Lomɛŋ 10 - Eka Eswhī

¹ Epɔ̄ memía, ajū mīi meŋ á ntē meŋ ntsáa, ńnɔŋ eswíŋtɛ á Ndém á athū epuɔ Yúda melaʼ aziɛ́, á si ŋgɔ́ á légɛ, pɔ́ evéŋ, Ndém a eghʉ̄ pɔ́ etswɛ́t.

² Meŋ gɔ eké ntswí ntāŋ wɔ́p á légɛ, pɔ́ é si ŋkhʉ́nɛ á letsɔ̄ʼ akhu Ndém, ńdaʼ ŋ́gɛ, pɔ́ té si ncuŋtɛ nzhɛ́ɛ á mɛnzhɛ mbɔŋ, á lelɔk ntsɔ́ʼ akhu zí mɛ́t ɛ́.

³ Pɔ́ té si nzhɛ́ɛ páʼ, Ndém a gē etɔ́ŋ á ŋiŋ lɛ ŋiŋ ndeŋ ndeŋ, á ziŋ épúp ɔ́. Pɔ́ méŋwɛ̄t mé si efāʼa ewɔp mɛnzhɛ, á lelɔk ŋgɔ́ epuɔ ndeŋ ndeŋ, á mvhɔ Ndém. Pɔ́ é si ŋghʉ̄ɛ épúp, ńdɔkɔ ndʉ̄ʼɛ á mɛnzhɛ yīi, Ndém a tsiā éwú, tɛ́ ntɔ́ŋ á ŋiŋ lɛ, ŋiŋ ndeŋ ndeŋ.

⁴ Lepé Mɔɔ́sɛ é le gʉ̄ɔ tɛ ntsóʼne áa ánɛ Klísto, tɛ́ Ndém a etɔ́ŋ epuɔ metsem pīi, pɔ́ fɛɛ́ nnɛ̄t ŋgyá á mbū Klísto lɛ, epuɔ ndeŋ ndeŋ.

Ŋiŋ ntsem tɛ efɛ́ nnɛ̄t ŋgyá á mbū Ndém, a a láʼ etswɛ́te

⁵ Mɔɔ́sɛ a le tíī, ánɛ ŋiŋ á legē egɔ́ á ŋiŋ ndeŋ ndeŋ, éfhó ánɛ yí á lekūʼte lepé, ŋ́gɛ: «Ŋiŋ yīi a kuʼteé lepé, a a láʼ elɔk lepé mɛ́t tɛ́ egɔ́ éwú. »

⁶ Táʼ, aŋwaʼne Ndém á leé ánɛ lezāpa ánɛ lefɛ̄ nnɛ̄t, tɛ́ ŋgɔ́ á ŋiŋ ndeŋ ndeŋ ŋ́gɛ: «Ndɛ́ʼ o elé á ntē wú ŋ́gɛ, “awɔ́ a a láʼ epe á lephū ū?”» Ńdɔkɔ ŋ́gɛ, awɔ́ a a láʼ epe á lephū tɛ́ etswi, Klísto á esóʼo ó?

⁷ Ńzéŋ le lé ŋ́gɛ: «Awɔ́ a a láʼ esóʼo á apeŋte ē?» Ńdɔkɔ ŋ́gɛ, awɔ́ a a láʼ esóʼo á apeŋte, tɛ́ eghʉ, Klísto a efhó á nnɔ mepfhō ndū á esī í?

⁸ Á páʼā, aŋwaʼne Ndém á lɔkɔ ndʉ́ɛ́ ŋ́gɛ akɔ̄? Ŋ́gɛ: «Ashuŋne Ndém, á lezēŋ wu, á nchu wu, á ntē wu. » Ashuŋne mɛ́t, á si ŋgɔ́ ŋke mbɔŋ yīi pek tswii, ŋ́gɛ mɛ́ pɔŋteé á lefɛ̄ nnɛ̄t ŋgyá á mbū Ndém.

⁹ Púp, o lɔkɔ nchu wú mvéŋ á mvhɔ epuɔ ŋ́gɛ, Yɛɛ́so a á Atsyapuɔ, ḿvéŋ á ntē wu á légɛ, Ndém a le ghʉ̄ á zím ánɛ lewhʉ̄, mbɔ Ndém a fú eghʉ, o etswɛ́t.

¹⁰ Ŋiŋ a fɛɛ́ nnɛ̄t ŋgyá á mbū Yɛɛ́so páʼā, Ndém á tɔ́ŋ á ŋgaŋ lɛ, ŋiŋ ndeŋ ndeŋ. Ŋiŋ a lɔɔ̄k nchu yí, ḿvéŋ á mvhɔ epuɔ á légɛ, Yɛɛ́so a á Atsyapuɔ páʼā, Ndém á ghʉ ŋgaŋ á tswɛ́t.

¹¹ Aŋwaʼne Ndém á leé ŋ́gɛ: «Ŋiŋ a fíɛ́ nnɛ̄t ŋgyá á mbū Yɛɛ́so, mbɔ ŋgaŋ a te e láʼ etapne ɛ́. »

¹² Púp, atɛʼte á té zɛ́t á tsetsɛlɛ epuɔ Yúda pɔ́ a epuɔ pīi, é té epuɔ Yúda á. Pɔ́ metsem é puú ŋgwɛ̄ á taʼ Atsyapuɔ, á pú ŋgyá etsō mbɔŋ á mbū epuɔ metsem pīi, pɔ́ é si eswíŋtɛ á yí.

¹³ Á gɔ́ páʼ aŋwaʼne Ndém á leé ŋ́gɛ: «Ŋiŋ ntsem yīi a laā ntɔ́ŋ á Atsyapuɔ, Atsyapuɔ a ghʉʉ̄ á tswɛ́t. »

¹⁴ Ŋiŋ a gɔ epīiŋ ŋghʉ̄ páʼ lā, ńda ntɔ́ŋ á yí, té gɔ́ yīi ŋgaŋ a fɛɛ́ nnɛ̄t ŋgyá á mbū yí í? Ŋiŋ a gɔ epīiŋ ŋghʉ̄ páʼ lā, éfɛ́ nnɛ̄t ŋgyá á mbū yí, té gɔ́ yīi ŋgaŋ a lé júʼ á lekīm á yí í? Ŋiŋ a gɔ epīiŋ ŋghʉ̄ páʼ lā, ńjúʼ á lekīm á yí, té gɔ́ yīi, ŋiŋ a á shúŋ á yí anu, ánɛ yí í?

¹⁵ Ŋiŋ a gɔ epīiŋ ŋghʉ̄ páʼ lā, éshúŋ anu ánɛ yí, té gɔ́ yīi, mɛ́ é tó á yí í. Á gɔ́ páʼ, mɛ́ leé á ntē aŋwaʼne Ndém ŋ́gɛ: «Á mbɔŋ á lejʉ̄ɔ epuɔ pīi, pɔ́ shʉʼɛ á ntswiī ŋke mbɔŋ. »

¹⁶ Táʼ, epuɔ metsem mé lɛ te ŋke mbɔŋ véŋ. Á lɔk ŋgɔ́ páʼ, Izayi ntswi‑ŋke Ndém, a le lé azí á ntē aŋwaʼne Ndém ŋ́gɛ: «Atsyapuɔ, awɔ́ a á ké mvéŋ ŋke mbɔŋ yīi, pek tswii ī?»

¹⁷ Á páʼā, ŋiŋ á ge efɛ́ nnɛ̄t eyá á mbū Klísto, éfhó ánɛ anu zīi a á júʼ, anu mɛ́t á gɔ́ ŋke mbɔŋ ánɛ Klísto.

¹⁸ Meŋ gɔ epīiŋ nzɛ́tte ŋ́gɛ: epuɔ Yúda é lɛ té ŋke mbɔŋ júʼ lɛ́? Ŋgáŋ, pɔ́ le júʼē. Á lɔk ŋgɔ́ páʼ, mɛ́ leé á ntē aŋwaʼne Ndém ŋ́gɛ: «Ŋghi metswi‑ŋke Ndém, e le gʉ̄ɔ tɛ ŋkó á ejʉʼ tsem, á ndo esī atsetsáʼ. Mɛ́ le júʼ ashuŋne zɔ́p, tɛ ŋkó á nzokó ŋgɔŋ. »

¹⁹ Meŋ gɔ ezéŋ nzɛ́tte ŋ́gɛ: epuɔ Islaɛl é lɛ te júʼ anu zīi, ŋke mɛ́t é lɔkɔ ndʉ́ɛ́ lɛ̄? Pɔ́ lɛ te júʼ. Ndém a le zī nté njhʉ̄, ńdɔ̄k nchu Mɔɔ́sɛ ńde ŋ́gɛ: «Meŋ a shʉʼ eghʉʉ, pɛ eséŋ eshhʉ̄ ánɛ alāʼ zīi, á kaá ŋgɔ́ á alāʼ zá á. Éghʉʉ, ntē wɛ́ e efūʼ, melaʼ alāʼ zīi, leghi tsɔ́p é té éwú ú.

²⁰ A gɔ gɔɔ́, tɛ Ndém á lɔk nchu ntswi‑ŋke yi Izayi ndé ŋ́gɛ: «Epuɔ pīi é le nɔ̄ŋ te efāʼa á gá á, pɔ́ le pīŋ njʉ́ɔ á gá. Meŋ nde ghʉ̄ʉ̄, epuɔ pīi pɔ́ kaá nnɔŋ nzɛ́ttɛ á gá á azō ɔ́, é zhɛ́ á gá. »

²¹ Ḿbiŋ ŋgɔ́ á mbū epuɔ Islaɛl, Ndém á lé ŋ́gɛ: «A kɛ eleʼé tsem, meŋ nɔ̄ɔŋ nnā apū zá, á mbū wɔ te júʼ‑nchu gá, ŋ́gɔ́ megaŋ atʉɛ́‑athū. »