Lomɛŋ 1 - Eka Eswhī

Atsaʼte

¹ Meŋ Pɔ́ɔl, ŋ́gɔ́ á ŋgaŋ afaʼ Yɛɛ́so Klísto, mé tíi akɛtte jʉɔ, mbɔ Ndém a le tɔ́ŋ á gá, ŋ́gɛ meŋ egɔ́ á nziŋ‑ntō, ńtswhi ntsɔ́ʼ á gá ŋ́gɛ, meŋ etswī ŋke mbɔŋ yí.

² A le té njhʉ̄, ńdɔ̄k nchu metswi‑ŋke pí, ńdāʼne ŋke mbɔŋ mɛ́t á ntē aŋwaʼne yí.

³ Ŋke mbɔŋ wuɔ mɛ́t, é cʉte á Méŋ yi. Páʼ a zeéŋ ŋgɔ́ á ŋiŋnɔŋ lā, mɛ́ fhó ánɛ ndhu Ndavít tɛ́ nzhí á yí.

⁴ Táʼ, Ndém á le ké nzápa ánɛ Azwakne zí méŋwɛ̄t, ŋ́ghʉ̄ á zím ánɛ lewhʉ̄, á yá á yí mete, ńtswī á légɛ a zi ŋgɔ́ á Méŋ yi, á yí Yɛɛ́so Klísto Atsyapuɔ yímpɛ.

⁵ Ndém a le zapá ánɛ yí, ŋ́gwɛ̄ apɔŋɔ́ ntē te ndhʉ ánɛ meŋ, ŋ́ghʉ̄ meŋ ecʉ́ʼ á nziŋ‑ntō. Éfāʼa ŋ́gɛ, meŋ eghʉ̄, elāʼ ntsem e efɛ́ nnɛ̄t ŋgyá á mbū Klísto, ńjúʼ nchu yí. Meŋ eghʉ̄ɛ épúp, ńdɔkɔ ŋgūʼtɛ á yí.

⁶ Pɛ é azɛ́ á nnɔ epuɔ puɔ mɛ́t, á wɛ́ pīi Ndém a le tɔ́ŋ á wɛ́, ŋ́gɛ pɛ elɛ̄tne ánɛ Yɛɛ́so Klísto.

⁷ Meŋ tíi akɛtte jʉɔ páʼa, á mbū pɛ epuɔ tésɔŋ Lóma metsem. Á wɛ́ pīi Ndém a kɔɔ̄ŋ á wɛ́, á wɛ́ pīi Ndém a le tɔ́ŋ á wɛ́, ŋ́gɛ pɛ egɔ́ epuɔ pí. Ŋ́gɛ Mɔʼɔ́ yímpɛ Ndém, pɔ́ Yɛɛ́so Klísto Atsyapuɔ yímpɛ, e elɛ ŋghʉ̄ anu mbɔŋ té ndhʉ ánɛ pɛ, ŋ́ghʉ̄ pɛ enáŋ mé apwɛne.

Pɔ́ɔl a á si ntsáa á legʉɔ njʉ́ɔ epuɔ Yɛɛ́so, á Lóma

⁸ Meŋ a ge ezi mvhɔ, étsia á nzem Yɛɛ́so Klísto, ésyákne á Mɔʼɔ́ yímpɛ Ndém á athū pɛ metsem. Ésyáknɛ épúp, melaʼ mīi, mɛ́ é ejʉʼ tsem á ndo esī atsetsáʼ, ésáʼa eshúŋɔ páʼ, pɛ fɛɛ́ nnɛ̄t épúp, ŋ́gyá á mbū Yɛɛ́so.

⁹ Ndém a á si nzhɛ́ɛ á légɛ, anu zīi meŋ gɔ á eshúŋɔ la, á anuúnē, á yí yīi meŋ á si ndɔ̄kɔ á letswi ŋke mbɔŋ ánɛ Méŋ yi, ŋ́gūʼtɛ á yí mé taʼ ntē. A á si nzhɛ́ɛ á légɛ, meŋ kimteé á wɛ́ té ká.

¹⁰ Ŋ́gɔ́ efʉʼ metsem yīi, meŋ á si eswíŋtɛ á yí, ńnɔŋ ndɔ́ɔ ŋ́gɛ, a elɛ ntsɔ́ʼ nzhɛ ánɛ lekɔŋ yi, meŋ eshʉ̄ʼ á alāʼ pɛ, ŋ́gúa á wɛ́.

¹¹ Ńdɔ́ɔ épúp melaʼ mīi, ntē gá si ŋkhʉ́nɛ á lejʉ̄ɔ á wɛ́, ŋ́ghʉ̄, Azwakne Ndém á yá á wɛ́ ndémndēm, ajū mīi á ghʉ pɛ etēte ánɛ lefɛ̄ nnɛ̄t.

¹² Anu zīi meŋ ndɔkɔ ndʉ́ɛ́, á si ŋgɔ́ á légɛ, meŋ a shʉʼ eshʉʼe tɛ egɔ́ á tsetsɛlɛ pɛ, ḿpɛ esēmte mennɛ̄t mímpɛ nzeŋne zeŋné. Wɛ́ lefɛ̄ nnɛ̄t, a egē esemte á gá, gá lefɛ̄ nnɛ̄t, a esēmte á wɛ́.

¹³ Epɔ̄ memía, meŋ á si ŋkɔ̄ŋɔ ŋ́gɛ, pɛ ezhɛ́ á légɛ, meŋ ndé zii ŋkwāŋte á gá á leshʉʼ á alāʼ pɛ, táʼ, azō á piŋ mvɛ́ne á gá tɛ ntshí tsetsɔŋɔ. Meŋ nde nɔ̄ŋ ntsáa á gá á leshʉʼ épúp, ŋ́ghʉ̄, afaʼ zá, á zém ntá á alāʼ pɛ azɛ́, ńdeŋ ndeŋ páʼ, á si nzémɛ ntá épúp, á tsetsɛlɛ emɔ̄ʼ melāʼ.

¹⁴ Ndém a le tsekné afaʼ á mbū meŋ, á épúp tɛ́ meŋ mbɔŋteé á letswi ŋke mbɔŋ á mbū epuɔ metsem. Á mbū epuɔ pīi é lé zíʼne azhɛ̄‑anu, mbɔɔ á mbū epuɔ pīi, é lɛ te zíʼne. Á mbū epuɔ pīi é lé zíʼne azō, mbɔɔ mbū epuɔ pīi é la zíʼnɛ ɛ́.

¹⁵ Melaʼ épúp tɛ́, meŋ tsáa á gá á leshʉʼ ntswī ŋke mbɔŋ, á mbū pɛ azɛ́ pīi, pɛ naáŋ á Lóma.

Ŋke mbɔŋ é wɛɛ̄ mete

¹⁶ Esē é té si ŋkúu á gá á letswi ŋke mbɔŋ ɔ́. É si ŋgɔ́ mete Ndém á lelɔk ŋghʉ̄, tɛ mbɔɔ awɔ́ lɛ́ yīi, a á fɛ́ nnɛ̄t ŋgyá á mbū Yɛɛ́so, á tswɛ́t. Epuɔ Yúda é zi mvhɔ, ńtswɛ́t, emɔ̄ʼ epuɔ é páte.

¹⁷ Ŋke mbɔŋ mɛ́t mé zi ntswī páʼ, Ndém a gē etɔ́ŋ á ŋiŋ lɛ, ŋiŋ ndeŋ ndeŋ, á tsia épúp. A fhoó ánɛ ŋiŋ á lefɛ̄ nnɛ̄t ŋgyá á mbū Yɛɛ́so Klísto, ńdáʼ efɛ́ fɛ́ tɛ nzōko. Á gɔ́ páʼ mɛ́ leé á ntē aŋwaʼne Ndém ŋ́gɛ: «Ŋiŋ a a láʼ egē ekwaʼ egɔ́ éwú, égɔ́ áa ŋiŋ yīi, a á fɛ́ nnɛ̄t ŋgyá á mbū Ndém, Ndém á tɔ́ŋ á yí lɛ, ŋiŋ ndeŋ ndeŋ. »

Epuɔ metsem é si ŋgɔ́ megaŋ mefa

¹⁸ Ndém a fhoó á lephū, ńtswī á légɛ, yí zaáŋ á lɔ́ŋ á mbū megaŋ atʉɛ́‑athū metsem. Ńzáŋ á lɔ́ŋ ánɛ anu tepɔŋ ntsem zīi, epuɔ menɔŋ é ghʉɛ, épuɔ pīi é lɔɔ̄k anu tepɔŋ, ŋ́kápte á anuúnē.

¹⁹ Á piŋ ŋké ŋ́gɔ́ páʼā, ajū mīi mɛ́ gɔ elɔ̄ɔk nzhɛ́ á Ndém, á fók lɛ púúú, á mbū epuɔ metsem. Ndém a lē ndáʼ ntswī á wɔ́p á azō mɛ́t.

²⁰ Tɛ efhó páʼ Ndém a le nɔ̄ŋ ŋgɔŋ, epuɔ menɔŋ é fhoó ánɛ mecū mīi a le ghʉ̄ʉ̄, ńzhɛ́ páʼ a á épúp, tɛ mbɔɔ páʼ, mɛ́ té lɔ̄k menēk njʉ́ɔ á yí í. Etsō mɛ́t é tswiī á légɛ, a wɛɛ̄ mete á lemiʼɛ. Ńzéŋ ntswī á légɛ, yí mé kwaʼ Ndém. Púp, Ndém a gɔ le tsá á ŋiŋ yīi, a á lé ŋ́gɛ, yí té á yí zhɛ́ ɛ́,

²¹ melaʼ mīi pɔ́ le nɔ̄ŋ nzhɛ́ɛ á légɛ, Ndém a á éwú, ḿbiŋ te mekuʼ mí ghʉ, pɔ́ té yí syákne. Pɔ́ lɛ te ghʉ̄ páʼ á zɛtteé ŋ́gɛ, mɛ́ eghʉ̄ á mbū Ndém épúp ɔ́. A cʉ́ʼɛ épúp, mbɔ ekwaŋte tsɔ́p tsīi, é zi ŋgɔ́ áa ŋŋiké, é le ghʉ̄ʉ̄, pɔ́ fa nzhɛ. Legɔ̄ yīi, pɔ́ té kwāŋte anu á mbɔŋɔ́ ɔ́, á ghʉ, pɔ́ pú ntsé á ntē nzém.

²² Pɔ́ le nɔ̄ŋ ŋkwāŋa ŋ́gɛ pɔ́ é megaŋ azhɛ̄‑anu, káʼā, ḿbiŋ ŋgɔ́ áa epia.

²³ Pɔ́ le tshī á lewuʼte Ndém, páʼ a naáŋ á lemiʼɛ nnéŋ, ńcʉ́ʼɛ ŋgūʼtɛ áa ekeke tsīi, mɛ́ é kɔ́ tɛ é swhí á ŋiŋnɔŋ, tɛ́ á ké ŋgɔ́ áa akwhʉɛ́‑azō, ńcʉ́ʼɛ ŋgūʼtɛ áa meséŋ, ŋ́gūʼte mena mekhu lekua, mbɔɔ epi é kɔŋɔ á esī esī.

²⁴ Á melaʼ épúp tɛ́, Ndém a le tshī á wɔ́p nnéŋ, pɔ́ ghʉ menu epe, páʼ ntē wɔ́p é si ntshónɛ á wɔ́p ŋ́gɛ, pɔ́ eghʉ̄ épúp. Ŋ́ghʉ̄ épúp, ńdɔk nnéŋ esē á athū pɔ́p méŋwɛ̄t.

²⁵ Pɔ́ lē ndɔk mela, ŋ́kúmne anuúnē zīi, á fhɔ́ɔ á mbū Ndém. Ŋ́gūʼte á ajū mīi, Ndém a le cuŋtēē, ńjúʼ á mbū yí, ńtɔ́k á lewuʼte á Ndém yīi, a le cuŋtē etsō mɛ́t. Mɛ́ pɔŋteé á leyā á lepɛ áa mbū yí, á meŋguʼ meŋguʼ. Á ajʉʼ éwú, ŋ́gɔ́ épúp.

²⁶ Melaʼ épúp tɛ́, Ndém a le tshī á wɔ́p nnéŋ, pɔ́ ghʉ menu esē mīi, mbe nnɛ̄t zɔp e tshónɛ á wɔ́p ŋ́gɛ pɔ́ eghʉ̄. Wɔnzwí é tshi melō pɔ́p nnéŋ, ńcʉ́ʼɛ nnɔ̄ŋɔ áa pɔ́ a emɔ̄ʼ wɔnzwí.

²⁷ Mbaŋa é zéŋ ŋghʉ̄ áa ndeŋ ndeŋ épúp, ńtshī mezwí pɔ́p nnéŋ, ńcʉ́ʼɛ ŋkhʉ́nɛ áa lenɔŋ pɔ́ a emɔ̄ʼ mbaŋa. Ŋ́ghʉ̄ épúp, á gɔ́ kwaʼ anu esē, á ŋiŋ mbaŋa pɔ́ emɔ̄ʼ á lenɔŋ. Ndém a ké ntswá á wɔ́p ŋgʉɔ athʉ́ lepé, páʼ mɛ́ pɔŋteé á letswā, á athū epuɔ pīi, pɔ́ fʉʼtɛ ejʉɔ ntií mele anu.

²⁸ Páʼ pɔ́ le jʉ́ɔ ŋ́gɛ, pɔ́ gɔ le á Ndém zhɛ́ lā, á sákne á wɔ́p á ntē akwaŋte tepɔŋ zīi, pɔ́ wɛ̄ɛ. Á épúp tɛ́, pɔ́ ghʉʉ̄ ajū mīi, mɛ́ té pɔŋté á leghʉ ɛ́.

²⁹ Pɔ́ puú te ghʉ̄ amɔ̄ʼ anu ndeŋ ndeŋ ɛ́. Leghʉ ntií ntiī anu tepɔŋ a lē mbú njhʉ́ á wɔ́p. Atsɔʼɔ́‑ntɔ̄ŋ á lē mbú njhʉ́ á wɔ́p. Pɔ́ é si ŋgɔ́ megaŋ esɔ̄. Kegʉɔʼ a lē mbú njhʉ́ á wɔ́p. Pɔ́ é wɔ zwhíte‑epuɔ. Ŋ́gɔ́ megaŋ ntsaŋ. Ŋ́gɔ́ megaŋ mekɛ̄t, ŋ́gɔ́ megaŋ ntē tepɔŋ. Ŋ́gɔ́ wɔ tshí menu á athū epuɔ.

³⁰ Ŋ́gɔ́ wɔ sɛ́ʼ‑epuɔ. Ŋ́gɔ́ megaŋ mbo Ndém. Ŋ́gɔ́ wɔ zɔte‑epuɔ. Ŋ́gɔ́ megaŋ leŋia. Ŋ́gɔ́ megaŋ memía eshuŋne. Ŋ́gɔ́ wɔ zɔ́ptɛ‑ŋgwɛ̄t. Ŋ́gɔ́ megaŋ atʉɛ́ athū á mbū memɔʼɔ́ pɔ́p.

³¹ Ŋ́gɔ́ wɔ te zhɛ́ á lekwaŋte anu. Ŋ́gɔ́ megaŋ ŋgɛ́tté. Ŋ́gɔ́ wɔ te zhɛ́ anu tepɔŋ. Ŋ́gɔ́ wɔ te tsá‑ŋiŋ.

³² Tɛ mbɔɔ páʼ pɔ́ é si ncūŋtɛ nzhɛ́ páʼ, lepé Ndém é leé ŋ́gɛ, epuɔ pīi pɔ́ fʉʼtɛ ntií menu jʉɔ mɛ́t, pɔ́ gɔ le vūʼu lā. Pɔ́ té lɛ efʉ̄ʼte ntií menu jʉɔ mɛ́t ndaʼá, pɔ́ zeéŋ ntswíʼte epuɔ pīi, pɔ́ é si efʉ̄ʼtɛ.