Lomɛŋ 14 - Eka Eswhī

Ŋiŋ Yɛɛ́so a te pɔŋté á lethū alɔ́ʼ mmɔʼ tɛ mbá á yí í

¹ Pɛ etswí á ŋiŋ yīi a á si mbwɛ́tɛ á ánɛ lefɛ̄ nnɛ̄t ŋgyá á mbū Klísto, ńnéŋ á nnɔ pɛ. Ndɛ́ʼ pɛ a pɔ́p é ŋak ánɛ ezi ntií lekwaŋte anu.

² Lefɛ̄ nnɛ̄t mmɔʼ ŋiŋ ŋgyá á mbū Klísto, a shuúŋ á yí á légɛ, á gɔ epú mpfɛ́t etsō tsem. Lefɛ̄ nnɛ̄t mmɔʼ ŋiŋ á ká, tɛ eshúŋ á yí ŋ́gɛ, a gɔ le mbap pfɛ́t.

³ Ŋiŋ yīi a pfɛɛ́t etsō tsem, a te pɔŋté á leŋyaŋne á ŋiŋ yīi, a gɛ te mpfɛ́tɛ mbap á ā. Ŋiŋ yīi, a piīŋ te mbap pfɛ́t, a te pɔŋté á lethū alɔ́ʼ ŋiŋ yīi a pfɛɛ́t etsō tsem, tɛ mbā á yí í, melaʼ mīi Ndém á veéŋ á ŋgaŋ azí.

⁴ O ó páʼa ŋgɔ́ áa awɔ́, tɛ nthúɔ alɔ́ʼ ŋgaŋ afaʼ ŋiŋ ndɛʼɛ, tɛ mbāa á yí í? A faa lo, ŋ́gɔ́ te fāa lo, á cʉte áa mɔʼɔ́ afaʼ yi. Á páʼā ŋgɔ́ éyi, ŋgaŋ afaʼ Atsyapuɔ, a gɔ le gē eghʉ épúp, ńdɔkɔ efāa, melaʼ mīi Atsyapuɔ á pɔɔ́ŋ mete á lelɔk ntɔ́te á yí, tɛ a á le fāa.

⁵ Emɔ̄ʼ epuɔ é kwaāŋ ŋ́gɛ, emɔ̄ʼ meleʼé alāʼ é tsyaā emɔ̄ʼ. Emɔ̄ʼ epuɔ é kwaŋ azɔ́p ŋ́gɛ, eleʼé alāʼ ntsem, é puú ŋgɔ́ áa taʼ azō. Ŋiŋ a ké nnɔ̄ŋ ŋkwāŋa ánɛ eziɛ́ ntií lɛ́, á cuŋte nzhɛ́ ajū mīi a kwaŋa.

⁶ Ŋiŋ yīi a kwaāŋ ŋ́gɛ, emɔ̄ʼ meleʼé alāʼ é tsyaā emɔ̄ʼ, a ghʉʉ̄ épúp páʼā, ńdɔkɔ ŋgūʼtɛ áa Atsyapuɔ. Ŋiŋ yīi a pfɛɛ́t etsō tsem, a ghʉʉ̄ épúp páʼā, ńdɔkɔ ŋgūʼtɛ áa Atsyapuɔ. Á páʼā, á lɔkɔ esyáknɛ á Ndém melaʼ etsō mɛ́t. Ŋiŋ yīi a te etsō tsem pfɛ́t, a ghʉʉ̄ épúp páʼā, ńdɔkɔ ŋgūʼtɛ áa Atsyapuɔ. Á páʼā á lɔkɔ esyáknɛ azí á Ndém.

⁷ Tsɔ ŋiŋ á nnɔ pímpɛ mé té kɔŋ nnáŋ á ŋgɔŋ ɔ́, ŋiŋ méŋwɛ̄t mé piŋ te kɔ̄ŋ ŋkwhʉ́ ɛ́.

⁸ Ḿpɛ naáŋ á ŋgɔŋ páʼā, ŋ́gɔ̄ áa ŋguʼtē Atsyapuɔ. Ŋ́kwhʉ́ɛ páʼā, ŋ́gɔ̄ áa ezéŋ ewuʼte á yí. Ńdɔkɔ ŋ́gɛ, a zi ŋgɔ́ éyi, ḿpɛ e náŋ á ŋgɔŋ lo, ŋ́gɔ́ éyi, ḿpɛ e kwhʉ́ lo, mbɔ ḿpɛ é gɔ́ áa epuɔ Atsyapuɔ Yɛɛ́so Klísto,

⁹ melaʼ mīi a le kwhʉ́ʉ̄, ńzéŋ nzím ánɛ lewhʉ̄ páʼā, ńdɔkɔ ŋgɔ́ á Atsyapuɔ á mbū mepfhō, mbɔɔ á mbū epuɔ mete.

¹⁰ Ḿbiŋ ŋgɔ́ mé wu, mbɔ melaʼ akɔ̄, o piŋɛ nthúɔ alɔ́ʼ méŋ mɔ́ wu, tɛ mbāa á yí í? Ŋ́gɔ́ mé wu, mbɔ melaʼ akɔ̄, o piŋɛ ŋŋyāŋnɛ á méŋ mɔ́ wu ú? Á páʼā, ḿpɛ metsem e eláʼ ntshí á mvhɔ Ndém, a ezáʼ ntsaŋ awíɛ awíɛ.

¹¹ Atsyapuɔ Ndém a lée á ntē aŋwaʼne yí ŋ́gɛ: «Meŋ á si ŋgɔ́ á Ndém, ńnáŋ nte, epuɔ metsem e láʼ etswíʼte á mvhɔ meŋ, éwuʼte á gá. Epuɔ metsem e láʼ eshúŋ á mvhɔ alāʼ á légɛ, meŋ mé si ŋgɔ́ á Ndém. »

¹² Púp, awɔ́ ŋiŋ nnɔ yímpɛ lɛ́, mé e láʼ etshí á mvhɔ Ndém, éshúŋ yí méŋwɛ̄t, páʼ meziŋɛ́ mí é lɛ épúp.

Ndɛ́ʼ ŋiŋ á ghʉ méŋ mɔ́ yi á kwate

¹³ Púp, ndɛ́ʼ ḿpɛ ezéŋ nthúne melɔ́ʼ, tɛ mbā á ŋiŋ. Pɛ enéŋ á ntē pɛ, á legɔ̄ le ghʉ̄ ajū mīi, á gɔ eghʉ̄ʉ, méŋ mɔ́ wɛ á kwate, ká ŋgwhʉ̄ á ntē mefa á.

¹⁴ Atsyapuɔ Yɛɛ́so á lē ŋghʉ, meŋ ecuŋte nzhɛ́ á légɛ, amɔ̄ʼ ajū mīi á lɛ̄ɛ ŋgɔ́ ajūɔ epe, á té éwú ú. Táʼ, ŋiŋ a ké njʉ́ɔ ŋ́gɛ, epe é ánɛ azō, azō mɛ́t, á lɛ nzéŋ ncʉ́ʼ ajūɔ epe á mbū yí.

¹⁵ A gɔ́ éyi, ecū mīi o pfɛ́tɛ, é gɔ eghʉ̄ʉ, méŋ mɔ́ wu á ká ánɛ lefɛ̄ nnɛ̄t, mbɔ o pfɛɛ́t épúp páʼā, ńdɔkɔ te nzɛ́t ŋkɔ̄ŋɔ á yí í. Pá á wú á lelɔk ajū mīi o pfɛ́tɛ, ŋ́ghʉ̄, ŋiŋ yīi Klísto a le kwhʉ́ melaʼ mí, á lákne.

¹⁶ Ndɛ́ʼ pɛ eghʉ̄ʉ, ajū mīi á mbɔŋ á mbū pɛ, á ghʉ, epuɔ é shúŋne té pɔŋ ánɛ pɛ,

¹⁷ melaʼ mīi, Lefɔ Ndém é té si ŋgɔ́ anu etsō lejhʉ̄ pɔ́ anu meluʼ ɔ́. É si ŋgɔ́ á lecʉ̄ʼ, Azwakne Ndém á ghʉ, mɛ́ lɔk á ndeŋ ndeŋ nnáŋ, ńnáŋ mé apwɛne, ńnáŋ mé lekāk.

¹⁸ Ŋiŋ a ge eghʉ afaʼ Klísto, ŋ́gwɛ̄ ntií atswhī jʉɔ mɛ́t, mbɔ á pɔŋ á Ndém, epuɔ menɔŋ e ekɔ̄ŋte á yí.

¹⁹ Púp, ḿpɛ efāʼ á ajū mīi á gɔ eghʉ̄ʉ, ḿpɛ enáŋ mé apwɛne, ńtswíte á yímpɛ á letswaŋ mbū, ńdɔ̄k á yímpɛ á lefɛ̄ nnɛ̄t ŋgʉɔ mé mvhɔ.

²⁰ Ndɛ́ʼ pɛ eták afaʼ Ndém, melaʼ anu, ánɛ etsō lejhʉ̄. Á anuúnē á légɛ, mɛ́ gɔ epú mpfɛ́t etsō tsem. Táʼ, á ka pɔ̄ŋ ŋ́gɛ, ŋiŋ a epfɛ́t etsō lejhʉ̄ tsīi, é gɔ eghʉ̄ʉ, taʼ méŋ mɔ́ á whʉ á ntē mefa á.

²¹ Ajū mīi á mbɔŋ, á si ŋgɔ́ á legɔ̄ le mbap pfɛ́t, á legɔ̄ le meluʼ nú, á legɔ̄ le ghʉ̄ ajū mīi, á gɔ eghʉ̄ʉ, méŋ mɔ́ á kwate ŋgwhʉ̄ á esī í.

²² Kúʼte anu zīi o ó si nzhɛ́ɛ ánɛ anu jʉɔ mɛ́t á ntē wu, pɛ Ndém mé ezhɛ́. Eshhʉ̄ mbɔŋ a á si ŋgɔ́ á ŋiŋ yīi, ntē yí é té si ŋŋāka á yí, ánɛ anu zīi, a á sáŋ tɛ njʉ́ɔ ŋ́gɛ, á mbɔŋ á leghʉ ɛ́.

²³ Táʼ, ŋiŋ a ge epfɛ́t azō, ntē yí e nɔ̄ŋ ŋŋāka á yí, mbɔ Ndém a a tswá á yí ŋgʉɔ athʉ́ lepé, melaʼ mīi a ka ghʉ̄ páʼ lefɛ̄ nnɛ̄t yi ŋgyá á mbū Klísto, a á si nzɛ́ttɛ ŋ́gɛ, a eghʉ̄ épúp ɔ́. Ŋiŋ a piŋɛ ŋghʉ̄ azō, té gɔ́ yīi, lefɛ̄ nnɛ̄t ŋgyá á mbū Klísto, a á si nzɛ́ttɛ ŋ́gɛ, a eghʉ̄ épúp, mbɔ ŋgaŋ a á fa.