Jáaŋ 16 - Eka Eswhī

¹ «Meŋ á pú eshúŋ á wɛ́ menu muɔ mɛ́t ntsem, ḿbɔ́k á wɛ́ á legɔ̄ le zéŋ efɛ́ nnɛ̄t ŋgyá mé meŋ ɛ́.

² Mɛ́ e shʉʼ efhó á meŋgyā aswiŋte, éjuŋ á wɛ́. Á té épúp ndaʼá, afʉʼ á si eshʉ̄ʼɛ, ázi epuɔ é ge ezwhíte á wɛ́, énɔŋ ekwaŋa ŋ́gɛ, pɔ́ ghʉɛ épúp páʼā, ńdɔkɔ ŋgūʼtɛ á Ndém.

³ Pɔ́ e shʉʼ ege eghʉ épúp, e egɔ́ melaʼ mīi, pɔ́ té si nzhɛ́ɛ á Mɔʼɔ́ ga á, ńnɔŋ te nzhɛ́ɛ á gá á.

⁴ Meŋ á ké nté njhʉ̄ eshúŋ á wɛ́ épúp, ńdɔkɔ ŋ́gɛ, afʉʼ mɛ́t á shʉʼɛ ŋkūʼ, pɛ ekímte á légɛ, meŋ ke zī eshúŋ á wɛ́. «Meŋ ndɛ te shúŋ á wɛ́ menu muɔ mɛ́t, á afʉʼ zīi, pɛ le tsé á nzem meŋ ɛ́, melaʼ mīi ḿpɛ é lɛ nnɔ.

Yɛɛ́so a á ega eshúŋɔ ajū mīi, Azwakne Ndém a shʉʼ eghʉʉ

⁵ Tsetseŋɔ, meŋ á si ŋké mbiŋɛ ŋgʉ̄ɔ mé lezēŋ ŋiŋ yīi, a le tó á gá á ŋgɔŋ. Ŋiŋ wɛ a ka pīŋ nzɛ́tte á gá ŋ́gɛ, meŋ gʉɔ mé egɔ́ lɛ́ ɛ̄.

⁶ Meŋ á ké mbiŋ eshúŋ á wɛ́ ŋ́gɛ, meŋ gʉɔ gʉɔ, ntē wɛ́ é zi á lepū mmēk.

⁷ Á piŋ ŋgɔ́ páʼā, mbɔ meŋ á shúŋ á wɛ́ á anuúnē. Á mbɔŋ á mbū pɛ, á légɛ meŋ egʉ̄ɔ. Meŋ gɔ te gʉ̄ɔ, mbɔ Ŋkʉɛ‑anɔŋɔ́‑mɛnzhɛ a te shʉʼ á mbū pɛ ɛ́. Meŋ mbiŋɛ ŋgʉ̄ɔ, mbɔ meŋ a tó á yí á mbū pɛ.

⁸ A a shʉʼ eshʉʼe páʼā, étswi epuɔ ŋgɔŋ puɔ á légɛ, pɔ́ é megaŋ mefa, á légɛ pɔ́ té epuɔ ndeŋ ndeŋ ɛ́, étswi epuɔ ntií zīi, Ndém a lɔɔ̄k nzáʼ ntsaŋ.

⁹ A a shʉʼ etswi á wɔ́p ajū mīi, mefa mɔ́p é emiɛ́. É si ŋgɔ́ páʼ, pɔ́ lɛ te fɛ́ nnɛ̄t ŋgyá mé meŋ ɛ́.

¹⁰ Ŋ́gɔ́ mé legɔ̄ ndeŋ ndeŋ, mbɔ meŋ gʉɔ mé lezēŋ Mɔʼɔ́ ga, tɛ pɛ é le zéŋ á gá njʉ́ɔ ɔ́, égʉɔ épúp, Ŋkʉɛ‑anɔŋɔ́‑mɛnzhɛ mɛ́t mé ecʉ́ʼɛ ntswīi.

¹¹ Ŋ́gɔ́ mé lezāʼ ntsaŋ, mbɔ efɔ ŋkaŋ‑ŋgɔŋ wuɔ, a lē ndáʼ ŋgwhʉ̄ á asāʼ.

¹² «Meŋ zɛɛ́t ŋgwɛ menu tɛ nzáne mīi, meŋ gɔ á eshúŋ pɛ. Pɛ piŋɛ ŋgɔ́ le kūʼ á wɛ́ á lejūʼ tsetsɔŋɔ ɔ́.

¹³ Afʉʼ zīi Azwakne Ndém a shʉʼ shʉʼe, á ŋiŋ yīi a a kwaʼ eshúŋ á wɛ́, á ŋiŋ yīi Ndém a á ewíɛ́, a eghʉ̄ pɛ ezhɛ́ á anuúnē ntsem. A te shʉʼ eshúŋ menu mīi, é fhɔ́ɔ á mbū yí í. A a shʉʼ eshúŋ ajū mīi, a ke júʼē. A a shʉʼ epú eshúŋ á wɛ́ ajū mīi, a shʉʼ tɛ́ shʉʼe.

¹⁴ Yí mé shʉʼ etswi á wɛ́ páʼ shʉ́shɔ́k ga, a á épúp, melaʼ mīi ajū mīi, a shʉʼɛ ŋgɔ̄ á nzíʼne pɛ, á fhó áa mbū meŋ.

¹⁵ Ajūɔ tsem zīi, Mɔʼɔ́ ga a wɛ̄ɛ, á zéŋ mbú ŋgɔ́ áa azá. Melaʼ épúp tɛ́ meŋ á lé ŋ́gɛ, ajū mīi Azwakne Ndém a shʉʼɛ ŋgɔ̄ á nzíʼne pɛ, á fhó áa mbū meŋ.

Pɛ e shʉʼ efhó ánɛ lemek, ékó á ntē lekāk

¹⁶ «Á lɛɛ̄ nzɛ́t áa méŋ afʉʼ lɛ, pɛ é le zéŋ á gá mé menēk mɛ́ njʉ́ɔ ɔ́. A epiŋ nzéŋ ńtɔ́k á méŋ afʉʼ lɛ, pɛ epiŋ nzéŋ ńjʉ́ɔ á gá. »

¹⁷ Á lé épúp, emɔ̄ʼ megaŋ nnɔ pí é lé á tsetsɛlɛ pɔ́p ŋ́gɛ: «A á ndʉ́ɛ́ ŋ́gɛ, á lɛɛ̄ nzɛ́t áa méŋ afʉʼ, ḿpɛ é le zéŋ á yí mé menēk mímpɛ njʉ́ɔ, a epiŋ nzéŋ ńtɔ́k á méŋ afʉʼ lɛ, ḿpɛ epiŋ nzéŋ ńjʉ́ɔ á yí péʼe, ńdɔkɔ ŋ́gɛ akɔ̄? A á nzéŋɛ ndʉ́ɛ́ ŋ́gɛ, yí gʉɔ mé ntswɛ́tte á Mɔʼɔ́ yi péʼe, ńdɔkɔ ŋ́gɛ akɔ̄?

¹⁸ Ewuɔ méŋ afʉʼ yīi, a lʉ́ɛ́ lāa, a á páʼa ndɔkɔ ŋ́gɛ akɔ̄? Ḿpɛ ka júʼ ajū mīi, a á páʼa ndɔkɔ ndʉ́ɛ́ ɛ́. »

¹⁹ Yɛɛ́so á zhɛ́ páʼ pɔ́ é si efāʼa á lezɛ̄tte á yí anu, ńdé á mbū pɔ́p ŋ́gɛ: «Pɛ é tsetsɛlɛ pɛ, éfāʼa páʼ meŋ á lé ŋ́gɛ, á zɛɛ́t á méŋ afʉʼ lɛ, pɛ é le zéŋ á gá mé menēk njʉ́ɔ ɔ́. A epiŋ nzéŋ ntɔ́k á méŋ afʉʼ lɛ, pɛ epiŋ nzéŋ njʉ́ɔ á gá. Pɛ é si faʼa ajū mīi, ashuŋne zá jʉɔ mɛ́t, á lɔkɔ ndʉ́ɛ́.

²⁰ Kwaʼ anuúnē anuúnē, meŋ shúŋɔ á wɛ́ ŋ́gɛ, pɛ e shʉʼ ege elaa, ézém mbū, epuɔ ŋgɔŋ puɔ, e enɔŋ ŋkáka. Pɛ e shʉʼ enáŋ mé lemek, táʼ, lemek mɛ́t a epiŋ esɛ̄t ńcʉ́ʼ lekāk.

²¹ Mɔ́ a nɔɔ̄ŋ nzáŋa á menzwí páʼā, á gɔ́ á ntē lemek, melaʼ mīi ezi njhʉ̄ e é kuʼ. Afʉʼ zīi a á piŋ nzhí á mɔ́, a te zéŋ ŋkwāŋte ŋgʉɔ̄ʼ zīi, a á nzi ŋgɔ́ éwú ú, ŋgɔŋ mé cʉ́ʼɛ mbɔŋɔ́ á yí, mela mīi a á zhí á taʼ ŋiŋ.

²² Ndeŋ ndeŋ épúp, pɛ é tsetsɔŋɔ, ŋgɔ́ á ntē lemek. Táʼ, meŋ a shʉʼ ezéŋ ejʉ́ɔ á wɛ́ leswhī leswhī, ntē wɛ́ e egáŋte, ŋiŋ a epīŋ le vɛ́ne á wɛ́ á legāŋte ɛ́.

²³ «A láʼ aleʼé mɛ́t, pɛ é le zéŋ á gá anu nzɛ́tte ɛ́. Kwaʼ anuúnē anuúnē, meŋ shúŋɔ á wɛ́ ŋ́gɛ, pɛ lɔkɔ lezēŋ tsá, ḿbú ndɔ́ akɔ̄ lɛ́ á mbū Mɔʼɔ́ ga, mbɔ a a yá azō mɛ́t mé pɛ.

²⁴ Tɛ ntshí tsetsɔŋɔ, pɛ ka lɔ̄k lezēŋ tsá ndɔ́ azō ɔ́. Pɛ elɔ́ azō, Ndém a eyá á mbū pɛ, púp ntē wɛ́ e egáŋte tɛ ntsékne.

Yɛɛ́so a á si ŋgɔ́ asaʼa‑ndʉɔ́ʼ

²⁵ «Meŋ á lɔk ashuŋne lepúʼ, tɛ́ eshúŋ á wɛ́ menu muɔ mɛ́t tsem. Afʉʼ á si eshʉ̄ʼɛ zīi, meŋ te ezéŋ eshúŋne á mbū pɛ ánɛ ejʉɔ ntií mɛ́t ɛ́. Afʉʼ mɛ́t a shʉʼ ekuʼe, meŋ eshúŋ á wɛ́ esa saá, ménu mīi é cʉte á Mɔʼɔ́ ga.

²⁶ A láʼ aleʼé mɛ́t, pɛ e lɔ̄k lezēŋ tsá ndɔ́ azō á mbū Ndém Mɔʼɔ́, meŋ ńde zéŋ mbɔ́ŋte á gá á leswīŋte á yí, ánɛ athū zɛ́ ɛ́.

²⁷ A shʉʼ egɔ́ épúp, éfhó ánɛ páʼ, Mɔʼɔ́ ga méŋwɛ̄t a kɔɔ̄ŋ á wɛ́. Mɔʼɔ́ ga a kɔɔ̄ŋ á wɛ́ melaʼ mīi, pɛ kɔɔ̄ŋ á gá, ḿvéŋ á légɛ, meŋ nde fhó ánɛ yí.

²⁸ Meŋ nde fhó ánɛ Mɔʼɔ́ ga, éshʉ̄ʼ á ŋgɔŋ ega. Á piīŋ ŋgɔ́ tsetsɔŋɔ, meŋ a fhó á ŋgɔŋ ega, égʉɔ etswɛ́tte á yí. »

²⁹ Yɛɛ́so á shúŋne épúp, megaŋ nnɔ pí é lé mé yí ŋ́gɛ: «Ké njʉ́ɔ páʼ á tsetseŋɔ, o nɔ̄ŋ eshúŋnɛ ésá saá, mbɔ o ó tshi á wú á lelɔk ashuŋne lepúʼ eshúŋne néŋ.

³⁰ Tsetsɔŋɔ, pek é zhɛ́ á légɛ, o puú nzhɛ́ ajūɔ tsem. Ŋiŋ a lɛɛ̄ ŋgē eŋáʼa nchu yí ezɛ́tte á wú anu, mbɔ o ó ndáʼ nzhɛ́ ajū mīi, a á si ŋkwāŋtɛ. É melaʼ épúp tɛ́, pek é véŋ á légɛ, o fhɔ́ɔ ánɛ Ndém. »

³¹ Yɛɛ́so á tsɔ́ʼ á mbū pɔ́p ŋ́gɛ: «Ńdɔkɔ ŋ́gɛ tsetsɔŋɔ, tɛ́ pɛ fíɛ́ nnɛ̄t ŋgyáa á mbū meŋ lɛ́?

³² Afʉʼ á si ŋkūʼɔ, tɛ á ndáʼ ntshóte tɛ mbáte, ázi mɛ́ e ŋwaŋ á wɛ́, awíɛ a elɔ̄k eyí eshhʉ̄ ŋkʉ̄, ńtshī á gá meŋɛmeŋ néŋ. Táʼ, meŋ ké te meŋɛmeŋ ɛ́, pek Mɔʼɔ́ ga mé nnɔ.

³³ Meŋ á pú eshúŋ á wɛ́ emuɔ menu mɛ́t, ńdɔkɔ ŋ́gɛ, páʼ pɛ lɛtneē ánɛ meŋ lā, apwɛne a egɔ́ mé pɛ. Pɛ é ntē ŋgɔŋ ega páʼa, ŋ́gɔ́ áa ntē atapne. Táʼ, pɛ eké ŋkāk ete, meŋ ndē ndáʼ nte ńtsyā anu tepɔŋ, á ŋgɔŋ ega. »