Lomɛŋ 12 - Eka Eswhī

Lenāŋ leswhī

¹ Epɔ̄ memía pá, meŋ á si eswíŋtɛ á wɛ́ ŋ́gɛ, páʼ Ndém a wɛɛ̄ atsāmezeŋɛ á mbū pímpɛ lā, pɛ epú mmāʼ ŋgua zɛ ŋgyá á mbū yí, ńdɔ̄k ewɛ legɔ̄ ntsem, ńnɔ̄ŋ epɔʼ á mbū yí. Ntií epɔʼ jʉɔ mɛ́t mé gɔ epɔ̄ŋ á yí. Pɛ ghʉɛ épúp, á gɔ́ á lewuʼte á Ndém tɛ ntsékne.

² Ndɛ́ʼ pɛ epɛ́ efʉʼ ánɛ epuɔ ŋguʼ puɔ. Pɛ ekúmne ntií lelɔk nnáŋ, ńcʉ́ʼ, Ndém a eyá á wɛ́ ntií á lelɔk ŋkwāŋ á anu leswhī leswhī, ńdɔk nzhɛ́ á leghʉ ajū mīi, a á si ŋkɔ̄ŋɔ ŋ́gɛ mɛ́ eghʉ̄. Pɛ ghʉɛ épúp, á gɔ́ mbɔŋ, á páʼa ŋgɔ́ á ajū mīi, á gɔ epɔ̄ŋ á Ndém, ŋ́gɔ́ á ajū mīi á mbɔŋ á mbū Ndém tɛ ntsékne.

³ Meŋ á lɔk páʼ Ndém a le ghʉ̄ anu mbɔŋ té ndhʉ ánɛ meŋ la, ńdé á mbū awíɛ awíɛ á tsetsɛlɛ pɛ ŋ́gɛ: ndɛ́ʼ ŋiŋ á nɛ́tte. Ndɛ́ʼ ŋiŋ á ghʉ, mɛ́ lɔk á yí ntɔ́ŋ á ajū mīi, a te aziɛ́ ɛ́. Awiɛ́ awiɛ́ a ecuŋte nzhɛ́ páʼ yí é épúp. Awíɛ awíɛ a efhó ánɛ páʼ, Ndém a le yá á yí á lefɛ̄ nnɛ̄t épúp, tɛ́ nzhɛ́ páʼ yí é épúp.

⁴ Ḿpɛ é páʼā, ŋ́gwɛ̄ áa taʼ mbe nnɛ̄t, mbe nnɛ̄t mɛ́t é wɛ mekim tɛ záne, aziɛ́ akim lɛ́, á piŋ mbɔ́ŋ azí afaʼ ntswhī.

⁵ Ndeŋ ndeŋ épúp, páʼ ḿpɛ lɛtneē ánɛ Klísto lā, á páʼa ḿpɛ elɔ̄ɔk mbú ŋgɔ̄ áa taʼ mbe nnɛ̄t, tɛ mbɔɔ páʼ ḿpɛ é tɛ nzáne lā. Ḿpɛ kʉʉ̄ŋ mbú ntemte ńcʉ́ʼ á taʼ, ńdɛ̄tne mennɛ̄t mímpɛ, páʼ aziɛ́ akim mbe nnɛ̄t lɛ́, á lɛtneē ánɛ amɔ̄ʼ lā.

⁶ Ndém a le zapá ánɛ apɔŋɔ́ ntē te ndhʉ zí, ŋ́gyá eyi nthū awiɛ́ á lelɔk ŋghʉ̄ mefaʼ mí, é tswhi. A gɔ́ éyi, eyi nthū ŋiŋ, é si ŋgɔ́ á letswi ŋke Ndém, á fhó ánɛ páʼ lefɛ̄ nnɛ̄t yímpɛ, a á si nzɛ́ttɛ ŋ́gɛ mɛ́ ezīŋ épúp, tɛ́ ntswī.

⁷ Ŋ́gɔ́ éyi, eyi nthū mmɔʼ ŋiŋ é si ŋgɔ́ á leghʉ afaʼ á mbū emɔ̄ʼ epuɔ, á ghʉ. Ŋ́gɔ́ éyi, eyi mmɔʼ ŋiŋ é si ŋgɔ́ á lezīʼne epuɔ, á zíʼne.

⁸ Ŋ́gɔ́ éyi, eyi mmɔʼ ŋiŋ é si ŋgɔ́ á lesemte epuɔ, á semte. Ŋiŋ a gɔ́ éyi, a a yá á ŋiŋ azō, á yá té sáŋ. Ŋiŋ a gɔ́ɔ á ntshi‑mvhɔ á nnɔ epuɔ, á ghʉ afaʼ zí, tɛ nzhɛ́ɛ ajū mīi a ghʉɛ. Ŋiŋ a gɔ́ɔ á tsá‑melaʼ, á lɔk lekāk tɛ́ ntsá.

⁹ Á pɔŋ ŋ́gɛ, ŋkɔŋne zīi ŋiŋ a wɛɛ̄ á mbū epuɔ, e egɔ́ ŋkɔŋne mé taʼ ntē. Awíɛ a echʉ́ nnɛ̄t ŋkʉ̄ anu tepɔŋ, ŋ́kúʼte á yí á leghʉ anu mbɔŋ.

¹⁰ Pɛ ekɔ̄ŋne mennɛ̄t mɛ́ nzeŋne zeŋné, mé taʼ ntē, páʼ epɔ̄ memía é pɔŋteé á lekɔŋne mennɛ̄t mɔ́p épúp. Pɛ ekhʉ́ne á wɛ́ á leghʉ mekuʼ á nnɔ pɛ, ńzeŋne zeŋné.

¹¹ Pɛ elɔ̄k á taʼ ntē, ńdɔ̄k akhʉne tɛ́ ŋghʉ̄ afaʼ á mbū Atsyapuɔ, ndɛ́ʼ pɛ egɔ́ melɔ́ŋ.

¹² Ajū mīi pɛ é si ntsáa, ńnɔŋ nzhɛ́ á légɛ Ndém a a láʼ eyá, pɛ egē ezwíʼte, ŋ́gɔ́ á ntē lekāk. Ŋ́kwɛ́t ntē, ánɛ afʉʼ ŋgʉɔ̄ʼ. Éswíŋte á Ndém té ká.

¹³ Pɛ etswíte epuɔ Ndém pīi, azō á mbū pɔ́p ŋkíŋɛ. Ŋ́kókne mege á ŋgyā pɛ efʉʼ metsem.

¹⁴ Pɛ elɔ́ ŋ́gɛ, Ndém a elɛ ŋghʉ̄ anu mbɔŋ, á mbū epuɔ pīi, é lʉɔ́ʼɔ á wɛ́. Pɛ elɔ́ ŋ́gɛ, a eghʉ̄ anu mbɔŋ á mbū pɔ́p, ndɛ́ʼ á néŋ ndɔ á athū pɔ́p.

¹⁵ Epuɔ é nɔŋ ŋkáka, pɛ a pɔ́p é púte ŋkák, ńnɔ̄ŋ ndāa, pɛ a pɔ́p é púte ndā.

¹⁶ Pɛ enáŋ á tsetsɛlɛ pɛ, ŋ́gɔ́ á taʼ nchu. Ndɛ́ʼ pɛ enáŋa ŋŋīa. Pɛ eghʉ̄ áa ajū mīi, á tswii á légɛ, pɛ soʼneé nnɛ̄t zɛ ŋgyá á esī. Ndɛ́ʼ pɛ esáʼ ŋ́gɛ, pɛ é megaŋ azhɛ̄‑anu.

¹⁷ Ndɛ́ʼ ŋiŋ á lɔk anu tepɔŋ, ḿbʉ̄ʼ á anu tepɔŋ. Pɛ ekāk ete, á leghʉ anu mbɔŋ á mbū epuɔ metsem.

¹⁸ Awíɛ a eghʉ̄ tɛ ŋgɔ́ yīi, á mii mé yí, pɔ́ a epuɔ metsem é náŋ mé apwɛne, páʼ eshhʉ̄ é tó épúp.

¹⁹ Mepɔŋ mesoó pá, ndɛ́ʼ ŋiŋ yí méŋwɛ̄t á pʉʼ anu zīi, ŋiŋ a á ghʉ á mbū yí. Pɛ ecʉ́ʼ Ndém mé epʉ̄ʼ, melaʼ mīi Atsyapuɔ Ndém a leé á ntē aŋwaʼne yí ŋ́gɛ: «Meŋ mé pɔɔ́ŋ á lepʉʼ anu, meŋ mé pɔ́ŋ á lezāpa azi awɔ́ ŋiŋ lɛ́, á alá apū yí. »

²⁰ A zeéŋ ndé ŋ́gɛ: «Nzi é nɔŋ nzáŋa á ŋgaŋ mbo wu, o eyá á yí azō á pfɛ́t. Agāk zí á nɔ̄ŋ eshhʉ́ɛ, o eyá á yí ntshi á nú. O ghʉɛ épúp, mbɔ o o maʼ esē á athū yí, a ekúmne á atswhī zí. »

²¹ Ndɛ́ʼ ŋiŋ á cʉ́ʼ, anu tepɔŋ á jhʉ́ á yí. A cʉ́ʼɛ épúp, o elɔ̄k á leghʉ anu mbɔŋ, ḿbāʼne azi tepɔŋ ŋgyá á nzem.