Lomɛŋ 13 - Eka Eswhī

Epuɔ Yɛɛ́so é pɔŋteé á lejūʼ nchu wɔ sáʼ‑ŋgɔŋ

¹ Awɔ́ ŋiŋ lɛ́, a pɔŋteé á lejūʼ nchu epuɔ pīi é sáʼa alāʼ. Ŋiŋ a gē esáʼ á alāʼ páʼā, á fhó áa mbū Ndém, epuɔ pīi é piŋɛ esáʼa, mbɔ Ndém mé nchʉ́ á wɔ́p.

² Púp, ŋiŋ yīi a á te nchu wɔ sáʼ‑alāʼ júʼ, a á páʼā ndɔkɔ te nzīŋɛ ánɛ mɛnzhɛ yīi, Ndém a le kīā ā. Wɔ tʉɛ‑athū á mbū wɔ sáʼ‑alāʼ, é páʼā ndɔkɔ mbíɛ́ á kwáŋ atʉɛ́, ńnéŋɛ á ntɔ̄ŋ pɔ́p méŋwɛ̄t.

³ Ŋiŋ a nɔɔ̄ŋ nziŋɛ ndeŋ ndeŋ páʼā, a te wɔ sáʼ‑alāʼ pɔ́k. Epuɔ pīi meziŋɛ́ mɔ́p é té pɔŋ, mé pɔɔ́k á wɔ́p. O nɔŋ te ŋkɔ̄ŋɔ á wú á lepɔ̄k wɔ sáʼ‑alāʼ á, o ezīiŋ ndeŋ ndeŋ. O ghʉɛ épúp, mbɔ pɔ́ e kɔŋte á wú.

⁴ Pɔ́ é páʼā, ńnɔŋ ŋghʉ̄ɛ áa afaʼ Ndém, ńdɔkɔ ntshónɛ á wú á leziŋ ndeŋ ndeŋ. Meziŋɛ́ mú é piŋɛ ŋgɔ́ té pɔŋ, o epɔ́k á wɔ́p. Á té ndémndēm tɛ́, pɔ́ wɛɛ̄ ŋgʉɔ athʉ́ lepé ɛ́. Pɔ́ gē etswá á ŋiŋ ŋgʉɔ athʉ́ lepé páʼā, ńdɔkɔ ŋghʉ̄ɛ áa afaʼ Ndém, ńdɔkɔ ntswīi azāŋalɔ́ŋ Ndém, ánɛ ŋiŋ yīi, meziŋɛ́ mí é té pɔŋ.

⁵ Melaʼ épúp tɛ́ á mbɔŋ, á lejūʼ nchu wɔ sáʼ‑alāʼ. O ó le njúʼɔ épúp páʼā, ńdiɛ ndɔ̄kɔ mbɔ́kɔ áa azāŋalɔ́ŋ Ndém ɛ́, o ejúʼu épúp melaʼ mīi, ntē wú é si nzi mvéŋɛ ŋ́gɛ, o eghʉ̄ épúp.

⁶ Á melaʼ épúp tɛ́, pɛ pɔŋteé á lemaʼ ncup alāʼ. Wɔ tswí‑ncup é páʼā, mbɔ Ndém mé le zapá á wɔ́p, ŋ́gɛ pɔ́ ecuŋte ŋghʉ̄ afaʼ mɛ́t, páʼ lepé é si nzɛ́ttɛ.

⁷ Pɛ eyá á mbū awíɛ awíɛ, á ajū mīi mɛ́ pɔŋteé á leyā á mbū yí. Ńdɔkɔ ŋ́gɛ, pɛ eyá á ntií ntiī ncup, á mbū epuɔ pīi, mɛ́ pɔŋteé á leyā á mbū pɔ́p. Ńtsɔ́ʼ á acɔʼ á mvhɔ ŋiŋ yīi, mɛ́ pɔŋteé á letsɔ̄ʼ á mvhɔ yí. Ŋ́ghʉ̄ mekuʼ ŋiŋ yīi, mɛ́ pɔŋteé á leghʉ mekuʼ mí.

Epuɔ Yɛɛ́so é pɔŋteé á lekɔŋne mennɛ̄t mɔ́p nzeŋne zeŋné

⁸ Ndɛ́ʼ ŋiŋ á wɛ njú á mbū ŋiŋ, té gɔ́ áa ŋkɔŋne. Pɛ ekɔ̄ŋne mennɛ̄t mɛ́ nzeŋne zeŋné. Ŋiŋ yīi, a kɔɔ̄ŋ emɔ̄ʼ epuɔ lā, a á páʼā, ńdɔkɔ ŋkúʼtɛ lepé Ndém tɛ ntséknɛ.

⁹ Á páʼa, mbé Ndém mīi é leé ŋ́gɛ: «Ndɛ́ʼ ŋiŋ á láʼ aleʼé ŋghʉ̄ agā. Ndɛ́ʼ ŋiŋ á zwhí á ŋiŋ. Ndɛ́ʼ ŋiŋ á jʉ. Ndɛ́ʼ ŋiŋ á tshí ntē ánɛ ajūɔ ŋiŋ». Mɛ́ pú ŋkwɛ́t methū mbé muɔ mɛ́t, mbɔɔ emɔ̄ʼ, ńdé ŋ́gɛ: «Ŋiŋ a ekɔ̄ŋ á ŋiŋ ntsem, páʼ athū nnɛ̄t zí méŋwɛ̄t. »

¹⁰ Ŋiŋ a lɔɔ̄k ŋkɔŋne nnáŋ páʼā, ŋ́gɔ́ yīi, á gɔ le ghʉ̄ á anu tepɔŋ ánɛ ŋiŋ ɛ́. Lenāŋ mé ŋkɔŋne á páʼā, ńdɔk ŋgɔ́ á lekūʼte lepé Ndém tɛ ntsékne.

Ḿpɛ ecūŋte lenāŋ tsímpɛ, ńdɔk nzwíʼte á lepiŋ nzem Klísto

¹¹ Páʼ pɛ é si ncuŋtɛ nzhɛ́ɛ afʉʼ alāʼ zīi, ḿpɛ é éwú lā, tsetsɔŋɔ á si ŋgɔ́ á afʉʼ zīi, ŋiŋ a te pɔŋté á lezēŋ ndí í. Afʉʼ zīi Ndém a gɔ eghʉ ḿpɛ etswɛ́t, á tshóte mbáte, tɛ ntɔ́k afʉʼ zīi, ḿpɛ le zɛ́t nzii á lefɛ̄ nnɛ̄t ŋgyá á mbū Yɛɛ́so.

¹² Etsōʼ a á zii ntɔ́k, njhʉ̄ é si ŋgɔ̄ á ndáa. Púp, ḿpɛ ewáʼ menu nzém, ḿbɛ́ á tsitsi ncu yīi mɛ́ lɔkɔ ndʉɔ́ʼɔ, afʉʼ zīi ejʉʼ é si efóko.

¹³ Ḿpɛ elɔ̄k á ndeŋ ndeŋ nnáŋ, páʼ wɔ ziŋ‑azokó é naáŋ épúp. Ḿpɛ epá agege ánɛ ajūɔ tsem. Ndɛ́ʼ ḿpɛ ezá agege ánɛ etsō lejhʉ̄, ndɛ́ʼ ḿpɛ egɔ́ wɔ núnú‑meluʼ, ndɛ́ʼ ḿpɛ egɔ́ megaŋ agā, ndɛ́ʼ ŋiŋ á wɛ á mɛgap. Ndɛ́ʼ ḿpɛ ewɛ̄ɛ á tákátáká, ndɛ́ʼ ḿpɛ egɔ́ megaŋ sɛ́h ntē.

¹⁴ Á gɔ́ áa lɛ, pɛ elɔ̄k á leghʉ páʼ Atsyapuɔ Yɛɛ́so Klísto, a á si ŋkɔ̄ŋɔ épúp, ŋ́kwɛ́t etsɛ́ lenāŋ, pɛ é le néŋ athū zɛ́ ánɛ ecū mīi, mbe nnɛ̄t zɛ é si ntshónɛ á wɛ́, ŋ́gɛ pɛ ghʉɛ, á pɔŋ á wɛ́ ɛ́.