Lomɛŋ 11 - Eka Eswhī

Ndém a la epuɔ Islaɛl wáʼ á

¹ Meŋ á páʼā ndɔkɔ nzɛ́ttɛ ŋ́gɛ: élɛ Ndém a lē ŋgwáʼ epuɔ alāʼ pí, kɛ akɔ̄ lɛ́? Ŋgáŋ, á té épúp ɔ́, a la á wɔ́p wáʼ á. Meŋ méŋwɛ̄t azá, meŋ á ŋiŋ Islaɛl, ŋ́gɔ́ ndhu Ablaham, ńtó ánɛ atseŋ ŋgyā Bɛnjamɛŋ.

² Ndém a laá ŋgwáʼ alāʼ zí zīi, a le té njhʉ̄ ŋkāŋ á. Pɛ é si ncuŋtɛ nzhɛ́ɛ páʼ, ánɛ amɔ̄ʼ ajʉʼ, á ntē aŋwaʼne Ndém, Eli á nɔŋ nzáŋa á lɔ́ŋ á mbū epuɔ Islaɛl, á mvhɔ Ndém, ŋ́gɛ:

³ «Atsyapuɔ, pɔ́ kʉʉ̄ŋ nzwhíte metswi‑ŋke pú, ńták ejʉʼ tsīi, mɛ́ nɔŋɔ epɔʼ éwú, á mbū wu. Tɛ meŋ wuɔ ndaʼ mé lɛ nzɛ́t. Pɔ́ é si mbīŋɛ efāʼa á lezēŋ nzwhí á gá azá. »

⁴ Eli a le lé épúp, Ndém á tsɔ́ʼ á mbū yí ŋ́gɛ akɔ̄? Ŋ́gɛ: «Meŋ á kyɛ́tte epuɔ pīi pɔ́ zɛɛ́t ntsɔ́ʼɔ akhu zá, á ŋiŋnɔŋ ntsāʼ esambīa, é gɔ́ epuɔ pīi, é ka tswíʼte á esī, á mvhɔ esī zīi, mɛ́ tɔ́ŋɔ lɛ, Báal á. »

⁵ Ndeŋ ndeŋ épúp, ánɛ tsetsɔŋɔ, avuʼ epuɔ zīi, Ndém a ke fhó ánɛ apɔŋɔ́ ntē te ndhʉ zí, ńtsɔ́ʼ á wɔ́p, á gɔ́ á esī.

⁶ Ndém a le fhó ánɛ apɔŋɔ́ ntē te ndhʉ zí, tɛ́ ntsɔ́ʼ á wɔ́p, a lɛ te fhó ánɛ mefaʼ mɔ́p ɔ́. A le wíʼe, éfhó ánɛ mefaʼ mɔ́p, mbɔ apɔŋɔ́ ntē te ndhʉ zí, á té zɛ́t á apɔŋɔ́ ntē ɛ́.

⁷ Á páʼa ndɔkɔ ndʉ́ɛ́ ŋ́gɛ akɔ̄? Ńdɔkɔ ŋ́gɛ, ajū mīi epuɔ Islaɛl é le nɔ̄ŋ efaʼa, pɔ́ lɛ te wɛ̄ɛ. Epuɔ pīi Ndém a le tsɔ́ʼē, é piŋ ŋgwɛ̄. Ŋ́gɔ́ mé emɔ̄ʼ epuɔ, mbɔ Ndém a le ghʉ̄ʉ̄, pɔ́ cʉ́ʼ wɔ athū te júʼ,

⁸ á gɔ́ páʼ aŋwaʼne Ndém á leé ŋ́gɛ: «Ndém a le kapté leghi tsɔ́p, ŋ́ghʉ̄, menēk mɔ́p é té zéŋ ejʉʼ njʉ́ɔ ɔ́, ŋ́ghʉ̄ metuúŋ mɔ́p é té zéŋ ejʉʼ njúʼ ɔ́, tɛ ntshí ayáʼa. »

⁹ Efɔ Ndavít a le lé azí ŋ́gɛ: «Ŋ́gɛ lekāk tsīi pɔ́ jhʉ́ɛ, e egɔ́ á mbū pɔ́p, ŋ́gɔ́ páʼ letā, ŋ́gɔ́ páʼ lekhʉ tsīi, pɔ́ e shʉʼ ewhʉte éwú, Ndém a etswá á wɔ́p ŋgʉɔ athʉ́ lepé lā.

¹⁰ Ŋ́gɛ menēk mɔ́p e eséŋ, tɛ pɔ́ le zéŋ ejʉʼ njʉ́ɔ ɔ́. Ŋ́gɛ Ndém a elɔ̄k ŋgʉɔ̄ʼ eswɛ́t á wɔ́p, tɛ pɔ́ enáŋ efʉʼ metsem, ńzīŋ áa ŋŋɔʼne ŋɔʼné. »

¹¹ Meŋ á páʼā ndɔkɔ nzɛ́tɛ ŋ́gɛ: á páʼā, mbɔ epuɔ Islaɛl é le pú ŋkwate ŋ́gwhʉ̄ á esī áa ndaʼ kɛ akɔ̄ lɛ́? Ŋgáŋ, á té épúp ɔ́. Pɔ́ le kwatē épúp, tɛ́ Ndém á zápa épúp, ŋ́ghʉ̄, epuɔ pīi é té epuɔ Yúda á, é tswɛ́t. Á ghʉɛ épúp, ńdɔkɔ efāʼa ŋ́gɛ, epuɔ Islaɛl e eséŋ eshhʉ̄ ánɛ pɔ́p.

¹² Páʼ epuɔ Islaɛl é le whʉ̄ mefa, á tsia épúp, Ndém á ghʉ, ŋgɔŋ ntsem é jhʉ́ á mía apɛ lā. Páʼ wɔ fɛ́‑nnɛ̄t ŋgyá á mbū Yɛɛ́so, é kʉɔ́k á nnɔ pɔ́p lā, á tsia épúp, Ndém á ghʉ, epuɔ pīi é té epuɔ Islaɛl ɛ́, é jhʉ́ á mía apɛ lā. Pɔ́ piŋɛ ŋgɔ́ páʼā, ḿbú efɛ́ nnɛ̄t metsem ŋgyá á mbū Yɛɛ́so, apɛ á le fáŋ tɛʼ ɛ́ lɛ̄?

Ndém a le ghʉ̄ʉ̄, epuɔ pīi é té epuɔ Yúda á é tswɛ́t

¹³ Tsetsɔŋɔ, meŋ shúŋnɛ á mbū pɛ, á wɛ́ pīi, pɛ te epuɔ Yúda á: meŋ á si ŋgɔ́ á nziŋ‑ntō Yɛɛ́so, á mbū epuɔ pīi, é té epuɔ Yúda á. Ntē gá é nɔŋ ŋgáŋtɛ, melaʼ afaʼ mɛ́t zīi, mɛ́ le tsekné á mbū meŋ.

¹⁴ Meŋ a ghʉ afaʼ mɛ́t, tɛ́ elɔk eghʉ, ntɔ̄ŋ epuɔ alāʼ pék, e efūʼ, ńzhɛ́ páʼ, Ndém a a shʉʼ á nnɔ pɔ́p, éghʉ, emɔ̄ʼ ntaʼné shɔ́ʼɔ́ lɛ́, e etswɛ́t.

¹⁵ Ndém a le náʼ mbaʼne á wɔ́p mé á nzem, ŋghʉ̄ ŋgɔŋ epuɔ metsem, é piŋ nzem á mbū yí. A láʼ aleʼé zīi, Ndém a ghʉɛ, pɔ́ zéŋɛ mbīŋɛ nzem á nnɔ, a lɛ ŋgɔ́ lɛ akɔ̄? A láʼ egɔ́ anu mbɔŋ tɛʼ, égɔ́ páʼ, ŋiŋ a kwhʉ́ɛ, ńzéŋɛ nzímɛ ánɛ lewhʉ̄ lā.

¹⁶ Mɛ́ piŋɛ ŋgyá mvhɔ atsém mblɛ á mbū Ndém, mbɔ avuʼ á puú nzéŋ ŋgɔ́ áa azí. Ŋiŋ a yáa ŋgaŋ athʉ́ á mbū Ndém, á zéŋ nzhɛ́ a légɛ, mbū athʉ́ é puú nzéŋ ŋgɔ́ áa emi Ndém.

¹⁷ Epuɔ Islaɛl é si ŋgɔ́ páʼ, athʉ́ olive zīi, mɛ́ tuŋneé lā, mbɔ Ndém a lē nzáʼ emɔ̄ʼ mbū athʉ́ mɛ́t, ńzáʼ épúp, ḿbiŋ mbɛ́ á wú yīi, o te ŋiŋ Islaɛl ɛ́, ŋ́gɔ́ páʼ apū athʉ́ olive zīi, á tshií á mbaʼ lā, ŋ́gyɛ̄t á ajʉʼ mɛ́t. Á piīŋ ŋgɔ́ tsetsɔŋɔ, ŋ́gɔ́ yīi, o gɔ́ ejhʉ́ ajú á apɛ mbɔŋ ŋka athʉ́ yīi, é fhɔ́ɔ ánɛ athʉ́ olive, ḿbʉɛ.

¹⁸ Ndɛ́ʼ o eké ndɔ̄k épúp, ŋ́gwák mbū methʉ́ mīi, mɛ́ le záʼē. Akwaŋte leŋia á zi ŋgɔ́ á athū wu, o ekímte á légɛ, wu mé té wɛ̄ meŋgaŋ á, meŋgaŋ mé wɛɛ̄ á wú.

¹⁹ Ŋiŋ wɛ a gɔ́ epīiŋ ndé á mbū meŋ ŋ́gɛ: «Mɛ́ lɛɛ́ nzáʼa mbū methʉ́ páʼā, ŋ́gɔ̄ á ŋgyɛɛ̄t meŋ éwú. »

²⁰ Á épúp á anuúnē. Mɛ́ lɛɛ́ nzáʼa á wɔ́p, melaʼ mīi pɔ́ le sɛ̄t nzem Ndém. O ké mbiŋ ŋgɔ́ á ajʉʼ ega mɛ́t páʼā, á gɔ́ melaʼ mīi, o lē efɛ́ nnɛ̄t ŋgyá á mbū Yɛɛ́so. Ndɛ́ʼ o ké ndɔ̄k épúp, ŋ́ŋīa. Lak athū jú.

²¹ Páʼ Ndém a le záʼ mbū ánɛ athʉ́ zīi, mɛ́ tuŋneé lā. Wu yīi o ké mbiŋ ŋgɔ́ páʼ apū athū zīi, mɛ́ le yɛ̄t yɛt éwú lā, o gɔ te lāk á athū jú ú, mbɔ o te e láʼ evuʼu á yí í.

²² Jʉ́ɔ páʼ Ndém a á ŋgaŋ ntē mbɔŋ, ńzéŋ ŋgɔ́ á ŋiŋ, ŋ́kīa, ŋiŋ a te zíʼ. A tswaá ŋgʉɔ athʉ́ lepé, á athū epuɔ pīi, pɔ́ é fa nzhɛ. A á piŋ ŋghʉ̄ anu mbɔŋ ánɛ wu. Ńdaʼ ŋ́gɛ, o eké nnáŋ é efʉʼ metsem, ńzhɛ́ á légɛ, yí mé ghʉʉ̄ anu mbɔŋ ánɛ wu, tɛ ŋgɔ́ te épúp zhɛ́, mbɔ a a shʉʼ ezáʼ á wú ajú.

²³ Ŋ́ké ŋgɔ́ mé epuɔ Yúda pīi, Ndém a le záʼ á wɔ́p lā, pɔ́ gɔ́ te zéŋ ntém nzem Ndém ɛ́, mbɔ Ndém a a zéŋ eyɛt á wɔ́p azɔ́p leswhī leswhī, melaʼ mīi a wɛɛ̄ mete, á lelɔk ŋghʉ̄ épúp.

²⁴ Wu, o ó si ŋgɔ́ páʼ apū athʉ́ olive zīi, á le tswhí á mbaʼ. Ndém á le pīŋ efhó éwú efāk á wú, ŋ́gyɛ̄t ánɛ azi mɛ́ tuŋneé. Tɛ ŋgʉɔ shɔ́ʼɔ́ á Ndém á lezēŋ ŋgyɛ̄t mbū methʉ́ mīi, a le zī efak áa ánɛ methʉ́ olive mīi, mɛ́ tuŋné ē?

Ndém a a láʼ egē ezoko, éghʉ, epuɔ Yúda e etswɛ́t

²⁵ Epɔ̄ memía, meŋ á si ŋkɔ̄ŋɔ ŋ́gɛ, pɛ ezhɛ́ ajū mīi, Ndém a le lʉ̄ɔ̄, tɛ́ a etsīa épúp, pɛ é le pfēŋ á kíkhí ŋ́gɛ, pɛ é si ŋgɔ́ megaŋ azhɛ̄‑anu ú. Azō mɛ́t á lɛ: apak epuɔ Islaɛl pīi, pɔ́ é si ntʉ̄ɛ̄ athū á mbū Ndém lā, pɔ́ e láʼ ete á athū tee, tɛ Ndém a eghʉ̄, epuɔ metsem pīi a le tsɔ́ʼē, é gɔ́ te epuɔ Islaɛl ɛ́, e etswɛ́t.

²⁶ Á páʼa tɛ́, Ndém a a láʼ eghʉ, epuɔ Islaɛl metsem e etswɛ́t. Á gɔ́ páʼ, Ndém a leé á ntē aŋwaʼne yí ŋ́gɛ: «Nzaʼ‑Ŋkhʉ a a láʼ etó áa tésɔŋ Siɔŋ, éghʉ, ndhu Yakɔ́p é le zéŋ ntē á athū á mbū Ndém ɛ́.

²⁷ Eka yīi pek a pɔ́p e láʼ ekʉɔ́ʼe, á si ŋgɔ́ á légɛ, meŋ a láʼ esok mefa mɔ́p. »

²⁸ Mɛ́ tsiā ánɛ páʼ pɔ́ le lʉ̄ʼ ŋke mbɔŋ, ńjʉ́ɔ pɔ́ gɔ́ megaŋ mbo Ndém, ŋ́gɔ́ épúp, pɛ ejhʉ́ apɛ. Ḿbiŋ ŋgɔ́ éyi mɛ́ fhɔ́ɔ ánɛ páʼ Ndém mé le kāŋ á wɔ́p, mbɔ a zɛɛ́t ŋkɔŋ á wɔ́p kɔŋ, melaʼ wɔ maŋgānjʉʼ pɔ́p.

²⁹ Ndém a gɔ le yá á afuʼ á mbū ŋiŋ, éshʉʼ nzéŋ ńtswí í. A á le tsɔ́ʼ á ŋiŋ, éshʉʼ nzéŋ ŋ́kúmne anu zí í.

³⁰ Á lɛ efʉʼ mvhɔ, pɛ etēe athū á mbū Ndém, tsetsɔŋɔ, Ndém a lē mbiŋ ntsá mezeŋɛ mɛ́, éfhó ánɛ páʼ epuɔ Islaɛl é le tē athū á mbū yí.

³¹ Ndeŋ ndeŋ épúp, pɔ́ lɛɛ́ ntʉɛ athū, melaʼ atsāmezeŋɛ zīi, Ndém a le wɛ̄ ánɛ pɛ, tɛ́ a etsīa épúp, Ndém a etsá mezeŋɛ mɔ́p azɔ́p.

³² Ndém a le tsɔ́ʼ nzhɛ á légɛ, epuɔ menɔŋ metsem é epú ntē á athū á mbū yí, tɛ́ a etsīa épúp, a ewɛ̄ á atsāmezeŋɛ á mbū epuɔ menɔŋ metsem.

Ndém a puú efáŋ ńtɔ́k ajūɔ tsem

³³ Jʉ́ɔ páʼ apɔŋɔ́ ntē zīi, Ndém a wɛɛ̄ ánɛ epuɔ, á faáŋ épúp. Jʉ́ɔ páʼ azhɛ̄‑anu zí á faáŋ tɛʼ, a puú nzhɛ́ páʼ, ajūɔ tsem á ziīŋ épúp. Ŋiŋ a gɔ le zhɛ́ páʼ Ndém a zapaá menu épúp ɔ́. Ŋiŋ á le zhɛ́ páʼ memɛnzhɛ pí, é épúp ɔ́.

³⁴ Á gɔ́ páʼ aŋwaʼne Ndém á leé ŋ́gɛ: «Awɔ́ a gɔ ezhɛ́ páʼ Ndém a kwaŋteē menu épúp é? Awɔ́ a gɔ eték á Ndém ḿ?

³⁵ Awɔ́ a le yá azō á mbū yí, tɛ́ mbiŋ ŋgɔ́ si nzwíʼtɛ apiŋ ŋ̄?»

³⁶ Ajūɔ tsem á puú ŋgɔ́ áa azí, mbɔ yí mé le ghʉ̄ ajūɔ tsem, ajūɔ tsem á piŋ mbɔ́ŋte áa lezēŋ mbīŋ nzem á mbū yí. Awuʼte a egɔ́ á mbū yí, á meŋguʼ meŋguʼ. Á épúp.