Jáaŋ 15 - Eka Eswhī

Yɛɛ́so a á si ŋgɔ́ páʼ athʉ́ lā

¹ Yɛɛ́so á zéŋ ndé ŋ́gɛ: «Meŋ á si ŋgɔ́ á kwaʼ athʉ́ lɛzɛŋ, Mɔʼɔ́ ga á gɔ́ ŋiŋ yīi, a túŋnɛ ŋkāʼ methʉ́ lɛzɛŋ mɛ́t.

² Apū athʉ́ tɛ ntɔ̄ʼne ánɛ meŋ, ḿbiŋ nnɔ̄ŋ te nzémɛ ntá á, a kʉɔ́ʼē. Azi á si nzémɛ ntá, á cuŋte ŋkíŋte ŋ́gɛ, a etswiʼne nzém á mbɔŋɔ́.

³ Anu zīi, meŋ ke ziʼné á wɛ́, á kʉʉ̄ŋ ndáʼ ŋ́ghʉ̄, pɛ egɔ́ epuɔ te alɔ́ʼ.

⁴ Apū athʉ́ á gɔ́ te lɛ̄tne ánɛ athʉ́ ɛ́, mbɔ yí méŋwɛ̄t á gɔ le ntá zém. Ndeŋ ndeŋ épúp, pɛ gɔ te tēmte nnɛ̄t zɛ ánɛ eza á, mbɔ pɛ gɔ le ntá zém. Púp, pɛ etēmte nnɛ̄t zɛ ánɛ eza, páʼ meŋ temteē nnɛ̄t za ánɛ ezɛ lā.

⁵ Meŋ á si ŋgɔ́ páʼ athʉ́ lā, pɛ gɔ́ páʼ mbū athʉ́ mɛ́t lā. Ŋiŋ a temtɛ nnɛ̄t zi ánɛ eza, meŋ etēmte eza ánɛ ezi, mbɔ ŋgaŋ a ghʉ menu membɔŋ e ezáne. Ḿpɛ mé gɔ́ te gɔ nnɔ ɔ́, mbɔ pɛ gɔ le kūʼ á leghʉ tsɔ azō ɔ́.

⁶ Ŋiŋ a gɔ te tēmte nnɛ̄t zi ánɛ eza á, mbɔ a a cʉ́ʼ páʼ mbū athʉ́ mīi, mɛ́ é maʼ á apɛ́, é zó, mɛ́ pɛ́ ntɔ̄ á mmók, é shhʉ́ lā.

⁷ Pɛ temtɛ nnɛ̄t zɛ ánɛ eza, ashuŋne zá á gɔ́ á ntē pɛ, pɛ lɔ́ á ajū mīi pɛ é kɔŋ, mbɔ Ndém a a yá mé pɛ.

⁸ Ajū mīi pɛ gɔ eghʉ̄ʉ, ńdɔk ntswī páʼ shʉ́shɔ́k Mɔʼɔ́ ga, a á épúp, á si ŋgɔ́ á wɛ́ á lezēm ntá mbɔŋ tɛ záne, púp, ńdɔk ŋgɔ́ megaŋ nnɔ pá.

⁹ Meŋ méŋwɛ̄t azá, meŋ kɔɔ̄ŋ á wɛ́, ńdeŋ ndeŋ páʼ Mɔʼɔ́ ga, a kɔɔ̄ŋ á gá épúp. Pɛ etēmte nnɛ̄t zɛ ánɛ meŋ, ńdɔk njʉ́ɔ páʼ meŋ kɔɔ̄ŋ á wɛ́ épúp.

¹⁰ Pɛ ziŋɛ páʼ meshuŋne má é si ndʉ́ɛ́ épúp, mbɔ pɛ etemte nnɛ̄t zɛ ánɛ eza, éjʉ́ɔ páʼ meŋ kɔɔ̄ŋ á wɛ́ épúp, ńdeŋ ndeŋ páʼ meŋ ziīŋ páʼ ashuŋne Mɔʼɔ́ ga á leé épúp, ńtēmte nnɛ̄t za ánɛ ezi, ńjʉ́ɔ páʼ a kɔɔ̄ŋ á gá épúp.

¹¹ «Meŋ shúŋɔ á wɛ́ emuɔ menu, ńdɔkɔ ŋ́gɛ, lekāk tsīi é ntē meŋ, e ezéŋ ŋgɔ́ á ntē pɛ, ŋ́gɔ́ éwú tɛ ntsékne.

¹² Pɛ ewɛ̄ ŋkɔŋne á tsetsɛlɛ pɛ nzeŋne zeŋné, ńdeŋ ndeŋ páʼ meŋ kɔɔ̄ŋ á wɛ́ épúp, é páʼa ŋgɔ́ lepé tsá.

¹³ Ŋiŋ a te éwú tɛ ŋgwɛ̄ ŋkɔŋ, ńtɔ́k á ŋiŋ yīi, a yaá athū nnɛ̄t zí melaʼ epuɔ pīi, a kɔɔ̄ŋ á wɔ́p ɔ́.

¹⁴ Pɛ gɔ́ ŋké ŋghʉ̄ ajū mīi, meŋ á si nzɛ́ttɛ á wɛ́, mbɔ pɛ é mesoó pá,

¹⁵ meŋ ńde zéŋ ntɔ́ŋ á wɛ́ lɛ, wɔ zíʼne afaʼ á. Nziʼnɛ afaʼ a te zhɛ́ ajū mīi, mɔʼɔ́ afaʼ yi, a á si ŋkwāŋtɛ ɛ́. Meŋ cʉ́ʼɛ ntɔ́ŋɔ á wɛ́ áa lɛ, mesoó pá, éfhó ánɛ páʼ, ajūɔ tsem zīi, Mɔʼɔ́ ga a le ziʼné á gá, meŋ ke ghʉ̄ pɛ zhɛ́.

¹⁶ Pɛ mé lɛ te gá kaŋ, meŋ mé le tsɔ́ʼ á wɛ́, ńchʉ́ á wɛ́, ŋ́gɛ pɛ egʉɔ nzém ntá mbɔŋ, ńtá mbɔŋ zīi é náŋa náŋa. Tɛ́ ajūɔ tsem zīi, pɛ é lɔk lezēŋ tsá ndɔ́ á Mɔʼɔ́ ga, a eyá á mbū pɛ.

¹⁷ Ajū mīi meŋ á si nzɛ́ttɛ á wɛ́, á si ŋgɔ́ á légɛ, pɛ ekɔ̄ŋne mennɛ̄t mɛ́ nzeŋne zeŋné.

Epuɔ ŋgɔŋ puɔ, é paā á Yɛɛ́so, ḿbā epuɔ pí

¹⁸ «Páʼ epuɔ ŋgɔŋ puɔ, é paā á wɛ́ lā, pɛ ezhɛ́ á légɛ, pɔ́ le zī nté njhʉ̄, ḿbā á gá azá.

¹⁹ Pɛ é ŋgwíʼe ŋgɔ́ epuɔ ŋgɔŋ puɔ, mbɔ pɔ́ kɔŋ á wɛ́ tɛʼ, melaʼ mīi, pɛ a pɔ́p mé nnɔ. Pɛ piīŋ te epuɔ ŋgɔŋ puɔ ɔ́. Meŋ nde tswhī ŋkaŋ á wɛ́, éfhó á nnɔ epuɔ ŋgɔŋ puɔ efók á wɛ́, é melaʼ épúp, tɛ́ pɔ́ paā á wɛ́.

²⁰ Pɛ ekímte anu zīi, meŋ nde lé mé pɛ ŋ́gɛ: “Nziʼnɛ afaʼ a te zhɛ́ afaʼ ntsyā á mɔʼɔ́ afaʼ yí í.” Púp, páʼ epuɔ é le lʉɔ́ʼ á gá lā, pɔ́ e láʼ ezéŋ elʉɔ́ʼ á wɛ́ azɛ́. Páʼ emɔ̄ʼ é le zīŋ páʼ ashuŋne zá, á si ndʉ́ɛ́ épúp lā, pɔ́ e láʼ ezéŋ eziŋ páʼ anu zīi, pɛ zíʼnɛ á wɔ́p, á si ndʉ́ɛ́ épúp.

²¹ Pɔ́ e láʼ elʉɔ́ʼ á wɛ́ épúp melaʼ mīi, pɛ é epuɔ pá, mbɔɔ páʼ pɔ́ té si nzhɛ́ɛ á ŋiŋ yīi, a le tó á gá á ŋgɔŋ ɔ́.

²² Meŋ nde wíʼe, meŋ te shʉ̄ʼ á ŋgɔŋ, éshúŋne á mbū pɔ́p ɔ́, mbɔ mefa é té á athū pɔ́p ɔ́. Á piīŋ ŋgɔ́ tsetsɔŋɔ, ŋ́gɔ́ éyi, pɔ́ gɔ le lé ŋ́gɛ, pɔ́ lɛ te nɔ̄ŋ nzhɛ́ɛ á légɛ, pɔ́ é si efāa á.

²³ Ŋiŋ yīi a á si mbāa á gá, a á páʼā ndɔkɔ mbāa áa Mɔʼɔ́ ga.

²⁴ Meŋ nde wíʼe, meŋ te ghʉ̄ mefaʼ mīi, ŋiŋ a zi la eghʉ̄ á tsetsɛlɛ pɔ́p ɔ́, mbɔ mefa é té á athū pɔ́p ɔ́. Tsetsɔŋɔ, tɛ mbɔɔ páʼ pɔ́ ke pīŋ njʉ́ɔ mefaʼ mɛ́t lā, pɔ́ é si mbiŋɛ mbāa á gá, ńzéŋɛ mbāa á Mɔʼɔ́ ga.

²⁵ Ŋ́ké ŋghʉ̄ɛ épúp páʼā ŋ́gɛ, ashuŋne zīi, mɛ́ le tí á ntē aŋwaʼne lepé zɔ́p, a elɔk mbō. Mɛ́ le tí éwú ŋ́gɛ: “Pɔ́ le pā á gá mé esɔ̄.”

²⁶ «Ŋkʉɛ‑anɔŋɔ́‑mɛnzhɛ, a a shʉʼ eshʉʼe. Meŋ a shʉʼ efhó á lezēŋ Mɔʼɔ́ ga, éghʉ a eshʉ̄ʼ á mbū pɛ. A á si ŋgɔ́ á Azwakne Ndém, éfhɔ́ɔ á mbū Ndém Mɔʼɔ́. A a shʉʼ eshʉʼe, étswí ntāŋ za.

²⁷ Pɛ azɛ́, pɛ etswí ntāŋ za, melaʼ mīi, tɛ efhó á afʉʼ zīi, pɛ le zī á lejūʼ ŋke mbɔŋ, ḿpɛ mé gɔ́ nnɔ.