefɛ̄ nnɛ̄t wɔp, ŋgʉ̄ɔ mé mvhɔ.

³ Klísto a lɛ te ghʉ̄ á ajū mīi á pɔŋ áa yí méŋwɛ̄t ɛ́. A cʉ́ʼɛ épúp, mbɔ mɛ́ le tí á ntē aŋwaʼne Ndém ánɛ yí ŋ́gɛ: «Azɔte zīi mɛ́ le lɔ̄k nzɔte á wú, á le soʼné áa athū meŋ. »

⁴ Ajūɔ tsem zīi mɛ́ le tí á ntē aŋwaʼne Ndém, tɛ efhó tɛ efʉʼ, mɛ́ le tíī, ńdɔkɔ ntékɛ á yímpɛ, tɛ́ ḿpɛ ezápa ánɛ menu mīi mɛ́ le tí á ntē aŋwaʼne mɛ́t, ŋ́kāk ete, ŋ́kwɛ́t ntē ndɔk nzwíʼte ajū mīi, ḿpɛ é si ntsáa, ńnɔŋ nzhɛ́ɛ á légɛ, ḿpɛ e láʼ ewɛ.

⁵ Ŋ́gɛ Ndém yīi, a yaá á lekak ete, ŋ́gyá á lekwɛ̄t ntē, a elɛ ŋghʉ̄, pɛ enáŋ, ŋ́gɔ́ á taʼ nchu á nnɔ pɛ, páʼ Yɛɛ́so Klísto a kɔɔ̄ŋ épúp.

⁶ Púp, ńdɔ̄k á taʼ ntē, ńdɔ̄k á taʼ nchu, ŋ́gūʼte á Ndém, á Mɔʼɔ́ Atsyapuɔ yímpɛ Yɛɛ́so Klísto.

Klísto a lɛɛ́ eshʉʼɛ á ŋgɔŋ, melaʼ epuɔ metsem

⁷ A épúp tɛ́, pɛ ekókne mennɛ̄t mɛ́ nzeŋne zeŋné, ńdeŋ ndeŋ páʼ, Klísto á le kokné á wɛ́ épúp, ŋ́ghʉ̄ épúp, ńdɔk ŋgūʼte á Ndém.

⁸ Meŋ ndɔkɔ eshúŋɔ á wɛ́ á anuúnē á légɛ, Klísto a le cʉ́ʼ ŋkwa epuɔ Yúda páʼā, tɛ́ ndɔk ŋghʉ̄, melaʼne mīi Ndém a le ghʉ̄ á mbū wɔ maŋgānjʉʼ pek, é po, ńzéŋɛ ndɔkɔ ntswīi á légɛ, Ndém a á te sɛt nzem.

⁹ A lɛɛ́ eshʉʼɛ á ŋgɔŋ páʼā, ńzéŋɛ ndɔkɔ efāʼa ŋ́gɛ, epuɔ pīi é té epuɔ Yúda á, e ewūʼte á Ndém, melaʼ atsāmezeŋɛ zīi, Ndém a wɛɛ̄ ánɛ epuɔ. Á lɔk ŋgɔ́ páʼ, mɛ́ le tí á ntē aŋwaʼne Ndém ŋ́gɛ: «É melaʼ épúp tɛ́, meŋ a shʉʼɛ ewuʼtɛ á wú, á tsetsɛlɛ epuɔ pīi é té epuɔ Yúda á, meŋ a shʉʼɛ ezɔpɔ, élɔkɔ ewuʼtɛ á wú. »

¹⁰ Mɛ́ zeéŋ ntí éwú ŋ́gɛ: «Epuɔ pīi é té epuɔ Yúda á, pɔ́ a epuɔ alāʼ Atsyapuɔ Ndém, e epúte ŋkák. »

¹¹ Ńzéŋ ntí éwú ŋ́gɛ: «Epuɔ metsem pīi é té epuɔ Yúda á, pɛ eyá lepɛ á mbū Atsyapuɔ. Elāʼ ntsem e ezɔ̄p, ńdɔk ŋgūʼte á Atsyapuɔ. »

¹² Izayi ntswi‑ŋke Ndém a le lé azí ŋ́gɛ: «Emɔ̄ʼ ŋiŋ a shʉʼ etó ánɛ nzwɛt Jese, éshʉʼ esáʼ elāʼ epuɔ pīi, é té epuɔ Yúda á. Pɔ́ emāʼ ŋgua zɔp, ŋgyá á mbū yí. »

¹³ Meŋ á si eswíŋtɛ ŋ́gɛ, Ndém, páʼ ḿpɛ zwiʼteé ajūɔ tsem áa mbū yí lā, a elɛ efhó ánɛ páʼ pɛ fɛɛ́ nnɛ̄t ŋgyá á mbū Klísto lā, ŋ́ghʉ̄, lekāk pɔ́ apwɛne e egɔ́ á ntē pɛ tɛ ndó. Tɛ́ mete Azwakne zí, é eghʉ̄, pɛ ecuŋte nzwíʼte ajū mīi, a le laʼnē á leyā á mbū pɛ.

Pɔ́ɔl a á si ŋgɔ́ á ŋgaŋ afaʼ Ndém á mbū epuɔ pīi é té epuɔ Yúda á

¹⁴ Epɔ̄ memía pá, meŋ á si ncuŋtɛ nzhɛ́ɛ azō ánɛ pɛ, á gɔ́ á légɛ, pɛ é megaŋ ntē mbɔŋ. Ńzhɛ́ á ajū mīi, mɛ́ pɔŋteé á lezhɛ̄, tɛ ntsékne. Ŋ́kūʼ pīi, pɛ gɔ etékne mennɛ̄t mɛ́ nzeŋne zeŋné.

¹⁵ Meŋ nde nɔ̄ŋ nzhɛ́ɛ épúp, tɛ́ ŋké ntí té lʉɔ amɔ̄ʼ azō, ánɛ emɔ̄ʼ mejʉʼ á ntē mekɛtte má, ńdɔk ŋkímte á wɛ́ á ajū mīi, mɛ́ lē ndáʼ nzíʼne á wɛ́. Meŋ nde gē etí épúp, éfhɔ́ɔ ánɛ apɔŋɔ́ ntē te ndhʉ zīi, Ndém a le wɛ̄ ánɛ meŋ.

¹⁶ Á gɔ́ páʼ, a le lɔ̄k á gá ŋghʉ̄ á ŋgaŋ afaʼ Yɛɛ́so Klísto, á mbū epuɔ pīi é té epuɔ Yúda á. Ńchʉ́ á gá ŋ́gɛ, meŋ etswī ŋke mbɔŋ Ndém, tɛ́ Azwakne Ndém a eghʉ̄, epuɔ pīi é té epuɔ Yúda á, e ecʉ́ʼ páʼ epɔʼ yīi, mɛ́ é yá á mbū Ndém, tɛ é pɔŋ á yí lā.

¹⁷ Páʼ meŋ ndɛtneē ánɛ Yɛɛ́so Klísto lā, meŋ mbɔŋteé á gá á lekaʼte, melaʼ afaʼ zīi, meŋ ghʉɛ ŋgyáa á mbū Ndém.

¹⁸ Meŋ ŋaʼaá nchu gá, ńdɔk eshúŋ áa ajū mīi, Klísto a le zapá ánɛ meŋ ŋghʉ̄, tɛ́ epuɔ pīi é té epuɔ Yúda á, é júʼ nchu Ndém. A le zapá ánɛ meshuŋne má, mbɔɔ ánɛ ega leghʉ, tɛ́ ŋghʉ̄ épúp.

¹⁹ Ńzápa ánɛ páʼ Azwakne Ndém á le yá á gá mete, á lelɔk ŋghʉ̄ mendajʉ́ɔ menu, mbɔɔ meyiŋne menu mīi, é tswii mete Ndém, tɛ́ ŋghʉ̄ épúp. Púp, meŋ zīi, á Yelósalɛm, ńtɔ́kte nchʉ́ nnɛ̄t ntswī ŋke mbɔŋ ánɛ Klísto, tɛ ŋkó á apak ŋgɔŋ Ilili.

²⁰ Táʼ, meŋ nde ké ŋkɔ̄ŋ á letswi ŋke mbɔŋ áa ánɛ ejʉʼ tsīi, mɛ́ laá nzi ŋkím lezēŋ Klísto éwú ú, ḿbɔ́k á gá lekwɛ̄t ŋgyā, ánɛ atseŋ zīi, mmɔʼ ŋiŋ mé le nɔ̄ŋŋ̄.

²¹ Ŋ́ghʉ̄ɛ épúp, ńdɔkɔ nzīŋɛ ánɛ mekhu aŋwaʼne Ndém. Á leé ŋ́gɛ: «Epuɔ pīi mɛ́ lɛ te shúŋ á wɔ́p anu ánɛ yí í, e láʼ ejʉ́ɔ á yí. Epuɔ pīi é lɛ te júʼ á leshūŋ anu ánɛ yí í, e láʼ ejúʼe. »

Pɔ́ɔl a á ega eshúŋɔ páʼ, yí é si ŋkwāŋtɛ á lewūa epuɔ Lóma

²² Á páʼa ŋgɔ́ á ajū mīi, á lé zii mvɛ́ne á gá ŋgʉɔ tɛ nzáne, á leshʉʼ á alāʼ pɛ.

²³ Á ké mbīŋ ŋgɔ́ tsetsɔŋɔ páʼā, mbɔ meŋ á mak afaʼ zá ánɛ elāʼ tsīi, é eshhʉ̄ ega. Páʼ á gɔ́ meŋguʼ tɛ nzáne, meŋ nɔ̄ɔŋ ntsáa á gá á leshʉʼ á alāʼ pɛ lā,

²⁴ meŋ á jʉ́ɔ ŋ́gɛ, meŋ a shʉʼ enɔŋ egʉɔ mé alāʼ epuɔ Apaŋyáŋ, éshʉʼ á alāʼ pɛ. Meŋ á si ntsáa á gá á leshʉʼ ŋgē egʉɔ mé éwú, ńtsia tɛ njʉ́ɔ á wɛ́, pɛ emāʼ mvēŋ ánɛ meŋ, ńdɔk ntswíte á gá á legʉɔ tɛ ŋkó éwú. Mbɔ meŋ á jhʉ́ apɛ ánɛ páʼ, ḿpɛ é náʼ nnáŋ.

²⁵ Á ké mbiŋ ŋgɔ́ tsetsɔŋɔ, meŋ nɔŋ ŋgʉ̄ɔ mé Yelósalɛm, á ntswíte epuɔ Ndém pīi é éwú.

²⁶ Á gɔ́ páʼ, epuɔ Yɛɛ́so pīi é apak ŋgɔŋ Maseduan mbɔɔ á apak ŋgɔŋ Akayi, é ke jʉ́ɔ ŋ́gɛ á mbɔŋ, á lemaʼ ncup ndɔ̄k ntswíte epuɔ Ndém pīi, é Yelósalɛm, ŋ́gɔ́ wɔ te kuʼ ánɛ azō.

²⁷ Pɔ́ méŋwɛ̄t mé le jʉ́ɔ ŋ́gɛ, á mbɔŋ épúp. Á zi ŋgɔ́ anuúnē, pɔ́ a pɔ́p é pɔɔ́ŋ njú, melaʼ mīi epuɔ Yɛɛ́so pīi, pɔ́ é epuɔ Yúda, é le tswité á wɔ́p á lezhɛ̄ anu Ndém, pɔ́ piŋ mbɔ́ŋte á leyā azō, ńdɔk ntswíte á wɔ́p azɔ́p.

²⁸ Meŋ a shʉʼ emak ajʉɔ anu mɛ́t, tɛ ecuŋte eyá ajū mīi mɛ́ ke cūpē, égē egʉɔ mé alāʼ epuɔ Apaŋyáŋ, étsia á alāʼ pɛ.

²⁹ Meŋ á si ncuŋtɛ nzhɛ́ɛ á légɛ, meŋ a shʉʼ eshʉʼ tɛ ekó á alāʼ pɛ, mbwɛ́né zīi é fhɔ́ɔ á mbū Klísto, e efūʼte ánɛ pɛ.

³⁰ Meŋ á si ŋké ntsīa ánɛ Atsyapuɔ yímpɛ Yɛɛ́so Klísto, mbɔɔ ánɛ ŋkɔŋne zīi é fhɔ́ɔ á mbū Azwakne Ndém, ńzɛ́tɛ á wɛ́ me epɔ̄ memía, ŋ́gɛ: pɛ eswíŋte á Ndém á athū meŋ, ḿpɛ elɔ̄k épúp, ḿbúte ndʉɔ́ʼ.

³¹ Pɛ eswíŋte ŋ́gɛ Ndém a lɛ ŋghʉ̄, meŋ evūʼu á mbū wɔ te fɛ́‑nnɛ̄t ŋgyá á mbū Klísto pīi, é apak ŋgɔŋ Yudéa. Ŋ́gɛ a eghʉ̄, epuɔ Ndém pīi é Yelósalɛm, e elɛ ntswí ncup jʉɔ zīi, meŋ ndɔkɔ mé éwú la, mé taʼ ntē.

³² Púp, ŋ́gɔ́ éyi, Ndém a véŋɛ, meŋ shʉ̄ʉʼ á alāʼ pɛ, ŋ́gē eshʉʼe, ntē gá é nɔŋ ŋgáŋtɛ. Meŋ enáʼ eswíte á alāʼ pɛ.

³³ Ŋ́gɛ Ndém, á ŋwɛ́t apwɛne, a egɔ́ mé pɛ metsem. Á épúp.